LOˇMAˆ SAHˬ BO ̭ 3

1Yuˇdaˆ tsawˇ haˬ deuˬ-aˬ, Yuˇdaˆ tsawˇ haˬ maˬ ngeuˇ-eu deuˬ naˆ maˬ tseˇ huiˬ dzehˬ mahˇ dzehˬ ta loˇ. Baˆ k'oˆ mehˬ dzaˬ yehˬ-euˬ-aˬ, guiˬ lahˬ baw dzehˬ ta loˇ. 2Ngeuˇ meh. Yawˬ jeˬ na lu ̭ la ̭ k'oeˇ guiˬ lahˬ baw dzehˬ meh. Miˬyehˇ-euˬ dawˬ Yuˇdaˆ tsawˇ haˬ deuˬ-ahˇ jeˬ huˬ a nehˬ-euˬ meh. 3Ehˇ k'aw ̭, aˬ yaw ̭ ma ̭ tiˬ paˆ na deuˬ Miˬyehˇ-euˬ dawˬ-ahˇ saˇ jaˇ maˬ zi ̭ naˇ, aˬ joˆ-ehˇ paˇ jahˇ nmˇ. Aˬ yaw ̭ ma ̭ k'oeˇ lo ̭-ehˇ g'eh-euˬ baˬ da neh Miˬyehˇ saˇ jaˇ maˬ zi ̭ nga lehˇ aˬ dui ehˇ nmˇ loˇ. 4Maˬ ngeuˇ-a. Tsawˇ haˬ zaˬ yawˬ g'aˬ na lu ̭ jaˬ myaw ̭ myaw ̭ k'aw ̭, Miˬyehˇ yaw tsaˬ yaw dawˇ meh. Jaˇ li ̭ la ̭ k'oeˇ heu lo ̭-ehˇ ehˇ taˬ-euˬ meh. "Nawˬ neh ngehˬ-euˬ tmˇ-euˬ la ̭ k'oeˇ, yaw tsaˬ yaw dawˇ ya bi mawˇ meh. Nawˬ-ahˇ aˬ cawˬ yaˇ k'aˬ daˇ ngeh, aˬ myah lu ̭ nawˇ g'aˬ leˇ teh ̭-a." 5Aˬ dui yaw lehˬ jeˬ mˇ-euˬ k'oeˇ-aˬ, Miˬyehˇ yaw tsaˬ jeˬ mˇ-eu gaˇ kawˆ bi mawˇ shawˇ dzehˬ laˇ-eu g'aˇ duˬ pyeu ̭-eu ngeuˇ naˇ, aˬ dui aˬ joˆ-ehˇ ehˇ nmˇ. Miˬyehˇ aˬ dui-ahˇ k'ehˬ nehˬ k'aˆ nehˬ la ̭ ngeh, aˬ yaw ̭ yaw lehˬ jeˬ mˇ-eu meh lehˇ aˬ dui ehˇ nmˇ loˇ. (Heu-aˬ, tsawˇ haˬ zaˬ naˇ haˬ tseˇ maw ̭-eu dawˬ tiˬ dawˬ meh.) 6K'oeˇ lo ̭-ehˇ maˬ ngeuˇ-a. Miˬyehˇ maˬ tsaˬ maˬ dawˇ naˇ, miˇ tsaˬ zaˬ-ahˇ aˬ yaw ̭ aˬ joˆ-ehˇ yaˇ k'aˬ daˇ nya nmˇ. 7Ehˇ k'aw ̭, ngaˬ-euˬ yaw lehˬ k'oeˇ-aˬ, Miˬyehˇ tsaˬ-eu dawˇ-eu gaˇ kawˆ bi mawˇ shawˇ dzehˬ laˇ-eu g'aˇ duˬ hawˇ-eu aˬ yaw ̭-euˬ yaw sheh ̭ k'ahˬ sehˇ g'aˇ duˬ pyeu ̭-eu ngeuˇ naˇ, aˬ dui aˬ joˆ-ehˇ ehˇ nmˇ. K'oeˇ lo ̭-ehˇ ngeuˇ meh lehˇ ehˇ naˇ, ngaˬ-ahˇ iˬ baˇ zaˬ lehˇ aˬ joˆ-ehˇ sawˇ nya ta. 8Toˆ-ehˇ ngeuˇ naˇ, "Yaw muiˬ jeˬ doˆ laˇ ni maˬ muiˬ-eu jeˬ mˇ kaˇ-euˇ" lehˇ ehˇ-eu maˬ tsaˬ-a loˇ. Tsawˇ haˬ tiˬ paˆ na deuˬ ngaˇ k'oeˇ lo ̭-ehˇ ehˇ-eu meh lehˇ ehˇ-awˇ, ngaˬ-euˬ yaw lehˬ poˆ poˆ-ehˇ ngaˬ-ahˇ ja doeˇ-eu meh. K'oeˇ lo ̭-ehˇ ehˇ-eu tsawˇ haˬ deuˬ-aˬ, k'ehˬ-eu k'aˆ-eu jeˬ-ahˇ ya daˬ teh ̭-a. 9Toˆ-ehˇ maˇ-iˬ, aˬ dui Yuˇdaˆ tsawˇ haˬ deuˬ-aˬ, Yuˇdaˆ tsawˇ haˬ maˬ ngeuˇ-eu deuˬ naˆ maˬ tseˇ muiˬ dzehˬ ta loˇ. Maˬ ngeuˇ-a. Yuˇdaˆ tsawˇ haˬ maˬ ehˇ, Yuˇdaˆ tsawˇ haˬ maˬ ngeuˇ-eu deuˬ maˬ ehˇ, dawˬ tawˆ lu ̭ iˬ baˇ-euˬ baoˬ uˬ moˆ tiˬ kawˆ lo ̭-ehˇ jawˇ lu ̭-eu meh lehˇ ngaˇ ehˇ dzeuˇ g'aˬ-euˬ ma. 10Jaˇli ̭ la ̭ k'oeˇ heu lo ̭-ehˇ ehˇ taˬ-euˬ meh. "Yaw tsaˬ yaw dawˇ poˆ-eu tsawˇ haˬ, tiˬ g'aˬ-iˬ maˬ jawˇ-a. 11Noeˬ siˬ noeˬ mawˇ nya-eu tsawˇ haˬ, tiˬ g'aˬ-iˬ maˬ jawˇ-a. Miˬyehˇ-ahˇ shaˇ poˆ-eu tsawˇ haˬ, tiˬ g'aˬ-iˬ maˬ jawˇ-a. 12Dawˬ tawˆ lu ̭ Miˬyehˇ-ahˇ byehˇ-awˇ, gaˇ bahˬ iˇ jiˇ-euˬ meh. Yaw muiˬ jeˬ-ahˇ mˇ-eu tsawˇ haˬ, tiˬ g'aˬ-iˬ maˬ jawˇ-a. 13K'aˬ meh lmˬ bymˇ duˬ k'ahˬ pyeu ̭-awˇ, mehˬ laˇ jaˬ myaw ̭ mehˇ shuiˇ k'mˇ-awˇ, mehˬ luˬ aˇ lawˇ do ̭-ahˇ duˇ meh. 14Yaˬ k'ehˇ yaˬ-awˇ dawˬ doeˇ ngehˬ-eu, k'aˬ meh tiˬ byah myuˇ taˬ-euˬ meh. 15Aˬ cawˬ-euˬ shiˬ laˆ yoeˇ leˇ-eu, kuiˇ to ̭ ciˬ-eu kawˇ dui dui meh. 16Yaw ̭ ma ̭ iˇ-eu gaˇ ma kahˇ li, yaw cawˆ jeˬ byaˆ dzeh ya ̭-eu meh. 17Bi tsaˬ bi zoeˇ leˇ-eu gaˇ ma, aˬ gaˇ jaˆ-eu maˬ siˬ nya-a. 18Aˬ yaw ̭ ma ̭-euˬ myaˆ nuiˆ la ̭ k'oeˇ, Miˬyehˇ-ahˇ guˆ-eu maˬ ahˇ-a." 19Zahˇ dawˬ k'o ̭ dawˬ la ̭ k'oeˇ k'aˇ bo ̭ taˬ-euˬ jeˬ-aˬ, Zahˇ dawˬ k'o ̭ dawˬ mehˬ nah k'aˇ caw teh-eu tsawˇ haˬ deuˬ-ahˇ ta ̭-eu dawˬ meh lehˇ aˬ dui siˬ nya-eu ma. Tsawˇ haˬ zaˬ dawˬ tawˆ lu ̭ dehˬ leh ̭ k'aˇ maˬ bi za ni Miˬyehˇ yaˇ k'aˬ daˇ gaˇ bi keuˆ leˇ-eu g'aˇ duˬ bo ̭ taˬ-euˬ jeˬ pyeu ̭-eu meh. 20Aˬ jeˬ miˇ neh ehˇ naˇ, Zahˇ dawˬ k'o ̭ dawˬ mehˬ nah caw teh-eu baˬ da neh Miˬyehˇ-ahˇ tsaˬ leˇ tsahˇ leˇ g'aˬ-euˬ tsawˇ haˬ maˬ pyeu ̭ laˇ nya-a siˬ. Zahˇ dawˬ k'o dawˬ-aˬ, tsawˇ haˬ zaˬ-ahˇ yawˬ ha iˬ baˇ mˇ-euˬ gaˇ kawˆ bi siˬ leˇ-eu g'aˇ duˬ teh ̭ meh. 21Tsawˇ haˬ zaˬ Miˬyehˇ-ahˇ tsaˬ leˇ tsahˇ leˇ nya ni Miˬyehˇ aˬ joˆ-ehˇ mˇ-euˬ gaˇ kawˆ, nymˬ-mˇ pah mehˬ nehˬ la ̭-euˬ meh. Moˇseˬ-euˬ Zahˇ dawˬ k'o ̭ dawˬ hawˇ-eu Miˬyehˇ g'aˇ duˬ ngehˬ dah-eu tsawˇ haˬ deuˬ-aˬ, gaˇ kawˆ k'oeˇ-euˬ saˇ kiˇ pyeu ̭-eu meh. Ehˇ k'aw ̭, tsawˇ haˬ zaˬ Miˬyehˇ-ahˇ tsaˬ leˇ tsahˇ leˇ-eu jeˬ-aˬ, zahˇ dawˬ k'o ̭ dawˬ-ahˇ tiˬ paw ̭-iˬ maˬ ta ̭-a. 22Aˬ yaw ̭ ma ̭ Yeˬsuˇ Ka li-ahˇ jah-eu baˬ da neh Miˬyehˇ-ahˇ tsaˬ leˇ tsahˇ leˇ-eu tsawˇ haˬ bi pyeu ̭ laˇ-euˬ meh. Ka li-ahˇ k'aˇ jah-eu tsawˇ haˬ dawˬ tawˆ lu ̭-ahˇ, tsawˇ jeuˬ maˬ tseˇ paˆ ni, Miˬyehˇ k'oeˇ lo ̭-ehˇ jahˇ nehˬ-euˬ meh. 23Aˬ jeˬ miˇ neh ehˇ naˇ, tsawˇ haˬ dawˬ tawˆ lu ̭ iˬ baˇ mˇ-awˇ, Miˬyehˇ ka k'o ̭-eu jeˬ-ahˇ gaˇ mahˇ kaˬ-iˇ-euˬ meh. 24Ehˇ k'aw ̭, Miˬyehˇ g'awˬ shaˬ gaˬ-eu jeˬ yaw ̭ ngeh ̭-ehˇ bi ̭ le ̭-awˇ, tsawˇ haˬ zaˬ-ahˇ bi buˬ bi law-iˇ-eu g'aˬ pyeu ̭-eu Yeˬsuˇ Ka li baˬ da neh, dawˬ tawˆ lu ̭ Miˬyehˇ-ahˇ tsaˬ leˇ tsahˇ leˇ ni jahˇ-euˬ meh. 25Aˬ yaw ̭ shiˇ dah-euˬ baˬ da neh tsawˇ haˬ zaˬ deuˬ aˬ yaw ̭-ahˇ jah-eu la ̭ k'oeˇ Miˬyehˇ iˬ baˇ pyehˬ nehˬ-eu jeˬ-ahˇ za nya ni, Miˬyehˇ neh aˬ yaw ̭-ahˇ tsawˇ haˬ zaˬ deuˬ g'aˇ duˬ bi ̭ le ̭-euˬ meh. K'oeˇ-aˬ, Miˬyehˇ-euˬ yaw tsaˬ yaw dawˇ jeˬ bi mawˇ ni mˇ-euˬ jeˬ pyeu ̭-eu meh. Dzeuˇ laˇ ngeh aˬ yaw ̭ nui ma g'awˬ mahˇ ni taˬ-awˇ, tsawˇ haˬ zaˬ-euˬ iˬ baˇ-ahˇ haw dzeuˇ nehˬ-euˬ meh. 26Ehˇ k'aw ̭, nymˬ-mˇ-aˬ, aˬ yaw ̭-euˬ yaw tsaˬ yaw dawˇ jeˬ bi mawˇ leˇ-eu g'aˇ duˬ aˬ yaw ̭ mˇ lu ̭-eu miˇ neh, tsawˇ haˬ zaˬ-euˬ iˬ baˇ-ahˇ aˬ yaw ̭ maˬ paˇ haw dzeuˇ meh. K'oeˇ lo ̭-ehˇ mˇ-eu la ̭ k'oeˇ, Miˬyehˇ aˬ yaw ̭ tsaˬ-eu dawˇ-eu g'aˬ pyeu ̭-eu gaˇ kawˆ hawˇ-eu, Yeˬsuˇ-ahˇ k'aˇ jah-eu tsawˇ haˬ yawˬ g'aˬ na lu ̭ Miˬyehˇ-ahˇ tsaˬ leˇ tsahˇ leˇ-eu tsawˇ haˬ bi pyeu ̭ laˇ-eu gaˇ kawˆ bi siˬ bi mawˇ la ̭-euˬ meh. 27Toˆ-ehˇ ngeuˇ naˇ, aˬ dui nui ma huiˬ k'aˇ aˬ gaˇ paˇ za ta. Tiˬ gaˇ-iˬ maˬ paˇ za meh. Aˬ jeˬ miˇ neh ehˇ naˇ, Zahˇ dawˬ k'o ̭ dawˬ mehˬ nah caw teh-eu baˬ da neh Miˬyehˇ-ahˇ tsaˬ leˇ tsahˇ leˇ-eu tsawˇ haˬ pyeu ̭ laˇ nya-eu maˬ ngeuˇ-a. Jah-eu baˬ da neh teh ̭-ehˇ pyeu ̭ laˇ nya-eu meh. 28Tsawˇ haˬ tiˬ g'aˬ Miˬyehˇ-ahˇ tsaˬ leˇ tsahˇ leˇ-eu k'oeˇ-aˬ, Zahˇ dawˬ k'o ̭ dawˬ mehˬ nah caw teh-eu baˬ da neh maˬ ngeuˇ-ehˇ, jah-eu baˬ da neh meh lehˇ aˬ dui tuˆ tehˬ taˬ-euˬ ma. 29Maˬ ngeuˇ naˇ, Miˬyehˇ-aˬ, Yuˇdaˆ tsawˇ haˬ deuˬ-euˬ Miˬyehˇ teh ̭-a loˇ. Aˬ cawˬ tsawˇ jeuˬ-euˬ Miˬyehˇ maˬ ngeuˇ-a loˇ. Ngeuˇ meh. Yuˇdaˆ tsawˇ haˬ maˬ ngeuˇ-eu deuˬ-euˬ Miˬyehˇ k'aw ̭ ngeuˇ meh. 30Tsawˇ jeuˬ dawˬ tawˆ lu ̭ g'aˇ duˬ Miˬyehˇ tiˬ g'aˬ teh ̭ meh. K'oeˇ miˇ neh, baˆ k'oˆ mehˬ dzaˬ yehˬ-euˬ Yuˇdaˆ tsawˇ haˬ-ahˇ maˬ ehˇ, baˆ k'oˆ mehˬ dzaˬ maˬ yehˬ-euˬ aˬ cawˬ tsawˇ jeuˬ-ahˇ maˬ ehˇ, jah-eu tiˬ jeˬ baˬ da neh teh ̭-ehˇ aˬ yaw ̭-ahˇ tsaˬ laˇ tsahˇ laˇ nya ni jahˇ teh ̭-a. 31Heu lo ̭-ehˇ ehˇ-eu baˬ da neh Zahˇ dawˬ k'o ̭ dawˬ-ahˇ aˬ dui byehˇ dzeh-eu ma lehˇ ehˇ maw ̭ ta loˇ. Maˬ ngeuˇ. Maˬ byehˇ dzeh-eu uˬ ta ̭, zi ̭ dah ni tuˆ tehˬ taˬ-eu ma.

will be added

X\