1 Corinthians 1

1Paolo, ma julwong’e ya ebed jakwenda pa Yesu Kristu ni kum yeny ma Mungu yenyo re, man Sosthene m’umegwa, 2ni kanisa pa Mungu ma ni i Korinto, cil ju ma judwokogi leng’ ni kum Kristu Yesu, ma julwong’ogi ya gibed jumaleng’ ku dhanu ceke ma gilwong’o nying Rwoth mwa Yesu Kristu ku kaka ma gini i ie ceke, Rwoth migi ku mwa bende: 3Bero iwu ku kwiocwiny m’uai ba Mungu Wegwa man Rwoth Yesu Kristu. 4Afoyo Mungu para i kumwu thiri thiri, kum bero Mungu m’umire iwu ni kum Kristu Yesu; 5kum judwokowu julonyo i gin ceke ni kume, i wec ceke man i ng’eyong’ec ceke; 6cil calu lembatuca pa Kristu nyang’ ko i iwu: 7ketho wubedo cen ungo kum giramia moko; ma wubekuro ko kanyuth pa Rwoth mwa Yesu Kristu; 8m’ebiketho wunyang’ bende cil i kajikne, kara lembe bed umbe i wiwu i ceng’ pa Rwoth mwa Yesu Kristu. 9Mungu en e mandha, ma julwong’owu ni kume i ripocwiny pa Wode ma Yesu Kristu Rwoth mwa. 10Nie abekwayuwu ma tek, umego, ku nying Rwoth mwa Yesu Kristu, ya kewu ceke wuwec lembe ma calacel, man ke pokri kud ubed i kindwu; endre wubed ma wuribru karacelo ku pidoic ma calacel man ku lembapoka ma calacel. 11Kum jugolo beng’wu ira, juwada, ku yo ba juot pa Kloe, ya piem ni i kindwu. 12Nie lembe nini e ende, ya wun kubeng’wu kubeng’wu man wacu kumae, An a pa Paolo; man, An a pa Apolo; man, An a pa Kefa; man, An a pa Kristu. 13Kristu pokre? juguro Paolo iwu? kadi jumio iwu baputisi ku nying Paolo? 14Afoyo Mungu kum amio baputisi ngo ni ng’atu moko m’i kindwu, ndhu ni Krispo giku Gayo re; 15jumaru wacu ya jumio baputisi iwu ku nyinga. 16Man ke amio baputisi ni juot pa Stefano bende: mange re, ang’eyo ngo tek amio baputisi ni ng’atu moko mange. 17Kum Kristu ora ngo ya ami baputisi, ento kara ayer lembanyong’a ma juboth ko: ku rieko mi lembe ngo, yen m’athara pa Kristu maru doko mananu. 18Kum lembe mi yen m’athara bedo calu lemkasegu ni ju ma girwinyo; ento iwa wa ju ma waboth re en e tego pa Mungu. 19Kum egore kumae, Abiroco rieko mi ju ma riek, Man ke abidwoko riu mi ju m’ung’eyo lembe doko mananu. 20Jarieko ni kani? jagorcik ni kani? japiem mi rundi maeni ni kani? Mungu dwoko rieko m’i ng’om udoko ni lemkasegu ngo? 21Kum ni rieko pa Mungu ng’om ku rieko pare ng’eyo Mungu ngo, ebedo ber ni Mungu ya ebodh ju m’uyio ku kasegu mi lembayera. 22Kum Juyahudi gipenjo giranyutha, Juyunani ke gibeyenyo migi rieko: 23ento wayero mwa Kristu ma jugure, ni Juyahudi lembene bedo ni gin ma redho jo, ni Thekdhanumange ke ebedo ni lemkasegu; 24ento ni ju ma julwong’ogi re, Juyahudi giku Juyunani de, en e Kristu ma ego pa Mungu, ku rieko pa Mungu de. 25Kum lemkasegu pa Mungu e riek ma sagu dhanu; man ke ng’ic pa Mungu e tek ma sagu dhanu. 26Dong’ wunen lwong’o mu, umego, ya ju ma gi riek ku kum gi dupa ngo, ju ma jutego de gi dupa ngo, ju ma gi judwong’ de gi dupa ngo, ma julwong’ogi: 27ento Mungu foyo gin ma kitgi mbe i ng’om, kara eketh lewic umak ju ma gi riek; man Mungu foyo gin ma ng’ic m’i ng’om, kara eketh lewic umak weg tego; 28man ke gin ma rac m’i ng’om, ku gin ma jucayugi de, e ma Mungu foyo, ku gin ma gimbe de, kara eketh gin ma ginuti gidok mananu: 29kara kum moko kud uyungre i wang’ Mungu. 30Ento wun re wuai i bang’e i Kristu Yesu, ma judwoke iwa ni rieko m’uai ba Mungu, man bedopwe ku dwokrileng’, man war: 31kara, calu egore kumae, Ng’atu m’ulule, dong’ elule i Rwoth.

will be added

X\