1 Peter 3

1Wu mon bende, kumeno, wubed wor ni cogwu ma dhe; kara, tek jumoko woro lembe ngo, ma gibedo umbe lembe gilok cwinygi kum koth mondgi; 2ma gineno ko kothwu ma leng’ ma mi lworo. 3Ma ruko kud ubed ruko ma yo woko mi kiedo yukwic, ku kendo mola ma kwar ma ie ju kidi ma pire tek, kadi ronyo girakenda bende; 4endre dong’ ebed ng’atu m’ukandre mir adunde, i kendi ma nyothre ngo mi cwiny ma mol ku ma yo de, ma wel pinje dit i wang’ Mungu. 5Kum con mon ma leng’ bende, ma gigeno Mungu, girukri kumeca, ma giworo ko coggi ma dhe: 6calu Sara woro Ibrahim, m’elwong’e ko rwoth: ma wun wu nyithindhe kawono tek wutimo dre, ma ndiri moko kuketho wulworo en ungo. 7Wu cogmon de, kumeno, wubed ku mon mu calku ng’eyong’ec, ma wumio ko yung ni dhaku, calu ni agulu ma ng’ic ma sagu wu, calu wubedo jucampacu mi bero mi kwo karacelo; kara rwo mu kud ucere. 8Aha a, kewu ceke pidoiwu bed calacel, ju ma ngisi nego, ju ma mari calu umego, weg ngisi ma yo i adunde, ju ma pidoigi mol: 9ma culo wang’ dubo ngo pi dubo, kadi ayany de pir ayany; ento ma tung’ wucul mugisa; kum jniwong’owu ni maeni, kara wugam mugisa ni mucumbi. 10Kum, Ng’atu m’uyenyo emar kwo, Man enen ceng’ ma ber, Dong’ ecer lebe ni gin ma rac, Dendhoge de kara ku giyer abombi: 11Dong’ elokre ku kum gin ma rac, man etim gin ma ber; Dong’ eyeny kwiocwiny, elub toke de. 12Kum wang’ Rwoth ni wi weg bedopwe, Ithe de ni yo ba kwac migi: Ento ni ju m’udubo re Rwoth uketho wang’e i kumgi. 13E ng’a ma bitimowu raci, tek wubedo k’amora kum gin ma beri? 14Ento tek wusendru kum bedopwe, mugisa kwanyuwu: man lworo migi kud unegwu, kadok ang’aba de cwinywu kud ung’abre; 15ento wudwok Kristu leng’ yo i adundewu calu Rwoth: ma wubedo ko ayika thiri thiri ma wudwok ko lembe ni dhanu ceke kubang’gi kubang’gi ma gipenjowu ku thelembe mi genogen ma ni i iwu, ento ku molcwiny man lworo: 16ma wubedo ko ku pidocwiny ma ber; kara, i maeni ma juyero nyingwu i kume, jubin juketh lewic umak ju ma gicayu kura bedo mu ma ber ma i Kristu. 17Kum en e ber m’usagu, nia wusendru pi timober sagu ma pi timorac, tek yeny pa Mungu yenyo kumeno. 18Kum Kristu bende sendre kum dubo wang’ acel pil, won bedopwe pi weg gondri, kara ekelwa ba Mungu; ma junege i kum, ento judwoke kwo i tipo; 19i maeni bende ecidho eyero ni tipo ma i odkol, 20ma yang’ gicamu co, kinde ma mwonyolembe pa Mungu m’emwonyo hai ukuro i ceng’ pa Noa, kinde ma jubeyiko avur, ka ma ju ma nok ni ie, thelembene, kwo abora, ma giboth ni kum pi: 21m’ubodho wun kawono calkud ayi mandha, en e baputisi, m’iketho cilo m’i kum cen re ngo, ento en e penji mi pidocwiny ma ber yo ba Mungu, ni kum cer pa Yesu Kristu; 22m’eni yo ku cing’ Mungu ma yor acwic, m’edaru cidho i polo; ma juketho malaika ku ng’ol ku tego de bed wor ire.

will be added

X\