MA ̭TEHˬ 16

1Yeˬsuˇ jawˇ gaˇ laˇ-euˬ Paˬliˬ sehˇ hawˇ-eu Saˬduˬgehˇ tiˬ paˆ na deuˬ, Yeˬsuˇ-ahˇ lahˇ ju k'mˇ maw ̭-eu nui ma ahˇ-eu meh. K'oeˇ miˇ neh, mˬ k'oeˇ taˆ-euˬ zahˬ leˇ paˬ-ehˇ g'eh-eu jeˬ mˇ mehˬ nehˬ la ̭ lehˇ ehˇ nehˬ-euˬ meh. 2Aˬ yaw ̭ ma ̭-ahˇ Yeˬsuˇ ehˇ nehˬ-eu, "Uˬ ci ̭ ci ̭ le ngeh, mˬ yaw neˇ naˇ, mˬ muiˬ ngaˇ lehˇ naw ma ̭ ehˇ-eu meh. 3Uˬ shawˬ yaw na ̭-ehˇ mˬ neˇ naˆ naˆ naˇ, uˬ yehˇ yehˇ le ngaˇ lehˇ naw ma ̭ ehˇ-eu meh. Naw ma ̭ mˬ-ahˇ haw haw-ehˇ, uˬ yehˇ uˬ tsaˇ to ̭ nya-eu meh. Ehˇ k'aw ̭, aˇ yamˬ aˇ law-ahˇ ta ̭-eu bi siˬ bi mawˇ-eu jeˬ-ahˇ naw ma ̭ dawˬ tsui ̭ maˬ yuˇ doˆ nya-a. 4Iˬ nah aˇ yamˬ-ahˇ deh ̭ lu ̭-eu tsawˇ haˬ deuˬ, zahˇ sahˇ k'o ̭ maˬ baw ni aˇ naˆ ni haiˬ-eu nga. K'aˆ jeˬ-ehˇ g'eh-eu jeˬ mˇ mehˬ nehˬ la ̭ lehˇ, naw ma ̭ ngaˬ-ahˇ ehˇ-eu meh. Yawˇnaˆ-euˬ gaˇ kawˆ zahˬ leˇ paˬ-ehˇ g'eh-eu k'oeˇ maˬ ngeuˇ naˇ, naw ma ̭-ahˇ ngaˇ nui jeˬ maˬ mehˬ nehˬ." K'oeˇ naˇ, aˬ yaw ̭ ma ̭ jawˇ gaˇ neh aˬ yaw ̭ doˆ-iˇ-euˬ meh. 5Zaˬ lahˇ deuˬ lah nui baˬ tsehˆ doˆ ngeh, dzaˬ-eu g'aˇ duˬ kaˬ muˇ maˬ yuˇ g'eh ni ngehˇ-euˬ meh. 6Yeˬsuˇ aˬ yaw ̭ ma ̭-ahˇ ehˇ nehˬ-eu, "Paˬliˬsehˇ hawˇ-eu Saˬduˬgehˇ deuˬ-euˬ dehˬ tseˬ-ahˇ yaw k'aˆ k'aˆ-ehˇ yahˇ-awˬ." 7Aˬ yaw ̭ ma ̭ yaw kaˬ ja-eu, "Aˬ dui ma ̭ kaˬ muˇ maˬ hehˇ le ̭-euˬ miˇ neh, aˬ yaw ̭ teu lo ̭-ehˇ ehˇ-eu ngaˇ." 8Aˬ yaw ̭ ma ̭ k'oeˇ lo ̭-ehˇ ja lu ̭-eu Yeˬsuˇ siˬ nya-awˇ, heu lo ̭-ehˇ ehˇ-eu meh. "Jah-eu g'aˬ baˬ dui dui-eu tsawˇ haˬ deuˬ-oˇ, aˬ jeˬ miˇ neh kaˬ muˇ maˬ ahˇ-eu gaˇ kawˆ ja ja-ehˇ jawˇ te. 9Naw ma ̭ iˬ nah keuˆ ni maˬ g'oˆ shaw-ehˇ jawˇ te siˬ loˇ. Tsawˇ haˬ ngaˬ heˇ g'aˬ g'aˇ duˬ ngaˬ neh kaˬ muˇ ngaˬ yaˆ ngawˬ pyehˬ-awˇ, naw ma ̭ k'aˆ puˬ aˇ myaˆ puˬ g'oˆ byah-euˬ gaˇ kawˆ ngehˇ jiˇ maˬ loˇ. 10Tsawˇ haˬ oeˬ heˇ g'aˬ g'aˇ duˬ ngaˬ neh kaˬ muˇ shi ̭ yaˆ ngawˬ pyehˬ-awˇ, naw ma ̭ neh k'aˆ puˬ aˇ myaˆ puˬ g'oˆ byah-euˬ gaˇ kawˆ g'eh ngehˇ jiˇ teˬ loˇ. 11Ngaˇ naw ma ̭-ahˇ kaˬ muˇ gaˇ kawˆ ehˇ lu ̭-eu maˬ ngeuˇ-a lehˇ, aˬ joˆ-ehˇ maˬ siˬ nya-eu nya. Paˬliˬsehˇ hawˇ-eu Saˬduˬgehˇ deuˬ-euˬ dehˬ tseˬ-ahˇ yaw k'aˆ k'aˆ-ehˇ yahˇ-awˬ." 12K'oeˇ ngeh jawˇ, kaˬ muˇ jahˇ gaˇ dawˆ-eu dehˬ tseˬ-ahˇ yahˇ-eu g'aˇ duˬ, Yeˬsuˇ aˬ yaw ̭ ma ̭-ahˇ ehˇ maw ̭-eu maˬ ngeuˇ-ehˇ, Paˬliˬsehˇ deuˬ hawˇ-eu Saˬduˬgehˇ deuˬ neh mehˬ-euˬ tsoˆ-euˬ dawˬ deuˬ-ahˇ yahˇ-awˬ lehˇ ehˇ maw ̭-eu gaˇ kawˆ, zaˬ lahˇ deuˬ g'oˆ shaw-euˬ meh. 13Piˇliˇpiˆ Gehˇsaˬliˇ meuˬ dawˬ peh Yeˬsuˇ iˇ keuˆ ngeh, zaˬ lahˇ deuˬ-ahˇ aˬ yaw ̭ naˇ haˬ-eu, "Tsawˇhaˬ-euˬ Zaˬmaˇ-ahˇ aˬ suˇ g'aˬ nga lehˇ aˬ cawˬ ehˇ lu ̭ ta." 14Aˬ yaw ̭ ma ̭ ehˇ-eu, "Tiˬ paˆ na deuˬ Iˇ cu ̭ shawˇ-eu Yoˇhaˬ nga lehˇ ehˇ-awˇ, tiˬ paˆ na deuˬ Eˇliˇyaˆ nga lehˇ ehˇ-eu meh. Tiˬ paˆ na deuˬ-aˬ, Yeˬlaˬmiˇ maˬ ngeuˇ naˇ, Miˬyehˇ g'aˇ duˬ ngehˬ dah-eu tsawˇ haˬ tiˬ g'aˬ na ngaˇ lehˇ ehˇ-eu meh." 15Aˬ yaw ̭ ma ̭-ahˇ aˬ yaw ̭ ehˇ nehˬ-eu, "Naw maˬ toe. Ngaˇ aˬ suˇ g'aˬ nga lehˇ ehˇ nmˇ." 16Siˇmoˬ Beˬtuˆluˆ ehˇ-eu, "Nawˇ-aˬ, Deh ̭ lu ̭-eu Miˬyehˇ-euˬ Zaˬmaˇ pyeu ̭-eu Meˬsiˇya meh." 17Yeˬsuˇ ehˇ-eu, "Yawˇnaˆ-euˬ aˬ li Siˇmoˬ-oˇ, nawˇ-aˬ guiˬ lahˬ zawˇ huiˬ-eu tsawˇ haˬ meh. Aˬ jeˬ miˇ neh ehˇ naˇ, gaˇ kawˆ heu tsawˇ haˬ zaˬ neh nawˬ-ahˇ pah mehˬ-euˬ maˬ ngeuˇ-a. Mˬ k'oeˇ taˆ jawˇ-eu ngaˬ Da neh nawˬ-ahˇ pah mehˬ nehˬ-euˬ meh. 18K'oeˇ miˇ neh, ngaˇ nawˬ-ahˇ heu lo ̭-ehˇ ehˇ-eu ma. Beˬtuˆluˆ nawˇ-aˬ, k'aˬ lo meh. K'aˬ lo heu k'oeˇ taˆ dawˬ pehˬ taˬ-awˇ, ngaˬ-euˬ aˇ muˇ ngaˇ gawˇ daˆ le ̭ ma. Shiˇ-eu jeˬ-euˬ baoˬ, aˇ muˇ heu muˇ-ahˇ maˬ g'a leˇ-a. 19Mˬtaˆ Miˇk'ahˬ laˇ g'oˆ-euˬ mawˬ taw ̭ kahˬ nawˬ-ahˇ ngaˇ bi ̭ ma. Miˇ tsaˬ k'oeˇ taˆ nawˬ neh k'aˇ laˆ tsoeˬ-euˬ jeˬ, mˬ k'oeˇ taˆ k'aw ̭ laˆ tsoeˬ-awˇ, miˇ tsaˬ k'oeˇ taˆ nawˬ neh k'aˇ bi mˇ-euˬ jeˬ, mˬ k'oeˇ taˆ k'aw ̭ bi mˇ teh ̭-a." 20K'oeˇ naˇ, aˬ yaw ̭ Meˬsiˇya pyeu ̭-eu gaˇ kawˆ aˬ cawˬ tiˬ g'aˬ-ahˇ-iˬ maˬ bi ja mehˬ-eu g'aˇ duˬ, zaˬ lahˇ deuˬ-ahˇ Yeˬsuˇ dawˬ bi ̭-euˬ meh. 21K'oeˇ ngeh nah neh aˇ dahˬ beh-awˇ, zaˬ lahˇ deuˬ-ahˇ Yeˬsuˇ heu lo ̭-ehˇ bya cehˆ ni ehˇ nehˬ-euˬ meh. "Yeˬluˇsaˬlehˬ meuˬ-ahˇ ngaˇ le-awˇ, aˬ yui ̭ aˬ tsu deuˬ, piˇ ma aˬ yui ̭ deuˬ hawˇ-eu, Zahˇ dawˬ k'o ̭ dawˬ mehˬ-eu saˬ laˬ deuˬ, ngaˬ-ahˇ g'awˬ mya jeˬ jahˇ nehˬ la ̭ gaˇ ya daˬ dui dui-eu yaw duˬ baw meh. Aˬ cawˬ ngaˬ-ahˇ seh ̭ teh ̭-a. Ehˇ k'aw ̭, smˬ nah byah laˇ naˇ, Miˬyehˇ ngaˬ-ahˇ paˇ bi g'o ̭ deh ̭ laˇ teh ̭-a." 22Beˬtuˆluˆ neh Yeˬsuˇ-ahˇ gaˇ dzeˇ paw sheuˬ doˆ g'eh-awˇ ehˇ-eu, "Sahˬ paˬ-oˇ, Miˬyehˇ nawˬ-euˬ k'oeˇ taˆ k'oeˇ lo ̭-ehˇ g'eh-eu jeˬ maˬ bi keuˆ le k'mˬ-aˇ." 23Yeˬsuˇ Beˬtuˆluˇ jawˇ paw ciˬ pyawˇ-awˇ ehˇ nehˬ-eu, "Saˬdaˬ-oˇ, ngaˇ jawˇ gaˇ neh doˆ-iˇ-awˬ. Nawˇ-aˬ, ngaˬ-ahˇ laˆ tsoeˬ-eu g'aˬ meh. Nawˇ teu lo ̭-ehˇ ehˇ-eu teu, Miˬyehˇ neh bi noeˬ doˆ-euˬ jeˬ maˬ ngeuˇ-a. Tsawˇ haˬ neh bi noeˬ doˆ-euˬ jeˬ meh." 24K'oeˇ naˇ, zaˬ lahˇ deuˬ-ahˇ Yeˬsuˇ heu lo ̭-ehˇ ehˇ nehˬ-euˬ meh. "Tsawˇ haˬ aˬ geu g'aˬ maˬ kaˬ, ngaˬ-euˬ mehˬ nah caw teh laˇ maw ̭ naˇ, yawˬ ha-euˬ nui k'ahˇ ya byehˇ dzeh-eu uˬ ta ̭, yawˬ ha-euˬ la ̭ ya ̭ ba ̭-awˇ, ngaˬ-euˬ mehˬ nah ya laˇ meh. 25Aˬ jeˬ miˇ neh ehˇ naˇ, yawˬ ha-euˬ deh ̭-eu jeˬ-ahˇ ka k'o ̭-eu lehˇ leh jeh-eu tsawˇ haˬ aˬ geu g'aˬ maˬ kaˬ, deh ̭-eu jeˬ-ahˇ ya smˬ-iˇ teh ̭-a. Ehˇ k'aw ̭, ngaˬ-euˬ g'aˇ duˬ yawˬ ha-euˬ deh ̭-eu jeˬ smˬ-euˬ tsawˇ haˬ aˬ geu g'aˬ maˬ kaˬ, deh ̭-eu jeˬ za teh ̭-a. 26Tsawˇ haˬ tiˬ g'aˬ miˇ tsaˬ tahˬ k'awˇ heu dawˬ tawˆ lu ̭ za jiˇ-euˬ k'aw ̭, sa ̭ laˆ deh ̭-eu jeˬ smˬ naˇ, aˬ yaw ̭ g'aˇ duˬ aˬ jeˬ jiˇ jeuˬ paˇ ahˇ ta. Aˬ geu jeˬ bi ̭-awˇ zeuˇ k'o ̭ k'aw ̭, sa ̭ laˇ deh ̭-eu jeˬ-ahˇ maˬ paˇ zeuˇ k'o ̭ geu ̭ nya meh. 27Tsawˇhaˬ-euˬ Zaˬmaˇ-aˬ, aˬ yaw ̭ Aˬda-euˬ yaw sheh ̭ k'ahˬ sehˇ dm-awˇ, aˬ yaw ̭-euˬ mˬ taˆ g'aˬ k'ehˇ deuˬ nehˬ-ehˇ za ̭ le-awˇ, tsawˇ haˬ yawˬ g'aˬ yawˬ na lu ̭-ahˇ, yawˬ ha neh k'aˇ mˇ taˬ-euˬ lo ̭-ehˇ tsoeˬ k'o ̭ nehˬ le teh ̭-a. 28Heu gaˇ jawˇ lu ̭-eu tsawˇ haˬ tiˬ paˆ na deuˬ maˬ shiˇ dzeuˇ mi naˆ-ehˇ, Tsawˇhaˬ-euˬ Zaˬmaˇ sahˬ paˬ geu ̭-awˇ oe gaˇ ya mawˇ teh ̭-a lehˇ, ngaˇ naw ma ̭-ahˇ maˇ jawˆ ni ehˇ-eu ma."

will be added

X\