LOˇMAˆ SAHˬ BO ̭ 6

1Aˬ dui aˬ joˆ-ehˇ ehˇ nmˇ. Miˬyehˇ-euˬ guiˬ lahˬ bi huiˬ bi myaˬ laˇ-eu g'aˇ duˬ, iˬ baˇ la ̭ k'oeˇ aˬ dui deh ̭ daˆ g'eh-eu loˇ. 2K'oeˇ lo ̭-ehˇ maˬ ngeuˇ-a. Iˬ baˇ mˇ-eu jeˬ-ahˇ ta ̭ leˇ-awˇ, aˬ dui shiˇ dzeuˇ g'aˬ-euˬ gaˇ duˇ-eu-aˬ, iˬ baˇ la ̭ k'oeˇ aˬ duiˬ aˬ joˆ-ehˇ paˇ deh ̭ daˆ g'eh le ̭ nya nmˇ. 3Aˬ dui Yeˬsu-ahˇ ta ̭ nya ni iˇ cu ̭ shawˇ-euˬ k'oeˇ-aˬ, aˬ yaw ̭ nehˬ-ehˇ tiˬ kawˆ lo ̭-ehˇ shiˇ-eu g'aˇ duˬ shawˇ-eu jeˬ pyeu ̭-eu meh lehˇ naw ma ̭ siˬ duˬ lu ̭ meh. 4Aˬ dui iˇ cu ̭ shawˇ-euˬ baˬ da neh aˬ yaw ̭ nehˬ-ehˇ tiˬ kawˆ lo ̭-ehˇ bi ba ̭ pahˬ-awˇ, a yaw ̭ shiˇ-euˬ gaˇ ta ̭-eu ma. K'oeˇ-aˬ, Aˬda Miˬyehˇ-euˬ yaw sheh ̭ k'ahˬ sehˇ huiˬ-eu baoˬ neh Ka li-ahˇ bi g'o ̭ deh ̭ laˇ-euˬ lo ̭-ehˇ, aˬ dui k'aw ̭ yaw shui ̭ deh ̭ paˇ nya-eu g'aˇ duˬ pyeu ̭-eu ma. 5Aˬ yaw ̭ lo ̭-ehˇ shiˇ-euˬ la ̭ k'oeˇ aˬ dui aˬ yaw ̭-ahˇ ta ̭ leˇ g'aˬ-euˬ-aˬ, aˬ yaw ̭ lo ̭-ehˇ paˇ g'o ̭ deh ̭ laˇ-eu la ̭ k'oeˇ aˬ dui aˬ yaw ̭-ahˇ paˇ ya ta ̭ leˇ teh ̭-a. 6Aˬ dui-euˬ iˬ baˇ mˇ-eu nui ma yaw oeˇ siˬ-euˬ baoˬ-ahˇ laˆ cawˆ-awˇ, iˬ baˇ-euˬ zaˬ k'aˆ maˬ paˇ ya geu ̭-eu g'aˇ duˬ aˬ dui yaw deh ̭ deh ̭-eu yaw oeˇ hmˬ Ka li nehˬ-ehˇ la ̭ ya ̭ k'oeˇ taˆ kamˇ shiˇ g'aˬ-euˬ ma lehˇ aˬ dui siˬ nya ma. 7Aˬ jeˬ miˇ neh ehˇ naˇ, tsawˇ haˬ tiˬ g'aˬ shiˇ ngeh, iˬ baˇ-euˬ baoˬ-ahˇ buˬ-iˇ law-iˇ-eu meh. 8Aˬ dui Ka li nehˬ-ehˇ shiˇ-euˬ miˇ neh, aˬ yaw ̭ nehˬ-ehˇ ya deh ̭ ma lehˇ aˬ dui jah-eu ma. 9Aˬ jeˬ miˇ neh ehˇ naˇ, Ka li-ahˇ shiˇ-euˬ gaˇ paˇ bi g'o ̭ deh ̭ laˇ g'aˬ-euˬ-aˬ, tiˬ jawˇ-iˬ maˬ paˇ shiˇ-ehˇ, shiˇ-eu jeˬ aˬ yaw ̭-ahˇ maˬ paˇ uˆ lahˇ nya meh lehˇ aˬ dui siˬ nya ma. 10Aˬ yaw ̭ shiˇ-euˬ miˇ neh, iˬ baˇ-euˬ baoˬ aˬ yaw ̭-ahˇ maˬ paˇ g'aˬ leˇ meh. Nymˬ-mˇ aˬ yaw ̭ deh ̭ lu ̭-eu-aˬ, Miˬyehˇ-euˬ g'aˇ duˬ meh. 11K'oeˇ lo ̭-ehˇ duˇ ni, naw ma ̭ k'aw ̭ iˬ baˇ-ahˇ k'aˇ ta ̭-eu yawˬ jeˬ na lu ̭ la ̭ k'oeˇ shiˇ g'aˬ-awˇ, Yeˬsuˇ Ka li baˬ da neh Miˬyehˇ-euˬ g'aˇ duˬ deh ̭ lu ̭-eu ma lehˇ yawˬ haˇ yawˬ ha noeˬ-awˬ. 12Naw ma ̭-euˬ shiˬ shaˬ jiˇ nui k'ahˇ mehˬ nah maˬ ya caw teh ni, shiˇ nya-eu naw ma ̭-euˬ shiˬ shaˬ jiˇ g'awˇ mawˇ-ahˇ iˬ baˇ neh taˬ paˇ bi uˆ lahˇ. 13Maˬ muiˬ-eu jeˬ mˇ gaˇ zmˬ-eu keu ka bi pyeu ̭-eu g'aˇ duˬ naw ma ̭-euˬ g'awˇ mawˇ tiˬ pyehˬ teh ̭-ehˇ k'aw ̭ iˬ baˇ-euˬ baoˬ-ahˇ maˬ a nehˬ ni, shiˇ-euˬ gaˇ paˇ g'o ̭ deh ̭ laˇ-euˬ tsawˇ haˬ lo ̭-ehˇ naw ma ̭-euˬ nui ma g'awˇ mawˇ dawˬ tawˆ lu ̭ Miˬyehˇ-ahˇ a nehˬ jiˇ-awˇ, yaw tsaˬ yaw dawˇ jeˬ g'aˇ duˬ zmˬ-eu keu ka bi pyeu ̭-awˬ. 14Iˬ baˇ neh naw ma ̭-ahˇ taˬ paˇ bi uˆ lahˇ. Aˬ jeˬ miˇ neh ehˇ naˇ, zahˇ dawˬ k'o ̭ dawˬ uˬ moˆ naw ma ̭ maˬ paˇ jawˇ-ehˇ, Miˬyehˇ-euˬ guiˬ lahˬ yaw dzahˇ uˬ moˆ jawˇ lu ̭-eu meh. 15Toˆ-ehˇ ngeuˇ naˇ, aˬ joˆ-ehˇ jahˇ nmˇ. Aˬ dui zahˇ dawˬ k'o ̭ dawˬ uˬ moˆ maˬ jawˇ-ehˇ Miˬyehˇ-euˬ guiˬ lahˬ yaw dzahˇ uˬ moˆ jawˇ lu ̭-eu miˇ neh iˬ baˇ mˇ-eu la. Maˬ ngeuˇ-a. 16Tsawˇ haˬ tiˬ g'aˬ na-euˬ myawˬ k'ehˇ g'oˆ nehˬ-eu g'aˇ duˬ zaˬ k'aˆ geu ̭-eu lehˇ yawˬ ha-euˬ g'awˇ mawˇ a nehˬ g'aˬ shaw naˇ, yawˬ ha myawˬ k'ehˇ g'oˆ nehˬ-eu baw leˬ k'oeˇ g'aˬ-euˬ zaˬ k'aˆ pyeu ̭ tsehˆ tsehˆ-euˬ meh lehˇ naw ma ̭ siˬ duˬ lu ̭ meh. Iˬ baˇ-euˬ ehˇ dawˬ naˇ haˬ naˇ, shiˇ gaˇ ya keuˆ teh ̭-a. Miˬyehˇ-euˬ ehˇ dawˬ naˇ haˬ naˇ, aˬ yaw ̭-ahˇ tsaˬ leˇ tsahˇ leˇ gaˇ ya keuˆ teh ̭-a. 17Ehˇ k'aw ̭, Miˬyehˇ-euˬ guiˬ lahˬ yaw dzahˇ-ahˇ ja ceuˬ-eu tsaˬ meh. Aˬ jeˬ miˇ neh ehˇ naˇ, dzeuˇ laˇ ngeh naw ma ̭ iˬ baˇ-euˬ zaˬ k'aˆ pyeu ̭-euˬ k'aw ̭, naw ma ̭-ahˇ mehˬ nehˬ tsoˆ nehˬ-euˬ la ̭ k'oeˇ ya mawˇ taˬ-euˬ yaw tsaˬ yaw dawˇ jeˬ-ahˇ nui ma la ̭ k'oeˇ keuˆ ni naw ma ̭ naˇ haˬ geu ̭-euˬ meh. 18Naw ma ̭-ahˇ iˬ baˇ la ̭ k'oeˇ bi buˬ bi law-iˇ-awˇ, yaw tsaˬ yaw dawˇ jeˬ-euˬ zaˬ k'aˆ bi pyeu ̭ laˇ-euˬ meh. 19Naw ma ̭ g'oˆ siˬ g'oˆ shaw nya-eu paw dzeˇ g'aˬ baˬ-eu miˇ neh, yawˬ nah na lu ̭ ngehˬ lu ̭-eu dawˬ deuˬ-ahˇ zmˬ-awˇ ngaˇ ehˇ-eu ma. Dzeuˇ laˇ ngeh, maˬ tsaˬ maˬ dawˇ-eu la ̭ k'oeˇ k'aˬ miˬ sheu-eu jeˬ hawˇ-eu maˬ muiˬ maˬ jaˬ-eu jeˬ-euˬ zaˬ k'aˆ geu ̭-eu la ̭ k'oeˇ, maˬ tsaˬ maˬ dawˇ-eu jeˬ-ahˇ mˇ-eu g'aˇ duˬ naw ma ̭-euˬ nui ma g'awˇ mawˇ dawˬ tawˆ lu ̭ a nehˬ-euˬ meh. K'oeˇ lo ̭-ehˇ duˇ ni, nymˬ-mˇ poˆ jawˇ-aˬ, yaw tsaˬ yaw dawˇ jeˬ-euˬ zaˬ k'aˆ geu ̭-eu la ̭ k'oeˇ yaw muiˬ yaw shawˇ jeˬ-ahˇ mˇ-eu g'aˇ duˬ, nui ma g'awˇ mawˇ dawˬ tawˆ lu ̭ a nehˬ-awˬ. 20Naw ma ̭ iˬ baˇ-euˬ zaˬ k'aˆ geu ̭ lu ̭ ngeh, yaw tsaˬ yaw dawˇ jeˬ-euˬ uˬ moˆ maˬ jawˇ-aˬ. 21Nymˬ-mˇ naw ma ̭ nui daˆ daˆ lu ̭-eu gaˇ k'oeˇ deuˬ-ahˇ naw ma ̭ mˇ-euˬ miˇ neh aˬ jeˬ za ta. Shiˇ-eu jeˬ-ahˇ za-eu teh ̭ meh. 22Ehˇ k'aw ̭, nymˬ-mˇ naw ma ̭-ahˇ iˬ baˇ la ̭ k'oeˇ bi buˬ-iˇ-awˇ, Miˬyehˇ-euˬ zaˬ k'aˆ bi pyeu ̭ laˇ-euˬ meh. Heu poˆ jawˇ naw ma ̭ aˬ jeˬ za ta. Naw ma ̭-euˬ nui ma g'awˇ mawˇ dawˬ tawˆ lu ̭ aˬ yaw ̭-ahˇ a nehˬ g'aˬ-euˬ miˇ neh mˬ maˬ maˬ byaˆ zaˇ ziˇ deh ̭-eu jeˬ-ahˇ za-eu meh. 23Aˬ jeˬ miˇ neh ehˇ naˇ, iˬ baˇ-euˬ aˇ poeˬ-aˬ, shiˇ-eu jeˬ pyeu ̭-eu meh. Ehˇ k'aw ̭, Miˬyehˇ neh yaw ̭ ngeh ̭-ehˇ bi ̭ nehˬ la ̭-euˬ la ̭ sawˬ-aˬ, aˬ dui-euˬ Sahˬpaˬ Yeˬsuˇ Ka li la ̭ k'oeˇ mˬ maˬ maˬ byaˆ zaˇ ziˇ deh ̭-eu jeˬ pyeu ̭-eu meh.

will be added

X\