2 Corinthians 5

1Kum wang’eyo nia tek ot ma ku ng’om mi hema mwa loi, wabedo ku giragoma m’uai ba Mungu, en e ot ma jutimo ku cing’ ungo, ma nja ku nja, i polo. 2Kum andha wacur acura i maeni, ma wabeyenyo dit jurony ot mwa m’uai i polo wi kumwa: 3tek ebedo kumeno nia juronywa e jubinwang’u wabedo muneru ngo. 4Kum andha wan ma wani i hema maeni wacur acura, ma jubenurowa; ma nia wayenyo jukab ko kendi mwa ngo, ento wayenyo nia jurony kud i wie, kara mi tho nini umwonjre ku kwo. 5Nie ng’atu m’utimowa pi gin maeni nini en e Mungu, m’emio iwa mukwatu mi Tipo. 6Ka kumeno wan ma wabedo thiri thiri ku tegocwiny, ma wang’eyo nia, kinde ma wani thuwa i kum, wambe ku Rwoth 7(kum wawotho ku yioyic, ku neno re ngo); 8wabedo ku tegocwiny, awacu, man wayenyo ma sagu ya wabed umbe kum, man wabed thuwa waku Rwothgi. 9Kum kumeno bende wakeco mwa, nia kadok wani thuwa kadi wambe, wabed ma wanyayu mutoro i ie. 10Kum wan ceke wabikonyuthra be ngbeng’ i wang’ kom mi ng’olo lembe pa Kristu; kara dhanu ceke kubang’gi kubang’gi ng’atuman unwang’ gin m’utimbre i kum, rom ku gin m’etimo, kadok ebedo ber kadi rac. 11Ka kumeno wan ma wang’eyo lworo pa Rwoth, wathoko dhanu, ento junyuthowa ngbeng’ ni Mungu; man ke ageno ya wanyuthra ngbeng’ bende i pidocwinywu. 12Wafoira kendo ngo iwu, ento calu wabemio iwu kafoiri ma ni kumwa, kara wubed ku gin moko ma wulok ni ju ma gifoiri kum giranena, man ku yo i adunde re ngo. 13Kum kadok rieko mwa rwinyo iwa, en e ni Mungu; kadi kadok wa weg pidoic ma nger, en e iwu. 14Kum mer pa Kristu becwaluwa; kum wang’olo kumeni, ya acel utho pi ceke, ka kumeno ceke tho; 15man etho pi ceke, kara ju m’ubedo kwo ku gibed kwo i kumgi gigi kendo, endre ire m’etho i kumgi man ecer kendo. 16Kum kumeno ugambre kawono cil macen wang’eyo ng’atu moko ngo ni kum gin mi kum: kadok wadaru ng’eyo Kristu ni kum gin mi kum, ento kawono wang’eye kumeno kendo ngo. 17Kum kumeno tek ng’atu moko ni i Kristu, meca en e giracwia ma nyen: gin ma con udaru kadhu; nen, gidoko nyen. 18Ento gin ceke ai ba Mungu, m’eketho kindwa poto wakugi en ni kum Kristu, man emio iwa tic mi pot; 19en e kumeni, ya Mungu ni i Kristu m’ebepoto ng’om ire gire, ma k’ebekwanu kier migi igi ngo, nwang’u emio iwa lembe mi pot. 20Ka kumeno wa judhulembe ka Kristu, calu ma tek Mungu bekwayu kudwa: wabekwayuwu ma tek ni kum Kristu, wuketh kindwu pot ku Mungugi. 21En m’eng’eyo dubo tak de ngo edwoke ni dubo piwa; kara wadok ni bedopwe pa Mungu ni kume.

will be added

X\