2 Corinthians 2

1Ento akeco mae ira gira, ya kud abin i beng’wu ku can kendo. 2Kum tek anyayu can i iwu, ka ng’a ke ma lund nyayu mutoro i ia ndhu ng’atu m’anyayu can i ie? 3Man agoro gin maeni nini, kara, kinde m’awok, kud anwang’ can ba ju ma maku anwang’ mutoro re; m’ageno ko wun ceke, nia mutoro para en e mutoro mu ceke. 4Kum agoro iwu ku piwang’ dupa kud i can ma dit ku ndiba mir adunde de; kara ya anyai can i iwu ngo, ento kara wung’ei mer para ma dit m’usagre yor i beng’wu. 5Ento tek ng’atu moko nyayu can, meca enyayu can, ira ngo, ento kume moko iwu ceke (kara kud anurwu ma sagu). 6Masendi maeni ma ju ma dupa giketho i wie eromo wagi ng’atu ma kumeni; 7kum kumeno ma tung’ ku eni maku wuwek lembe pare woko man wujuke, kara ng’atu ma wagi maeni kud umwonjre ku yo moko ni kum can pare m’usagu. 8Kum kumeno akwayuwu ma tek ya wunyuth ire mer mu ma wumare ko. 9Kum lembe nini bende ketho agoro iwu, kara ang’ei mulo piwu ma jumulo, tek wuwor i gin ceke. 10Ento ni ng’atu ma wuweko ire gin moko woko, an bende aweko woko: kum gin ma tek an bende adaru weko woko, tek adaru weko gin moko, meca aweke ni kum lembe mu i wang’ Kristu; 11kara Jok kud unwang’ kuloka i wiwa: kum wan wacobo ngo kum pidoic pare. 12Nie kinde m’abino Troa pi lembanyong’a pa Kristu ma juboth ko, man kinde ma dhugola yabre ira i Rwoth, 13cwinya kwio ngo, kum anwang’u Tito m’umira ngo: ento kan awekogi, acidho i Makedoni. 14Ento foyofoc ni Mungu, m’etelo wiwa thiri thiri i sag ma jusagu ko ni kum Kristu, man eketho mido mi ng’eyong’ec pare nyuthie i kaka ceke ni kumwa. 15Kum wan wa mido ma ng’ar pa Kristu ni Mungu, i ju ma giboth, man i ju ma girwinyo; 16ni acel mido m’uai ba tho tundo de ba tho; ni mange ke mido m’uai i kwo tundo de i kwo. Ng’a ke m’uromo ni gin maeni? 17Kum wan wa calu dupa ngo, ma gibenyotho lem pa Mungu: ento wayero mwa i Kristu, endre calu ma abombi mbe i cwinywa, ento calu pa Mungu i wang’ Mungu.

will be added

X\