2 Corinthians 3

1Wan wamaku foira giwa kendo? kadi wayenyo waraga mi foc ma jufoyo ko jo, calu jumoko, ma wabin ko i beng’wu kadi ma waai ko i beng’wu? 2Wun wu waraga mwa, ma jugoro i adundewa, ma dhanu ceke ging’eyo gisomo de; 3ma juketho enyuthre ya wun wu waraga pa Kristu, ni kum tim ma watimo, ma jukugoro ku vino ngo, endre ku Tipo pa Mungu ma kwo; ku ban mi kidi ngo, ento i ban ma adunde mi ring’kum. 4Man wabedo ku genogen ma kumeni yo ba Mungu ni kum Kristu: 5ya wan waromo giwa wan ungo, ma nia wapor gin moko calu eai i bang’wa wan: endre rom mwa ma waromo kudo ai ba Mungu; 6en bende m’eketho waromo calu jutim mi lembariba ma nyen; mi nyiguta ngo, ento mi tipo re: kum nyiguta nego, endre ripo mio kwo. 7Ento tek timotim mi tho, ma i nyiguta, ma jutong’o i kidi, uwok ku dwong’, ketho ya nyithindho pa Israel gicopo neno wang’ Musa tel ungo ni dwong’ mi wang’e; ma dwong’ne bekadhu woko: 8timotim mi tipo dwong’ne bisagu hai ngo? 9Kum tek timotim mi pokolembe rac dwong’ne nuti, e timotim mi bedopwe dwong’ne sagu dit. 10Kum andha maeno m’unwang’u dwong’ k’enwang’u dwong’ kum gin maeni re ngo, ni kum dwong’ m’usagu asaga. 11Kum tek maeno m’ubekadhu woko no bedo ku dwong’, m’udong’ no e m’ubedo i dwong’ ma sagu apila. 12Ka kumeno wan ma wabedo ku genogen ma kumeni, waweco ku tegocwiny ma dit, 13man wa calu Musa ngo, m’uumo bongu i wang’e, kara nyithindho pa Israel ku ginen kajik mi gino tel m’ubekadhu woko: 14endre pidoic migi bedo nwang’: kum cil i ceng’ maeni nini ku som ma jusomo ko lembariba ma con bongu nica fodubedo kakare, m’ebenyuthre igi ngo nia lembariba ma con ukabre woko ni kum Kristu. 15Ento cil i ceng’ maeni, kinde ma tek jusomo Musa, e bongune umo adundegi. 16Ento kinde ma tek ebilokre ni Rwoth, bongune kabre woko. 17Nie Rwoth en e Tipo maeni: man ka ma Tipo Rwoth ni i ie, e gony de nuti. 18Ento wan ceke, ma bongu mbe i wang’wa ma wabeneno dwong’ pa Rwoth calu i kieu, e walokra wadoko calu ayi maeni m’uai i dwong’ utundo de i dwong’, cil calu m’eai ba Rwoth ma Tipo.

will be added

X\