1 Thessalonians 3

1Kum kumeno ka wacopo twio cwinywa kendo ngo, iwa pido nia e ber ya wadong’ i Athene kendwa; 2e waoro Timoteo, m’umegwa man jatic pa Mungu i lembanyong’a ma juboth ko pa Kristu, kara eketh wucungi, man kara ejukwu kum yioyic mu; 3kara ng’atu moko cwinye kud uringi kum ruvwa maeni; kum wung’eyo giwu nia jukethowa pi maeni. 4Kum andha, kinde ma wanuti wakudu, walar wayero iwu nia wabisendra ku ruvwa; cil calu etimbre, e wun wung’eyo. 5Kum lembe nini an bende, kan acopo twio cwinya kendo ngo, aoro kara ang’ei yioyic mu, kara jabidhe kud ubidhwu ku yo moko, tic ma wamula kudo maru bedo mananu. 6Ento ka Timoteo dwogo i bang’a kawono m’eai ko i beng’wu, man ekelo iwa rwonglembe ma ber mi yioyic mu ku mer mu, ya poi mu ma thiri thiri piwa e dre, ma ava nenowa benegowu, cil calu ava nenowu benegowa; 7kum lembe nini, umego, wajukra piwu i mono mwa ku ruvwa mwa ni kum yioyic mu: 8kum kawono wabedo, tek wucungo ki i Rwoth. 9Kum foyofoc ma nedi ma wacopo mio kendo ni Mungu piwu, kum anyong’a ceke m’unegowa piwu wang’ Mungu mwa, 10ma diewor ku dieceng’ de warwo apila kara wanen weng’wu, man kara waketh gin m’urem i yioyic mu dok ndhu cu? 11Nie dong’ Mungu mwa man Wegwa en, ku Rwoth mwa Yesu, unyuth yo mwa i beng’wu: 12man Rwoth uketh mer mu unyai esagre de ng’atuman ni wadi man ni wadi, man ni dhanu ceke, cil calu wan bende iwu; 13kara eketh adundewu cung ma adote mbe i leng’cwiny wang’ Mungu mwa man Wegwa, i bino pa Rwoth Yesu mwa ku jupare maleng’ ceke.

will be added

X\