MATIYU 1

1Ngo wi o Ngaorom Eben Ke Aol Njiseson ab sumb wilon imbi wi. Ngo tomb Debir obu Eberehemon sem sisaol, Njises obu Debiron sem sisesa. 2Ngo tomb Eberehemom Isak maru wisesa. Isakom Njekob maru wisesa. Ngo tomb Njekobom Njura di nas mendbor di andub maru wisesa. 3Njuram Peres hesa Sira kab maru wisaol, mbinin am di Temar sisesa. Peresom Hesron maru wisesa. Ngo tomb Hesronom Erem maru wisesa. 4Eremom Aminarab maru wisesa. Ngo tomb Aminarabom Nason maur wisesa. Nasonom Salmon maru wisesa. 5Ngo tomb Salmonom Bowas maru wisaol, obun am di Erehab sisesa. Bowasom Ober maur wisaol, obun am di Urur sisea. Ngo tomb Oberom Njesi maru wisesa. 6Ngo tomb Njesim aol wesmbao aondao Debir maru wisesa. Debirom Soloman maur wisaol, obun am di mbes Yurayan were sisesa. 7Solomanom Iriyabowam maru wisesa. Iriyabowamom Abasa maru wisesa. Abasam Esa maur wisesa. 8Ngo tomb Esam Njehosapar maru wisesa. Njehosaporom Njoram maru wisesa. Ngo tomb Njoram Usaya maru wisesa. 9Usayam Njotam maru wisesa. Ngo tomb Njotam Ehas maru wisera. Ehasom Hesekaya maru wisera. 10Ngo tomb Hesekayam Manasa maru wisesa. Manasam Emon maru wisesa. 11Emonom Njosaya maru wisesa. Ngo tomb Njosayam Njekonaya di nas mendbor di maru wisaol, mbini ngo baeben hasmi tomb Babilon semom Isreyel tenaol baeben mbinin su Babilon bor kemi po mao baraesmisa. 12Ngo tomb mbini su Babilon ngo bor ngub kemi po mao baraesmi tomb Njekonayam Salliyel maru wisesa. 13Salliyelom Serababel maru wisesa. Serababelom Abayar maru wisesa. Ngo tomb Abayarom Elayakim maru wisesa. Elayakimom Eso maru wisesa. 14Ngo tomb Esom Serok maru wisesa. Serokom Ekim maru wisesa. Ekimom Elayar maru wisesa. 15Ngo tomb Elayarom Eleyasa maru wisesa. Eleyasam Matan maru wisesa. Matanom Njekob maru wisesa. 16Njekobom Njoseb maru wisesa. Ngo tomb aol Njoseb ngo nong Mariyan aoli sisesa. Ngo tomb Mariyam Njises maru wisaol, aol ngo obu Ngaorom Eben Ke Aol ora hae kismisa. 17Ngo tomb Eberehemom maru wam en en bisao o, Debirom tuma pabur sem ngo baeben maoklaopun kab oran ha himismisa. Ngo tomb Debirom maru wam aeben aeben bisao o, Babilon tenaolom mbini su Babilon bor kemi po mao baraesmi tomb di, sem maoklaopun kab mende ha himismisa. Su Babilon ngo bor kemi pismi tomb tuma pabur Ngaorom Eben Ke Aol obu ngo en anga ol pindib paesao o, sem tebo nan maoklaopun kab mend di ha himismisa. 18Eben Ke Aol Njises marisao on arman ngub wiyao. Mabor Njises marisao o nong Mariya sisaol, obu Njosebon tuman ke sokl kal hae birisao o, Njosebom Mariya nao taol bi hae tomb Wesao Ebe Tangarom Mariya obun kone bor hondaesaol nongnas pangisaol hindismisa. 19Ngo tomb Mariya obun tuman ke di Njoseb ngo hasao o obu kone ebe wi ora sisaol, obum Mariya bor di tenaol hambunom henden, sakl mao pola menjao nao bi sub ngub hondbao pango win bao wabur nao osisao pungun muklwao ko nen sabisesa. 20Ngo tomb Njosebom nong ndam ngo hondbao pango wisaon was bao nen sab ha wisaol, ko mend oran obun obam hindisao tomb Aorao Aondaon angal mini wesao bombor mend obobur kakl, Debir semon isi Njoseb o, njem njen tuman ke nong Mariya taol bun be? nao taol bun ko kone taol bu pakl pakl nao homaebe ora kisesa. Ngub kobur kakl, Pangal. Obum nongnas ngo pango wi o Wesao Ebe Tangarom ora kalaonao kisesa. 21Ngo tomb wakl kakl, Obum kang wen sao nas maruklaol obum tenaol hambunon kone bor kho wiyao o kunabur bu muklaong, njem obun imbi Njises kaebe kisesa. 22Ngo tomb Njosebom angal hambun sao ngo obam hindisao baeben, Aorao Aondao obum mbes man mini aol is mend bor ngub kao ko kao kalisao ub heneng ora ngo il so pind bile o ka. Man mini aol ngom ngub kisao. 23Pangal. Nong mondom nongnas pangobur Obum nas maruklaol Mbinim obun imbi Imanyuwel lemi ko mbes Ngaoron man mini aol is mondom waeb bu wisao ub angal mini wesaom oba nda bor Njoseb kao kalisesa. Ngub kao kalisao o obun imbi ngon te, Ngaorom nao hesa haru was hayao ko karu wisao ora. 24Ngo tomb Njoseb obu u paolu wisao nda teka peyobur, obum Aorao Aondaon angal mini wesaom kisao nda ub was bubur kisaon obum nong Mariya taol bisesa. 25Ngo tomb obum ngub taol bisao o, Njosebom nong Mariya biri nao pe haen was nas Njises mbes maru wisaol, Njosebom obun imbi Njises ko karu wisesa.


Copyright
Learn More

will be added

X\