1 John 3

1Wunen maram mer ma Wego maru kowa bedo ko m’emio iwa, ketho julwong’owa nyithindho pa Mungu; wabedo kumeno de. Kum lembe nini ng’om ung’eyowa ngo, kum eng’eye ngo. 2Jumer, kawono wa nyithindho pa Mungu, endre fodi enyuthre ngo nia wabibedo ni ang’o. Wang’eyo nia, tek ebinyuthie, wabibedo calkude; kum wabinene cli calu ebedo. 3Man ku ba dhanu ceke m’ubedo ku genogen maeni i bang’e edwokre leng’ gire, cil calu en e leng’. 4Ku ba dhanu ceke ma timo dubo etimo co bende; dubo de en e camuco. 5Man wang’eyo nia enyuthre kara ekab dubo woko; man dubo mbe i ie. 6Ng’atu ma tek ubedo i ie dubo ngo: ng’atu ma tek udubo meca nwang’u enene ngo, kadok ang’eya de eng’eye ngo. 7Nyithindho para ma thindho, kud wuyi ng’atu moko tel wiwu ariri swa; ng’atu ma timo bedopwe nwang’u ebedo pwe, cil calu en ebedo pwe: 8ng’atu ma timo dubo en e pa wonabali; kum wonabali dubo ugambre ku kwong’a. Kum lembe maeni Wod Mungu nyuthie, kara enyoth tic pa wonabali. 9Ng’atu ma tek Mungu nyole timo dubo ngo, kum kodhi pare bedo i ie: man ecopo dubo ngo, kum Mungu nyole. 10I maeni nyithindho pa Mungu nyuthii, man nyithindho pa wonabali: ng’atu ma tek timo bedopwe ngo nwang’u en e pa Mungu ngo, kadok ng’atu m’umaru umin ungo bende. 11Kum maeni en e rwonglembe ma wawinjo ugambre ku kwong’a, nia dong’ wamara: 12calu Kain ungo ma en e pa ng’atu ma rac, man enego umin. Man enege mir ang’o? Kum tic pare bedo rac, p’umin e m’ubedo pwe. 13Iwu kud uwang’ lii, umego, tek ng’om udaguwu. 14Wang’eyo nia waai i tho wamondo i kwo, kum wamaru umego. Ng’atu m’umaru ngo bedo i tho. 15Ng’atu ma tek udagu umin nwang’u en e janek: man wang’eyo nia janek umbe ma bedo ku kwo ma rondo ku rondo i ie. 16Kum kumeni wang’eyo mer, kum emio kwo pare piwa: e maku wan bende wami kwo mwa pir umego. 17Ento ng’atu m’ubedo ku piny m’i ng’om. man eneno can piny unego umin. man ecero ngisi pare ue, mer pa Mungu bedo i ie nenedi? 18Nyithindho para ma thindho, ku wamar ku lembe, kadok ku dhok; endre ku tic man lemandha. 19Kum maeni wabing’eyo nia wan wa mi lemandha, man wabiketho adundewa kwio i wang’e: 20kum tek adundewa poko lembe i wiwa rac, Mungu dwong’ ma sagu adundewa, man eng’eyo gin ceke. 21Jumer, tek adundewa poko lembe i wiwa rac ungo, nwang’u wabedo ku tegocwiny yo ba Mungu; 22man gin ma tek wakwayu wagamu i bang’e, kum waworo cik pare watimo de gin ma nyayu mutoro i wang’e. 23Maeni de cik pare, nia wayi nying Wode Yesu Kristu, man wamara cil calu emio iwa cik. 24Man ng’atu m’uworo cik pare bedo i ie, en de ebedo i ie. Ku maeni de wang’eyo nia ebedo i iwa, ni kum Tipo m’emio iwa.

will be added

X\