1 Thessalonians 2

1Kum wun giwu, umego, wung’eyo mondo mwa m’i beng’wu, ya junwang’u ebedo mananu ngo: 2ento wan ma walar wasendra man jutimowa rac dit, calu wung’eyo, i Filipi, cwinywa doko tek i Mungu mwa ma wayero ko iwu lembanyong’a ma juboth ko pa Mungu ma waii ko aiia. 3Kum juk mwa en e mi ndra ngo, kadi mi sasa de ngo, kadi i abombi de ngo: 4ento cil calu Mungu ufoyo ya wagwok lembanyong’a ma juboth ko, kumeno wayero; calu ma nyayu mutoro i dhanu ngo, ento ma nyayu mutoro i Mungu m’umulo adundewa. 5Kum nindo moko junwang’u watimo lembe mi pak mananu ngo, calu wung’eyo, kadi ku jambomb mi ketho cwiny hai kum piny de ngo, Mungu en e jamulembe; 6kadi wabeyenyo dwong’ mi dhanu de ngo, kadok m’uai i beng’wu kadi ba jumange de, nwang’u wacopo wacu ya wa weg ng’ol calu jukwenda pa Kristu. 7Ento wabedo yo i kindwu, calu ka japidi bepido nyithindho pare ma dhe: 8cil kumeno, wan ma waketho cwinywa i kumwu ku mer, ebedo ni mutoro ma dit iwa ya wami iwu, lembanyong’a ma juboth ko pa Mungu kende ngo, ento kwo mwa bende, kum wudoko ju ma kacwinywa. 9Kum wupoi, umego, pi tic ma wamula ko ku sendri: ma wabewatimo diewor ku dieceng’, kara ku wanur kindwu moko, wayero iwu lembanyong’a ma juboth ko pa Mungu. 10Wun wu jumulembe, ku Mungu bende, maram watimbra ko leng’, man pwe, man umbe adote iwu wu ju m’uyio: 11calu wung’eyo maram watimo ko iwu kubeng’wu kubeng’wu, calu wego timo ni nyithindhe ma dhe, ma wabewajukowu, wabewapiko lembe i iwu, wabewatuco de, 12kara nia wuwoth calu uromo ku Mungu, m’elwong’owu i ker pare gire man i dwong’. 13Man pi lembe nini wafoyo Mungu areri, nia, ka wujolo lembe mi kwenda i bang’wa, ndhu lem pa Mungu, wujole calu en e lenibe mi dhanu ngo, ento, calu ebedo andha, lembe pa Mungu, m’etimo bende i iwu wu ju m’uyio. 14Kum wun, umego, wudoko jupor mi kanisa pa Mungu ma gini i Kristu Yesu i Yahudi: kum wun bende wusendru ku gin ma cal cal ni juthu, cil calu joca ke ni Juyahudi; 15ma ginego Rwoth Yesu ku jubila, giriemo wan de woko, ginyayu mutoro ngo i Mungu, man gi tung’ ku dhanu ceke; 16gikwero ya ku wayer ni Thekdhanumange kara gibothi; kara gipong’ dubo migi thiri thiri: ento kwinyo wok i wigi cil i kajikne. 17Ento wan, umego, ma jupokowa wakudu mi nindo ma nyanok, mi nendri ku wang’ kud adunde re ngo, waponjo apila ma sagu ya wanen weng’wu kud amora ma dit: 18kum nwang’u wayenyo dit wabin i beng’wu, an a Paolo wang’ acel man kendo; e Jok ucerowa. 19Kum genogen mwa en e ang’o, kadi anyong’a mwa, kadi jamkermiwic mwa mi kulula? Ndhu wun ungo, i wang’ Rwoth mwa ma Yesu i bino pare? 20Kum wun wu dwong’ mwa man mutoro mwa.

will be added

X\