1 Corinthians 10

1Kum ayenyo ngo wubed cobo, umego, ya wegwa ceke yang’ gini ther afuru, man kagi ceke gikadhu kud i nam; 2man ke kagi ceke jumio igi baputisi ba Musa i afuru kud i pi bende; 3man ke kagi ceke gicamu cemo mi tipo ma calacel; 4man kagi ceke gimadhu giramadha mi tipo ma calacel: kum gimadhu kum kidi mi tipo m’ulubo ng’eigi; e kidine en e Kristu. 5Ento Mungu maru pi jukucel ma dit m’i kindgi ngo: kum juredhogi piny i yamba. 6Nie gin maeni bedo iwa ni por, kara awanya ma rac kud unegwa kum gin ma rac, calu awanya ma rac yang’ unegogi bende. 7Kadi kud wubed ju ma rwo ni ayi gin m’acwia, calu jumoko m’i kindgi; calu egore kumae, Dhanu gibedo piny nicamu nimadhu de, man giai malu nituko. 8Kadi ku watim tarwang’, calu jumoko m’i kindgi timo, man gipodho rubanga pier ario wi adek i ceng’ acel. 9Kadi ku wabidh Rwoth, calu jumoko m’i kindgi gibidho,man githo ni thwol. 10Kadi kud wung’ur calu jumoko m’i kindgi ging’ur, man githo ni janyoth piny. 11Nie gin maeni timbre igi ni por; man ke jugoro ni juk mwa, wan ma kajik rundi ni i wiwa. 12Kum kumeno wek ng’atu ma ie wacu ya ecungo ebed ku wang’e emaru podho. 13Abidhe moko mbe m’uwok i kumwu ma jukucop bedo ko ngo; ento Mungu en e mandha, m’e.. biyio ngo ya jubidhwu ma sagu ma wucopo bedo ko: ento karacelo kud abidhe nica ebiketho yojboth bende, kara wucopo cire. 14Kum kumeno, jumerna, wuring rwo ma jurwo ko ni ayi gin m’acwia. 15Ayero calu ni jurieko; wung’i gin m’ayero. 16Kikombe mi ngisi ma wamio mugisa i wie, eribowa karacelo i rimo pa Kristu ngo? Kwen de ma wang’weko, eribowa karacelo i kum Kristu ngo? 17kum wan, ma wa dupa, wa kwen acel, wa kum acel: kum wan ceke wang’wenyo kum kwen acel. 18Nen Israel ma ku kum: gi ju ma gicamu giralama gi juriblembe giku pemblam ungo? 19Kan ayer ang’o ke? ya gin ma julamu ni ayi gin m’acwia en e gin moko, kadi ya ayi gin m’acwia de en e gin moko? 20Ento awacu, nia gin ma Thekdhanumange gilamu, meca gilamu ni pajogi, ni Mungu ngo: man ayenyo ngo ya wuribru ku pajogi. 21Wucopo madhu kikombe pa Rwoth, ku kikombe mi pajogi de ngo: wucopo ng’wenyo ngo wi par pa Rwoth, ku wi par mi pajogi de. 22Kadi waketh nyeko tim Rwothi? tego mwa sagu pare? 23Cik uyio gin ceke; ento gin ceke ber ungo ya jutim. Cik uyio gin ceke; ento gin ceke teug’o jo ngo. 24Ng’atu moko kud uyeny ire gire, ento pa wadi re. 25Gin ma tek juloko i katali, wucam, ma wukupenjo penji moko ngo ni cwinywu m’ubepido; 26kum ng’om en e pa Rwoth, ku gin ceke m’upong’ i ie de. 27Tek ng’atu moko m’i kindgi m’uyio ngo lwong’owu i agba, e wun bende wuyenyo wucidhi; e gin ma tek juketho i weng’wu, wucam, ma wukupenjo penji moko ngo ni cwinywu m’ubepido. 28Ento tek ng’atu moko wacu iwu kumae, Maeni julamu alama, kud wucam, ni kum ng’atu m’uewe nini, man ni kum cwiny m’ubepido: 29cwiny m’ubepido, awacu, peri giri ngo, endre pa ng’atu mange; kum gony m’abedo ko agonya e, cwiny m’ubepido pa ng’atu mange ng’olo lembe pire nedi? 30Tek agamu ku foyofoc, juyero pira rac nedi kum gin maeni m’afoyo kume foci? 31Ka kumeno kadok wucamu, kadi wumadhu, kadi gin ceke ma tek wutimo, wutim ceke ni dwong’ pa Mungu. 32Kud wutim gin moko ma ketho jukier, kadi ni Juyahudi, kadi ni Juyunani, kadi ni kanisa pa Mungu: 33cil calu an bende anyayu mutoro i dhanu ceke i gin ceke, m’abeyenyo ko kuloka para gira ngo, ento mi dhanu dupa, kara gibothi.

will be added

X\