1 Peter 2

1Ka kumeno ka wubeketho akece ceke, kud abombi ceke, kud ambili, ku kumira, ku yeronying’ de ceke cen, 2calu mukere ma junyolo kawono, dong’ ava cak mi tipo ma awondi mbe i ie unegwu, kara wudong kude ni both; 3tek wubilo nia Rwoth e ber; 4ma wubino i bang’e, en e kidi ma kwo, ma dhanu kwere andha, ento ku ba Mungu en e ng’atu ma jugoyo wie, ma pire tek de, 5wun bende, calu kidi ma kwo, wugombru wi ot mi tipo, kara wubed ni lamulam ma leng’, ma wuthiero ko lam mi tipo, ma yire ni Mungu ni kum Yesu Kristu. 6Kum maeni ni i lembagora pa Mungu kumae, Nen, aketho i Sayuni kidi ma dit ma wi gul, ma jugoyo wie, ma pire tek: E ng’atu m’uyio ire jubiketho lewic nege ngo. 7Ka kumeno pire ma tekne en e iwu wu ju m’uyio: ento ni wagi ju m’uyio ngo re kumae, Kidi ma jugomot gikwero, Eni juketho ni wi gul; 8man, Kidi ma redho jo, ku cana mi kier; kum gikier kum lembe, ma gi juco ko; ma yang’ jukethogi kum maeno bende. 9Ento wun wu thekdhanu ma jugoyo nyingwu, lamulam mi ker, thek ma leng’, dhanu mi piny ma dhe pa Mungu, kara wunyuth bero pare m’elwong’owu kud i mudho i der pare ma wang’uic: 10wun ma naka wu dhanu ngo, ento kawono wu dhanu pa Mungu: wun ma naka fodi wunwang’u kisa ngo, ento kawono wudaru nwang’u kisa. 11Jumer, akwayuwu calu jubedo man juwoth, ya wuceru ni awanya ma rac mi kum, ma kiedo kum ng’eyong’ec; 12ma wubedo ko ku piwu ma ber i kind Thekdhanumange; kara, i lembe ma giyero ie nyingwu calu wu judubo, giyung Mungu i ceng’ mi lieu, ni kum tic ma ber mu ma gineno. 13Wubed wor ni lembang’ola ceke ma dhanu ketho ni kum Rwoth: kadok ni ubimo, calu ng’atu m’usagu; 14kadi ni jubim, calu m’eoro pi culokwor kum judubo man ni pak ni ju m’utimo dre. 15Kum yeny ma Mungu yenyo bedo kumeno, nia ku timober wuketh dhanu ma cobo ma jukusegu de uling’: 16calu wubedo agonya, man kud wuketh gony mu ni jambum mir akece, endre calu jurniru pa Mungu. 17Wuyung dhanu ceke. Wumar umego. Wulwor Mungu. Wuyung ubimo. 18Jutic, wubed wor ni judongo m’i wiwu ku lworo ceke; ni jubero ku ju ma bedo yo de kendgi ngo, ento ni ju ma kwiny bende. 19Kum maeni e yire, tek ng’atu moko ciro can, esendre de ma there mbe, kum pidocwiny ma yo ba Mungu. 20Kum tek wudubo, man judhongowu, wun de wutwio cwinywu i kume, e pak ma nedi ma wunwang’u pire? ento tek, ka wutimo dre, wusendru pire de, wutwio cwinywu de i kume, maeni yire ni Mungu. 21Kum jniwong’owu kum lembe nini: kum Kristu bende sendre piwu, m’eweko ko por iwu, kara wniub ba tiende: 22m’etimo dubo ngo, kadok abombi de junwang’u ngo i dhoge: 23ma, ka jucaye edwoko wang’ cac de ngo; kan esendre, ecimo cim ungo; ento emire gire ni ng’atu m’upoko lembe pwe: 24ma en gire eyeyo dubo mwa i kume wi yen, kara wan, ma watho ni dubo, wabed kwo ni bedopwe; ku goc pare wun wucangu. 25Kum nwang’u wubekiewo calu rombe; ento kawono wudwogo ba Jakwac ku Jalieu mi ng’eyong’ec mu.

will be added

X\