MAˬKUˆ 6

1Yeˬsuˇ k'oeˇ gaˇ neh doˆ le-awˇ, aˬ yaw ̭ jawˇ-eu miˇ k'ahˬ-ahˇ g'o ̭ leˇ-euˬ meh. Aˬ yaw ̭-euˬ zaˬ lahˇ deuˬ k'aw ̭, aˬ yaw ̭ mehˬ nah caw teh k'o ̭ le ̭-euˬ meh. 2Jawˇ nah ngeh nah, uˬ duˬ tahˬ nymˇ la ̭ k'oeˇ aˬ yaw ̭ mehˬ-euˬ tsoˆ-euˬ meh. Aˬ yaw ̭ mehˬ gaˇ tsoˆ gaˇ ya gaˬ-euˬ tsawˇhaˬ g'awˬ mya ni zahˬ dui dui leˇ-awˇ, heu lo ̭-ehˇ ehˇ-eu meh. "Tsawˇ ha heu g'aˬ teu lo ̭-ehˇ g'eh-eu jeˬ aˬ gaˇ laˬ-iˇ-euˬ nga. Aˬ yaw ̭-ahˇ bi ̭ taˬ-euˬ zaˬ siˬ tsawˇ gahˇ teu, aˬ geu jeˬ-euˬ zaˬ siˬ tsawˇ gahˇ nga. Aˇ naˆ naˆ-ehˇ g'eh-eu zahˬ leˇ paˬ-ehˇ g'eh-eu jeˬ aˬ yaw ̭ mˇ doˆ la ̭ nya-eu nga. 3Tsawˇ haˬ heu g'aˬ Maˬliˇ-euˬ aˬ li la ̭ saˇ maˇ k'oeˇ g'aˬ maˬ ngeuˇ nga loˇ. Yaˬkoˆ, Yoˇsehˆ, Yuˇdaˆ, Siˇmoˬ aˬ ha mehˇ nmˇ-euˬ aˇ doˆ maˬ ngeuˇ nga loˇ. Aˬ yaw ̭-euˬ dmˇ ma deuˬ aˬ dui ma ̭ nehˬ-ehˇ jawˇ lu ̭ meh tawˇ." Aˬ yaw ̭ ma ̭ aˬ yaw ̭-ahˇ myaˆ naˆ-awˇ bye-eu meh. 4Yeˬsuˇ aˬ yaw ̭ ma ̭-ahˇ ehˇ nehˬ-eu, "Miˬyehˇ g'aˇ duˬ ngehˬ dah-eu tsawˇ haˬ-ahˇ yawˬ gaˇ na lu ̭ aˬ cawˬ taˬ huiˬ nehˬ meh. Ehˇ k'aw ̭, aˬ yaw ̭-euˬ jawˇ k'ahˬ, aˬ yaw ̭-euˬ aˬ yui ̭ aˬ nyiˇ deuˬ hawˇ-eu, aˬ yaw ̭-euˬ nymˇ k'ahˬ zaˬ deuˬ aˬ yaw ̭-ahˇ maˬ taˬ huiˬ-a." 5K'oeˇ gaˇ, zahˬ leˇ paˬ-ehˇ g'eh-eu jeˬ aˬ yaw ̭ maˬ mˇ mehˬ nya-a. Naˇ-eu gawˇ-eu tsawˇ haˬ heu myaˆ g'aˬ k'oeˇ taˆ aˬ la ̭ ba ̭ daˆ nehˬ-awˇ bi taˬ leˇ-euˬ jeˬ jahˇ nehˬ nya-euˬ teh ̭ meh. 6Tsawˇ ha koeˇ deuˬ jah-eu nui ma maˬ ahˇ gaˇ aˬ yaw ̭ zahˬ dui dui leˇ-euˬ meh. K'oeˇ naˇ, k'oeˇ gaˇ jaˆ-eu pu deuˬ-ahˇ Yeˬsuˇ iˇ-awˇ mehˬ nehˬ tsoˆ nehˬ-euˬ meh. 7G'aˬ k'ehˇ tseˇ nyi ̭ g'a-ahˇ aˬ yaw ̭ kuˇ uiˬ-awˇ, nyiˬ g'aˬ-euˬ tiˬ muˇ muˇ muˇ-ehˇ bi iˇ-euˬ meh. Neh ̭ yaw jaw ̭-ahˇ teh doˆ nya-eu baoˬ aˬ yaw ̭ ma ̭-ahˇ bi ̭ nehˬ-euˬ meh. 8Aˬ yaw ̭ ma ̭ gaˇ ma doˆ-iˇ ngeh, gawˬ yoeˬ maˬ ngeuˇ naˇ nui jeˬ tiˬ jeˬ-iˬ maˬ yuˇ ni iˇ-eu g'aˇ duˬ, aˬ yaw ̭ dawˬ bi ̭-euˬ meh. Kaˬ muˇ maˬ hehˇ g'eh-ehˇ, pehˇ tahˬ maˬ pi-eu uˬ ta ̭, jo ̭ pa ̭-ahˇ pyuˇ maˬ dawˆ ahˇ ni, 9sehˬ nawˆ teh ̭-ehˇ nawˬ-awˇ, pehˇ k'ahˬ dzeˇ paˇ maˬ yuˇ ni iˇ-eu g'aˇ duˬ, aˬ yaw ̭ dawˬ bi ̭-euˬ meh. 10Aˬ yaw ̭ ma ̭-ahˇ aˬ yaw ̭ ehˇ nehˬ-eu, "Naw ma ̭ nymˇ tiˬ nymˇ-ahˇ nymˇ daˆ daˆ leˇ shaw naˇ, jawˇ duˬ k'oeˇ tsahˇ-ahˇ k'aˇ jawˇ k'oeˇ keuˆ ni, nymˇ daˆ taˬ daˆ paˇ. 11Naw ma ̭-ahˇ maˬ ha geu ̭-ehˇ, naw ma ̭ mehˬ gaˇ maˬ naˇ haˬ maw ̭-eu jawˇ duˬ-ahˇ naw ma ̭ iˇ zaˬ naˇ, naw ma ̭ doˆ-iˇ ngeh, aˬ kuiˇ pehˬ zaˬ-ahˇ leh ̭-eu k'aˬ lehˇ sawˆ k'aˇ nehˬ ya ̭-awˬ. K'oeˇ-aˬ, aˬ yaw ̭ ma ̭-euˬ yaw lehˬ siˬ leˇ ni mˇ-eu saˇ kiˇ meh." 12K'oeˇnaˇ, tsawˇ haˬ zaˬ deuˬ iˬ baˇ bi noeˬ poˆ-eu g'aˇ duˬ, aˬ yaw ̭ ma ̭ iˇ-awˇ dawˬ mehˬ mehˬ-iˇ-euˬ meh. 13Aˬ yaw ̭ ma ̭ neh ̭ g'awˬ mya ni teh doˆ-awˇ, naˇ-eu tsawˇ haˬ g'awˬ mya ni-ahˇ tsiˇ leh ̭-awˇ laˆ taˬ nehˬ-euˬ meh. 14Gaˇ kawˆ k'oeˇ deuˬ dawˬ tawˆ lu ̭ sahˬ paˬ Heˬloˆ ya gaˬ-euˬ meh. Aˬ jeˬ miˇ neh ehˇ naˇ, Yeˬsuˇ-euˬ gaˇ kawˆ yawˬ gaˇ na lu ̭ gaˬ doe-iˇ lu ̭-eu meh. "Iˇ cu ̭ shawˇ-eu Yoˇhaˬ g'o ̭ deh ̭ laˇ-euˬ ngaˇ. K'oeˇ miˇ neh, zahˬ leˇ paˬ-ehˇ g'eh-eu gaˇ heu deuˬ mˇ nya-eu baoˬ aˬ yaw ̭ jaˆ-eu ngaˇ" lehˇ, tsawˇ haˬ tiˬ paˆ na deuˬ ehˇ-eu meh. 15Tiˬ paˆ na deuˬ-aˬ, aˬ yaw ̭-ahˇ Eˇliˇyaˆ nga lehˇ ehˇ-awˇ, tiˬ paˆ na deuˬ-aˬ, "Aˇ hu ba Miˬyehˇ g'aˇ duˬ ngehˬ dah-euˬ tsawˇ haˬ deuˬ-ahˇ duˇ-eu Miˬyehˇ g'aˇ duˬ ngehˬ dah-eu tsawˇ haˬ ngaˇ" lehˇ ehˇ-eu meh. 16Gaˇ kawˆ k'oeˇ sahˬ paˬ Heˬloˆ ya gaˬ ngeh, "Aˬ yaw ̭-aˬ, Iˇ cu ̭ shawˇ-eu Yoˇhaˬ k'oeˇ g'aˬ ngaˇ. Aˬ yaw ̭-euˬ uˬ duˬ ngaˬ neh toˆ tsehˆ-euˬ k'aw ̭, paˇ g'o ̭ deh ̭ laˇ-euˬ ngaˇ" lehˇ ehˇ-eu meh. 17Heˬloˆ-aˬ, yawˬ ha-euˬ mehˇ nmˇ tsi tsi ni g'eh-eu Piˇliˇpuˆ-euˬ miˬ zaˬ Heˬloˇdiˇ-ahˇ sheuˬ-euˬ meh. Zaˬ miˬ zaˬ k'oeˇ g'aˬ baˬ da neh, Yoˇhaˬ-ahˇ pa ̭-awˇ tawˬ-ahˇ bi dawˆ-eu g'aˇ duˬ, Heˬloˆ neh dawˬ bi ̭-euˬ meh. 18Aˬ jeˬ miˇ neh ehˇ naˇ, yawˬ ha-euˬ mehˇ nmˇ tsi tsi ni g'eh-eu g'aˬ-euˬ miˬ zaˬ-ahˇ sheuˬ-eu maˬ tsaˬ-a lehˇ, Yoˇhaˬ neh Heˬloˆ-ahˇ ehˇ nehˬ-euˬ meh. 19K'oeˇ miˇ neh, Yoˇhaˬ-ahˇ Heˬloˇdiˇ muiˇ dui dui-awˇ, seh ̭ maw ̭-eu meh. Ehˇ k'aw ̭, Heˬloˆ-ahˇ maˬ laˆ tawˆ nya-eu miˇ neh, maˬ seh ̭ nya-ehˇ jawˇ-euˬ meh. 20Heˬloˆ-aˬ, Yoˇhaˬ-ahˇ guˆ-eu meh. Aˬ jeˬ miˇ neh ehˇ naˇ, Yoˇhaˬ-aˬ, muiˬ-eu shawˇ-eu yaw tsaˬ yaw dawˇ tsawˇ haˬ tiˬ g'aˬ pyeu ̭-eu meh lehˇ, aˬ yaw ̭ siˬ nya-eu meh. K'oeˇ miˇ neh, maˬ bi ca laˇ ni haw piˇ nehˬ lu ̭-eu meh. Yoˇhaˬ-euˬ dawˬ k'aˇ ya gaˬ ngeh aˬ yaw ̭ nui ma maˬ saˇ k'aw ̭, Yoˇhaˬ mehˬ-euˬ dawˬ-ahˇ aˬ yaw ̭ naˇ haˬ maw ̭-eu nui ma ahˇ-eu meh. 21Aˇ saˬ saˬ laˇ ngeh, Heˬloˇdiˇ Yoˇhaˬ-ahˇ seh ̭-eu yeh ̭ laˇ-euˬ meh. K'oeˇ-aˬ, Heˬloˆ deh ̭ le-euˬ aˇ nah-ahˇ noeˬ keuˆ-eu bawˬ-iˬ jahˇ ngeh nah meh. K'oeˇ ngeh nah, sahˬ paˬ sahˬ ma geu ̭ lu ̭-eu yaw huiˬ yaw mahˇ deuˬ, guiˇ guiˇ ma ̭ k'oeˇ taˆ uˆ lahˇ-eu yaw huiˬ yaw mahˇ deuˬ hawˇ-eu, Gaˬliˬlehˇ miˇ k'ahˬ la ̭ k'oeˇ myaˆ pyawˬ naˇ mehˇ jaˆ-eu aˬ yui ̭ aˬ tsu deuˬ-ahˇ hawˬ byawˇ lawˇ nehˬ-euˬ meh. 22Heˬloˇdiˇ-euˬ aˬ buˇ uˇ laˇ-awˇ gaˇ nyeh nyeh mehˬ gaˇ, Heˬloˆ hawˇ-eu aˬ yaw ̭-euˬ daˬ yah k'oeˇ deuˬ nui k'ahˇ shiˇ dui dui-eu meh. K'oeˇ miˇ neh, aˬ buˇ k'oeˇ buˇ-ahˇ sahˬ paˬ Heˬloˆ ehˇ nehˬ-eu, "Nawˇ k'aˇ shaˇ maw ̭-eu jeˬ shaˇ-awˬ. Ngaˇ nawˬ-ahˇ bi ̭ ma." 23Aˬ yaw ̭ kamˬ-awˇ ehˇ-eu, "Nawˇ k'aˇ shaˇ-eu jeˬ bi ̭ ma lehˇ ngaˇ kamˬ-eu ma. Ngaˬ-euˬ miˇ k'ahˬ tiˬ paˆ paˆ nehˬ la ̭ lehˇ shaˇ k'aw ̭, ngaˇ paˆ nehˬ ma." 24K'oeˇ ngeh, a buˇ k'oeˇ buˇ doˆ-iˇ-awˇ, "Ngaˇ aˬ geu jeˬ ya shaˇ nmˇ" lehˇ, aˬ yaw ̭-euˬ aˬ ma-ahˇ naˇ haˬ-euˬ meh. Aˬ ma g'aˬ ehˇ-eu, "Iˇ cu ̭ shawˇ-eu Yoˇhaˬ-euˬ uˬ duˬ shaˇ-awˬ." 25Aˬ buˇ k'oeˇ buˇ sahˬ paˬ Heˬloˆ jawˇ gaˇ yaw kawˇ-ehˇ paˇ g'o ̭ leˇ-awˇ ehˇ-eu, "Iˇ cu ̭ shawˇ-eu Yoˇhaˬ-euˬ uˬ duˬ, k'mˬ maˬ sehˇ byehˇ-ahˇ dawˆ ahˇ-awˇ, nymˬ-mˇ heu gaˇ bi ̭ la ̭ gaˇ geu ̭ maw ̭-eu ma." 26Dawˬ k'oeˇ dawˬ baˬ da neh sahˬ paˬ Heˬloˆ noeˬ shaˬ dui dui-eu meh. Ehˇ k'aw ̭, daˬ yah k'oeˇ myaˆ ni g'eh-eu mehˬ shi aˬ yaw ̭ kamˬ tsehˆ g'aˬ-euˬ miˇ neh, aˬ buˇ k'oeˇ buˇ k'aˇ ehˇ-eu lo ̭-ehˇ maˬ jahˇ nehˬ-ehˇ maˬ g'eh nya-a. 27K'oeˇ miˇ neh, k'oeˇ gaˇ lo ̭ lu ̭-eu yehˇ tiˬ g'aˬ-ahˇ yaw kawˇ-ehˇ k'ehˇ g'eh-awˇ, Yoˇhaˬ-euˬ uˬ duˬ yuˇ la ̭-eu g'aˇ duˬ dawˬ bi ̭-euˬ meh. Yehˇ k'oeˇ g'aˬ tawˬ-ahˇ iˇ-awˇ, Yoˇhaˬ-euˬ uˬ duˬ coeˇ tsehˆ-euˬ meh. 28K'oeˇ naˇ, k'mˬ maˬ sehˇ byehˇ-ahˇ dawˆ ahˇ-awˇ, aˬ buˇ k'oeˇ buˇ-ahˇ ciˬ nehˬ laˇ-awˇ, aˬ buˇ k'oeˇ neh aˬ ma g'aˬ-ahˇ paˇ ciˬ ha nehˬ-iˇ-euˬ meh. 29Yoˇhaˬ-euˬ zaˬ lahˇ deuˬ gaˇ kawˆ k'oeˇ ya gaˬ ngeh, aˬ yaw ̭-euˬ g'awˇ mawˇ ba ̭ k'o ̭ laˬ le-awˇ, lmˬ bymˇ-ahˇ ba ̭ pahˬ nehˬ-euˬ meh. 30G'aˬ k'ehˇ deuˬ Yeˬsuˇ jawˇ gaˇ paˇ g'o ̭ laˇ-awˇ, aˬ yaw ̭ ma ̭ neh mˇ ya ̭ shaˇ ya ̭-euˬ gaˇ kawˆ hawˇ-eu, mehˬ ya ̭ tsoˆ ya ̭-euˬ gaˇ kawˆ dawˬ tawˆ lu ̭, aˬ yaw ̭-ahˇ dzawˇ nehˬ-euˬ meh. 31Tsawˇ haˬ laˇ-eu maˬ tsehˆ leˇ-eu miˇ neh, Yeˬsuˇ hawˇ-eu aˬ yaw ̭-euˬ g'aˬ k'ehˇ deuˬ hawˬ dzaˬ-eu maˬ dah-a. K'oeˇ miˇ neh, g'aˬ k'ehˇ deuˬ-ahˇ Yeˬsuˇ ehˇ nehˬ-eu, "Aˬ dui ma ̭ teh ̭-ehˇ ciˬ cuˇ ni g'eh-eu jawˇ duˬ-ahˇ iˇ-awˇ, g'aˬ naˬ naˬ-iˇ kaˇ-euˇ." 32K'oeˇ ngeh, aˬ yaw ̭ ma ̭ teh ̭-ehˇ lawˬ dziˬ-awˇ, ciˬ cuˇ ni g'eh-eu jawˇ duˬ-ahˇ doˆ-iˇ-euˬ meh. 33Aˬ yaw ̭ ma ̭ doˇ-iˇ lu ̭ gaˇ tsawˇ haˬ g'awˬ mya ni mawˇ-awˇ, aˬ yaw ̭ ma ̭-ahˇ haw siˬ-euˬ meh. K'oeˇ miˇ neh, meuˬ yawˬ meuˬ na lu ̭-ahˇ jawˇ-eu tsawˇ haˬ deuˬ, aˬ yaw ̭ ma ̭-euˬ mehˬ hu dahˇ taˆ paw neh cehˆ-awˇ, Yeˬsuˇ hawˇ-eu g'aˬ k'ehˇ deuˬ-euˬ jeˬ hu cehˆ keuˆ-awˇ jawˇ-eu meh. 34Yeˬsuˇ lawˬ la ̭ nyiˇ doˆ le-awˇ, tsawˇ haˬ aˇ ma ̭ ma ̭ ma-ahˇ ya mawˇ ngeh, g'awˬ shaˬ haw gaˬ-euˬ meh. Aˬ jeˬ miˇ neh ehˇ naˇ, aˬ yaw ̭ ma ̭-aˬ, yawˇ bo-eu g'aˬ maˬ jawˇ-eu yawˇ yawˇ ma ̭-ahˇ duˇ-eu meh. K'oeˇ ngeh, aˬ yaw ̭ ma ̭-ahˇ g'awˬ mya jeˬ mehˬ nehˬ tsoˆ nehˬ-euˬ meh. 35Uˬ ci ̭ uˬ taw taw le ngeh, g'aˬ k'ehˇ deuˬ aˬ yaw ̭ jawˇ gaˇ laˇ-awˇ ehˇ-eu, "Uˬ ci ̭ ci ̭ le shaw-iˬ ngaˇ. K'oeˇ uˬ ta ̭, jawˇ duˬ heu tsahˇ-aˬ, pu-ahˇ gaˇ mahˇ kaˬ-eu jawˇ duˬ tiˬ tsahˇ meh. 36Tsawˇ haˬ heu deuˬ-ahˇ pyehˬ nehˬ-awˇ, dawˬ peh jaˆ-eu pu doe ni, dzaˬ dzaˬ dawˇ dawˇ bi poˆ zeuˇ dzaˬ-iˇ-eu maˬ tsaˬ-a loˇ." 37Yeˬsuˇ ehˇ-eu, "Naw ma ̭ aˬ yaw ̭ ma ̭-ahˇ tiˬ jeˬ paˬ bi dzaˬ-awˬ." Aˬ yaw ̭ ma ̭ ehˇ-eu, "Tsawˇ haˬ heu deuˬ-ahˇ bi dzaˬ-eu g'aˇ duˬ, pyuˇ mehˇ byaˆ nyiˬ yaˇ byaˆ poeˬ kaˬ muˇ zeuˇ laˬ-iˇ-awˬ loˇ." 