2 Corinthians 8

1Mange ke, umego, waketho wung’ei bero pa Mungu m’umire i kanisa ma Makedoni; 2maram ku muloic ma dit mi can e dit mi mutoro migi man can piny migi ma apila usagre ni lonyo mi miomic migi ma ku berocwinygi. 3Kum anyutho, nia calku tego migi, eyo ma kadhu tego migi de, gimio gigi kendgi, 4ma gibekwayuwa ku kwac ma dit pi bero maeni man ribri i timotim ma ni jumaleng’: 5man maeni, calu ma wageno de ngo, endre gilar gimiri gigi ni Rwoth, man iwa ni kum yeny ma Mungu yenyo. 6Kum kumeno wakwayu Tito, ya calu elar etheko, e kumeno dong’ edar bero maeni bende i iwu. 7Ento calu wusegru i gin ceke, i yioyic, man i wec, ku ng’eyong’ec de, man i morkum ceke, man i mer mu ma yor i bang’wa, wunen ya wusegru i bero maeni bende. 8Ayero ma nia amio ko lembang’ola ngo, endre calu amulo ko kit mer mu maeni bende ni kum amora mi jumange. 9Kum wung’eyo bero pa Rwoth mwa Yesu Kristu, nia kadok elony, ento edoko jacan piwu, kara wun wulony ni kum can pare. 10Man amio lembang’ola para i maeni: kum maeni en e ber iwu, wun ma wular wukwong’o timo kende ngo, ento ayenya bende wuyenyo i rundi acel m’ukadhu. 11Ento kawono bende wuketh timne timbre; calu amorane nuti ma wuyenyo wutime kudo, e kumeno wuketh timne timbre kakare bende calu ma wucopo. 12Kum tek amorane nuti, eyire ni ng’atuca calu m’ebedo ko, calku m’ebedo ko ngo re ngo. 13Kum ayero eni ma nia jumange cwinygi kwi ko ngo wun re ma cwinywu dieng’; 14ento kara lembe bed rom rom: sagri mi piny mu ukoukei can m’i kumgi nindo maeni, kara sagri mi piny migi bende ubin ukei can m’i kumwu; kara lembe ubed rom rom; 15calu egore kumae, Ng’atu m’ucoko dit donge m’udong’ umbe; ng’atu m’ucoko nyanok de cande nege ngo. 16Endre foyofoc ni Mungu, m’eketho amora mi gwokogwok ma calacel i adunde Tito piwu. 17Kum ejolo dwandwa andha; endre m’ebedo kud amora ma sagu, ecidho i beng’wu gire kende. 18man waorogi gikud umego acel ma pak pare i lembanyong’a ma juboth ko urweire i kind kanisa ceke; 19man kumeno kende ngo, ento kanisa goyo nyinge bende ya wawoth wakugi ni bero maeni, m’umire ni kumwa ni dwong’ pa Rwoth, ninyutho amora mwa bende: 20ma waura ko kum eni, ya ng’atu moko kud ucok lembe i wiwa kum jukupiny maeni m’umire ni kumwa: 21kum iwa pido kum gin m’ubedo alili i wang’ Rwoth kende ngo, endre i wang’ dhanu bende. 22Man waoro umegwa gikugi, ma wamulo wang’ udul wanwang’u ebedo kud amora kum giki dupa, ento kawono kud amora ma sagu dit, ni kum genogen ma dit m’ebedo ko i kumwu. 23Tek ng’atu moko penjo pi Tito, en e jaribna man jatic wada yor i beng’wu; kadi juwadwa de, gin gi jukwenda mi kanisa, gin gi dwong’ pa Kristu. 24Ka kumeno wunyuth igi kit mer mu i wang’ kanisa, man ke kulula mwa ma i kumwu bende.

will be added

X\