1 John 4

1Jumer, kud wuyi tipo ceke, ento wuponj tipo, tek giai ba Mungu, kum jubila mi ndra dupa cidho nge nge i ng’om. 2Kum kumeni waug’eyo Tipo pa Mungu: ku ba tipo ceke ma tuco nia Yesu Kristu daru bino i kum nwang’u en e pa Mungu: 3man ku ba tipo ceke ma tuco Yesu ngo nwang’u en e pa Mungu ngo: man maeni en e tipo japiem Kristu, ma wuwinjo pire nia ebebino; e kawono edaru wok i ng’om. 4Wun wu pa Mungu, nyithindho para ma thindho, man wuloyogi: kum ng’atu ma ni i iwu e dit ma sagu ng’atu ma ni i ng’om. 5Gin gi mi ng’om: kum kumeuo giyero calu mi ng’om, ng’om de winjog. 6Wan wa pa Mungu: ng’atu m’ung’eyo Mungu winjowa; ng’atu ma pa Mungu ngo winjowa ngo. Kum maeni wang’eyo tipo mi lemandha, ku tipo mi kier. 7Jumer, dong’ wamara, kum mer en e pa Mungu; man ku ba dhanu ceke ma mer nwang’u Mungu nyole, man eng’eyo Mungu. 8Ng’atu ma mer ungo nwang’u eng’eyo Mungu ngo; kum Mungu en e mer. 9I maeni mer pa Mungu nyuthre iwa, nia Mungu oro Wode kulong’ i ng’om kara wabed kwo ni kume. 10I maeni mer ungo, nia wamaru Mungu, ento nia emaruwa, eoro wode de bed ni lam mi dubo mwa. 11Jumer, tek Mungu maruwa kumeno. maku wan bende wamara. 12Ng’atu moko mbe ma foduneno Mungu nindo moko: tek wamara, nwang’u Mungu bedo i iwa. man mer pare doko ndhu cu i iwa: 13ku maeni wang’eyo nia wabedo i ie en ke i iwa, kum emio iwa kum Tipo pare. 14E waneno man wanyutho lembe de nia Wego oro Wod ubed ni Jalar mi ng’om. 15Ng’atu ma tek bituco nia Yesu en e Wod Mungu, nwang’u Mungu bedo i ie, en de i Mungu. 16E wang’eyo wayio de mer ma Mungu bedo ko yor i bang’wa. Mungu en e mer; man ng’atu m’ubedo i mer nwang’u ebedo i Mungu, man Mungu de bedo i ie. 17I maeni mer udoko ndhu cu i bang’wa, kara wabed ku tegocwiny i ceng’ pokolembe; kum calu ebedo, cil wan bende wabedo kumeno i ng’ombuni. 18Lworo mbe i mer: ento mer ma ndhu cu riemo lworo woko, kum lworo bedo ku masendi; man ng’atu ma lworo nege nwang’u edoko ndhu cu ngo i mer. 19Wamaru, kum elar emaruwa. 20Tek ng’atu moko wacu kumae, Amaru Mungu, ma en ke edagu umiu, nwang’u en e jandra: kum ng’atu m’umaru umin ungo m’eneno, ecopo maru Mungu ngo m’eneno ngo. 21E cik maeni ma wabedo ko ai i bang’e, nia ng’atu m’umaru Mungu dong’ emar umin bende.

will be added

X\