2 Corinthians 10

1Nie an a Paolo ku kita abekwayuwu ku molcwiny ku bedoyo de pa Kristu, an ma kan ani i vutwu abedo ming’ i kindwu endre kan ambe abedo ku tegocwiny yor i beng’wu: 2eyo, abekwayuwu ma tek, kara kan anuti kud anyuth tegocwiny ku genogen maeno m’akwanu ya abedo kudo kum jumoko, m’ukwanu piwa calu ma tek wan de wawotho calku kum. 3Kum kadok wawotho ku kum, watimo lwiny calku kum ungo 4kum jamtho mwa mi lwiny gi mi kum ungo, endre gi tek apila i wang’ Mungu ma giredho ko gin ma tek piny; 5ma giredho ko pidoic m’udhunjo piny, man ku gin ma tingre kum ng’eyong’ec pa Mungu, ma kelo pidoic ceke kubang’gi ni kol m’edoko ko wor ni Kristu; 6m’ebedo ko ayika niculo kwor kum camuco ceke, kinde ma woro mu uromo kakare. 7Wuneno gin ma ni i weng’wu. Tek ng’atu moko begendre gire ya en e pa Kristu, dong’ ie pid maeni kendo gire, nia, cil calu en e pa Kristu, wan bende wabedo kumeno. 8Kum kadok alula moko ma dit pi ng’ol mwa (ma Rwoth umio ya ugomwu agoma, m’ubamwu abama re ngo), e lewic binega ngo. 9kara kud i weng’wu kud abed calu ma nia ang’oyo ndiri i iwu ku waraga para. 10Kum, giwacu kumae, Waraga pare gi pek gi tek de; ento ku kume e ng’ic, wec pare de en e mananu. 11Dong’ ng’atu ma wagi maeni ie pid kumeni, nia calu wabedo i lembe ku waraga ka wambe, wabedo kumeno bende i tic kinde ma wanuti. 12Kum wa weg tegocwiny ungo ma wakwandra ko giwa kadi ma wapora ko giwa ku jumoko m’i kindgi ma gifoiri gigi: endre gin gigi, ma gibepori gigi, ma gibenyuthri gigi de gibedo ma ng’eyong’ec umbe kugi. 13Endre wabilula giwa ngo ma sagu kapor mwa, endre calu kapor maeni mi jampor ma Mungu poko iwa calu kapor, m’etundo ko cil i beng’wu bende. 14Kum wan giwa wakukadhu jampor mwa giwa ngo, calu wakutundo i beng’wu ngo: kum wabino agbele i beng’wu i lembanyong’a ma juboth ko pa Kristu: 15ma wakulula ko ngo ma sagu kapor mwa, i tic ma jumange gimuli ko; endre ma wabedo ku genogen nia, calu yioyic mu bedongo, e wabidoko dit ni kumwu calku jampor mwa ni sag ma jusagri ko, 16kara wayer lembanyong’a ma juboth ko cil i ng’et ng’om m’ukadhuwu, man kud alula i jampor pa ng’atu mange pi gin maeni m’ubedo ayika i cingwa. 17Ento ng’atu m’ulule, dong’ elule i Rwoth. 18Kum juyio ng’atu ma foire gire ngo, ento ng’atu ma Rwoth foyo re.

will be added

X\