1 Corinthians 15

1Nie aketho wung’ei lembanyong’a maeni ma juboth ko m’ayero iwu ma wujolo bende, ma wucungo i ie bende, umego, 2ma wuboth de ni kume, tek wutwiru ndhu wi lembe m’ayero iwu, tek wukuyio mananu ngo. 3Kum alar amio iwu maeca ma an bende ajolo: ya Kristu tho kum dubo mwa calku lembagora pa Mungu: 4ya juyike bende; man nia ecer i ceng’ mir adege calku lembagora pa Mungu; 5man nia enen ni Kefa; macen ke ni juapar wi ario; 6macen enyuthre ni umego ma sagu dak abic wang’ acel, jumoko m’i kindgi ginindo, ento jukucel ma dit gidong’ cil eni; 7macen enyuthre ni Yakobo; macen ke ni jukwenda ceke; 8man yo ng’eye ceke, calu ni nyathin ma junyole ma fodi kanyol pare kutundo ngo, e enyuthre ira bende. 9Kum an a nok ma sagu jukwenda wada ceke, m’aromo ngo ya julwong’a jakwenda, kum anyayu ragedo kum kanisa pa Mungu. 10Ento ni kum bero pa Mungu abedo ku ramba nini: man ke berone m’emia junwang’u ebedo mananu ngo: ento amula ku tic ma sagugi ceke: endre an ungo, ento bero pa Mungu m’ubedo kuda re. 11E kadok an, kadi gin de, wayero kumeni, wun bende wuyio kumeni. 12Nie tek juyero ya Kristu cer uai ku kind ju m’utho, jumoko m’i kindwu giwacu ya cer ma kind ju m’utho mbe nenedi? 13Ento tek cer mi ju m’utho mbe, kadok Kristu de cer ungo: 14man tek Kristu kucer ungo, nwang’u lembayera mwa bedo mananu, yioyic mu bende bedo mananu. 15Eyo, wan de junwang’u wa junyuth mi ndra pa Mungu; kum wanyutho pi Mungu ya eketho Kristu cer eting’e malu: m’eting’e malu ngo, tek ebedo kumeno nia ju m’utho gicer ungo. 16Kum tek ju m’utho gicer ungo, kadok Kristu de cer ungo: 17man tek Kristu kucer ungo, yioyic mu en e mananu; nwang’u fodi wuni i dubo mu. 18E joni bende ma ginindo i Kristu girwinyo. 19Tek wageno Kristu i kwo maeni kende, nwang’u wa jucan ma sagu dhanu mange ceke. 20Endre kawono Kristu cer ku kind ju m’utho, en e mwoka ma kwong’a mi ju m’unindo. 21Kum tho wok ni kum dhanu, cer ma kind ju m’utho bende wok ni kum dhanu. 22Kum calu i Adamu dhanu ceke tho, e kumeno bende i Kristu dhanu ceke binwang’u kwo. 23Ento dhanu acel acel ku kakagi kendgi: Kristu landu wi mwoka; macen ju ma gi pa Kristu, i bino pare. 24E kajikne lund ubino, kan ebimio ker ni Mungu, ma en e Wego; kinde m’ebidaru kabu bimobim ceke ku ng’ol ceke man tego. 25Kum ebikocamu ker be, cil m’ebiketho ko jukwoje ceke the tiende. 26Jakwor macen ma bikabre en e tho. 27Kum, Eketho gin ceke doko wor the tiende. Ento kan ewacu kumae, Gin ceke juketho ubed wor, e jung’eyo nia lembene coko ng’atu m’uketho gin ceke bed wor ire ngo. 28Man ka judwoko gin ceke bed wor ire, e Wod nini bende bilund doko wor ire en e ng’atu m’edwoko gin ceke bed wor ire, kara Mungu bed ceke i ceke. 29Tek ebedo kumeno ngo ju ma jumio baputisi igi kaka ju m’utho gibitimo ang’o? Tek ju m’utho gicer ki ngo, jumio baputisi kakagi mir ang’o? 30nedi wakuno kumwa bende ni tho ku ba saa ceke? 31Ayero ku ba kulula maeni m’alulo ko piwu, umego, m’abedo ko i Kristu Yesu Rwoth mwa, atho ku ba rupiny. 32Tek ku kura dhanu anyegra ku yedi i Efeso, kuloka para e girang’o? Tek ju m’utho cer ungo, wek wacam wamadhi, kum urwo watho. 33Ku juwondwu: Rib ma juribri ko ku ju ma pigi rac nyotho pi jo ma ber. 34Dong’ wuceu ni bedonger pwe de, man kud wudubi; kum jumoko ng’eyong’ec pa Mungu mbe kugi: ayero eni kara lewic unegwu. 35Ento ng’atu moko biwacu kumae, Ju m’utho gicer nenedi? Giwok ku kum manedi? 36I jakasegu, maeno m’icoyo in enwang’u kwo ngo tek ekoetho ngo: 37maeno de m’icoyo, icoyo kum ma bibedo ngo, endre kodhi ma kodhi kende, kuno mi nganu, kadi kwond kodhi mange; 38ento Mungu mio kum ire cil calu ie yenyo, man emio kum ni kodhi ndri kubang’gi kubang’gi. 39Ring’o ceke ring’o acel ungo: ento acel ring’o mi dhanu, ring’o mange ke mi lei, ring’o mange ke mi winyo, mange ke mi rec. 40Kum m’i polo bende nuti, man kum m’i ng’om: ento dwong’ mi m’i polo en e acel, mi m’i ng’om bende en e mange. 41Dwong’ mi ceng’ de acel, dwong’ mange ke mi dwi, dwong’ mange ke mi cero; kum dwong’ mi cero acel e tung’ ku cero mange. 42E cer mi ju m’utho bende bedo kumeno. Jucoye i nyoth; ecer umbe nyoth: 43jucoye m’umbe yung; ecer i dwong’: jucoye i ng’ic; ecer i tego: 44jucoye m’e kum mi kum; ecer de m’e kum mi tipo. Tek kum mi kum nuti, kum mi tipo bende nuti. 45Egore kumeno bende kumae, Ng’atu ma kwong’a ma Adamu doko ni ng’eyong’ec ma kwo. Adamu macen udoko ni tipo ma mio kwo. 46Ento maeno ma mi tipo, en e ma kwong’a ngo, ento maeno ma mi kum re; macen re ma mi tipo. 47Ng’atu ma ma kwong’a ca eai i ng’om, en e mi ng’om; ng’atu ma mir arionde en e mi polo. 48Calu gin m’i ng’om ubedo, e ju ma gi mi ng’om bende gibedo kumeca: man calu m’i polo bedo, e ju ma gi mi polo de gibedo kumeca. 49Man calu wan wadaru bedo kud ayi maeni mi ng’om, e wabibedo kud ayi maeni mi polo bende. 50Nie ayero maeni, umego, nia ring’kum ku rimo copo camu pacu mi ker pa Mungu ngo: kadok nyothri de copo camu pacu m’umbe nyothii ngo. 51Nen, ayero iwu giramung’a: Kawa ceke wabinindo ngo, ento jubilokowa kawa ceke, 52nyapil calu goyowang’, kinde ma agwara ywak macen: kum agwara biywak, man ju m’utho bicer m’umbe nyothri, e wan de jubilokowa. 53Kum maeni ma nyothre ekoerony ma nyothre ngo be, man ng’atu ma tho maeni ekoerony ma tho ngo be. 54Ento ka ma nyothre maeni daru ronyo ma nyothre ngo, man tek ma tho maeni daru ronyo ma tho ngo, lembe m’ugore bilund timbre kakare m’uwacu kumae, Jumwonyo tho i aloci. 55E tho, aloci peri ane? E tho, kwirni ane? 56Kwir mi tho en e dubo; man tego mi dubo en e cik: 57ento foyofoc ni Mungu, m’umio iwa aloci ni kum Rwoth mwa Yesu Kristu. 58Kum kumeno, juwada ma jumer, wucung nging’ nging’, ma wulokru ngo, ma wusegru thiri thiri i tic pa Rwoth, kum wung’eyo nia tic ma wumulu kudo en e mananu ngo i Rwoth.

will be added

X\