1 Peter 4

1Ka kumeno kum Kristu sendre i kum, e wun giwu bende wutwi jambali mi pidoic ma calacel; kum en m’esendre i kum eweko dubo; 2kara ugambre kawono i dong nindo m’udong’ kud wukwo i kum kud awanya ma rac mi dhanu, ento ku yeny ma Mungu yenyo. 3Kum nindo m’ukadhu romo mi timo yeny mi Thekdhanumange, man ku wotho i tarwang’, kud awanya ma rac, ku mer ku pigulok, ku cokri ma ku vul, ku cokri ma wi pigulok, ku lamu ayi gin m’acwia ma judagu: 4kum wukuringo wukugi ngo i thwo dubo ma calacel lembene wang’u igi hi, gidong’ giyero piwu rac: 5ma gibimio wel ni ng’atu m’ubedo ayika mi poko lembe mi ju ma kwo ku ju m’utho bende. 6Kum pi lembe maeni yang’ juyero lembanyong’a ma juboth ko cil ni ju m’utho de, kara jubin jupok lembe migi andha calku dhanu m’i kum, endre gibed kwo calku Mungu i tipo. 7Ento kajik mi gin ceke dhingo ceng’ni: ka kumeno wubed ku pidoiwu ma cu, wubed nger de ni rwo ni Mungu: 8ma sagu gin ceke wumeru i kindwu kud amora; kum mer umo udul dubo: 9ma wugwokru ko ma ng’ur umbe: 10calu ku ba dhanu ng’atuman ujolo girarnia, ma wutim ko i kindwu giwu, calu jukurpiny ma ber mi bero pa Mungu ma kwonde tung’ tung’; 11tek ng’atu moko yero, eyer calu en e wec pa Mungu; tek ng’atu moko timo, etim calu mi tego ma Mungu mio: kara juyung Mungu i gin ceke ni kum Yesu Kristu, ma dwong’ ku kero ubedo pare rondo ku rondo. Amen. 12Jumer, iwu kud uwang’ kum muloic ma calu mac ma ni i kindwu, m’ubino i beng’wu, nimulo iwu, calu nia gin moko ma tung’ utimbre i kumwu: 13ento kum wu jurib mi sendri pa Kristu, anyong’a negwu; kara i nyuth mi dwong’ pare bende anyong’a negwu kud anyong’a ma dit apila. 14Tek jucayuwu kum nying’ Kristu, mugisa kwanyuwu; kum Tipo mi dwong’ ku Tipo pa Mungu ebedo i wiwu. 15Kum ng’atu moko m’i kindwu kud usendre kum en e janek, kadi jakwo, kadi jatim rac, kadi kum erodhre i lembe mi dhanu mange: 16ento tek ng’atu moko besendre kum en e Jakristu, lewic kud unege; ento dong’ eyung Mungu nying’ maeni. 17Kum nindo wok ma lembapoka thekre ie i ot pa Mungu: man tek elar ethekre i bang’wa, kajik mi ju m’uworo lembanyong’a ma juboth ko pa Mungu ngo ke bibedo nenedi? 18Man tek weg bedopwe giboth arida, e ng’atu ma ayi Mungu mbe i kume ku jadubo de gibinen kani? 19Kum kumeno dong’ ju m’usendri bende calku yeny ma Mungu yenyo giketh ng’eyong’ec migi i timober ni Jacwic mandha.

will be added

X\