MA ̭TEHˬ 20

1"Mˬtaˆ Miˇk'ahˬ-aˬ, heu gaˇ duˇ leˇ-eu meh. Tsawˇ haˬ tiˬ g'aˬ uˬ shawˬ yaw na ̭-ehˇ doˆ-iˇ-awˇ, aˬ yaw ̭-euˬ aˬ ga ̭ yaˇ kmˇ la ̭ k'oeˇ gaˇ bi mˇ-eu tsawˇ haˬ poˆ-iˇ-euˬ meh. 2Tiˬ nah mˇ-euˬ g'aˬ gaˇ poeˬ pyuˇ maˇ byaˆ tiˬ byaˆ bi ̭ ma lehˇ ja tsaˬ-awˇ, aˬ ga ̭ yaˇ kmˇ la ̭ k'oeˇ gaˇ bi mˇ-iˇ-euˬ meh. 3Aˬ cawˬ yaˇ smˇ iˇ tsiˇ jiˇ ngeh yamˬ-ahˇ, lehˆ lehˆ kawˆ paw aˬ yaw ̭ paˇ iˇ haw ngeh, gaˇ mˇ-eu maˬ jaˆ-ehˇ yaw ̭ lu ̭-eu tsawˇ haˬ tiˬ deuˬ-ahˇ aˬ yaw ̭ mawˇ-euˬ meh. 4'Naw ma ̭ g'eh ngaˬ-euˬ aˬ ga ̭ yaˇ kmˇ la ̭ k'oeˇ gaˇ mˇ-iˇ-awˬ. G'aˬ gaˇ poeˬ haw tsaˬ nehˬ ma' lehˇ, tsawˇ haˬ k'oeˇ deuˬ-ahˇ aˬ yaw ̭ ehˇ nehˬ ngeh, aˬ yaw ̭ ma ̭ iˇ-awˇ gaˇ mˇ-iˇ-euˬ meh. 5Nah loˆ ceh laˇ ngeh tiˬ poˆ hawˇ-eu, nahˇ ma ga k'aˇ-iˇ ngeh tiˬ poˆ aˬ yaw ̭ paˇ iˇ-awˇ, tsawˇ haˬ paˇ k'ehˇ lahˬ-iˇ-awˇ, aˬ ga ̭ yaˇ kmˇ-ahˇ gaˇ bi mˇ-iˇ-euˬ meh. 6Uˬ ci ̭ paw kuiˬ dzaˇ za ̭ dzaˇ bi ̭ yamˬ keuˆ laˇ ngeh, lehˆ lehˆ kawˆ-ahˇ aˬ yaw ̭ tiˬ poˆ paˇ iˇ-awˇ, tsawˇ haˬ tiˬ deuˬ gaˇ mˇ-eu maˬ jaˆ-ehˇ yaw ̭ lu ̭ gaˇ paˇ ya mawˇ-euˬ meh. 'Aˬ jeˬ miˇ neh naw ma ̭ nah ga-ehˇ tiˬ jeˬ-iˬ maˬ mˇ ni jawˇ te' lehˇ aˬ yaw ̭ naˇ haˬ-euˬ meh. 7'Tsawˇ haˬ tiˬ g'aˬ-iˬ nga ma ̭-ahˇ gaˇ bi mˇ-eu lehˇ maˬ poˆ le-euˬ miˇ neh, heu lo ̭-ehˇ jawˇ lu ̭-eu ma' lehˇ aˬ yaw ̭ ma ̭ ehˇ-eu meh. 'Toˆ-ehˇ ngeuˇ naˇ, naw ma ̭ jiˇ ngaˬ-euˬ aˬ ga ̭ yaˇ kmˇ-ahˇ iˇ-awˇ gaˇ mˇ-iˇ-awˬ' lehˇ, tsawˇ haˬ k'oeˇ deuˬ-ahˇ aˬ yaw ̭ ehˇ nehˬ-euˬ meh. 8"Uˬ ci ̭ ci ̭ le ngeh, aˬ ga ̭ yaˇ kmˇ-euˬ yaw sahˇ g'aˬ, aˬ ga ̭ yaˇ kmˇ la ̭ k'oeˇ gaˇ mˇ gaˇ aˬ yui ̭ geu ̭-awˇ bi haw bi pyaˆ-euˬ g'aˬ-ahˇ kuˇ-awˇ ehˇ nehˬ-eu, 'Gaˇ mˇ le-euˬ tsawˇ haˬ deuˬ-ahˇ kuˇ-awˇ g'aˬ gaˇ poeˬ bi ̭ nehˬ-awˬ. Jeˬ nah nah saˬ mˇ le-euˬ deuˬ-ahˇ jeˬ huˬ bi ̭-awˇ, jeˬ hu hu saˬ mˇ le-euˬ deuˬ-ahˇ bi ̭ saˬ saˬ-awˬ.' 9Uˬ ci ̭ paw kuiˬ dzaˇ za ̭ dzaˇ bi ̭ ngeh yamˬ-ahˇ hawˇ-eu mˇ le-euˬ deuˬ-ahˇ, tiˬ g'aˬ-ahˇ pyuˇ maˇ byaˆ tiˬ byaˆ bi ̭-euˬ meh. 10Aˬ cawˬ jeˬ hu mˇ le-euˬ deuˬ g'aˬ gaˇ poeˬ yuˇ-eu lehˇ laˇ ngeh, aˬ yaw ̭ ma ̭ aˬ cawˬ myaˆ maˬ tseˇ za dzehˬ teh ̭-a lehˇ noeˬ-euˬ meh. Ehˇ k'aw ̭, aˬ yaw ̭ ma ̭ g'eh, tiˬ g'aˬ-euˬ pyuˇ maˇ byaˆ tiˬ byaˆ za-euˬ teh ̭ meh. 11Aˬ yaw ̭ ma ̭-ahˇ g'aˬ gaˇ poeˬ bi ̭ nehˬ ngeh, aˬ ga ̭ yaˇ kmˇ yaw sahˇ g'aˬ-ahˇ aˬ yaw ̭ ma ̭ g'awˬ mya jeˬ toˇ-eu meh. 12'Jeˬ nah nah saˬ oe-awˇ mˇ le-euˬ deuˬ naˬ liˬ tiˬ la ̭ mˇ-euˬ teh ̭ meh. Nga ma ̭-aˬ, nah ga-ehˇ nahˇ tsaˇ law ̭ law ̭-ehˇ mˇ-euˬ ma. Ehˇ k'aw ̭, nawˇ g'aˬ gaˇ poeˬ bi ̭ la ̭ ngeh, tiˬ kawˆ myaˆ ni teh ̭-ehˇ bi ̭ la ̭-eu nga' lehˇ ehˇ-eu meh. 13"Tsawˇ haˬ k'oeˇ deuˬ la ̭ k'oeˇ tiˬ g'aˬ-ahˇ, aˬ ga ̭ yaˇ kmˇ yaw sahˇ g'aˬ heu lo ̭-ehˇ ehˇ k'o ̭ nehˬ-euˬ meh. 'Naw ma ̭-ahˇ ngaˇ mehˇ shuiˇ shuiˇ-euˬ maˬ ngeuˇ. Tiˬ nah-euˬ g'aˬ gaˇ poeˬ pyuˇ maˇ byaˆ tiˬ byaˆ sawˇ-awˇ mˇ-eu g'aˇ duˬ naw ma ̭ nui ma tsaˬ-euˬ meh. 14Nymˬ-mˇ naw ma ̭-euˬ g'aˬ gaˇ poeˬ yuˇ-awˇ g'o ̭-iˇ-awˬ. Mˇ saˬ saˬ le-euˬ tsawˇ haˬ heu deuˬ-ahˇ k'aw ̭, naw ma ̭-ahˇ bi ̭-euˬ myaˆ ni ngaˇ bi ̭ maw ̭-eu nui ma ahˇ-eu ma. 15Ngaˬ-euˬ pyuˇ ngaˇ noeˬ-euˬ lo ̭-ehˇ maˬ bi ̭ k'mˬ ta loˇ. Ngaˇ aˬ cawˬ-ahˇ g'awˬ mya ni bi ̭ maw ̭-eu nui ma ahˇ gaˇ naw ma ̭ myaˆ naˆ-eu nya loˇ' lehˇ ehˇ nehˬ-euˬ meh. 16"K'oeˇ gaˇ duˇ ni, heu ziˇ-ahˇ aˬ cawˬ mehˬ hu jawˇ-eu tsawˇ haˬ-aˬ, aˬ kaˇ kaˇ ziˇ-ahˇ aˬ cawˬ mehˬ nah ya jawˇ-awˇ, heu ziˇ-ahˇ aˬ cawˬ mehˬ nah jawˇ-eu tsawˇ haˬ-aˬ, aˬ kaˇ kaˇ ziˇ-ahˇ aˬ cawˬ mehˬ hu ya jawˇ teh ̭-a." 17Yeˬsuˇ Yeˬluˇsaˬlehˬ meuˬ-ahˇ le lu ̭ ngeh, aˬ yaw ̭-euˬ zaˬ lahˇ deuˬ-ahˇ sheuˬ ceuˆ-awˇ cah-eu la ̭ k'oeˇ, aˬ cawˬ maˬ bi gaˬ ni heu lo ̭-ehˇ ehˇ nehˬ-euˬ meh. 18"Naˇ haˬ sheˇ. Aˬ dui ma ̭ Yeˬluˇsaˬlehˬ meuˬ-ahˇ le lu ̭-eu ma. K'oeˇ gaˇ, Tsawˇhaˬ-euˬ Zaˬmaˇ-ahˇ, piˇ ma aˬ yui ̭ deuˬ hawˇ-eu Zahˇ dawˬ k'o ̭ dawˬ mehˬ-eu saˬ laˬ deuˬ-euˬ aˬ la ̭ la ̭ k'oeˇ aˬ cawˬ a nehˬ-awˇ, aˬ yaw ̭ ya shiˇ ni aˬ cawˬ yaˇ k'aˬ daˇ teh ̭-a. 19K'oeˇ naˇ, Miˬyehˇ-ahˇ maˬ siˬ nya-eu aˬ cawˬ tsawˇ jeuˬ-euˬ aˬ la ̭ la ̭ k'oeˇ a nehˬ-awˇ, aˬ yaw ̭-ahˇ yehˬ bawˬ sehˇ lu-ehˇ bi ehˇ niˇ g'a-awˇ, yahˬ caˆ neh bi jui ̭-awˇ, la ̭ ya ̭ k'oeˇ taˆ bi ta ̭ seh ̭ teh ̭-a. Ehˇ k'aw ̭, smˬ nah byah laˇ naˇ, Miˬyehˇ aˬ yaw ̭-ahˇ paˇ bi g'o ̭ deh ̭ laˇ teh ̭-a." 20K'oeˇ naˇ, Zeˬbeˬdehˇ-euˬ miˬ zaˬ-aˬ, aˬ yaw ̭-euˬ aˬ li nyiˬ li sheuˬ-awˇ, aˬ nya ̭ nmˇ g'aˇ duˬ tiˬ jeˬ paˬ shaˇ-eu lehˇ, Yeˬsuˇ-euˬ mehˬ shi pawˬ tsui ̭ pawˬ dmˬ dmˬ-euˬ meh. 21Yeˬsuˇ aˬ yaw ̭-ahˇ ehˇ nehˬ-eu, "Nawˇ aˬ jeˬ shaˇ maw ̭ te." Aˬ yaw ̭ ehˇ-eu, "Nawˇ sahˬ paˬ keuˆ leˇ ngeh, ngaˬ li heu nyiˬ li-ahˇ, nawˬ-euˬ aˇ maˇ paw tiˬ g'aˬ bi nuiˇ-awˇ, aˇ caˇ paw tiˬ g'aˬ bi nuiˇ ma lehˇ, ngaˬ-ahˇ tiˬ poˆ ehˇ tsehˆ nehˬ la ̭-awˬ." 22Aˬ nya ̭ nmˇ-ahˇ Yeˬsuˇ ehˇ nehˬ-eu, "Naw nya ̭ nmˇ shaˇ-eu jeˬ-ahˇ naw nya ̭ nmˇ maˬ siˬ nya-a. Ngaˇ dawˇ-eu lehˇ g'eh-eu shaˬ zahˬ na ̭-eu k'mˬ maˬ-ahˇ naw nya ̭ nmˇ dawˇ coeˇ ma loˇ." Aˬ nya ̭ nmˇ ehˇ-eu, "Dawˇ coeˇ ma." 23Yeˬsuˇ ehˇ-eu, "Naw nya ̭ nmˇ ngaˬ-euˬ k'mˬ maˬ-ahˇ aˬ diˇ aˬ maˇ dawˇ teh ̭-a. Ehˇ k'aw ̭, ngaˬ-euˬ aˇ maˇ paw hawˇ-eu aˇ caˇ paw bi nuiˇ-eu tsawˇ haˬ-ahˇ ngaˇ tseˇ geu ̭-eu aˬ kawˬ-aˬ maˬ jaˆ. Nuiˇ duˬ k'oeˇ deuˬ-aˬ, ngaˬ Da neh lehˬ hmˬ taˬ-euˬ tsawˇ haˬ deuˬ g'aˇ duˬ meh." 24K'oeˇ lo ̭-ehˇ ehˇ gaˇ zaˬ lahˇ nui deuˬ tseˇ g'aˬ ya gaˬ ngeh, aˬ nya ̭ nmˇ-ahˇ nui ma pehˇ-eu meh. 25K'oeˇ miˇ neh, aˬ yaw ̭ ma ̭ dawˬ tawˆ lu ̭-ahˇ Yeˬsuˇ kuˇ uiˬ-awˇ, heu lo ̭-ehˇ ehˇ nehˬ-euˬ meh. "Aˬ cawˬ tsawˇ jeuˬ-euˬ sahˬ paˬ sahˬ ma deuˬ-aˬ, miˇ k'ahˬ zaˬ deuˬ k'oeˇ taˆ zuiˆ-eu baoˬ jaˆ-awˇ, aˬ yui ̭ aˬ tsu geu ̭-awˇ uˆ lahˇ-eu deuˬ k'aw ̭, yawˬ ha k'aˇ noeˬ-euˬ lo ̭-ehˇ uˆ lahˇ-eu baoˬ tiˬ byah ni jaˆ meh. 26Ehˇ k'aw ̭, naw ma ̭ k'oeˇ lo ̭-ehˇ maˬ ya geu ̭-a. Naw ma ̭ la ̭ k'oeˇ, aˬ cawˬ naˆ maˬ tseˇ huiˬ maw ̭ mahˇ maw ̭-eu g'aˬ-aˬ, aˬ cawˬ-euˬ myawˬ k'ehˇ ya g'oˆ teh ̭-a. 27Naw ma ̭ la ̭ k'oeˇ aˬ cawˬ k'oeˇ taˆ aˬ yui ̭ aˬ tsu geu ̭ maw ̭-eu g'aˬ-aˬ, aˬ cawˬ-euˬ zaˬ k'aˆ ya geu ̭ teh ̭-a. 28Tsawˇhaˬ-euˬ Zaˬmaˇ k'aw ̭, aˬ cawˬ neh bi mˇ cu-eu g'aˇ duˬ oe-euˬ maˬ ngeuˇ-a. Aˬ cawˬ g'aˇ duˬ mˇ le-euˬ uˬ ta ̭, tsawˇ haˬ g'awˬ mya ni-ahˇ ka k'o ̭-eu g'aˇ duˬ shiˇ dah le-eu lehˇ oe-euˬ meh." 29Yeˬsuˇ hawˇ-eu aˬ yaw ̭-euˬ zaˬ lahˇ deuˬ Yeˬliˇkoˇ meuˬ-ahˇ neh doˆ-iˇ ngeh, aˬ yaw ̭ ma ̭-euˬ mehˬ nah tsawˇ haˬ aˇ ma ̭ ma ̭ ma caw teh lu ̭-eu meh. 30Gaˇ ma gaˇ dzeˇ nuiˇ lu ̭-eu myaˆ beh ̭ nyiˬ g'aˬ, Yeˬsuˇ iˇ lu ̭-eu teˇ saˇ gaˬ-awˇ, "Daˬbiˇ-euˬ Zaˬmaˇ-oˇ, nga nya ̭-ahˇ g'awˬ shaˬ gaˬ nehˬ la ̭-awˬ" lehˇ guˇ-eu meh. 31Tsawˇ haˬ aˇ ma ̭ ma ̭ ma k'oeˇ deuˬ aˬ yaw ̭ nya ̭-ahˇ dehˬ-awˇ, ciˬ cuˇ ni jawˇ-awˬ lehˇ ehˇ nehˬ-euˬ meh. Ehˇ k'aw ̭, aˬ yaw ̭ nya ̭ maˬ naˇ haˬ-ehˇ, "Daˬbiˇ-euˬ Zaˬmaˇ-oˇ, nga nya ̭-ahˇ g'awˬ shaˬ gaˬ nehˬ la ̭-awˬ" lehˇ, yaw beh poˆ naˇ maˬ tseˇ guˇ k'aˆ laˇ-euˬ meh. 32Yeˬsuˇ naˬ leˇ-awˇ, aˬ yaw ̭ nya ̭-ahˇ kuˇ-awˇ ehˇ nehˬ-eu, "Naw nya ̭ g'aˇ duˬ ngaˇ aˬ jeˬ bi jahˇ nehˬ maw ̭-eu nya." 33Aˬ yaw ̭ nya ̭ ehˇ-eu, "Sahˬpaˬ-oˇ, nga nya ̭-euˬ myaˆ nuiˆ mawˇ laˇ ni bi jahˇ nehˬ maw ̭ miˇ-a." 34Aˬ yaw ̭ nya ̭-ahˇ Yeˬsuˇ g'awˬ shaˬ haw gaˬ-awˇ, myaˆ nuiˆ-ahˇ toeˬ ciˆ nehˬ ngeh, aˬ yaw ̭ nya ̭-euˬ myaˆ nuiˆ tiˬ poˆ teh ̭-ehˇ mawˇ laˇ-awˇ, aˬ yaw ̭-euˬ mehˬ nah caw teh g'eh-euˬ meh.

will be added

X\