LOˇMAˆ SAHˬ BO ̭ 4

1Aˬ dui tsawˇ jeuˬ-euˬ aˬ da yaw dzahˇ g'aˬ pyeu ̭-eu Aˬbyaˬhaˬ gaˇ kawˆ aˬ joˆ-ehˇ ehˇ nmˇ. 2Aˬ yaw ̭ neh mˇ-euˬ shaˇ-euˬ jeˬ baˬ da neh aˬ yaw ̭ Miˬyehˇ-ahˇ tsaˬ leˇ tsahˇ leˇ nya-euˬ ngeuˇ law nmˇ-aˬ, aˬ yaw ̭ nui ma huiˬ k'aˇ za teh ̭-a. Ehˇ k'aw ̭, Miˬyehˇ k'oeˇ lo ̭-ehˇ maˬ sawˇ-a. 3Jaˇli ̭ la ̭ k'oeˇ bo ̭ taˬ-euˬ, "Aˬbyaˬhaˬ Miˬyehˇ-ahˇ jah-awˇ, jah-eu k'oeˇ hmˬ baˬ da neh aˬ yaw ̭-ahˇ yaw tsaˬ yaw dawˇ tsawˇ haˬ meh lehˇ Miˬyehˇ ha geu ̭ nehˬ-euˬ meh." 4Gaˇ mˇ-eu tsawˇ haˬ-aˬ, g'aˬ gaˇ poeˬ za-eu meh. K'oeˇ-aˬ, la ̭ sawˬ za-euˬ lehˇ maˬ sawˇ nya-a. Aˬ yaw ̭ neh mˇ za-euˬ jeˬ pyeu ̭-eu meh. 5Ehˇ k'aw ̭, mˇ-eu shaˇ-eu jeˬ-ahˇ maˬ g'oe-ehˇ, jah-eu jeˬ-ahˇ g'oe-eu la ̭ k'oeˇ, iˬ baˇ ahˇ-eu tsawˇ haˬ-ahˇ iˬ baˇ maˬ ahˇ-a lehˇ daˇ tsehˆ nya-eu g'aˬ pyeu ̭-eu Miˬyehˇ-ahˇ jah-eu tsawˇ haˬ-ahˇ, jah-eu jeˬ baˬ da neh Miˬyehˇ-ahˇ tsaˬ leˇ tsahˇ leˇ-euˬ tsawˇ haˬ lehˇ Miˬyehˇ sawˇ-eu meh. 6Yawˬ ha neh mˇ-euˬ yaw muiˬ yaw doeˇ-ahˇ Miˬyehˇ maˬ haw ni, yaw tsaˬ yaw dawˇ tsawˇ haˬ lehˇ bi ha geu ̭-euˬ g'aˬ-aˬ, guiˬ lahˬ huiˬ dui dui-eu meh lehˇ Daˬbiˇ neh ehˇ-euˬ dawˬ k'oeˇ dawˬ, heu gaˇ ehˇ maw ̭-eu meh. Daˬbiˇ ehˇ-eu, 7"Yaw lehˬ yaw ca ngehˇ jiˇ nehˬ-awˇ, iˬ baˇ pyehˬ nehˬ-euˬ tsawˇ haˬ deuˬ, aˇ naˆ ni guiˬ lahˬ huiˬ-eu nga. 8Yawˬ ha-euˬ iˬ baˇ dawˬ tawˆ lu ̭, Sahˬpaˬ Miˬyehˇ pyehˬ nehˬ-euˬ g'aˬ, aˇ naˆ ni guiˬ lahˬ huiˬ-eu nga." 9Daˬbiˇ ehˇ-eu guiˬ lahˬ huiˬ-eu gaˇ kawˆ heu, baˆ k'oˆ mehˬ dzaˬ yehˬ-euˬ deuˬ-ahˇ teh ̭-ehˇ ta ̭ ta loˇ. Maˬ ngeuˇ-a. Baˆ k'oˆ mehˬ dzaˬ maˬ yehˬ-euˬ deuˬ-ahˇ k'aw ̭ ta ̭-eu meh. "Aˬbyaˬhaˬ Miˬyehˇ-ahˇ jah-awˇ, aˬ yaw ̭-euˬ jah-eu jeˬ baˬ da neh aˬ yaw ̭-ahˇ yaw tsaˬ yaw dawˇ tsawˇ haˬ lehˇ Miˬyehˇ ha geu ̭ nehˬ-euˬ meh" lehˇ ehˇ taˬ-euˬ Jaˇli ̭ dawˬ k'oeˇ dawˬ aˬ dui ehˇ dzeuˇ g'aˬ-euˬ ma. 10K'oeˇ lo ̭-ehˇ pyeu ̭ laˇ-euˬ k'oeˇ aˬ geu ngeh yamˬ-ahˇ-a. Baˆ k'oˆ mehˬ dzaˬ maˬ yehˬ mi naˆ-ehˇ pyeu ̭ laˇ taˬ loˇ. Yehˬ g'aˬ miˇ tsa pyeu ̭ laˇ taˬ loˇ. K'oeˇ-aˬ, Aˬbyaˬhaˬ aˬ yaw ̭ baˆ k'oˆ mehˬ dzaˬ maˬ yehˬ mi naˆ-ehˇ pyeu ̭ laˇ-euˬ gaˇ kawˆ meh. Yehˬ g'aˬ miˇ tsa pyeu ̭ laˇ-euˬ gaˇ kawˆ maˬ ngeuˇ-a. 11Aˇ nah ba hawˇ-eu aˬ yaw ̭ baˆ k'oˆ mehˬ dzaˬ yehˬ-euˬ meh. Aˬ yaw ̭ baˆ k'oˆ mehˬ dzaˬ maˬ yehˬ mi naˆ-ehˇ Miˬyehˇ neh aˬ yaw ̭-ahˇ yaw tsaˬ yaw dawˇ tsawˇ haˬ lehˇ ha geu ̭ nehˬ la ̭ g'aˬ-euˬ gaˇ kawˆ bi siˬ bi mawˇ-eu g'aˇ duˬ, baˆ k'oˆ mehˬ dzaˬ yehˬ-eu zahˇ jahˇ-euˬ jeˬ pyeu ̭-eu meh. K'oeˇ miˇ neh, baˆ k'oˆ mehˬ dzaˬ maˬ yehˬ-euˬ k'aw ̭, Miˬyehˇ-ahˇ jah-awˇ Miˬyehˇ neh yaw tsaˬ yaw dawˇ tsawˇ haˬ meh lehˇ k'aˇ sawˇ taˬ-euˬ tsawˇ haˬ dawˬ tawˆ lu ̭-euˬ guiˬ lahˬ sa ̭ laˇ paw aˬ da yaw dzahˇ g'aˬ-aˬ, Aˬbyaˬhaˬ meh. 12Baˆ k'oˆ mehˬ dzaˬ yehˬ-euˬ uˬ ta ̭, aˇ hu Aˬbyaˬhaˬ aˬ yaw ̭ baˆ k'oˆ mehˬ dzaˬ maˬ yehˬ mi naˆ-ehˇ k'aˇ deh ̭ ya ̭-euˬ lo ̭-ehˇ jah jah-ehˇ deh ̭-eu deuˬ-euˬ aˬ da yaw dzahˇ g'aˬ k'aw ̭, Aˬbyaˬhaˬ aˬ yaw ̭ meh. 13Miˇ tsaˬ heu dawˬ tawˆ lu ̭ Aˬbyaˬhaˬ hawˇ-eu aˬ yaw ̭-euˬ zaˬ deuˬ uˆ deuˬ-ahˇ bi ̭ ma lehˇ Miˬyehˇ saˇ jaˇ dzaˬ ngeh, Aˬbyaˬhaˬ Zahˇ dawˬ k'o ̭ dawˬ mehˬ nah caw teh-eu miˇ neh dzaˬ-euˬ maˬ ngeuˇ-a. Ehˇ k'aw ̭, aˬ yaw ̭ jah-awˇ, Miˬyehˇ neh yaw tsaˬ yaw dawˇ tsawˇ haˬ lehˇ bi ha geu ̭-euˬ miˇ neh meh. 14Miˬyehˇ neh saˇ jaˇ dzaˬ taˬ-euˬ jeˬ-aˬ, Zahˇ dawˬ k'o ̭ dawˬ mehˬ nah caw teh-eu tsawˇ haˬ deuˬ-ahˇ bi ̭-eu g'aˇ duˬ ngeuˇ naˇ, tsawˇ haˬ zaˬ-euˬ jah-eu jeˬ gaˇ dahˇ maˬ tsoeˬ-eu uˬ ta ̭, Miˬyehˇ-euˬ saˇ jaˇ k'aw ̭ yaw ̭ ngeh ̭ meh. 15Zahˇ dawˬ k'o ̭ dawˬ-aˬ, Miˬyehˇ nui ma pehˇ-eu jeˬ bi keuˆ le-eu meh. Ehˇ k'aw ̭, zahˇ dawˬ k'o ̭ dawˬ maˬ jaˆ gaˇ-aˬ, zahˇ dawˬ k'o ̭ dawˬ-ahˇ mˇ bahˬ-eu jeˬ k'aw ̭ maˬ jaˆ-aˇ. 16K'oeˇ miˇ neh, Miˬyehˇ-euˬ saˇ jaˇ k'oeˇ hmˬ Zahˇ dawˬ k'o ̭ dawˬ mehˬ nah caw teh-eu deuˬ-ahˇ teh ̭-ehˇ maˬ ta ̭-ehˇ, Aˬbyaˬhaˬ lo ̭-ehˇ jah-eu tsawˇ haˬ deuˬ-ahˇ k'aw ̭ ta ̭ leˇ ni, Aˬbyaˬhaˬ-euˬ zaˬ deuˬ uˆ deuˬ dawˬ tawˆ lu ̭-ahˇ yaw ̭ ngeh ̭-ehˇ bi ̭ nehˬ-euˬ jeˬ pyeu ̭-eu g'aˇ duˬ, jah-eu jeˬ-ahˇ ta ̭-eu saˇ jaˇ bi pyeu ̭-euˬ meh. Aˬ jeˬ miˇ neh ehˇ naˇ, Aˬbyaˬhaˬ-aˬ, guiˬ lahˬ sa ̭ laˇ paw aˬ dui dawˬ tawˆ lu ̭-euˬ aˬ da yaw dzahˇ g'aˬ pyeu ̭-eu meh. 17"Ngaˇ nawˬ-ahˇ tsawˇ jeuˬ g'awˬ mya jeuˬ-euˬ aˬ da yaw dzahˇ g'aˬ bi pyeu ̭ laˇ ma" lehˇ, Jaˇli ̭ la ̭ k'oeˇ aˬ yaw ̭-ahˇ ehˇ taˬ-euˬ meh. Dawˬ ma saˇ jaˇ k'oeˇ-aˬ, Aˬbyaˬhaˬ jah-eu Miˬyehˇ-euˬ mehˬ shi yaw muiˬ meh. Shiˇ-euˬ tsawˇ haˬ-ahˇ bi g'o ̭ deh ̭ laˇ nya-awˇ, maˬ jaˆ haw maˬ mawˇ haw-euˬ jeˬ-ahˇ dawˬ bi ̭-awˇ bi jaˆ laˇ nya-eu Miˬyehˇ-ahˇ Aˬbyaˬhaˬ jah-euˬ meh. 18Aˬbyaˬhaˬ-aˬ, noeˬ tmˬ k'aˇ maˬ paˇ za-euˬ k'aw ̭, jah-awˇ noeˬ tmˬ-euˬ meh. K'oeˇ miˇ neh, "tsawˇ jeuˬ g'awˬ mya jeuˬ-euˬ aˬ da" pyeu ̭ laˇ-euˬ meh. "Nawˬ-euˬ zaˬ nawˬ-euˬ uˆ deuˬ mˬ taˆ aˬ guiˇ lo ̭-ehˇ jeuˬ le o le teh ̭-a" lehˇ, Jaˇli ̭ la ̭ k'oeˇ aˬ yaw ̭-ahˇ ehˇ taˬ-euˬ meh. 19Aˬ yaw ̭-ahˇ k'oeˇ lo ̭-ehˇ ehˇ nehˬ ngeh, aˬ yaw ̭-euˬ aˇ k'o ̭ tiˬ yaˇ dawˬ peh tah tehˬ leˇ taˬ-euˬ meh. Aˬ yaw ̭-euˬ aˬ lmˬ g'awˇ mawˇ gaˇ kawˆ shaˇ noeˬ ngeh, shiˇ g'aˬ-euˬ lo ̭-ehˇ duˇ-awˇ, aˬ yaw ̭-euˬ nymˇ dahˬ Saˬlaˇ zaˬ ciˬ zaˬ cu maˬ paˇ mˇ nya-euˬ k'aw ̭, aˬ yaw ̭ jah-eu k'oeˇ hmˬ g'aˬ tiˬ paw ̭-iˬ maˬ baˬ-iˇ-a. 20Aˬ yaw ̭ jah-eu g'aˬ maˬ baˬ-iˇ-ehˇ, Miˬyehˇ-euˬ saˇ jaˇ-ahˇ poˆ poˆ laˆ laˆ-ehˇ maˬ noeˬ-a. Jah-eu baˬ da neh nui ma g'aˬ k'aˆ laˇ-awˇ, Miˬyehˇ-ahˇ ja ceuˬ-euˬ meh. 21Miˬyehˇ-aˬ, saˇ jaˇ k'aˇ dzaˬ taˬ-euˬ lo ̭-ehˇ mˇ byah nya meh lehˇ aˬ yaw ̭ ziˬ dah ni jah-euˬ meh. 22K'oeˇ miˇ neh, Aˬbyaˬhaˬ-aˬ, jah-eu jeˬ baˬ da neh "Miˬyehˇ neh yaw tsaˬ yaw dawˇ tsawˇ haˬ lehˇ bi ha geu ̭-euˬ meh." 23"Aˬ yaw ̭-ahˇ yaw tsaˬ yaw dawˇ tsawˇ haˬ lehˇ ha geu ̭-euˬ meh" lehˇ ehˇ-eu dawˬ heu dawˬ-aˬ, aˬ yaw ̭ g'aˇ duˬ teh ̭-ehˇ bo ̭ taˬ-euˬ maˬ ngeuˇ-a. 24Sahˬpaˬ Yeˬsuˇ-ahˇ shiˇ-euˬ gaˇ paˇ bi g'o ̭ deh ̭ laˇ-euˬ Miˬyehˇ-ahˇ jah-awˇ, yaw tsaˬ yaw dawˇ tsawˇ haˬ lehˇ bi sawˇ-eu lehˇ g'eh-eu aˬ dui-euˬ g'aˇ duˬ k'aw ̭ bo ̭ taˬ-euˬ jeˬ pyeu ̭-eu meh. 25Aˬ dui-euˬ iˬ baˇ baˬ da neh aˬ yaw ̭-ahˇ seh ̭-eu g'aˇ duˬ bi a nehˬ-awˇ, aˬ dui Miˬyehˇ-ahˇ tsaˬ leˇ tsahˇ leˇ nya ni aˬ yaw ̭-ahˇ bi g'o ̭ deh ̭ laˇ-euˬ meh.

will be added

X\