1 Corinthians 5

1Lembe yik andha nia tarwang’ ni i kindwu, ma en e tarwang’, ma kadok cli kind Thekdhanumange de embe, ya ng’atu acel m’i kindwu bedo ku ci won. 2E wutingru ating’a, man can unegowu ngo, kara ng’atu m’utimo tic maeni ukabre woko kud i kindwu. 3Kum andha, an m’ambe ku kum ento anuti ku cwiny re, adaru poko lembe pa ng’atu m’utimo ginduni kumeno calu ma tek anuti, 4i nying Rwoth mwa Yesu, wun ma wucokru karacelo, ku cwinya de, ku tego pa Rwoth mwa Yesu, 5kara jumi ng’atu ma kumeno ni Jok pi nyoth ma junyotho ko kum, kara cwiny uboth i ceng’ pa Rwoth Yesu. 6Kulula mu e ber ungo. Wung’eyo ngo nia thobi ma nyanok thumo i kwen ceke? 7Wulwok thobi ma con cen, kara wubed kwen ma nyen, cil calu ma thobi mbe i beng’wu. Kum lam mwa mi kadhukuwijo judaru lamu, ndhu Kristu: 8kum kumeno dong’ wakwiru agba, ku thobi ma con re ngo, kadok ku thobi mi cwiny mir akece ku dubo de ngo, ento ku kwen ma thobi mbe i ie mi cwiny ma abombi mbe i ie ku lemandha. 9Agoro iwu i waraga para ya kud wuribru ku weg tarwang’; 10awacu ngo ma nia kud wuribru ki ku weg tarwang’ m’i ng’om maeni, kadi ku ju ma ketho cwiny hai kum piny ku juvugdhanu de, kadi ku ju ma rwo ni ayi gin m’acwia, kum tek ebedo kumeni nwang’u wukoai aaia be kud i ng’ombuni: 11ento calu lembe bedo kumeni, agoro iwu ya kud wuribru, tek ng’atu moko ma julwong’e umego e won tarwang’, kadi ng’atu ma ketho cwinye hai kum piny, kadi ng’atu ma rwo ni ayi gin m’acwia, kadi jacai cac, kadi andrej kong’o, kadi javugdhanu; ku wagi ng’atu ma kumeni, kud wucam kude. 12Kum en e lembe para awene ma nia apok lembe mi ju ma gini woko? Wupoko lembe mi ju ma gini i ie ngo? 13Ento ju ma gini woko re Mungu poko lembe migi en. Dong’ wukab jadubo nino woko kud i kindwu.

will be added

X\