1 Corinthians 11

1Wukwany kotha, calu an bende akwanyu koth Kristu. 2Nie apakuwu kum wupoi i kuma i gin ceke, man ke wuceru wi lembapoka, cil calu amio kogi iwu. 3Ento ayenyo wung’ei, nia wi co ceke kubang’gi kubang’gi en e Kristu; man wi dhaku en e ng’atu ma nico; wi Kristu ke en e Mungu. 4Co ceke kubang’gi tek eberwo kadi ebeewo, ma wie bedo arieba, meca enyayu lewic i wie. 5Ento ku ba mon re ceke ma tek eberwo kadi ebeewo ma wie kubedo arieba ngo meca enyayu lewic i wie; kum en e calacel ma tek wie bedo agwara. 6Kum tek dhaku kuriebo wie ngo, wek wie bed anyara: ento tek en e lewic ni dhaku ya junyar wie kadi jugwar de, e dong’ wie bed arieba. 7Kum ng’atu ma nico maku wie kud ubed arieba, kum en e ayi ku dwong’ pa Mungu: ento dhaku re en e dwong’ pa ng’atu ma nico. 8Kum ng’atu ma nico ai ba dhaku ngo; ento dhaku re m’uai ba ng’atu ma nico: 9kum kadi ng’atu ma nico de kucwire ngo pi dhaku; ento ng’atu ma dhaku re m’ucwire pi ng’atu ma nico: 10kum lembe nini maku dhaku bed ku giranyutha mi ng’ol i wie, ni kum malaika . 11Karacelo ku maeni, dhaku bedo umbe ng’atu ma nico ngo, ng’atu ma nico de kubedo umbe dhaku ngo, i Rwoth. 12Kum calu dhaku ai ba ng’atu ma nico, e kumcno bende ng’atu ma nico de nyole ni kum dhaku; ento gin ceke ai ba Mungu. 13Wupok wun i kindwu giwu: emaku piny nia dhaku rwo ni Mungu ma wie bedo arieba ngo? 14Cil kurajo de ponjowa ngo, nia, tek ng’atu ma nico yukwie wobo, en e lewic ire? 15Ento dhaku re tek yukwie wobo, en e dwong’ ire: kum yukwie mire ire ni girauma. 16Ento tek ng’atu moko nyutho nia eyenyo piem, kura ma kumeno wambe kudo, kadok kanisa pa Mungu de. 17Ento kan amio iwu lembang’ola maeni, apakuwu ngo, kum wucokru ma wutimo ko ber m’usagu ngo, ento ma wutimo ko rac ma sagu. 18Kum ma kwong’a, ma nwang’u wucokru i kanisa, awinjo nia pokri ni i kindwu; nyakanok ci ayenyo yie de. 19Kum yic mi ndra bende gibibedo umbe ngo i kindwu be, kara ju ma jufoyogi ginyuthri i kindwu. 20Ka kumeno ka wucokru karacelo, wucopo camu cemo pa Rwoth ungo: 21kum ka wubecamu dhanu ceke kubang’gi ng’atuman lar maku cemo pare mir uthieno gire ma fodi wagi kumaku ngo; man acel kec unege, mange ke mer amera. 22Ei, wun udi mu mbe ma wucam i ie wumadh de i ie? kadi wucayu kanisa pa Mungu acaya, man wunyayu lewic wi ju ma gimbe ku pinyi? Abiyero ang’o iwu? abipakuwu? I maeni apakuwu ngo. 23Kum agamu ba Rwoth maeno m’amio iwu, nia Rwoth Yesu ting’o kwen i diewor ma jucibe i ie; 24e kan efoyo foc, eng’weko ie, man ewacu kumae, Maeni kuma, ma en e piwu; wutim kumeni wupoi ko pira. 25Eting’o kikombe bende kumeca, yo ng’ei cemo mir uthieno, ewacu kumae, Kikombe maeni en e lembariba ma nyen i rimba: wutim maeni, ku ba madhu ceke ma wumadhe, i poi ma pira. 26Kum ku ba camu kwenduni ma wucamu, man ku ba madhu kikombe ma wumadhu nini, wunyutho tho pa Rwoth cil m’ebino ko. 27Kum kumeno ng’atu ma tek bicamu kwenduni kadi ma bimadhu kikombe maeni ma pa Rwoth swa, e lembapoka mi kum Rwoth ku rimbe de bibedo i wie. 28Endre wek ng’atuman ung’i i ie gire, e kan edong’ ecam kwenduni, emadh kum kikombe de. 29Kum ng’atu m’ucamu m’umadhu de, meca ecamu emadhu de lembapoka ire gire, tek eng’io kum nini ngo. 30Kum lembe nini dupa m’i kindwu gibedo ng’ic kumgi de jutho, man dupa ginindo. 31Ento tek wang’io i lembe mwa giwa, kuno di jupoko lembe mwa ngo. 32Ento ka jupoko lembe mwa, e Rwoth ponjowa, kara ku jubin jupok lembe mwa rac karacelo ku ng’om. 33Kum kumeno, juwada, ka wucokru karacelo nicamu. wukur juwedwu man ukur wadi man ukur wadi. 34Tek ng’atu moko kec ubenege, dong’ ecam ku thugi; kara cok ma wucokru ko karacelo kud ubed ni lembapoka. Dong lembe abiyiko ceng’ ma tek awok.

will be added

X\