2 Corinthians 12

1Abikolula be, kadok e ber ungo; endre abibino ba ginmawokiwang’ ku nyuthonyuth pa Rwoth. 2Ang’eyo ng’atu moko i Kristu, rundi apar wi ang’wen m’ukadhu (tek eni i kum, ang’eyo ngo; kadi tek embe i kum, ang’eyo ngo; Mungu ng’eyo), ng’atu ma kumeca juring’e malu cil i polo mir adege. 3Man ang’eyo wagi ng’atuca (tek eni i kum, kadi e nge ku kum, ang’eyo ngo; Mungu ng’eyo), 4maram juting’e ko malu i Paradis, m’ewinjo ko lembe de ma sagu aweca, ma cik uyio ngo ya dhanu weci. 5Ni kum ng’atu ma kumeca abilula: endre ni kuma gira abilula ngo, ndhu i ng’ic para m’a ng’ic ko. 6Kum tek ayenyo alula, abibedo jakasegu ngo; kum abiyero lemandha; endre aweko, kara ng’atu moko kud ukwana ma sagu ramba m’eneno abedo ko, kadi m’ewinjo i bang’a de. 7Man kara kud atingra malu ma sagu ni kum giranyutha ma dit apila, ukudho ma i ring’kum umire ira, jakwenda pa Jok kara epada, kara kud atingra ma sagu. 8Pi gin maeni akwayu Rwoth bang’ adek, kara eai i kuma. 9Man ewacu ira kumae, Berona romi: kum tegona doko ndhu cu i ng’ic. Kum kumeno abilula kum ng’ic para kud anyong’a m’usagu dit, kara tego pa Kristu bed i kuma. 10Kum kumeno anyong’a nega i ng’ic, i acidi de, i can piny, i ragedo, i can m’alimo, ni kum Kristu: kum kinde ma a ng’ic, kinde maeca a tek. 11Adoko jakasegu: wucwala; kum emaku ya wufoya: kum adong’ cen ki ngo i gin moko mi jukwenda ma sagu juwagi ceke, kadok an a gin moko ngo. 12Andha giranyutha pa jakwenda utimbre i kindwu i twiocwiny ceke, ku giranyutha man musana ku tego ma dit de. 13Kum girang’o ma wujwik i ie ma sagu kanisa mange, tek en e ma nia an gira abedo ni ter iwu ngo? wek timo rac maeni woko ira. 14Nen, maeni wang’ adege m’abedo ko ayika m’abin ko i beng’wu; man abibedo ni ter iwu ngo: kum ayenyo gin mu ngo, ento wun re: kum emaku ya nyithindho gikan piny ni junyodo migi ngo, ento junyodo re ni nyithindho. 15Man abilalu ndhu alala ku mutoro ma dit man abidaru tekna de piwu. Tek amaruwu dit ma sagu, an ke jumara nok ma sagu? 16Ento kadok ebedo kumeno, an gira anurowu ngo; ento, kum a riek, amakuwu kud abombi. 17Avugowu ku jumoko m’aoro i beng’wu? 18Ajuko Tito, man aoro umego gikude. Tito vugowu? wawotho ku tipo ma calacel ungo? wawotho ku ba tielo ma calacel ungo? 19Iwu wacu nyo cil unyoni wabegonyo lembe m’i wiwa giwa iwu. I wang’ Mungu wabeyero i Kristu. Ento gin ceke, jumer, gi pi teng’oteng’ mu. 20Kum alworo, kara ku yo moko, kinde m’awok, abinwang’uwu calu wagi m’amaru ngo, an bende jubinwang’a calu wagi ma wumaru ngo; kara dhau kud ubed nuti ku yo moko, ku ngiri, ku kwinyo, ku pokri, ku yero nying’, ku yero nying’ ma kwe kwe, ku yakni; 21kara kinde m’abino kendo Mungu para kud ubin ujwiga i weng’wu man abin aywak kum dupa m’i kindgi ma gilar gidubo, ma gikuloko cwinygi ngo kum sasa man tarwang’ man awanya ma rac ma gitimo.

will be added

X\