1 Corinthians 7

1Nie pi gin ma wugoro pire: ebedo ber ni ng’atu ma nico ya kud emul kum nyaku. 2Ento, kum tarwang’, wek co kubang’gi kubang’gi ng’atuman ubed ku cege gire, man ke mon de kubang’gi ku.. bang’gi wek ng’atuman ubed ku cware gire. 3Wek ng’atu ma nico uribre ku cege ku mer: dhaku bende kumeno giku cware. 4Dhaku tegone mbe kum kume gire, ento cware re: ng’atu ma nico bende kumeno tegone mbe kum kume gire, ento cege re. 5Kud wukwer ribru karacelo, ma tek wukuripo pire ngo mi nindo moko, kara wumiru giwu ni rwo, e ka wudong’ wubed karacelo kendo, kara Jok kud ubidhwu ku lembe mi dhiro wi kum ungo. 6Ento maeni ayero kum ju.. yio ya ayer, ma ang’ola re ngo. 7Endre ayenyo ya dhanu ceke bed calu an. Ento ku ba dhanu ceke ng’atuman ubedo ku giramia pare m’uai ba Mungu, acel kumae, mange ke kumae. 8Ento awacu ni ju ma aradu man ni mon ma coggi tho de kumae, Maku gibed ndhu calu an. 9Ento tek gicopo ciro ava kumgi ngo, wek gigambri: kum tek jugambri ber ma sagu tek kumgi reuni. 10Ento ni ju ma gigambri ang’olo igi ku.. mae, ere an ungo, ento Rwoth re, Ya dhaku kud uwek cware 11(ento tek eai, wek ebed ndhu musuma, kadi gitit kindgi giku cwarene); man ya nico kud uwek cege. 12Ento ni dong dhanu awacu kumae, Rwoth re ngo: Tek umego moko bedo ku cege ma jayic ungo, ma cegene de maru ya gibed gikude, dong’ kud eweke. 13Man ke dhaku ma tek ubedo ku cware ma jayic ungo, ma cwarene de maru ya gibed gikude, dong’ kud ewek cwarene. 14Kum cware ma jayic ungo judwoke leng’ ni kum cege, man ke dhaku ma jayic ungo judwoke leng’ ni kum umego: tek ebedo kumeno ngo nwang’u nyithindho mu gibedo ma gi leng’ ungo; ento kawono gi leng’. 15Ento tek ng’atu ma jayic ungo ai, wek eai; umego kadi nyamego de gi jumiru ni wagi lembe ma kumeni ngo; ento Mungu iwong’owa i kwiocwiny. 16Kum ing’eyo nenedi, E dhaku, tek ibibodho cweri? kadi ing’eyo nenedi, E nico, tek ibibodho cegi? 17Ento, calu Rwoth udaru poko ni dhanu kubang’gi kubang’gi, calu Mungu daru lwong’o dhanu kubang’gi kubang’gi, wek ewoth kumeca. E ang’olo lembe kumeno i kanisa ceke. 18Julwong’o ng’atu moko ma judaru timo yaa i kume? dong’ kud edok calu ma jutimo yaa i kume ngo. Julwong’o ng’atu moko ma fodi jukutimo yaa i kume ngo? dong’ ku jutim yaa i kume. 19Yaa en e gin moko ngo, yaango de en e gin moko ngo; ento woro lembang’ola pa Mungu re. 20Ku ba dhanu ceke wek ng’atuman ubed ku rambe ma julwong’e ko. 21Julwong’i ma nwang’u i jamiru? cwinyi kud upid pire: ento, tek ecopre iri ya ibed agonya, dong’ iyi. 22Kum ng’atu ma julwong’e i Rwoth ma nwang’u en e jamiru, en e ng’atu m’agonya pa Rwoth: kumeno de ng’atu ma julwong’e ma nwang’u ebedo agonya de, en e jamiru pa Kristu. 23Jung’iewowu ku wel piny; kud wudok jumiru mi dhanu. 24Umego, ku ba dhanu ceke wek ng’atuman ubed ku Mungu ku rambe m’ebedo ko kinde ma julwong’e. 25Nie pi nyir ma sumba abedo ku lembang’ola pa Rwoth ungo: ento amio lembe ma ia poro, calu ng’atu m’unwang’u kisa ba Rwoth ya ebed mandha. 26Ia wacu kumeno ya eni ber kum lem ma tek ma kawono ma ni i kumwa, ya e ber ni ng’atu ma nico nia ebed ndhu ku rambe m’ebedo ko. 27Ibedo atwia ku dhaku? kud iyeny nia jugonyi. Ibedo agonya ni dhaku? kud iyeny dhaku. 28Ento tek igamu, meca idubo ngo; man tek nyaku ma sumba gomo co, meca edubo ngo. Ento wagi ju ma kumeni binwang’u can i kum: man ayenyo acerwu ni maeni. 29Ento ayero maeni umego, nindo dong’ cek, kara ugambre kawono ju ma gidaru gambri gibed calu gikugambri ngo; 30man ju m’uywak, calu gikuywak ungo; man ju ma anyong’a benegogi, calu ma anyong’a negogi ngo; man ju m’ung’iewo ng’ieu, calu gikubedo ku jupiny ungo; 31man ju ma gitimo ni ng’om maeni, gibed calu gikutimo dit ungo: kum ayi ng’om maeni bekadhu woko. 32Ento ayenyo wubed agonya ni gin ma dieng’o cwiny. Ng’atu ma en e jamusuma ie pido pi gin pa Rwoth cu, maram ecopo nyayu ko mutoro i Rwoth: 33ento ng’atu ma won dhaku re ie pido pi gin m’i ng’om, maram ecopo nyayu ko mutoro i cege. 34Man tung’ tung’ maeni bende ni i kind dhaku ku nyaku ma sumba. Ng’atu m’ugomo co ngo eparu pi gin pa Rwoth cu, kara ebed leng’ i kume kud i cwinye bende: ento ng’atu ma cware nuti re ie pido pi gin m’i ng’om, maram ecopo nyayu ko mutoro i cware. 35Man ayero maeni ni kuloka mu giwu; ma nia abol ko uwic i wiwu re ngo, endre kum maeno ma maku wutim, man kara wutim ni Rwoth ma gin moko mbe m’ucerowu. 36Ento tek ng’atu moko ie wacu nyo etimo rac kum nyare ma sumba, tek nwang’u kagame kadhu, man tek emaku ya ecidhi, wek etim gin m’eyenyo; meca edubo ngo; wek gigambri. 37Ento ng’atu ma adundene cungo tek, ma lembe moko mbe m’ucung’e, ento tego pare nuti kum lembe ma ie caku, man ekeco maeni i adundene gire, ya egwok nyare ma dhe ubed sumba, meca etimo dre. 38Ka kumeno ng’atu m’umio nyare ma dhe ma sumba ya junyom meca etimo dre; man ng’atu m’umio nyare ngo ya junyom etimo ber m’usagu. 39Dhaku bedo atwia maram cware fodubedo kwo; ento tek cware tho, meca egonjre m’ecopo gomo ma ie yenyo; ndhu i Rwoth. 40Ento ia poro, nia anyong’a pare sagu tek ebedo kende; man ia wacu nia an bende Tipo Mungu ni kuda.

will be added

X\