2 Peter 2

1Ento jubila mi ndra bende wok i kind dhanu, calu i kindwu bende juponji mi ndra bibedo nuti, ma gibikelo ponji mi ndra mi nyoth nyalwe, ma gikwero ko cil Rwoth m’ung’iewogi, ma gikelo ko nyoth pio i wigi gigi. 2Dhanu dupa de bilubo tok tim migi mi tarwang’; kum joni yo mi lemandha jubiyero pire rac. 3I kethocwiny ma giketho hai kum piny gibitimo i kumwu ku lembabombi kara ginwang’ kuloka: ma pokolembe migi gambre con ugalu ngo, nyoth migi de nindo ngo. 4Kum tek Mungu weko malaika m’udubo ngo, ento ebologi i gehena, man ekethogi i vur mi mudho, ma jugwoko kogi cil ni pokolembe; 5man eweko ng’om ma con de ngo, ento egwoko Noa, m’e jayer mi bedopwe ku juabiro mange, kan ekelo pi ma dit m’uumo ng’om wi ju ma ayi Mungu mbe i kumgi; 6man ku loko adhura Sodom ku Gomora ni vuru, epoko lembe rac i wigi ku nyoth m’enyotho kogi, m’edwoko kogi ni por ni ju ma gibedo ma ayi Mungu mbe i kumgi; 7man ebodho Lot ma pwe, ma can unege dit kum bedo mi tarwang’ mi judubo 8(kum ng’atu maeni ma pwe m’ebedo i kindgi, i neno ku winjo de, esendo ng’eyong’ec pare ma pwe ceng’ ku ceng’ ku tic migi ma cik uyio ngo): 9Rwoth ung’eyo maram elar ko ju ma ayi Mungu ni i kumgi ku i abidhe, m’egwok ko weg gondri de the masendi mi cing’ pokolembe; 10ento ma sagu ju m’ulubo tok kum i awanya ma rac mir acidi, man m’ucayu kero. Ju ma wigi tek, m’udhuko, ma lworo cayu weg dwong’ negogi ngo: 11ento malaika, kadok gi dwong’ ma sagu i tek ku tego, gikelo lembadote mi cac ungo i kumgi i wang’ Rwoth. 12Ento joni calu giracwia pa Mungu ma rieko mbe kugi, ma junyologi yedi kende, ya jumak junyoth de, ma gicayu cac i lembe ma gikung’eyo there ngo, i nyoth migi gibinyothri andha, 13ma gisendri ko ku lem ma rac calu sukulia rni timorac; gi dhanu ma gikwanu cokri ku vul ma ku dieceng’ ni mutoro, gi gin m’ucwinyo man mulima, ma gimer amera kud abombi migi i cemo migi mi mer ka wucamu wukugi; 14ma gieri kwa e m’upong’o wang’gi, ma gikucop ceri ngo ni dubo; ma gibidho ng’eyong’ec m’ucungo tek ungo; ma adundegi pido ru pi kethocwiny kum piny kwa; nyithindho mi kwong’; 15ma giweko ko yo ma atira gikiewo, ma gikwanyu ko yo pa Balam wod Bosor, m’umaru sukulia mi timorac; 16ento jujuke kum dubo pare gire: kana m’ajuba weco ku dwand dhanu man ecero abelu pa jabila. 17Maeni kulo m’umbe pi, afuru m’uyerni ku wavuvu; ma jukanu igi col mi mudho. 18Kum, ma gibeweco thwo lembe m’uyenyo ma kite mbe, gibidho ju m’umaku ringo ju m’ubedo i kier kud awanya ma rac mi kum ni kum tarwang’; 19ma ging’olo ko igi gony, kinde ma gin gigi gi jumiru mi nyoth; kum tek lembe voyo ng’atu moko, ebedo ni jamiru i lembene bende. 20Kum tek, yo ng’ei both ni gin m’ucido m’i ng’om ni kum ng’eyong’ec pa Rwoth ku Jalar Yesu Kristu, ka gigapri i ie kendo man juvoyogi, bedo migi macen doko rac ma sagu ma kwong’a. 21Kum e ber igi ma sagu tek fodi gikung’eyo yo mi bedopwe ngo, ma tek, yo ng’ei ng’eye gidok cen kum lembang’ola ma leng’ m’umire igi. 22Etimbre igi calku lembabola mandha kumae, Gwok udok kendo ba ng’ok pare gire, min kul de m’ujom udok ninyambre i unzabu.

will be added

X\