1 Corinthians 9

1Abedo agonya ngo? an a jakwenda ngo? aneno Yesu ma Rwoth mwa ngo? wun wu bodho para ngo i Rwothi? 2Tek an a jakwenda ngo ni jumange, ento iwu re an a jakwenda; kum wun nini e ma wun ayi kwenda para i Rwoth. 3Dhoga m’aloko ni ju m’uluro i lembe para e eni. 4Wan tego mwa mbe ma wacamu ko ku ma wamadhu ko de? 5Wan tego mwa mbe mawapeyo ko dhaku ma jayici,cil calu dong jukwenda, man utumin Rwoth, ku Kefagi? 6Kadi an a kenda waku Barnaba, tego mwa mbe ma wawek ko tici? 7Asikari makani ma timo lwiny ku jupiny pare gire? ng’a ma pidho podho mir ulok, ma kucam nyinge ngo? kadi ng’a ma tungo udul lim, ma kumadh cag udul limbe de ngo? 8Ayero gin maeni calu dhanu yero? kadi cik bende yero kumeni ngo? 9Kum egore i cik pa Musa kumae, Kud wutwi dhu koni dhiang’ kinde m’ebeyoko cam. I Mungu bepido pi koni dhiang’, 10kadi eyero lembe maeni ndhu kum lembe mwa? Eyo. kum lembe mwa: kum ng’atu m’ufuro fur maku efur ku genogen, man ng’atu m’ufodo de, maku efod ma ie geno ya ebimaku. 11Tek wacoyo iwu gin mi tipo, en e gin ma dit tek wabikayu gin mu mi kumi? 12Tek jumange gibedo ku tego maeni i wiwu, wabedo kumeno ma sagu ngo? Ento watimo ku tego maeni ngo, endre wamula ku gin ceke, kara ku wacer lembanyong’a ma juboth ko pa Kristu. 13Wung’eyo ngo nia ju ma gitimo kum gin ma leng’ gicamu gin mi hekalu, man ju ma gitimo kum pemblam gibedo ku maka migi karacelo ku pemblami? 14Cil kumeno Rwoth uketho ya ju ma giyero lembanyong’a ma juboth ko gibibedo de ni kum lembanyong’a nini. 15Ento atimo gin maeni acel de ngo; man agoro gin maeni ngo ma nia etimbre ira; kum e ber ira tek atho, sagu ma tek ng’atu moko thiro kulula para. 16Kum tek ayero lembanyong’a ma juboth ko, gin moko mbe i bang’a m’alula i kume; kum juketho lembene i kora; kum can i wia, tek ayero lembanyong’a ma juboth ko ngo. 17Kum tek atimo eni ku yeny m’ayenyo ra, anwang’u sukuliane: endre tek ku yeny m’ayenyo an ungo, e judaru ketho tic i kora. 18Kum kumeno sukulia para en e ang’o? Nia, kan ayero lembanyong’a ma juboth ko, aketh lembanyong’ane wok mananu, kara kud atim ku tego ceke i lembanyong’a calu ma nwang’u acopo timo. 19Kum kadok abedo agonya ni dhanu ceke, adwokra gira igi ceke ni ng’eca, kara alim dhanu m’usagu. 20Man ni Juyahudi adoko calu Jayahudi, kara alim Juyahudi; ni ju ma gini the cik ke, calu ani the cik, ma nwang’u an gira ke ani the cik ungo, kara alim ju ma gini the cik; 21ni ju ma cik umbe kugi, calu m’ambe ku cik, ma an ke ambe ku cik ungo ku ba Mungu, endre ani the cik ni Kristu, kara alim ju ma cik umbe kugi. 22Ni ju ma ng’ic adoko ng’ic, kara alim ju ma ng’ic: adoko gin ceke ni dhanu ceke, kara ku yo moko abodh dhanu moko. 23Man atimo gin ceke ni lembanyong’a ma juboth ko, kara an bende agam maka para karacelo ku joca. 24Wung’eyo ngo nia ju ma giringo i kwaya ma jubolo giringo ceke, endre ng’atu acel e ma nwang’u sukulia mi sag m’esagu ko? E wuring kumeni; kara wusagi. 25Man ku ba dhanu nzu m’uponjo ya esag i kwaya ma jubolo edhiro wi ava gin ceke. Nie gitime kara ginwang’ jamkermiwic ma nyothre; ento mwa re ma nyothie ngo. 26Ka kumeno aringo kumeni, calu ma swa ngo; abecwanyu kumeni, calu m’acwanyu lietho ngo: 27ento afodo kuma, man adwoke ni ng’eca: kuno nyo ku yo moko, ku yo ng’ei yero lembe ni jumange, an nini e ma jubicora cen.

will be added

X\