2 Corinthians 11

1Wukowutwi cwinywu i kuma tundu kum wec ma nok ma kite mbe: ento wutwio cwinywu i kuma andha. 2Kum ngiri benega piwu en e ngiri ma ayi Mungu ni i kume: kum adhumowu ni nico acel, kara aterwu ni Kristu calu nyaku ma leng’ ma sumba. 3Ento alworo, kuno nyo ku yo moko, calu thwol ubombo Eva ku rieko pare, e pidoiwu binyothre kud i bedo m’ebedo ma abombi mbe i ie man i leng’ m’e leng’ ko yo ba Kristu. 4Kum tek ng’atu m’ubino eyero Yesu mange, ma wayero pire ngo, kadi tek wujolo tipo ma tung’, ma fodi wukujolo ngo, kadi lembanyong’a ma juboth ko ma tung’, ma wujolo ngo, meca wutimo dre kum wutwio cwinywu i kume. 5Kum akwanu nia adong’ cen ng’ei jukwenda ma gisagu juwadi ceke ki ngo. 6Ento kadok acanyu wec acanya, endre ng’eyong’ec para re kumeno ngo; eyo, i yo ceke waketho maeni nyuthie iwu i gin ceke. 7Kadi atimo dubo kum ajwigra gira kara judodwu malu, kum ayero iwu lembanyong’a ma juboth ko pa Mungu mananu? 8Ayaku kanisa mange m’agamu ko sukulia i bang’gi kara atim ko iwu; 9man kinde ma ani i beng’wu ma can piny bende ni i kuma, abedo ter ni ng’atu moko ngo: kum umego, kinde ma giai i Makedoni, gin e ma gimio m’ukabu can piny ma ni i kuma; man i gin ceke akura gira kara kud abed ni ter iwu, man abigwokra gira kumeno. 10Calu lemandha pa Kristu ni i ia, ng’atu moko mbe ma bicera kum kulula maeni i ng’om mir Akaya. 11Kum lembang’o? kum amaruwu ngo? Mungu ng’eyo. 12Ento gin m’atimo, maeno abitimo, kara acer kaka ni ju ma giyenyo kaka moko; kara i gin maeni ma giluli i ie, e jubinwang’u gin de ndhu calu wan. 13Kum wagi dhanu ma kumeno gi jukwenda mi ndra, jutic ma weg abombi, ma gibelokri gigi ni jukwenda pa Kristu. 14Man wang’uijo mbe; kum cil Jok loko kite gire, ni malaika mi der. 15Ka kumeno en e gin ma dit ungo tek jutic pare bende gilokri gigi ve jutic mi bedopwe, ma kajik migi bibedo calku tic migi. 16Ayero kendo, ng’atu moko ie kud uwac nia a jakasegu; ento tek iwu wacu kumeno, wujola asu ma kita mbe, kara an bende alula nyanok. 17Maeno m’ayero no, ayero m’uai ba Rwoth ungo, ento calu ma kite mbe i genogen maeni mi kulula. 18Kum nwang’u dupa giluli calku kum, an bende abilula. 19Kum wutwio cwinywu kum jukusegu ku mutoro, ma wun wu riek. 20Kum wutwio cwinywu kum ng’atu moko, tek ekelowu ni ng’eca, tek ecamuwu, tek eyakuwu de, tek eyungre gire, tek epadu weng’wu de. 21Abeyero ma yung umbe i kume, calu ya wan wa ng’ic. Endre ka ma tek ju.. moko gibedo ie ku tegocwiny (ayero ku lembe ma kite mbe), abedo ku tegocwiny bende. 22Gin gi Juebrania? an bende abedo kumeno. Gin gi Juisraeli? an bende abedo kumeno. Gin gi nyikwai Ibrahimu? an bende abedo kumeno. 23Gin gi jutim pa Kristu? (Ayero calu abelu) an e m’asagu; i tic m’amula ko ma sagu drt, i kol ma sagu dit, ku wang’ goc ma kaporne mbe, i tho wang’ udul. 24Ba Juyahudi wang’ abic amaku goc pier ang’wen udong’ acel. 25Bang’ adek jugoya ku dul, wang’ acel ke jucanya ku kidi, wang’ adek ke asendra i combo m’ung’eny, diewor acel ku dieceng’ acel ani i nam; 26i woth ma wang’ udul, ceng’ni tho mi kulo, ceng’ni tho ni weg ayeki, ceng’ni tho ni juthuwa, ceng’ni tho ni Thekdhanumange, ceng’ni tho i adhura de, ceng’ni tho i yamba, ceng’ni tho i nam de, ceng’ni tho i kind umego mi ndra; 27i tic ma jumuli ko ku sendri, i kurokur wang’ udul, ku kec ku rieu de, ku kwirocam de wang’ udul, ku koyo ku muneru de. 28M’umedre kum gin maeno ma yo woko, gin moko nuti m’unura ku ba rupiny, en e adieng’acwiny pi kanisa ceke. 29Ng’a ma ng’ici, ma an a ng’ic ungo? ng’a ma juketho ekier, ma a kuwang’ ungo? 30Tek emaku ya alula, abilula kum gin mi ng’ic para m’ang’ic ko. 31Mungu ma Won Rwoth Yesu, en m’e jamugisa rondo ku rondo eng’eyo ya ayero ndra ngo. 32I Dameski jabim ma the cing Areta m’ubimo ekuro adhura mi Judameski kara emaka: 33man ku wang’ot julura piny ku wi gang’ ku i kukunju, e aboth ve kud i cinge.

will be added

X\