MA ̭TEHˬ 9

1K'oeˇ naˇ, Yeˬsuˇ lawˬ k'oeˇ laˇ-ahˇ paˇ dziˬ-awˇ, aˬ yaw ̭ jawˇ-eu meuˬ-ahˇ g'o ̭ tsehˆ-iˇ-euˬ meh. 2K'oeˇ ngeh, maˬ luˆ nya-ehˇ yu ̭ zaˇ k'oeˇ taˆ bi yu ̭ taˬ-euˬ kuiˇ shiˇ la ̭ shiˇ shiˇ-euˬ tsawˇ haˬ tiˬ g'aˬ-ahˇ, aˬ yaw ̭ jawˇ gaˇ ba ̭ ha le-euˬ meh. Ba ̭ ha le-euˬ tsawˇ haˬ k'oeˇ deuˬ-euˬ jah-eu nui ma-ahˇ Yeˬsuˇ ya mawˇ ngeh, kuiˇ shiˇ la ̭ shiˇ shiˇ-euˬ tsawˇ haˬ k'oeˇ g'aˬ-ahˇ, "Aˬ li-oˇ, tiˬjeˬ-iˬ taˬ noeˬ shaˬ. Nawˬ-euˬ iˬ baˇ-ahˇ Miˬyehˇ pyehˬ nehˬ g'aˬ-euˬ meh lehˇ ngaˇ ehˇ-eu ma" lehˇ ehˇ nehˬ-euˬ meh. 3K'oeˇ ngeh, Zahˇ dawˬ k'o ̭ dawˬ mehˬ-eu saˬ laˬ tiˬ paˆ na deuˬ-aˬ, "Tsawˇ haˬ heu g'aˬ Miˬyehˇ-euˬ tsawˇ myahˇ ahˬ dzaˬ-eu ngaˇ" lehˇ, nui ma la ̭ k'oeˇ noeˬ k'oeˬ-euˬ meh. 4Ehˇ k'aw ̭, aˬ yaw ̭ ma ̭-euˬ nui ma la ̭ k'oeˇ noeˬ lu ̭-eu jeˬ-ahˇ Yeˬsuˇ siˬ nya-awˇ, heu lo ̭-ehˇ ehˇ nehˬ-euˬ meh. "Aˬ jeˬ miˇ neh naw ma ̭-euˬ nui ma la ̭ k'oeˇ maˬ muiˬ-eu jeˬ shaˇ noeˬ lu ̭ te. 5'Nawˬ-euˬ iˬ baˇ-ahˇ Miˬyehˇ pyehˬ nehˬ g'aˬ-euˬ meh' lehˇ ehˇ-eu hawˇ-eu, 'Tuˇ laˇ-awˇ, gaˇ ma cah-awˬ' lehˇ ehˇ-eu dawˬ heu nyiˬ dawˬ aˬ geu dawˬ awˬ dzehˬ ta. 6Tsawˇ haˬ-euˬ Zaˬmaˇ -aˬ, miˇ tsaˬ heu k'oeˇ taˆ iˬ baˇ pyehˬ nehˬ nya-eu baoˬ ahˇ-eu gaˇ kawˆ, naw ma ̭-ahˇ ngaˇ bi mawˇ duˬ nyaˇ." K'oeˇ naˇ, kuiˇ shiˇ la ̭ shiˇ shiˇ-eu tsawˇ haˬ k'oeˇ g'aˬ-ahˇ Yeˬsuˇ ehˇ nehˬ-eu, "Tuˇ-awˇ, nawˬ-euˬ yu ̭ zaˇ ba ̭-awˇ g'o ̭-iˇ-awˬ." 7K'oeˇ ngeh, tsawˇ haˬ k'oeˇ g'aˬ tuˇ laˇ-awˇ, g'o ̭-iˇ-euˬ meh. 8Tsawˇ haˬ aˇ ma ̭ k'oeˇ deuˬ k'oeˇ gaˇ ya mawˇ ngeh, guˆ-iˇ-awˇ, tsawˇ haˬ zaˬ-ahˇ k'oeˇ naˆ ni g'eh-eu baoˬ bi ̭-euˬ Miˬyehˇ-ahˇ ja ceuˬ-euˬ meh. 9Jawˇ duˬ k'oeˇ tsahˇ-ahˇ neh Yeˬsuˇ luˆ-iˇ-awˇ mehˬ hu paw iˇ lu ̭ ngeh, kawˬ ta ̭-eu tsawˇ haˬ pyeu ̭-eu Ma ̭tehˬ lehˇ myahˇ-euˬ g'aˬ, kawˬ ta ̭-eu nymˇ-ahˇ nuiˇ lu ̭ gaˇ aˬ yaw ̭ ya mawˇ-euˬ meh. "Ngaˬ-euˬ mehˬ nah caw teh laˇ-awˇ ngaˬ-euˬ zaˬ lahˇ geu ̭ laˇ-awˬ" lehˇ Yeˬsuˇ ehˇ ngeh, Ma ̭tehˬ tsawˬ tuˇ laˇ-awˇ, Yeˬsuˇ-euˬ mehˬ nah caw teh g'eh-euˬ meh. 10Yeˬsuˇ iˇ kahˇ la ̭ k'oeˇ hawˬ jeh-ahˇ hawˬ jawˬ jawˬ leˇ ngeh, kawˬ ta ̭-eu tsawˇ haˬ deuˬ hawˇ-eu iˬ baˇ zaˬ g'awˬ mya ni laˇ-awˇ, Yeˬsuˇ hawˇ-eu aˬ yaw ̭-euˬ zaˬ lahˇ deuˬ nehˬ-ehˇ hawˬ jawˬ jawˬ-euˬ meh. 11Paˬliˬsehˇ deuˬ k'oeˇ gaˇ ya mawˇ ngeh Yeˬsuˇ-euˬ zaˬ lahˇ deuˬ-ahˇ ehˇ nehˬ-eu, "Naw ma ̭-euˬ saˬ laˬ aˬ jeˬ miˇ neh k'oeˇ lo ̭-ehˇ g'eh-eu tsawˇ haˬ deuˬ nehˬ-ehˇ dzaˬ ta ̭ dawˇ ta ̭ ta." 12K'oeˇ lo ̭-ehˇ ehˇ gaˇ Yeˬsuˇ ya gaˬ ngeh, heu lo ̭-ehˇ ehˇ k'o ̭ nehˬ-euˬ meh. "Jawˇ saˇ doˆ lu ̭-eu deuˬ naˇ gawˇ laˆ saˆ-eu tsawˇ haˬ-ahˇ maˬ loˬ-a. Jawˇ saˇ maˬ doˆ-eu deuˬ teh ̭-ehˇ naˇ gawˇ laˆ saˆ-eu tsawˇ haˬ-ahˇ loˬ-eu meh. 13'Lawˇ-eu shehˇ-eu jeˬ-ahˇ ngaˇ geu ̭ maw ̭-eu maˬ ngeuˇ. G'awˬ shaˬ gaˬ nya-eu jeˬ-ahˇ ngaˇ geu ̭ maw ̭-eu ma' lehˇ, Miˬyehˇ neh ehˇ-euˬ dawˬ k'oeˇ dawˬ-euˬ dawˬ tsui ̭ naw ma ̭ dzaw duˬ-iˇ-awˬ. Aˬ jeˬ miˇ neh ehˇ naˇ, yaw tsaˬ yaw dawˇ tsawˇ haˬ deuˬ-ahˇ kuˇ-eu lehˇ ngaˇ oe-euˬ maˬ ngeuˇ. Iˬ baˇ zaˬ deuˬ-ahˇ kuˇ-eu lehˇ ngaˇ oe-euˬ ma." 14K'oeˇ naˇ, Iˇcu ̭shawˇ-eu Yoˇhaˬ-euˬ zaˬ lahˇ deuˬ Yeˬsuˇ jawˇ gaˇ laˇ-awˇ ehˇ-eu, "Nga ma ̭ hawˇ-eu Paˬliˬsehˇ deuˬ-aˬ, tiˬ k'ehˬ maˬ taˬ ni maˬ dzaˬ-eu zahˇ jahˇ lu ̭ ma. Nawˬ-euˬ zaˬ lahˇ deuˬ aˬ jeˬ miˇ neh k'oeˇ lo ̭-ehˇ maˬ jahˇ ta." 15Yeˬsuˇ ehˇ-eu, "Oeˇ mˇ baˇ gaˇ laˇ-euˬ tsawˇ haˬ deuˬ, miˬ zaˬ sheuˬ daˆ-eu g'aˬ aˬ yaw ̭ ma ̭ nehˬ-ehˇ k'aˇ jawˇ k'oeˇ keuˆ ni noeˬ shaˬ teh ̭-a loˇ. Miˬ zaˬ sheuˬ daˆ-eu tsawˇ haˬ k'oeˇ g'aˬ aˬ yaw ̭ ma ̭ nehˬ-ehˇ maˬ ya jawˇ ni bi sheuˬ byoˆ g'eh-eu tiˬ nah keuˆ le teh ̭-a. K'oeˇ ngeh jawˇ, aˬ yaw ̭ ma ̭ maˬ dzaˬ-eu zahˇ jahˇ teh ̭-a. 16"Tsawˇ haˬ tiˬ g'aˬ-iˬ mehˬ tsoeˬ yaw cehˇ-ahˇ saˬ paˇ yaw shui ̭ neh pehˇ tsahˇ maˬ do ̭-aˇ. K'oeˇ lo ̭-ehˇ do ̭ naˇ, pehˇ tsahˇ yaw shui ̭ k'oeˇ, mehˬ tsoeˬ yaw cehˇ k'oeˇ kahˇ-ahˇ yaw beh naˆ maˬ tseˇ paˇ bi pyaˬ-iˇ teh ̭-a. 17K'oeˇ gaˇ duˇ ni, aˬ ga ̭ dzaˇ uiˇ shehˆ ahˇ-eu shaˬ k'oˆ iˇ puˬ yaw oeˇ-ahˇ, aˬ ga ̭ dzaˇ uiˇ yaw shui ̭ maˬ shehˆ ahˇ-aˇ. K'oeˇ lo ̭-ehˇ jahˇ naˇ, shaˬ k'oˆ iˇ puˬ k'oeˇ puˬ peh ̭-iˇ-awˇ, aˬ ga ̭ dzaˇ uiˇ yoeˇ k'aˇ-eu miˇ neh, shaˬ k'oˆ iˇ puˬ k'oeˇ cawˆ-iˇ jiˇ teh ̭-a. Aˬ ga ̭ dzaˇ uiˇ yaw shui ̭-ahˇ shaˬ k'oˆ iˇ puˬ yaw shui ̭ la ̭ k'oeˇ ya shehˆ ahˇ-eu meh. K'oeˇ lo ̭-ehˇ jahˇ naˇ, nyiˬ jeˬ lu ̭ maˬ cawˆ-iˇ ni ya geu ̭-eu meh." 18Aˬ yaw ̭ ma ̭-ahˇ Yeˬsuˇ k'oeˇ lo ̭-ehˇ ehˇ nehˬ lu ̭ ngeh, yaw huiˬ yaw mahˇ tiˬ g'aˬ Yeˬsuˇ jawˇ gaˇ oe-euˬ meh. Yeˬsuˇ-euˬ mehˬ shi aˬ yaw ̭ ga byaˆ-awˇ, "Ngaˬ buˇ uˬ soe shiˇ tsehˆ-euˬ meh. Ehˇ k'aw ̭, nawˇ oe-awˇ aˬ la ̭ tiˬ poˆ ba ̭ daˆ nehˬ la ̭ naˇ, aˬ yaw ̭ paˇ deh ̭ poˆ laˇ teh ̭-a" lehˇ ehˇ-eu meh. 19Yeˬsuˇ tuˇ laˇ-awˇ, tsawˇ haˬ k'oeˇ g'aˬ-euˬ mehˬ nah caw teh g'eh-euˬ meh. Aˬ yaw ̭-euˬ zaˬ lahˇ deuˬ k'aw ̭, aˬ yaw ̭ nehˬ-ehˇ iˇ-euˬ meh. 20K'oeˇ ngeh, tseˇ nyi ̭ k'o ̭ keuˆ ni shiˬ doˆ-eu naˇ gawˇ-ahˇ maˬ tsehˆ leˇ ni ya daˬ lu ̭-eu zaˬ miˬ zaˬ tiˬ g'aˬ, Yeˬsuˇ-euˬ mehˬ nah miˇ ni caw teh le-awˇ, Yeˬsuˇ-euˬ pehˇ k'ahˬ pehˇ dahˬ-ahˇ toeˬ ciˆ-euˬ meh. 21"Aˬ yaw ̭-euˬ pehˇ k'ahˬ pehˇ dahˬ-ahˇ teh ̭-ehˇ ya toeˬ ciˆ-euˬ k'aw ̭, ngaˬ-euˬ naˇ gawˇ taˬ leˇ ma" lehˇ, zaˬ miˬ zaˬ k'oeˇ g'aˬ nui ma la ̭ k'oeˇ yawˬ haˇ yawˬ ha ehˇ-eu meh. 22Yeˬsuˇ nahˇ g'o ̭ g'o ̭ haw ngeh, aˬ yaw ̭-ahˇ mawˇ-awˇ, "Aˬ buˇ-oˇ, tiˬ jeˬ-iˬ taˬ noeˬ shaˬ. Nawˬ-euˬ jah-eu nui ma neh nawˬ-ahˇ bi taˬ leˇ-euˬ meh" lehˇ ehˇ nehˬ-euˬ meh. K'oeˇ lo ̭-ehˇ ehˇ g'aˬ-eu maˬ dah ni, zaˬ miˬ zaˬ k'oeˇ g'aˬ-euˬ naˇ gawˇ taˬ tsehˆ leˇ-euˬ meh. 23Yaw huiˬ yaw mahˇ k'oeˇ g'aˬ-euˬ nymˇ-ahˇ Yeˬsuˇ le keuˆ ngeh, tsawˇ shiˇ bawˬ law baw-eu deuˬ k'aw ̭ k'oeˇ gaˇ jawˇ-awˇ, tsawˇ haˬ g'awˬ mya ni law ̭ g'a lu ̭ gaˇ ya mawˇ-euˬ meh. 24"Yawˬ g'aˬ na lu ̭ doˆ-iˇ jiˇ-awˬ. Aˬ buˇ heu g'aˬ shiˇ-euˬ maˬ ngeuˇ-a. Yu ̭ k'aˆ lu ̭-eu teh ̭ meh" lehˇ Yeˬsuˇ ehˇ ngeh, aˬ yaw ̭ ma ̭ dawˬ tawˆ lu ̭ aˬ yaw ̭-ahˇ uiˇ-eu meh. 25Tsawˇ haˬ k'oeˇ deuˬ-ahˇ la ̭ nyiˇ bi doˆ-iˇ jiˇ ngeh jawˇ, aˬ buˇ k'oeˇ g'aˬ-euˬ kuˆ lawˆ-ahˇ aˬ yaw ̭ uˇ leˇ-awˇ, aˬ la ̭-ahˇ nyeh ̭ tehˬ nehˬ ngeh, aˬ buˇ k'oeˇ g'aˬ tuˇ laˇ-euˬ meh. 26Gaˇ kawˆ k'oeˇ miˇ k'ahˬ k'oeˇ coeˇ coeˇ lah-ehˇ gaˬ doe-iˇ-euˬ meh. 27Jawˇ duˬ k'oeˇ tsahˇ-ahˇ neh Yeˬsuˇ luˆ-iˇ-awˇ, mehˬ hu paw iˇ lu ̭ ngeh, myaˆ beh ̭ nyiˬ g'aˬ aˬ yaw ̭-euˬ mehˬ nah caw teh g'eh-awˇ, "Daˬbiˇ-euˬ Zaˬmaˇ-oˇ, nga nya ̭-ahˇ g'awˬ shaˬ gaˬ nehˬ la ̭-awˬ" lehˇ guˇ-eu meh. 28Yeˬsuˇ iˇ kahˇ la ̭ k'oeˇ uˇ leˇ ngeh, myaˆ beh ̭ k'oeˇ nyiˬ g'aˬ aˬ yaw ̭ jawˇ gaˇ laˇ-euˬ meh. "Naw nya ̭-ahˇ ngaˇ laˆ taˬ nehˬ nya meh lehˇ naw nya ̭ jah ma loˇ" lehˇ Yeˬsuˇ naˇ haˬ ngeh, "Sahˬ paˬ-oˇ, nga nya ̭ jah ma" lehˇ ehˇ-eu meh. 29K'oeˇ naˇ, aˬ yaw ̭ nya ̭-euˬ myaˆ nuiˆ-ahˇ Yeˬsuˇ toeˬ ciˆ-awˇ, "Naw nya ̭ jah-eu lo ̭-ehˇ pyeu ̭ laˇ lu ̭-uˇ" lehˇ ehˇ nehˬ-euˬ meh. 30K'oeˇ ngeh, aˬ yaw ̭ nya ̭ myaˆ nuiˆ mawˇ laˇ-euˬ meh. Aˬ yaw ̭ nya ̭-ahˇ Yeˬsuˇ ehˇ nehˬ-eu, "Ngaˬ neh naw nya ̭-ahˇ myaˆ nuiˆ bi mawˇ laˇ-euˬ gaˇ kawˆ heu, aˬ cawˬ tiˬ g'aˬ-ahˇ-iˬ maˬ bi siˬ ni yaw k'aˆ k'aˆ-ehˇ yahˇ-awˬ." 31Ehˇ k'aw ̭, aˬ yaw ̭ nya ̭ g'o ̭-iˇ-awˇ, Yeˬsuˇ neh mˇ-euˬ gaˇ kawˆ k'oeˇ miˇ k'ahˬ k'oeˇ coeˇ coeˇ lah ni ja byah jiˇ-euˬ meh. 32Myaˆ nuiˆ mawˇ laˇ-euˬ myaˆ beh ̭ k'oeˇ nyiˬ g'aˬ g'o ̭ dzeuˇ-euˬ nehˬ-ehˇ, neh ̭ uˇ-eu miˇ neh dawˬ maˬ ngehˬ nya-eu aˬ dzawˬ tiˬ g'aˬ-ahˇ, Yeˬsuˇ jawˇ gaˇ sheuˬ la ̭-euˬ meh. 33Ehˇ k'aw ̭, neh ̭ teh doˆ nehˬ-euˬ nehˬ-ehˇ tiˬ poˆ teh ̭-ehˇ, tsawˇ haˬ k'oeˇ g'aˬ dawˬ ngehˬ nya laˇ-euˬ meh. K'oeˇ ngeh, tsawˇ haˬ dawˬ tawˆ lu ̭ zahˬ leˇ-awˇ, "Iˇsaˬleˬlaˆ miˇ k'ahˬ la ̭ k'oeˇ heu lo ̭-ehˇ mˇ-eu jeˬ tiˬ jawˇ-iˬ maˬ mawˇ haw-aˬ" lehˇ ehˇ-eu meh. 34Ehˇ k'aw ̭, Paˬliˬsehˇ deuˬ ehˇ-eu, "Neh ̭ Sahˬpaˬ-euˬ baoˬ-ahˇ aˬ yaw ̭ g'oe-awˇ neh ̭ teh doˆ-eu ngaˇ." 35Meuˬ doe ni, pu doe ni Yeˬsuˇ iˇ-awˇ, uˬ duˬ tahˬ nymˇ la ̭ k'oeˇ dawˬ mehˬ dawˬ tsoˆ tsoˆ-euˬ meh. Miˬyehˇ Miˇk'ahˬ gaˇ kawˆ laˬ k'aˬ cehˇ-eu guiˬ lahˬ dawˬ mehˬ-awˇ, naˇ gawˇ yawˬ jeˬ na lu ̭-ahˇ laˆ taˬ nehˬ-euˬ meh. 36Tsawˇ haˬ aˇ ma ̭-ahˇ aˬ yaw ̭ ya mawˇ ngeh, g'awˬ shaˬ haw gaˬ-euˬ meh. Aˬ jeˬ miˇ neh ehˇ naˇ, aˬ yaw ̭ ma ̭-aˬ, yawˇ bo-eu yaw sahˇ maˬ baw-eu yawˇ deuˬ lo ̭-ehˇ, guˆ-awˇ g'aˬ baˬ lu ̭-eu meh. 37K'oeˇ ngeh, aˬ yaw ̭-euˬ zaˬ lahˇ deuˬ-ahˇ aˬ yaw ̭ heu lo ̭-ehˇ ehˇ nehˬ-euˬ meh. "Cehˇ myah laˇ taˬ-euˬ g'awˬ mya ni jaˆ k'aw ̭, yehˬ-eu tsawˇ haˬ ui cuiˆ teh ̭ meh. 38K'oeˇ miˇ neh, aˬ yaw ̭-euˬ cehˇ yehˬ duˬ-ahˇ cehˇ yehˬ zaˬ deuˬ g'awˬ mya ni bi oe-eu g'aˇ duˬ, Yaw sahˇ g'aˬ-ahˇ guiˬ lahˬ shaˇ-awˬ."

will be added

X\