1 Timothy 4

1Ento Tipo wacu gbe, ya i nindo macen jumoko bibadhri kum yioyic, gibiciko ithgi ba tipo mir abidhe ku ponji mi pajogi, 2ni kum dhanu ma gi weg ambili m’uyero lemndra, ma calu ya junyelo pidocwinygi gigi ku nyunyu ma lieth: 3ma gikwero ko ya ku jugambri, ma ging’olo de ya jukwir ring’o, ma Mungu cwio ya ju ma gi weg yioyic ma ging’eyo lemandha de gijol ku foyofoc. 4Kum giracwia ma kwo pa Mungu ceke gi ber kubang’gi ndri, moko de mbe ma jukwero, tek jujole ku foyofoc: 5kum judwoke leng’ ni kum lem pa Mungu ku rwo bende. 6Tek ipoyo umego pi ginduni, meca ibidoko jatic ma ber pa Kristu Yesu, ibidoko tek i lembe mi yioyic, man mi lem ponji ma ber m’ibelubo toke cil eni: 7ento dong’ ikwer lembuda mir acidi mi mondongo. Man dong’ iponjri giri ni bedo ma ayi Mungu ni kume: 8kum rieyokum gin moko ma jukwanyu ie cu mbe; ento bedo ma ayi Mungu ni kume kulokane nuti kum gin ceke, m’ebedo ku lembang’ola mi kwo ma wakwo ko kawono, ku mi maeca ma bibino bende. 9Maeni lembe mandha, m’uromo ya dhanu ceke gijole. 10Kum lembe nini wabemula ku tic man wabeii aiia, kum genogen mwa ndhu ni yo ba Mungu ma kwo, m’e Jalar mi dhanu yu, ndhu mi ju m’uyie. 11Ng’ol gin maeni man iponj de. 12Kud iyi ng’atu moko cei ya fodi i nyathin; ento dong’ ibed ni por mi ju m’uyio, i lembe, i bedo, i mer, i yioyic, i leng’cwiny. 13Dong’ iketh weng’i kum somo lembe, man kum jukojuk, ku ponji bende, cil m’abino ko kuno. 14Kud igal kum giramia ma ni ii, ma jumio iri ni kum lembila, ku cing’ ma judongo ketho i wii bende. 15Tim gin maeni ku cwinyi ceke; tingri dho kum lembe nini; kara teng’ni m’ibeteng’ni ko nyuthre ni dhanu ceke. 16Dong’ ibed ku weng’i i kumi giri, man kum ponji peri. Bed asu i gin maeni; kum tek itimo kumeni ibibodhri giri ku dhanu m’ubeduwinji bende.

will be added

X\