MA ̭TEHˬ 14

1Aˇ yamˬ k'oeˇ yamˬ-ahˇ, Yeˬsuˇ tsawˇ myahˇ doˆ-eu gaˇ kawˆ, Gaˬliˬlehˇ miˇ k'ahˬ-ahˇ uˆ lahˇ-eu sahˬ paˬ Heˬloˆ ya gaˬ-awˇ, 2aˬ yaw ̭-euˬ gaˇ mˇ-eu yaw huiˬ yaw mahˇ deuˬ-ahˇ ehˇ nehˬ-eu, "Tsawˇ haˬ k'oeˇ g'aˬ maˇ maˇ ni Iˇ cu ̭ shawˇ-eu Yoˇhaˬ g'o ̭ deh ̭ laˇ-euˬ ngaˇ. K'oeˇ miˇ neh, zahˬ leˇ paˬ-ehˇ g'eh-eu jeˬ mˇ nya-eu baoˬ ahˇ-eu ngaˇ." 3Heˬloˆ-aˬ, Yoˇhaˬ-ahˇ nyeh ̭-eu g'aˇ duˬ dawˬ bi ̭-awˇ, tawˬ-ahˇ bi dawˆ taˬ-euˬ meh. Aˬ yaw ̭-euˬ mehˇ nmˇ Piˇliˇpuˆ-euˬ miˬ zaˬ Heˬloˇdiˇ baˬ da neh, aˬ yaw ̭ k'oeˇ lo ̭-ehˇ jahˇ-euˬ meh. 4"Nawˇ Heˬloˇdiˇ-ahˇ maˬ sheuˬ k'mˬ-a" lehˇ, Iˇ cu ̭ shawˇ-eu Yoˇhaˬ neh Heˬloˆ-ahˇ ehˇ nehˬ-euˬ miˇ neh, k'oeˇ lo ̭-ehˇ jahˇ-euˬ meh. 5Yoˇhaˬ-ahˇ Heˬloˆ seh ̭ maw ̭-eu meh. Ehˇ k'aw ̭, Yuˇdaˆ tsawˇ haˬ deuˬ-ahˇ aˬ yaw ̭ yahˇ-eu meh. Aˬ jeˬ miˇ neh ehˇ naˇ, Yuˇdaˆ tsawˇ haˬ k'oeˇ deuˬ Yoˇhaˬ-ahˇ Miˬyehˇ g'aˇ duˬ ngehˬ dah-eu tsawˇ haˬ lehˇ sawˇ taˬ-euˬ meh. 6Heˬloˆ deh ̭ le-euˬ aˇ nah-ahˇ noeˬ keuˆ-eu bawˬ-iˬ g'eh lu ̭ ngeh, tsawˇ haˬ dawˬ tawˆ lu ̭-euˬ mehˬ shi Heˬloˇdiˇ-euˬ aˬ buˇ gaˇ nyeh nyeh mehˬ gaˇ, Heˬloˆ nui ma tsaˬ dui dui-euˬ meh. 7K'oeˇ miˇ neh, "Nawˇ k'aˇ shaˇ-eu jeˬ bi ̭ ma lehˇ ngaˇ saˇ jaˇ dzaˬ-eu ma" lehˇ, aˬ buˇ k'oeˇ buˇ-ahˇ Heˬloˆ ehˇ nehˬ-euˬ meh. 8Aˬ ma g'aˬ neh mehˬ gahˇ nehˬ-euˬ lo ̭-ehˇ, "Iˇ cu ̭ shawˇ-eu Yoˇhaˬ-euˬ uˬ duˬ, k'mˬ maˬ sehˇ byehˇ-ahˇ dawˆ ahˇ-awˇ, nymˬ-mˇ heu gaˇ bi ciˬ ha laˇ-awˬ" lehˇ, aˬ buˇ k'oeˇ buˇ shaˇ-eu meh. 9Sahˬ paˬ Heˬloˆ noeˬ shaˬ dui dui-eu meh. Ehˇ k'aw ̭, daˬ yah k'oeˇ myaˆ ni g'eh-eu mehˬ shi aˬ yaw ̭ saˇ jaˇ dzaˬ dzeuˇ-euˬ miˇ neh, aˬ buˇ k'oeˇ buˇ k'aˇ ehˇ-eu lo ̭-ehˇ jahˇ nehˬ-eu g'aˇ duˬ, aˬ yaw ̭ dawˬ bi ̭-euˬ meh. 10Aˬ yaw ̭ tsawˇ haˬ k'ehˇ g'eh-awˇ, tawˬ la ̭ k'oeˇ uˇ lu ̭-eu Yoˇhaˬ-euˬ uˬ duˬ bi deuˆ tsehˆ laˬ-iˇ-euˬ meh. 11Uˬ duˬ k'oeˇ siˬ k'mˬ maˬ sehˇ byehˇ-ahˇ dawˆ ahˇ-awˇ, aˬ buˇ k'oeˇ buˇ-ahˇ ciˬ ha nehˬ laˇ-awˇ, aˬ buˇ k'oeˇ buˇ neh aˬ yaw ̭-euˬ aˬ ma-ahˇ ciˬ nehˬ-euˬ meh. 12Yoˇhaˬ-euˬ zaˬ lahˇ deuˬ laˇ-awˇ, Yoˇhaˬ-euˬ g'awˇ mawˇ-ahˇ ba ̭ pahˬ-iˇ-euˬ meh. K'oeˇ naˇ, gaˇ kawˆ k'oeˇ Yeˬsuˇ-ahˇ aˬ yaw ̭ ma ̭ dzawˇ nehˬ-iˇ-euˬ meh. 13Yoˇhaˬ-euˬ gaˇ kawˆ Yeˬsuˇ ya gaˬ ngeh, jawˇ duˬ k'oeˇ tsahˇ-ahˇ neh doˆ-iˇ-awˇ, ciˬ cuˇ ni g'eh-eu jawˇ duˬ-ahˇ tiˬ g'aˬ teh ̭-ehˇ iˇ-euˬ meh. Aˬ yaw ̭ iˇ-euˬ gaˇ kawˆ tsawˇ haˬ aˇ ma ̭ ya siˬ ngeh, aˬ yaw ̭ ma ̭ jawˇ-eu meuˬ deuˬ-ahˇ neh doˆ laˇ-awˇ, aˬ yaw ̭-euˬ mehˬ nah kuiˇ zoˬ caw teh-iˇ-euˬ meh. 14Yeˬsuˇ lawˬ la ̭ k'oeˇ neh doˆ laˇ-awˇ, tsawˇ haˬ aˇ ma ̭ ma ̭ ma-ahˇ ya mawˇ ngeh, aˬ yaw ̭ ma ̭-ahˇ g'awˬ shaˬ haw gaˬ dui dui-awˇ, naˇ-eu tsawˇ haˬ deuˬ-ahˇ laˆ taˬ nehˬ-euˬ meh. 15K'oeˇ ngeh nah uˬ ci ̭ uˬ taw paw, aˬ yaw ̭-euˬ zaˬ lahˇ deuˬ aˬ yaw ̭ jawˇ gaˇ laˇ-awˇ ehˇ-eu, "Iˬ nah uˬ ci ̭ ci ̭ le shaw-iˬ miˇ-a. Jawˇ duˬ heu tsahˇ pu-ahˇ gaˇ mahˇ kaˬ-eu miˇ neh, tsawˇ haˬ aˇ ma ̭ heu deuˬ-ahˇ pyehˬ nehˬ-awˇ, pu doe ni dzaˬ dzaˬ dawˇ dawˇ bi poˆ dzaˬ-iˇ-eu maˬ tsaˬ-a loˇ." 16Yeˬsuˇ ehˇ-eu, "Aˬ yaw ̭ ma ̭-ahˇ bi iˇ-eu maˬ loˬ-aˇ. Naw ma ̭ dzaˬ dzaˬ dawˇ dawˇ bi ̭ nehˬ-awˇ bi dzaˬ-awˬ." 17Zaˬ lahˇ deuˬ ehˇ-eu, "Nga ma ̭ kaˬ muˇ ngaˬ yaˆ hawˇ-eu ngaˬ shaˬ nyiˬ mawˇ ahˇ-eu teh ̭ ma." 18K'oeˇ ngeh, "Ngaˇ jawˇ gaˇ yuˇ la ̭-awˬ" lehˇ Yeˬsuˇ ehˇ nehˬ-euˬ meh. 19Tsawˇ haˬ aˇ ma ̭-ahˇ, daˬ zawˬ deh k'oeˇ taˆ nuiˇ-eu g'aˇ duˬ, Yeˬsuˇ dawˬ bi ̭-euˬ meh. K'oeˇ naˇ, kaˬ muˇ k'oeˇ ngaˬ yaˆ hawˇ-eu ngaˬ shaˬ k'oeˇ nyiˬ mawˇ aˬ yaw ̭ yuˇ-awˇ, mˬ paw g'awˇ leuˇ-awˇ, Miˬyehˇ-euˬ guiˬ lahˬ-ahˇ ja ceuˬ-euˬ meh. K'oeˇ naˇ, kaˬ muˇ k'oeˇ deuˬ aˬ yaw ̭ ngawˬ pyehˬ-awˇ, zaˬ lahˇ deuˬ-ahˇ bi ̭ nehˬ-awˇ, tsawˇ haˬ aˇ ma ̭-ahˇ bi biˇ nehˬ-euˬ meh. 20Aˬ yaw ̭ ma ̭ dawˬ tawˆ lu ̭ tiˬ dehˆ dzaˬ g'aˬ-awˇ, maˬ dzaˬ jiˇ-ehˇ dzeˇ laˇ-euˬ deuˬ-ahˇ zaˬ lahˇ deuˬ paˇ g'oˆ uiˬ ngeh, k'aˆ puˬ tseˇ nyi ̭ puˬ byah laˇ-euˬ meh. 21K'aˇ dzaˬ-euˬ tsawˇ haˬ deuˬ,zaˬ miˬ zaˬ hawˇ-eu zaˬ deuˬ maˬ sawˇ-ehˇ, k'aˬ dzeˇ zaˬ teh ̭-ehˇ ngaˬ heˇ g'aˬ dawˬ peh byah-eu meh. 22K'oeˇ naˇ, Yeˬsuˇ tsawˇ haˬ aˇ ma ̭ ma ̭ ma-ahˇ bi g'o ̭-iˇ-awˇ, zaˬ lahˇ deuˬ-ahˇ lawˬ la ̭ k'oeˇ bi uˇ-iˇ-awˇ, aˬ yaw ̭-euˬ mehˬ hu lah nui baˬ paw bi iˇ tsehˆ tawˬ-euˬ meh. 23Tsawˇ haˬ aˇ ma ̭-ahˇ bi g'o ̭-iˇ g'aˬ ngeh, gawˬ duˇ-ahˇ guiˬ lahˬ shaˇ leˇ-eu lehˇ, aˬ yaw ̭ teh ̭-ehˇ daˆ leˇ-euˬ meh. Uˬ ci ̭ ci ̭ le ngeh, Yeˬsuˇ tiˬ g'aˬ teh ̭-ehˇ k'oeˇ gaˇ jawˇ lu ̭-eu meh. 24K'oeˇ ngeh, zaˬ lahˇ deuˬ dziˬ lu ̭-eu lawˬ k'oeˇ laˇ-aˬ, lah g'ahˇ ceh gaˇ mahˇ kaˬ gaˇ iˇ keuˆ-awˇ, jaˬ lehˇ lehˇ ma baw tehˬ le ̭-euˬ miˇ neh, iˇ luˆ dzeh laˇ-awˇ, lawˬ-ahˇ yaw k'aˆ-ehˇ ciˬ tahˬ ciˬ tuˆ-eu meh. 25Ya poeˇ doeˇ taw paw Yeˬsuˇ iˇ cu ̭ k'oeˇ taˆ cah-awˇ, zaˬ lahˇ deuˬ jawˇ gaˇ oe-euˬ meh. 26Aˬ yaw ̭ iˇ cu ̭ k'oeˇ taˆ cah gaˇ zaˬ lahˇ deuˬ ya mawˇ ngeh, guˆ dui dui-eu miˇ neh, " Shaˆ shiˇ yaw sahˇ ngaˇ" lehˇ ehˇ-awˇ guˇ-eu meh. 27Yeˬsuˇ ehˇ-eu, "Taˬ guˆ. Nui ma taˬ baˬ. Ngaˇ ma. 28Beˬtuˆluˆ ehˇ-eu, "Sahˬ paˬ-oˇ, nawˇ jeˬ maˇ-iˬ ngaˇ iˇ cu ̭ k'oeˇ taˆ cah-awˇ nawˇ jawˇ gaˇ oe nya ni dawˬ bi ̭-awˬ." 29K'oeˇ naˇ, "Oe-awˬ tawˇ" lehˇ Yeˬsuˇ ehˇ ngeh, Beˬtuˆluˆ lawˬ la ̭ nyiˇ doˆ-iˇ-awˇ, iˇ cu ̭ k'oeˇ taˆ cah cah-ehˇ Yeˬsuˇ jawˇ gaˇ iˇ-euˬ meh. 30Ehˇ k'aw ̭, jaˬ lehˇ yaw k'aˆ-ehˇ baw gaˇ aˬ yaw ̭ mawˇ ngeh, guˆ-eu nui ma ahˇ laˇ-awˇ, iˇ cu ̭-ahˇ ga nui ̭-iˇ-euˬ meh. K'oeˇ ngeh, "Sahˬ paˬ-oˇ, ngaˬ-ahˇ ka k'o ̭ nehˬ la ̭-awˬ" lehˇ aˬ yaw ̭ guˇ-euˬ meh. 31Tiˬ poˆ teh ̭-ehˇ Yeˬsuˇ aˬ la ̭ cawˬ ja-awˇ, aˬ yaw ̭-ahˇ nyeh ̭ tehˬ-awˇ, "Jah-eu g'aˬ baˬ-eu tsawˇ haˬ-oˇ, aˬ jeˬ miˇ neh poˆ poˆ laˆ laˆ-ehˇ noeˬ te" lehˇ ehˇ nehˬ-euˬ meh. 32Aˬ yaw ̭ nya ̭ nyiˬ g'aˬ lu ̭ lawˬ la ̭ k'oeˇ uˇ-iˇ ngeh, jaˬ lehˇ baw-eu naˬ leˇ-euˬ meh. 33K'oeˇ naˇ, lawˬ la ̭ k'oeˇ uˇ lu ̭-eu zaˬ lahˇ deuˬ Yeˬsuˇ-ahˇ uˬ duˬ tahˬ-euˬ meh. Aˬ yaw ̭ ma ̭ ehˇ-eu, "Nawˇ-aˬ, maˇ maˇ ni Miˬyehˇ-euˬ Zaˬmaˇ ngaˇ." 34Aˬ yaw ̭ ma ̭ lah tsehˆ doˆ-awˇ, Geˬneˬsaˬlehˇ miˇ k'ahˬ-ahˇ le-euˬ meh. 35K'oeˇ gaˇ jawˇ-eu tsawˇ haˬ deuˬ Yeˬsuˇ-ahˇ haw siˬ-awˇ, miˇ k'ahˬ k'oeˇ k'ahˬ doe ni tsawˇ haˬ pyehˬ g'eh-awˇ, naˇ-eu tsawˇ haˬ dawˬ tawˆ lu ̭ aˬ yaw ̭ jawˇ gaˇ bi sheuˬ uiˬ la ̭-euˬ meh. 36Aˬ yaw ̭-euˬ pehˇ k'ahˬ pehˇ dahˬ-ahˇ teh ̭-ehˇ k'aw ̭ bi toeˬ ciˆ la ̭ lehˇ aˬ yaw ̭ ma ̭ shaˇ-awˇ, k'aˇ ya toeˬ ciˆ-euˬ deuˬ naˇ gawˇ taˬ leˇ jiˇ-euˬ meh.

will be added

X\