1 Corinthians 3

1An de, umego, acopo yero iwu ngo calu ni weg tipo, ento calu ni weg kum, ve ni mukere ma ni i Kristu. 2Akakuwu ku cak, ku ring’o ngo; kum fodi ecopre iwu ngo: eyo, cil ku kawono de ecopre iwu ngo; 3kum fodi wu weg kum: kum ka kumira ku dhau ni i kindwu, meni wu weg kum ungo, man ke wubewotho ve dhanu bewotho gin ungo? 4Kum ka ng’atu acel uwacu kumae, An a pa Paolo; mange ke wacu, An a pa Apolo: meni nwang’u wu dhanu ngo? 5Ka kumeno Apolo en e girang’o? man ke Paolo de en e girang’o? Gi jutim ma wuyio ni kumgi; man dhanu ceke kubang’gi kubang’gi ng’atuman bedo ko calu Rwoth umio ire. 6Apidho, Apolo ke kwoyo pi; ento nyai m’enyai ko Mungu mio en. 7Ka kumeno ng’atu m’upidho en e gin moko ngo, kadok en m’ekwoyo pi de; ndhu Mungu re m’umio nyai m’enyai ko. 8Nie ng’atu m’upidho ku ng’atu m’ukwoyo pi de gin acel: ento ng’atuman binwang’u sukulia pare gire rom ku tic pare gire. 9Kum wan wa jutic ma watimo karacelo waku Mungugi: wun wu girafura pa Mungu, wu giragoma pa Mungu. 10Calku bero pa Mungu ma jumio ira, acaku there ve jabodho ma riek m’ugomo ot; ng’atu mange de begomo yor i wie. Ento wek ng’atuman unen cu ram ebegomo ko yor i wie. 11Kum there mange ng’atu moko copo caku ngo ma tung’ ku eni ma jucaku, ma en e Yesu Kristu. 12Ento tek ng’atu moko begomo wi there mola ma kwar, man mola ma tar, ku kidi ma pire tek, ku yen, ku lum, ku soka; 13ku ba dhanu ceke ng’atuman tic pare binyuthre: kum cing’ nino biwodhe ka ma leng’, kum enyuthre i mac; man ke mac e ma biponjo tic mi dhanu en kubang’gi kubang’gi ram ebedo ko. 14Tek tic pa ng’atu moko m’egomo yor i wie bipor bo, ebinwang’u sukuliane. 15Tek tic pa ng’atu moko biwang’, ruvwa bikwanye: ento en gire re ebiboth; endre calu kud i leb mac. 16Wung’eyo ngo ya wun wu hekalu pa Mungu, man Tipo Mungu de bedo i iwu? 17Tek ng’atu moko nyotho hekalu pa Mungu, Mungu binyothe; kum hekalu pa Mungu e leng’, ma wun de wu hekalune. 18Dong’ ng’atu moko kud uwondre gire. Tek ng’atu moko m’i kindwu ie wacu nyo e riek i ng’om maeni, wek edok jakasegu, kara edok riek. 19Kum rieko m’i ng’om maeni en e lemkasegu ku ba Mungu. Kum egore kumae, En m’emaku jurieko i riu migi: 20man kendo, Rwoth ung’eyo lembapida mi jurieko, ya gi mananu. 21Kum kumeno dong’ ng’atu moko kud ulule pi dhanu. Kum gin ceke en e mu; 22kadok Paolo, kadi Apolo, kadi Kefa, kadi ng’om, kadi kwo, kadi tho, kadi gin ma kawono, kadi gin ma bibino; ceke en e mu; 23wun ke wu pa Kristu; Kristu ke en e pa Mungu.

will be added

X\