1 Thessalonians 5

1Ento pi nindo ku oro, umego, can lembe moko ma nia jugor iwu negowu ngo. 2Kum wung’eyo giwu cu nia ceng’ pa Rwoth ubino kumeno calu jakwo ku diewor. 3Kinde ma gibewacu kumae, Kwiocwiny ku bedomoth e nyoth ulund ubino i wigi ndhu ndhu nica, calu moc ma goyo dhaku ma ie nuti; man gibiboth ki ngo. 4Ento wun, umego, wuni i mudho ngo, ma nia ceng’ nino unwang’wu calu jakwo: 5kum kewu ceke wu wot mi der, man wu wot mi ceng’: wan wa mi diewor ungo, kadi mi piny ma col de ngo; 6kum kumeno dong’ ku wanindu, calu dong dhanu, ento dong’ wakur wabed nger de. 7Kum ju m’unindo ginindo ku diewor; man ju ma gimer amera gimer ku diewor. 8Ento dong’ wan, kum wa mi ceng’, wabed nger, waroi asi mi yioyic ku mer bende; man ka sabu mir umbu, waketh genogen mi both. 9Kum Mungu kethowa ngo ni kwinyo, ento kara wanwang’ both ni kum Rwoth mwa Yesu Kristu, 10m’utho piwa, kara, kadok wabedo neno kadi wanindo, wabed karacelo wakugi. 11Kum kumeno dong’ wujukru, man wutengru, cil calu wubetimo bende. 12Ento wakwayuwu, umego, ya wung’ei ju ma gimuli ku tic i kindwu, man gini i wiwu i Rwoth, man gijukowu; 13man wufoigi dit apila i mer kum tic migi. Wubed ku kwiocwiny i kindwu giwu. 14Man wakwayuwu, umego, wujuk ju ma gitimbri rac, wudwok cwiny ju ma cwinygi tek ungo, wujeng ju m’ubedo ng’ic, wubed ku mwonyolembe ma jumwonyo hai yo ba dhanu ceke. 15Nen nia ng’atu moko kud ucul gin ma rac ni wadi ka wang’ gin ma rac; ento elub pare tok gin ma ber thiri thiri, ng’atuman ni wadi man ni wadi, man ni dhanu ceke. 16Anyong’a negwu thiri thiri; 17wurwo areri; 18wumi foyofoc i gin ceke: kum maeni yeny ma Mungu yenyo i Kristu Yesu yor i beng’wu. 19Kud wucer Tipo; 20kud wucai lembila; 21wuponj gin ceke; wuceru wi maeno m’e ber; 22wuceru ni dubo ma mba mba ceke. 23Man Mungu mi kwiocwiny en edwokwu leng’ njwa; man dong’ cwinywu ku kwo mu ku kumwu gibed kubang’gi: ma adote mbe i bino pa Rwoth mwa Yesu Kristu. 24En e ng’atu mandha m’ebelwong’owu, m’ebitime bende. 25Umego, wurwo i kumwa. 26Wumoth umego ceke ku cwiocwic ma leng’. 27Ang’olo iwu ku Rwoth ya jusom waraga nini ni umego ceke. 28Dong’ bero pa Rwoth mwa Yesu Kristu bed kudu.

will be added

X\