2 Corinthians 13

1Maeni wang’ adek m’abebino ko i beng’wu. Ku dhu jumulembe ario kadi adek lembe ceke bicungo. 2Alar ayero iwu, man alar abeyero, calu kinde m’anuti i beng’wu mir arionde, e kawono bende, m’ambe, ni ju ma gilar gidubo man ni dhanu ceke m’udong’ de, nia, tek awok kendo, abiweko ng’olo lembe migi ngo; 3kum nwang’u wubeyenyo giranyutha pa Kristu m’ubeyero i ia; ma ku yor i beng’wu en e ng’ic ungo, endre e tek i iwu: 4kum jugure i ng’ic, endre ebedo kwo ni kum tego pa Mungu. Kum wan bende wa ng’ic i ie, endre wabibedo kwo wakude ni kum tego pa Mungu yor i beng’wu. 5Wumulu giwu, tek wuni i yioyic; wuponjru giwu. Kadi wung’eyo ngo piwu giwu, ya Yesu Kristu ni i iwu? tek ebedo andha ma jukukwerowu ngo. 6Ento ageno ya wubing’eyo nia wan wa ju ma jukwerowa ngo. 7Nie waberwo ni Mungu kara kud wudubi; ma nia wanyuthra ko ngo ya jufoiwa, endre kara wutim maeno ma mi yung, kadok wabedo calu ju ma jukwero. 8Kum wacopo timo gin moko ngo ma wacer ko lemandha, ento pi lemandha re. 9Kum anyong’a negowa, kinde ma wa ng’ic e wun wu tek: maeni bende wakwayu pire, cil dokocu mu. 10Kum lembe nini agoro gin maeni kan ambe, kara kan anuti kud atim iwu ku kwinyo, calku tego ma Rwoth umio ira mi gomogom, man pi bamu abama re ngo. 11Aha a, umego, dong’ wubedi. Wudok ndhu cu; wujukru; wubed ku pidoic acel; wubed i kwiocwiny: man Mungu mi mer ku kwiocwiny de bibedo kudu. 12Wumothru ku cwiocwic ma leng’. 13Jumaleng’ ceke gimothowu. 14Bero pa Rwoth Yesu Kristu, ku mer pa Mungu, man ribri pa Tipo Maleng’, ubed i beng’wu kpo.

will be added

X\