2 Corinthians 1

1Paolo, jakwenda pa Yesu Kristu ni yeny ma Mungu yenyo, man Timoteo m’umegwa, ni kanisa pa Mungu ma ni i Korinto, ku jumaleng’ ceke ma ni i Akaya yu: 2Bero iwu man kwiocwiny m’uai ba Mungu ma Wegwa man Rwoth Yesu Kristu. 3Mugisa ni Mungu man Won Rwoth mwa Yesu Kristu, ma Wego mi kisa man Mungu mi jukojuk ceke; 4m’ejukowa i can mwa ceke, kara wacopo juko ju ma gini i can moko, ni kum jukojuk ma Mungu juko ko wan giwa. 5Kum calu sendri pa Kristu sagre iwa, e kumeno jukojuk mwa bende sagre ni kum Kristu. 6Ento kadok wasendra, en e pi jukojuk mu man both mu; kadi kadok wabedo ajuka, en e pi jukojuk mu, m’ubetimbre i ciro can ma calacel ku maeno ma wan bende wasendra kudo ku twiocwiny: 7man genogen mwa piwu cungo tek; ma wang’eyo ko nia, calu wun wugamu kum sendrine, kumeno bende wu jugam jukne. 8Kum wayenyo ngo, umego, ya wubed cobo kum lembe mi can ma wanwang’u i Asia, ya junurowa piny apila, ma sagu tego mwa, ketho cwinywa ai cil kum kwo: 9eyo, wan giwa wabedo ku lembang’ola mi tho yor i iwa giwa, kara ku wagendra giwa, ento i Mungu re ma ting’o ju m’utho: 10m’elaruwa kud i tho ma dit kumeni, man ebilaru: e waketho genogen mwa i ie ya ebilaruwa asu bende; 11ma wubekonyo karacelo bende piwa ku kwac ma wukwayu; kara, kum giramia ma jumio iwa ni kum dhanu dupa, foyofoc umire ku dhanu dupa ni kumwa. 12Kum kulula mwa e eni, lembatuca mi pidocwiny mwa, nia i leng’cwiny man cwiny ma abombi mbe i ie pa Mungu, i rieko mi kum de ngo endre i bero pa Mungu, watimbra giwa i ng’om, ma sagu dit yor i beng’wu. 13Kum wagoro iwu giki mange ngo, ndhu ma wusomo kadi ma wutuco, man ageno de ya wubituco cil i kajikne: 14calu jumoko m’i kindwu bende gituco piwa, ya wan wa kniula mu, cil calu wun bende wu mwa, i ceng’ pa Rwoth mwa Yesu. 15E i genogen maeni nwang’u ia pido ya alar abin i beng’wu, kara wunwang’ kuloka mir arionde; 16man abikadhu kud i beng’wu m’acidho ko i Makedoni, man kendo kud i Makedoni abibino i beng’wu, e wun e ma wubicika i woth para m’acidho ko i Yahudi. 17E kinde ma ia pido kumeno, anyutho lok ma pidoia lokre ko swa? kadi gin m’akeco ya abitimo, akeco calku kum, ya eyo eyo kud ungo ungo ubed nuti i bang’a? 18Ento calu Mungu en e mandha, lembe mwa ma yor i beng’wu de en e eyo kud ungo de ngo. 19Kum Wod Mungu, Yesu Kristu, en nini ma pire yere i kindwu ni kuma, ndhu ni kuma waku Siluano man Timoteo, en e eyo kud ungo de ngo, ento i ie re en e eyo. 20Kum kadok lembang’ola pa Mungu gi dupa, e eyo ni i ie: kum kumeno amen bende ni i kume, ni dwong’ pa Mungu ni kumwa. 21Nie ng’atu m’uketho wanyang’ wakudu i Kristu, en m’ewirowa de, en e Mungu; 22en bende m’eketho ayi i kumwa, man emio mukwatu mi Tipo i adundewa. 23Ento alwong’o Mungu ni jamulembe mi pidoic para, kum ngisi nega i kumwu ketho akwero bino Korinto. 24En e kum wan wa rwodhi mi yioyic mu ngo, endre wa jukony mi mutoro mu: kum i yioyic wucungo ki.

will be added

X\