38Yeˬsuˇ aˬ yaw ̭ ma ̭-ahˇ ehˇ nehˬ-eu, "Naw ma ̭ kaˬ muˇ aˇ myaˆ yaˆ ahˇ te. Tiˬ poˆ haw-iˇ sheˇ." Aˬ yaw ̭ ma ̭ poˆ haw-iˇ-awˇ ehˇ-eu, "Kaˬ muˇ ngaˬ yaˆ hawˇ-eu ngaˬ shaˬ nyiˬ mawˇ ahˇ-eu teh ̭ nga." 39Tsawˇ haˬ k'oeˇ deuˬ dawˬ tawˆ lu ̭-ahˇ daˬ zawˬ deh k'oeˇ taˆ aˇ muˇ biˇ-awˇ bi nuiˇ-eu g'aˇ duˬ, g'aˬ k'ehˇ deuˬ-ahˇ Yeˬsuˇ dawˬ bi ̭-euˬ meh. 40K'oeˇ ngeh, tsawˇ haˬ k'oeˇ deuˬ tiˬ yaˇ g'aˬ aˇ muˇ, ngaˬ tseˇ g'aˬ aˇ muˇ lehˇ muˇ muˇ-ehˇ nuiˇ-euˬ meh. 41K'oeˇ naˇ, kaˬ muˇ k'oeˇ ngaˬ siˬ hawˇ-eu ngaˬ shaˬ k'oeˇ nyiˬ mawˇ-ahˇ Yeˬsuˇ yuˇ-awˇ, mˬ paw g'awˇ leuˇ-awˇ Miˬyehˇ-euˬ guiˬ lahˬ-ahˇ ja ceuˬ-euˬ meh. Aˬ yaw ̭ kaˬ muˇ ngawˬ pyehˬ-awˇ, g'aˬ k'ehˇ deuˬ-ahˇ bi ̭ nehˬ-awˇ, tsawˇ haˬ aˇ ma ̭-ahˇ bi biˇ nehˬ-euˬ meh. Ngaˬ shaˬ k'oeˇ nyiˬ mawˇ k'aw ̭, tsawˇ haˬ dawˬ tawˆ lu ̭-ahˇ aˬ yaw ̭ bi biˇ o ̭ nehˬ-euˬ meh. 42Tsawˇ haˬ yawˬ g'aˬ na lu ̭ tiˬ dehˆ ya dzaˬ-euˬ meh. 43Maˬ dzaˬ jiˇ coeˇ-ehˇ dzehˬ laˇ taˬ-euˬ kaˬ muˇ hawˇ-eu ngaˬ shaˬ k'oeˇ deuˬ-ahˇ g'aˬ k'ehˇ deuˬ g'oˆ uiˬ ngeh, k'aˆ puˬ tseˇ nyi ̭ puˬ byah laˇ-euˬ meh. 44Dzaˬ-euˬ tsawˇ haˬ dawˬ tawˆ lu ̭, ngaˬ heˇ g'aˬ byah-eu meh. 45Yeˬsuˇ tsawˇ haˬ aˇ ma ̭-ahˇ bi g'o ̭-iˇ lu ̭ ngeh, aˬ yaw ̭-euˬ zaˬ lahˇ deuˬ-ahˇ tiˬ poˆ tehˬ-ehˇ lawˬ la ̭ k'oeˇ bi uˇ-iˇ-awˇ, lah nui baˬ-ahˇ jaˆ-eu Behˬdzeˇdaˬ meuˬ-ahˇ bi iˇ tawˬ-euˬ meh. 46Aˬ yaw ̭ tsawˇ haˬ aˇ ma ̭-ahˇ g'awˬ-iˇ g'aˬ-awˇ, gawˬ jawˬ-ahˇ guiˬ lahˬ shaˇ leˇ-eu lehˇ le-euˬ meh. 47Uˬ ci ̭ ci ̭ le ngeh, lawˬ k'oeˇ laˇ lah g'ahˇ ceh iˇ keuˆ-awˇ, Yeˬsuˇ tiˬ g'aˬ teh ̭-ehˇ dahˇ taˆ jawˇ ya ̭-euˬ meh. 48Aˬ yaw ̭-euˬ zaˬ lahˇ deuˬ jaˬ lehˇ-ahˇ ciˬ daˬ-awˇ lawˬ ya heu-eu