MA ̭TEHˬ 25

1"Aˇ nah aˇ yamˬ k'oeˇ yamˬ keuˆ le ngeh, Mˬtaˆ Miˇk'ahˬ-aˬ, heu lo ̭-ehˇ duˇ teh ̭-a. Miˬ zaˬ sheuˬ le-eu k'aˬ dzeˇ zaˬ-ahˇ ha laˬ leˇ-eu g'aˇ duˬ, aˬ buˇ zaˬ guˬ tseˇ g'aˬ yawˬ ha-euˬ tsiˇ k'mˬ ciˬ-awˇ le-euˬ meh. 2Aˬ buˇ zaˬ guˬ k'oeˇ deuˬ-aˬ, yaw lai ̭ ngaˬ g'aˬ hawˇ-eu noeˬ dahˇ doe-eu ngaˬ g'aˬ meh. 3Yaw lai ̭ k'oeˇ ngaˬ g'aˬ-aˬ, tsiˇ k'mˬ ciˬ g'eh-euˬ k'aw ̭, tsiˇ aˇ dzehˬ maˬ yuˇ g'eh-a. 4Noeˬ dahˇ doe-eu k'oeˇ ngaˬ g'aˬ-aˬ, tsiˇ k'mˬ ciˬ g'eh-awˇ, tsiˇ maˇ tsa ̭ k'aw ̭ ciˬ g'eh-euˬ meh. 5Miˬ zaˬ sheuˬ le-eu k'aˬ dzeˇ zaˬ k'oeˇ g'aˬ yaw kawˇ-ehˇ maˬ oe keuˆ-eu miˇ neh, aˬ buˇ zaˬ guˬ k'oeˇ deuˬ yu ̭ yoeˇ ngeuˇ laˇ-awˇ, yu ̭ k'aˆ-euˬ meh. 6"'Miˬ zaˬ sheuˬ le-eu g'aˬ oe keuˆ-euˬ meh. Ha laˬ laˇ-awˬ' lehˇ guˇ doˆ laˇ ngeh, sehˇ g'ahˇ ceh laˇ-euˬ meh. 7Aˬ buˇ zaˬ guˬ k'oeˇ tseˇ g'aˬ noeˬ laˇ-awˇ, yawˬ ha-euˬ tsiˇ k'mˬ yawˬ ha laˆ nyehˆ-euˬ meh. 8Yaw lai ̭ deuˬ noeˬ dahˇ doe-eu deuˬ-ahˇ ehˇ nehˬ-eu, 'Nga ma ̭-ahˇ tsiˇ ui cuiˆ bi ̭ la ̭ sheˇ. Nga ma ̭-euˬ tsiˇ k'mˬ miˆ-iˇ shaw-iˬ meh.' 9Noeˬ dahˇ doe-eu k'oeˇ ngaˬ g'aˬ ehˇ-eu, 'Nga ma ̭ g'aˇ duˬ maˬ ngeuˇ naˇ maˬ lo ̭ leˇ-eu paˬ. Tsiˇ ahˬ gaˇ iˇ-awˇ zeuˇ laˬ-iˇ-awˬ.' 10K'oeˇ ngeh, aˬ buˇ zaˬ guˬ yaw lai ̭ k'oeˇ deuˬ tsiˇ zeuˇ-eu lehˇ doˆ-iˇ-euˬ meh. Aˬ yaw ̭ ma ̭ iˇ dzeuˇ ngeh, miˬ zaˬ sheuˬ le-eu g'aˬ oe keuˆ-euˬ meh. Lehˬ hmˬ dah taˬ-euˬ aˬ buˇ zaˬ guˬ k'oeˇ ngaˬ g'aˬ-aˬ, aˬ yaw ̭ nehˬ-ehˇ oeˇ mˇ baˇ-eu bawˬ-iˬ g'eh gaˇ uˇ leˇ-euˬ meh. K'oeˇ naˇ, laˇ g'oˆ piˬ tehˬ-euˬ meh. 11"K'oeˇ ngeh, aˬ buˇ zaˬ guˬ yaw lai ̭ k'oeˇ ngaˬ g'aˬ g'o ̭ keuˆ laˇ-awˇ guˇ-eu, 'Sahˬpaˬ-oˇ, Sahˬpaˬ-oˇ, nga ma ̭-ahˇ laˇ g'oˆ tiˬ poˆ pah nehˬ la ̭ sheˇ.' 12Oeˇ mˇ baˇ le-euˬ g'aˬ ehˇ k'o ̭ nehˬ-eu, 'Ngaˇ maˇ jawˆ ni ehˇ-eu ma. Naw ma ̭-ahˇ ngaˇ maˬ siˬ' 13"Tsawˇhaˬ-euˬ Zaˬmaˇ za ̭ ka le-eu aˇ nah aˇ yamˬ naw ma ̭ maˬ siˬ duˬ nya-eu miˇ neh, yaw beuˇ beuˇ-ehˇ deh ̭-awˬ. 14"Aˇ nah aˇ yamˬ k'oeˇ yamˬ keuˆ le ngeh. Mˬtaˆ Miˇk'ahˬ-aˬ, heu lo ̭-ehˇ duˇ teh ̭-a. Tsawˇ haˬ tiˬ g'aˬ gaˇ ma doˆ-iˇ-eu lehˇ g'eh-eu miˇ neh, aˬ yaw ̭-euˬ zaˬ k'aˆ deuˬ-ahˇ kuˇ-awˇ, aˬ yaw ̭-euˬ pyuˇ shuiˇ myawˬ gahˬ deuˬ-ahˇ bi haw bi pyaˆ ya ̭-euˬ meh. 15Yawˬ g'aˬ na lu ̭-ahˇ, yawˬ ha-ahˇ k'aˇ geuˇ-eu myaˆ ni a nehˬ ya ̭-awˇ bi haw-euˬ meh. Tiˬ g'aˬ-ahˇ-aˬ, shuiˇ maˇ byaˆ ngaˬ heˇ byaˆ, tiˬ g'aˬ-ahˇ-aˬ, nyiˬ heˇ byaˆ, tiˬ g'aˬ-ahˇ-aˬ, tiˬ heˇ byaˆ lehˇ a nehˬ ya ̭-awˇ, gaˇ ma doˆ-iˇ-euˬ meh. 16Shuiˇ maˇ byaˆ ngaˬ heˇ byaˆ ha geu ̭ taˬ-euˬ g'aˬ-aˬ, tiˬ poˆ teh ̭-ehˇ jeˬ ga ̭ ga ̭-iˇ-awˇ, ngaˬ heˇ byaˆ paˇ ga ̭ jeuˬ-euˬ meh. 17K'oeˇ lo ̭-ehˇ duˇ ni, nyiˬ heˇ byaˆ ha geu ̭ taˬ-euˬ g'aˬ k'aw ̭, nyiˬ heˇ byaˆ paˇ ga ̭ jeuˬ-euˬ meh. 18Ehˇ k'aw ̭, tiˬ heˇ byaˆ ha geu ̭ taˬ-euˬ g'aˬ-aˬ, miˇ tsaˬ-ahˇ duˬ k'ahˬ k'ahˬ-awˇ, aˬ yaw ̭-euˬ baw leˬ neh a nehˬ ya ̭-euˬ shuiˇ maˇ byaˆ k'oeˇ deuˬ duˬ pahˬ-awˇ bi jaˆ-euˬ meh. 19"Aˇ nah aˇ yamˬ myahˇ laˇ ngeh, zaˬ k'aˆ k'oeˇ deuˬ-euˬ baw leˬ g'aˬ g'o ̭ keuˆ laˇ-awˇ, zaˬ k'aˆ k'oeˇ deuˬ nehˬ-ehˇ pyuˇ sawˇ tsaˬ-euˬ meh. 20Shuiˇ maˇ byaˆ ngaˬ heˇ byaˆ ha geu ̭ taˬ-euˬ zaˬ k'aˆ k'oeˇ g'aˬ-aˬ, jiˇ jeuˬ ngaˬ heˇ byaˆ jiˇ yuˇ la ̭-awˇ, baw leˬ-ahˇ a nehˬ-awˇ ehˇ-eu, 'Baw leˬ-oˇ, nawˇ ngaˬ-ahˇ shuiˇ maˇ byaˆ ngaˬ heˇ byaˆ bi ̭ taˬ ya ̭-euˬ meh. Haw sheˇ. Ngaˇ ngaˬ heˇ byaˆ paˇ ga ̭ jeuˬ taˬ-euˬ ma.' 21Baw leˬ ehˇ-eu, 'Saˇ jaˇ zi ̭-eu muiˬ-eu zaˬ k'aˆ-oˇ. Nawˇ gaˇ mˇ-euˬ muiˬ dui dui ngaˇ. Nawˇ gaˇ yaw nyiˇ mˇ-euˬ saˇ jaˇ zi ̭-eu miˇ neh, nawˬ-ahˇ ngaˇ gaˇ yaw huiˬ bi mˇ ma. Nawˬ-euˬ baw leˬ nehˬ-ehˇ tiˬ kawˆ lo ̭-ehˇ laˬ k'aˬ cehˇ laˇ-awˬ.' 22K'oeˇ naˇ, shuiˇ maˇ byaˆ nyiˬ heˇ byaˆ ha geu ̭ taˬ-euˬ zaˬ k'aˆ k'oeˇ g'aˬ oe-awˇ, 'Baw leˬ-oˇ, nawˇ ngaˬ-ahˇ shuiˇ mehˇ byaˆ nyiˬ heˇ byaˆ bi ̭ taˬ ya ̭-euˬ meh. Haw sheˇ. Ngaˇ nyiˬ heˇ byaˆ paˇ ga ̭ jeuˬ taˬ-euˬ ma.' 23Baw leˬ ehˇ-eu, 'Saˇ jaˇ zi ̭-eu, muiˬ-eu zaˬ k'aˆ-oˇ. Nawˇ gaˇ mˇ-euˬ muiˬ dui dui ngaˇ. Nawˇ gaˇ yaw nyiˇ mˇ-euˬ saˇ jaˇ zi ̭-eu miˇ neh, nawˬ-ahˇ ngaˇ gaˇ yaw huiˬ bi mˇ ma. Nawˬ-euˬ baw leˬ nehˬ-ehˇ tiˬ kawˆ lo ̭-ehˇ laˬ k'aˬ cehˇ laˇ-awˬ.' 24"K'oeˇ naˇ, shuiˇ maˇ byaˆ tiˬ heˇ byaˆ ha geu ̭ taˬ-euˬ zaˬ k'aˆ k'oeˇ g'aˬ oe-awˇ ehˇ-eu, 'Baw leˬ-oˇ, nawˇ yaw ya ̭ meh lehˇ ngaˇ siˬ nya ma. Nawˬ neh maˬ ka-euˬ gaˇ nawˇ yehˬ dzaˬ-awˇ, nawˬ neh maˬ baw shawˇ-euˬ cehˇ-ahˇ nawˇ tawˆ geu ̭-eu meh. 25Nawˬ-ahˇ ngaˇ guˆ-eu miˇ neh, nawˬ-euˬ pyuˇ miˇ tsaˬ-ahˇ duˬ pahˬ taˬ-euˬ ma. Hehˬ. Nawˬ-euˬ myawˬ nawˇ yuˇ k'o ̭-awˬ.' 26"Baw leˬ g'aˬ ehˇ-eu, 'Haiˬ dui dui-awˇ yaw doeˇ doeˇ dui dui-eu zaˬ k'aˆ-oˇ, ngaˬ neh maˬ ka-euˬ gaˇ ngaˇ yehˬ dzaˬ-awˇ, ngaˬ neh maˬ baw shawˇ-euˬ cehˇ-ahˇ ngaˇ tawˆ geu ̭-eu nawˇ siˬ duˬ-eu nga laˬ. 27Toˆ-ehˇ ngeuˇ-eu jeˬ maˇ-iˬ, ngaˬ-euˬ pyuˇ teu deuˬ yuˇ-awˇ, pyuˇ cehˇ jiˇ la ̭ k'oeˇ nawˇ dawˆ ahˇ-iˇ law nmˇ-aˬ, ngaˇ g'o ̭ keuˆ laˇ ngeh, ngaˬ-euˬ pyuˇ uˬ ta ̭ jiˇ jeuˬ k'aw ̭ za k'o ̭ teh ̭-a. 28Tsawˇ haˬ teu g'aˬ jawˇ gaˇ jaˆ-eu pyuˇ teu deuˬ yuˇ-awˇ, tiˬ muiˇ byaˆ ahˇ-eu g'aˬ-ahˇ bi ̭-awˬ. 29Aˬ jeˬ miˇ neh ehˇ naˇ, jaˆ-eu tsawˇ haˬ-ahˇ paˇ bi ̭ lahˬ nehˬ-awˇ, paˇ bi jaˆ dzehˬ laˇ teh ̭-a. Maˬ jaˆ-eu tsawˇ haˬ-aˬ, maˬ jaˆ k'aˇ jaˆ-eu dawˬ tawˆ lu ̭ bi yuˇ jiˇ teh ̭-a. 30Gaˇ dahˇ maˬ tsoeˬ-eu zaˬ k'aˆ heu g'aˬ-ahˇ-aˬ, la ̭ nyiˇ paw zahˇ tsui ni g'eh gaˇ ba ̭ dzeh-awˬ. K'oeˇ gaˇ, aˬ yaw ̭ ngoeˇ ngoeˇ-ehˇ seuˬ teu ̭ teu ̭-ehˇ shaˬ lu ̭-uˇ.' 31"Tsawˇhaˬ-euˬ Zaˬmaˇ mˬ taˆ g'aˬ k'ehˇ deuˬ sheuˬ-awˇ, Sahˬ paˬ lo ̭-ehˇ za ̭ le ngeh, aˬ yaw ̭-euˬ dzoeˬ dzaˬ nuiˇ mahˬ k'oeˇ taˆ nuiˇ le teh ̭-a. 32Miˇ tsaˬ tsawˇ jeuˬ tsawˇ ca dawˬ tawˆ lu ̭ aˬ yaw ̭-euˬ mehˬ shi uiˬ laˇ teh ̭-a. Yawˇ bo-eu tsawˇ haˬ yawˇ hawˇ-eu ci ̭ myeh ̭ biˇ paˆ-eu lo ̭-ehˇ, tsawˇ haˬ k'oeˇ deuˬ-ahˇ aˬ yaw ̭ nyiˬ muˇ biˇ paˆ teh ̭-a. 33Yaw tsaˬ yaw dawˇ tsawˇ haˬ deuˬ-ahˇ aˬ yaw ̭-euˬ aˇ maˇ paw bi jawˇ-awˇ, maˬ tsaˬ maˬ dawˇ-eu tsawˇ haˬ deuˬ-ahˇ aˬ yaw ̭-euˬ aˇ caˇ paw bi jawˇ teh ̭-a. 34K'oeˇ naˇ, aˬ yaw ̭-euˬ aˇ maˇ paw jawˇ-eu tsawˇ haˬ deuˬ-ahˇ Sahˬ paˬ heu lo ̭-ehˇ ehˇ nehˬ teh ̭-a. 'Ngaˬ Da neh guiˬ lahˬ bi ̭ taˬ-euˬ tsawˇ haˬ deuˬ-oˇ, laˇ-awˬ. Mˬ beh miˇ beh ngeh neh naw ma ̭ g'aˇ duˬ lehˬ hmˬ taˬ-euˬ miˇ k'ahˬ-ahˇ jawˇ laˇ-awˬ. 35Ngaˇ hawˬ meh ̭ ngeh naw ma ̭ bi dzaˬ la ̭-awˇ, ngaˇ iˇ cu ̭ meh ̭ ngeh naw ma ̭ bi dawˇ la ̭-euˬ meh. Ngaˇ daˬ yah pyeu ̭ ngeh naw ma ̭ ha nehˬ la ̭-euˬ meh. 36Ngaˇ mehˬ tsoeˬ maˬ ahˇ ngeh, naw ma ̭ bi dm la ̭-euˬ meh. Ngaˇ jawˇ saˇ maˬ doˆ ngeh, naw ma ̭ bo saˆ la ̭-euˬ meh. Ngaˇ pa ̭ kuˆ-ahˇ uˇ ngeh, naw ma ̭ haw le-euˬ meh.' 37"K'oeˇ ngeh, yaw tsaˬ yaw dawˇ tsawˇ haˬ k'oeˇ deuˬ aˬ yaw ̭-ahˇ heu lo ̭-ehˇ ehˇ nehˬ teh ̭-a. 'Sahˬ paˬ-oˇ, nawˇ hawˬ meh ̭ ngeh nga ma ̭ mawˇ-awˇ bi dzaˬ-euˬ aˬ myah jaˆ ta. Nawˇ iˇ cu ̭ meh ̭ ngeh nga ma ̭ mawˇ-awˇ bi dawˇ-euˬ aˬ myah jaˆ ta. 38Nawˇ daˬ yah lo ̭-ehˇ cah lu ̭ gaˇ nga ma ̭ mawˇ-awˇ, iˇ kahˇ la ̭ k'oeˇ ha ahˇ-euˬ aˬ myah jaˆ ta. Nawˇ mehˬ tsoeˬ maˬ ahˇ-eu nga ma ̭ mawˇ-awˇ, mehˬ tsoeˬ bi dm-euˬ aˬ myah jaˆ ta. 39Nawˇ naˇ gaˇ maˬ ehˇ, pa ̭ kuˆ-ahˇ uˇ gaˇ maˬ ehˇ, nga ma ̭ mawˇ-awˇ haw le-euˬ aˬ myah jaˆ ta.' 40K'oeˇ ngeh, aˬ yaw ̭ ma ̭-ahˇ Sahˬ paˬ heu lo ̭-ehˇ ehˇ nehˬ teh ̭-a. 'Ngaˬ-euˬ aˬ yui ̭ aˬ nyiˇ heu deuˬ la ̭ k'oeˇ, aˬ cawˬ naˆ maˬ tseˇ nyiˇ teˬ-eu g'aˬ-ahˇ naw ma ̭ neh ngehˬ g'eh nehˬ-euˬ jeˬ-aˬ, ngaˬ-ahˇ ngehˬ g'eh nehˬ la ̭ gaˇ duˇ-eu meh lehˇ, ngaˇ naw ma ̭-ahˇ maˇ jawˆ ni ehˇ-eu ma.' 41"K'oeˇ naˇ, Sahˬ paˬ-euˬ aˇ caˇ paw jawˇ-eu tsawˇ haˬ deuˬ-ahˇ, Sahˬ paˬ heu lo ̭-ehˇ ehˇ nehˬ teh ̭-a. 'Miˬyehˇ neh yaˬ k'ehˇ bi yaˬ-euˬ tsawˇ haˬ deuˬ-oˇ, ngaˇ jawˇ gaˇ neh doˆ-iˇ-awˇ, Neh ̭ sahˬ paˬ hawˇ-eu aˬ yaw ̭-euˬ mˬ taˆ g'aˬ k'ehˇ deuˬ g'aˇ duˬ lehˬ hmˬ taˬ-euˬ, mˬ maˬ maˬ byaˆ zaˇ ziˇ do ̭ lu ̭-eu miˬ dzaˬ la ̭ k'oeˇ uˇ-iˇ-awˬ. 42Ngaˇ hawˬ meh ̭ ngeh, naw ma ̭ maˬ bi dzaˬ la ̭-aˬ. Ngaˇ iˇ cu ̭ meh ̭ ngeh, naw ma ̭ maˬ bi dawˇ la ̭-aˬ. 43Ngaˇ daˬ yah pyeu ̭ ngeh, naw ma ̭ maˬ ha nehˬ la ̭-aˬ. Ngaˇ mehˬ tsoeˬ maˬ ahˇ ngeh, naw ma ̭ maˬ bi dm la ̭-aˬ. Ngaˇ jawˇ saˇ maˬ doˆ ngeh maˬ ehˇ, pa ̭ kuˆ-ahˇ uˇ ngeh maˬ ehˇ, naw ma ̭ maˬ haw le-aˬ.' 44K'oeˇ ngeh, aˬ yaw ̭ ma ̭ aˬ yaw ̭-ahˇ heu lo ̭-ehˇ ehˇ teh ̭-a. 'Sahˬ paˬ-oˇ, hawˬ meh ̭-eu, iˇ cu ̭ meh ̭-eu, daˬ yah pyeu ̭-eu, mehˬ tsoeˬ maˬ ahˇ-eu, jawˇ saˇ maˬ doˆ-eu, pa ̭ kuˆ-ahˇ uˇ-eu, heu lo ̭-ehˇ g'eh-eu deuˬ-ahˇ nawˇ ya daˬ lu ̭ gaˇ nga ma ̭ mawˇ-awˇ, nawˬ-ahˇ maˬ caw ba ni byehˇ-euˬ aˬ myah jaˆ ta.' 45"Sahˬ paˬ ehˇ-eu, 'Ngaˇ naw ma ̭-ahˇ ehˇ nehˬ nyaˇ. Tsawˇ haˬ heu deuˬ la ̭ k'oeˇ aˬ cawˬ naˆ maˬ tseˇ nyiˇ teˬ-eu g'aˬ-ahˇ naw ma ̭ ngehˬ maˬ g'eh nehˬ ni byehˇ naˇ, ngaˬ-ahˇ ngehˬ maˬ g'eh nehˬ la ̭ gaˇ duˇ-eu meh.' 46Aˬ yaw ̭ ma ̭-aˬ, mˬ maˬ maˬ byaˆ zaˇ ziˇ k'ehˬ-eu k'aˆ-eu jeˬ-ahˇ ya daˬ-awˇ, yaw tsaˬ yaw dawˇ tsawˇ haˬ deuˬ-aˬ, mˬ maˬ maˬ byaˆ zaˇ ziˇ deh ̭-eu jeˬ za teh ̭-a."

will be added

X\