1 Corinthians 2

1An de, umego, kan abino i beng’wu, abino ku bero mi wec ungo kadi mi rieko de ngo m’ayero ko iwu lembatuca pa Mungu. 2Kum akeco ya kud ang’ei gin moko m’i kindwu, ndhu Yesu Kristu, en ma jugure. 3E abedo i kindwu m’abedo ng’ic, ku lworo, man ku mielkum ma dit. 4Wec para ku lembayerane de gibedo ni lembacung’a mi rieko ngo, ento i nyuth pa Tipo re man mi tego: 5kara yioyic mu kud ucung i rieko mi dhanu, ento i tego pa Mungu. 6Wayero rieko, ento, i kind ju ma wang’gi teng’ni kum lembe: ere rieko m’i ng’om maeni ngo, kadi mi jubim m’i ng’om maeni ngo, ma kakare bibekadhu: 7ento wayero rieko pa Mungu i lembamung’a, cil rieko m’ubedo apana, ma Mungu lar uketho ku kwong’a ma fodi ng’om umbe ni dwong’ mwa: 8ma jubim m’i ng’om maeni moko mbe m’ung’eyo: kum tek ande ging’eyo, kuno di gikuguro Rwoth mi dwong’ ungo; 9ento calu egore kumae, Gin ma wang’ fokuneno ngo, ku ma ith de fokuwinjo ngo, Ma fokumondo de i adunde dhanu ngo, Gin ceke ma Mungu yiko ni ju m’umare. 10Ento Mungu nyuthogi iwa ku Tipo: kum Tipo beyenyo i gin ceke, eyo, cil lembe pa Mungu ma ng’eyo tek. 11Kum ng’a m’i kind dhanu m’ung’eyo lembe m’i ng’atu moko, ndhu cwiny ng’atuca gire, ma ni i ie ngo? gin pa Mungu de kumeno ng’atu moko mbe m’ung’eyo, ndhu Tipo Mungu kende. 12Ento wajolo, tipo m’i ng’om ungo, ento tipo m’uai ba Mungu; kara wang’ei gin ma Mungu mio iwa k’abamba. 13Ginduni bende e ma wayero pire, ku lembe ma rieko mi dhanu beponjo re ngo, endre ma Tipo beponjo re; m’ebetuco lembe mi tipo ni ju ma gi weg tipo. 14Nie ng’atu ma mi kum ejolo gin mi Tipo Mungu ngo: kum gibedo ni lemkasegu ire; man ecopo ng’eyogi ngo, kum jung’iogi ku tipo. 15Ento ng’atu ma won tipo re ng’io i gin ceke, man ke en gire ng’atu moko mbe ma ng’io lembe pare. 16Kum ng’a m’ung’eyo pidoic pa Rwothi, ketho eponje? Ento pidoic pa Kristu ni i bang’wa.

will be added

X\