2 Corinthians 7

1Ka kumeno, jumer, wan ma wabedo ku lembang’ola maeni, dong’ walwokra giwa ni cilo ceke mi kum ku mi tipo, ma wadwok ko leng’cwiny udok ndhu cu i lworo pa Mungu. 2Wuyab adundewu iwa: watimo rac ni ng’atu moko ngo, wawingo ng’atu moko de ngo, wavugo ng’atu moko de ngo. 3Ayero eni ma nia apoko ko lembe rac i wiwu ngo: kum adaru yero ku kwong’a, ya wuni i adunde mwa nitho karacelo man nibedo kwo de karacelo wakudu. 4Tegocwiny mi wec para yor i beng’wu e dit, kulula para m’i kumwu e dit: jukojuk uroma thur, anyong’a de roma hau i can mwa ceke. 5Kum cil ma wawok i Makedoni kumwa kwio ngo, endre junyayu can i iwa yo kun ku kun ceke; yo woko lwiny, yor i ic ke lworo. 6Endre ng’atu m’ujuko ju ma can unuro cwinygi, ndliu Mungu, ejukowa ku bino ma Tito bino ko i bang’wa; 7man ku bino pare m’ebino ko kende ngo, endre ni kum juk m’ujuke ni kumwu, kinde m’eyero pir avane m’unegowu, pi can m’unegowu de, kud amora mu de ma pira; ketho anyong’a nega m’usagu. 8Kum kadok anyayu can i iwu ku waraga para, can unega i kume ngo: kadok naka can unega i kume (kum aneno nia waraga nino nyayu can i iwu, kadok mi nindo moko kende ci), 9e kawono anyong’a nega, ma nia junyayu can i iwu re ngo, endre nia junyayu can i iwu ni lokocwiny; kum junyayu can i iwu ma wagi can ma ayi Mungu ni i kume, kara kud wunwang’ ruvwa ni kumwa i gin moko. 10Kum can ma ayi Mungu ni i kume timo ni lokocwiny ni both, en e lokocwiny ma kelo can ungo: endre can m’i ng’om timbre ni tho. 11Kum nen, gin maeni nini, ya junyayu can i iwu ma ayi Mungu ni i kume, etimo i iwu gwokogwok ma tek rokeni ngi, eyo ku kabu lembe m’i wiwu giwu ma rokeni ngi, eyo ku ng’ecwiny de ma rokeni ngi, eyo ku lworo de ma rokeni ngi, eyo kud avane de ma rokeni ngi, eyo kud amora de ma rokeni ngi, eyo ku culo wang’ lembe ma rokeni ngi! I gin ceke wunyuthru giwu ya wu leng’ i lembe nini. 12Kum kumeno kadok nyamaca agoro iwu, de agoro kum lembe pa ng’atu m’utimo rac ungo, kadok kum lembe pa ng’atu ma jutimo rac i kume de ngo, endre kara kurokur ma dit ma piwa unyuthie iwu i wang’ Mungu. 13Ka kumeno wanwang’u juk: man i jukojuk mwa anyong’a negowa dit apila ma sagu kum anyong’a m’unego Tito, kum kewu ceke wudwoko cwinye. 14Kum tek adaru lulo piwu ire i gin moko, e lewic uwok i wia ngo; ento calu wayero gin ceke iwu i lemandha, kumeno kulula mwa bende m’aketho wang’ Tito junwang’u ebedo lemandha. 15Man mer pare de sagre dit yor i beng’wu, kinde m’epoi pi wor ma wun ceke wuwor ko, maram wujole ko ku lworo ku mielkum de. 16Anyong’a nega kum abedo ku tegocwiny ma dit piwu kum gin ceke.

will be added

X\