1 Peter 1

1Petro, jakwenda pa Yesu Kristu, ni ju ma jugoyo nying’gi ma gi jubedo uii Jumulal mba ma gini i Ponto, ku Galatia, ku Kapadokia, kud Asia, man Bithuni, 2calku ng’eyong’ec ma Mungu ma Wego lar ung’eyo, i dwokrileng’ mi Tipo, ni woro ku kir mi rimo pa Yesu Kristu: Bero ku kwiocwiny umedre iwu. 3Mugisa ubed ni Mungu ma Won Rwoth mwa Yesu Kristu, menyolowa kendo calku kisa pare ma dit mi genogen ma kwo ni kum cer pa Yesu Kristu ma kind ju m’utho, 4ni camupacu ma nyothre ngo, ma cido de ngo, ma duny woko de ngo, ma jukanu iwu i polo, 5ma wubedo akura ku tego pa Mungu ni kum yioyic ni both m’ubedo ayika ma binyuthre i acoka nindo. 6Anyong’a negowu dit i gin maeni, kadok kawono mi nindo ma nyanok, tek ebedo kumeno, juketho can unegwu i abidhe ma kwonde tung’ tung’, 7kara mulo yioyic mu, ma pire tek ma sagu mola ma kwar ma nyothie kadok jumule ku mac, junwang’e ni pak ku dwong’ ku yung i nyuth pa Yesu Kristu: 8ma wumare, ma fodi wukunene ngo; ma kadok wunene ngo kawono, ento ma wuyie, anyong’a negowu dit kud anyong’a mawecre ngo m’upong’ ku dwong’ de; 9ma wujolo ko kajik mi yioyic mu, ma en e both mi ng’eyong’ec mu. 10Pi both maeni jubila gisayu man giyenyo cu, ma giewo pi bero ma bibino i beng’wu: 11ma giyenyo ko kanindo kadi karambnindo ma Tipo Kristu ma ni i igi nyutho pire, kan elar etuco pi sendri pa Kristu, ku dwong’ ma bilubo toke. 12M’unyuthre igi, nia igi gigi ngo, ento iwu, gitimo gin maeni, ma kawono uyere iwu ni kum ju ma giyero iwu lembanyong’a ma juboth ko ku Tipo Maleng’ ma juore kud i polo; ma malaika giyenyo ging’i i ginde. 13Kum kumeno ma wutwio ko thondh pier pidoiwu, wubed nger, wuketh genogen mu cu wi bero ma jubikelo iwu i nyuth pa Yesu Kristu; 14calu nyithindho mi woro, kud wuporu giwu kud awanya ma rac mu ma kwong’a mi cobo mu; 15ento calu ng’atu m’ulwong’owu e leng’, wun giwu bende wubed leng’ i kura ceke mi bedo mu; 16kum egore kumae, Wubibedo leng’; kum an a leng’. 17Man tek wulwong’e calu en e Wego, m’epoko lembe mi dhanu ng’atuman calku tic pare ma dhanu bedo ko tung’ tung’ ungo i wang’e, e wubed ku lworo i nindo mi bedo mu: 18ma wung’eyo ko nia juwaruwu, ku gin ma nyothre ngo, ku mola ma tar kadi mola ma kwar de ngo, kud i kura mi bedo mu ma kite mbe ma wunwang’u ba kwaruwu; 19ento ku rimo ma pire tek, calu pa nyathi rombo ma mulima kadi poyo de mbe i kume, en e rimb Kristu: 20ma jular jung’eye andha ka fodi theng’om kucakre ngo, ento enyuthre i kajiknindo piwu, 21wun ma wu juyic i Mungu ni kume, m’eketho ecer kud i kind ju m’utho, emio ire dwong’ de; kara yioyic mu ku genogen mu bed i Mungu. 22Kum wudaru dwoko adundewu leng’ i woro mu ma ba lemandha ni mer mir umego ma abombi mbe i ie, dong’ wumeru k’amora ku i adunde: 23ma junyolowu kendo ku kodhi ma nyothre ngo, ento ku kodhi ma kunyothie, ni kum lem pa Mungu, ma kwo ma bedo de. 24Kum, Kum ceke calu lum, Dwong’ne ceke de calu thiu lum. Lum ner, man thiwe de oi: 25Ento lembe pa Rwoth bedo rondo ku rondo. Maeni lembe mi lembanyong’a ma juboth ko ma juyero iwu.

will be added

X\