baˬ da neh, g'aˬ doeˇ doeˇ dui dui gaˇ aˬ yaw ̭ ya mawˇ-euˬ meh. Ya poeˇ doeˇ taw paw naˬ liˬ smˇ la ̭ dzehˬ-iˇ ngeh, aˬ yaw ̭ iˇ cu ̭ k'oeˇ taˆ gaˇ ma cah cah-ehˇ, aˬ yaw ̭ ma ̭ jawˇ gaˇ oe-euˬ meh. Aˬ yaw ̭ ma ̭-ahˇ aˬ yaw ̭ iˇ dzeuˇ-eu lehˇ g'eh-eu meh. 49Ehˇ k'aw ̭, aˬ yaw ̭ iˇ cu ̭ k'oeˇ taˆ cah lu ̭ gaˇ aˬ yaw ̭ ma ̭ mawˇ-awˇ, shaˆ shiˇ neh ̭ nga lehˇ noeˬ-awˇ guˇ-euˬ meh. 50Aˬ yaw ̭ ma ̭ yawˬ g'aˬ na lu ̭ aˬ yaw ̭-ahˇ mawˇ-awˇ, guˆ dui dui-iˇ-euˬ meh. "Taˬ guˆ. Nui ma taˬ baˬ. Ngaˇ ma" lehˇ, aˬ yaw ̭ ma ̭-ahˇ Yeˬsuˇ ehˇ nehˬ-euˬ meh. 51K'oeˇ naˇ, aˬ yaw ̭ ma ̭ dziˬ lu ̭-eu lawˬ la ̭ k'oeˇ aˬ yaw ̭ uˇ-iˇ ngeh, jaˬ lehˇ baw-eu naˬ leˇ-euˬ meh. Zaˬ lahˇ deuˬ zahˬ dui dui leˇ-euˬ meh. 52Aˬ jeˬ miˇ neh ehˇ naˇ, tsawˇ haˬ ngaˬ heˇ g'aˬ-ahˇ bi dzaˬ-euˬ gaˇ kawˆ k'oeˇ aˬ yaw ̭ ma ̭ noeˬ maˬ doˆ-a. Aˬ yaw ̭ ma ̭-euˬ nui ma ka ̭ duiˬ ni g'eh-eu meh. 53Aˬ yaw ̭ ma ̭ lah tsehˆ doˆ-awˇ, Geˬneˬsaˬlehˇ miˇ k'ahˬ-ahˇ iˇ keuˆ ngeh, lawˬ pa ̭ taw ̭ ya ̭-euˬ meh. 54Aˬ yaw ̭ ma ̭ lawˬ la ̭ nyiˇ doˆ-iˇ-euˬ nehˬ-ehˇ, Yeˬsuˇ-ahˇ aˬ cawˬ tiˬ poˆ teh ̭-ehˇ haw siˬ-euˬ meh. 55Aˬ yaw ̭ ma ̭ miˇ k'ahˬ k'oeˇ k'ahˬ coeˬ doe-awˇ, naˇ-eu tsawˇ haˬ deuˬ-ahˇ seuˆ yo ̭ k'oeˇ taˆ bi yu ̭-awˇ, Yeˬsuˇ jawˇ meh lehˇ k'aˇ ya gaˬ gaˇ ba ̭ ha laˇ-euˬ meh. 56Pu doe ni, meuˬ doe ni, yaˇ k'ahˬ yaˇ lahˬ doe ni, Yeˬsuˇ k'aˇ iˇ k'aˇ laˇ doˆ gaˇ, lehˆ lehˆ tsmˇ tsawˇ haˬ uiˬ leˇ duˬ-ahˇ, naˇ-eu tsawˇ haˬ ba ̭ taˬ-awˇ, Yeˬsuˇ-euˬ pehˇ k'ahˬ pehˇ dahˬ-ahˇ teh ̭-ehˇ k'aw ̭ bi toeˬ ciˆ la ̭-eu g'aˇ duˬ, aˬ yaw ̭ ma ̭ shaˇ-euˬ meh. K'aˇ toeˬ ciˆ-euˬ deuˬ naˇ gawˇ taˬ leˇ jiˇ-euˬ meh.

will be added

X\