1 John 5

1Ng’atu ma tek uyio nia Yesu en e Kristu nwang’u Mungu nyole: man ng’atu ma tek umaru janyodo nwang’u emaru ng’atu m’euyolo bende. 2Kum maeni wang’eyo nia wamaru nyithindho pa Mungu, ka wamaru Mungu watimo cik pare de. 3Kum maeni en e mer pa Mungu, nia wawor cik pare: man cik pare gi pek ungo. 4Kum gin ma tek Mungu nyolo eloyo ng’om: man maeni en e aloci m’uloyo ng’om, en e yioyic mwa. 5En e ng’a m’uloyo ng’om, ndhu ng’atu m’uyio nia Yesu en e Wod Mungu ngo? 6Maeni ng’atu m’ubino ku pi man rimo, ndhu Yesu Kristu; ku pi kende ngo, ento ku pi ku rimo de. 7Man en e Tipo ma nyutho lembe, kum Tipo en e lemandha. 8Kum juadek nuti ma ginyutho lembe, en e Tipo, man pi, man rimo: man adek maeni giribri i acel. 9Tek wajolo lembanyutha mi dhanu, lembanyutha pa Mungu dit m’usagu: kum lembanyutha pa Mungu e eni, nia enyutho lembe pi Wode. 10Ng’atu m’uyio ni Wod Mungu ebedo ku lembanyutha i ie: ng’atu m’uyio Mungu ngo eketho ebedo jandra; kum eyio lembanyutha ngo ma Mungu nyutho pi Wode. 11Man lembanyutha e eni, nia Mungu mio kwo ma rondo ku rondo iwa, kwo maeni de ni i Wode. 12Ng’atu m’ubedo ku Wod ebedo ku kwo; ng’atu m’ubedo ku Wod Mungu ngo nwang’u kwo mbe kude. 13Agoro iwu gin maeni, kara wung’ei nia wubedo ku kwo ma rondo ku rondo, wu ju ma wuyio nying Wod Mungu. 14Man maeni tegocwiny ma wabedo ko yor i bang’e, nia, tek wakwayu gin moko calku yeny ma ie yenyo, ewinjowa: 15man tek wang’eyo nia ewinjowa pi gin ma tek wakwayu, wang’eyo nia wabedo ku kwac ma wakwayu i bang’e. 16Tek ng’atu moko neno umin ubedubo dubo ma mi tho ngo, ebikwayu, man Mungu bimio ire kwo pi ju m’udubo ma mi tho ngo. Dubo nuti ma mi tho: awacu ngo nia ekwai pi maeni. 17Gondri ceke ci en e dubo: dubo nuti ma mi tho ngo. 18Wang’eyo nia ng’atu ma tek Mungu nyole dubo ngo; ento ng’atu ma Mungu nyole gwokre gire, e ng’atu ma rac mulo kume de ngo. 19Wang’eyo nia wa pa Mungu, man ng’om ngung’ de vuto i ng’atu ma rac. 20Wang’eyo de nia Wod Mungu bino, emio iwa ng’eyong’ec de, kara wang’ei ng’atu ma en e mandha, wabedo de i ng’atu ma en e mandha, ndhu i Wode Yesu Kristu. Maeni Mungu mandha, ku kwo ma rondo ku rondo. 21Nyithindho para ma thindho, wugwokru giwu ni ayi gin m’acwia.

will be added

X\