MAˬKUˆ 14

1Baˬ saˬ kaˬ Bawˬ-iˬ hawˇ-eu Dehˬ tseˬ maˬ dawˆ-euˬ Kaˬ muˇ dzaˬ-eu Bawˬ-iˬ g'eh-eu aˇ yamˬ keuˆ le-eu nyiˬ nah dzeˇ-eu teh ̭ meh. Piˇ ma aˬ yui ̭ deuˬ hawˇ-eu Zahˇ dawˬ k'o ̭ dawˬ mehˬ-eu saˬ laˬ deuˬ-aˬ, Yeˬsuˇ-ahˇ ciˬ cuˇ ni nyeh ̭ k'oeˬ-awˇ seh ̭-eu g'aˇ duˬ nawˬ jawˬ lu ̭-eu meh. 2"Bawˬ-iˬ g'eh lu ̭ ngeh aˬ dui ma ̭ aˬ yaw ̭-ahˇ maˬ nyeh ̭ nya nga siˬ. K'oeˇ lo ̭-ehˇ jahˇ naˇ, miˇ k'ahˬ zaˬ luiˬ g'a laˇ gaˇ ya yahˇ nga" lehˇ, aˬ yaw ̭ ma ̭ ehˇ-eu meh. 3Beˬtaˬniˇ pu-ahˇ jawˇ-eu Siˇmoˬ lehˇ myahˇ-euˬ coiˬ doi tiˬ g'aˬ-euˬ nymˇ-ahˇ Yeˬsuˇ jawˇ lu ̭-eu meh. Aˬ yaw ̭ hawˬ dzaˬ lu ̭ ngeh, zaˬ miˬ zaˬ tiˬ g'aˬ aˇ poeˬ k'aˆ dui dui-eu tsiˇ yaw saw jeˬ shehˆ ahˇ taˬ-euˬ lo pyuˇ maˇ tsa ̭ ciˬ la ̭-awˇ, maˇ tsa ̭ deh paˆ-awˇ, Yeˬsuˇ-euˬ uˬ duˬ-ahˇ tsiˇ yaw saw jeˬ shehˆ daˆ nehˬ-euˬ meh. 4K'oeˇ gaˇ jawˇ-eu tsawˇ haˬ tiˬ paˆ na deuˬ maˬ jawˇ tehˬ coeˇ-ehˇ ehˇ-eu, "Aˬ jeˬ g'eh-eu lehˇ tsiˇ yaw saw teu, gaˇ dahˇ maˬ tsoeˬ gaˇ zmˬ dzeh niˇ g'a-eu nga. 5Ahˬ law nmˇ-aˬ, k'aˇ teˬ-eu pyuˇ mehˇ byaˆ smˬ yaˇ byaˆ za teh ̭-a tawˇ. Pyuˇ k'oeˇ yuˇ-awˇ shaˬ zaˬ zahˬ zaˬ-ahˇ biˇ nehˬ law nmˇ-aˬ, aˇ naˆ ni gaˇ dahˇ tsoeˬ nmˇ" lehˇ, aˬ yaw ̭ ma ̭ yaw kaˬ ja ja-ehˇ zaˬ miˬ zaˬ k'oeˇ g'aˬ-ahˇ yaw k'aˆ-ehˇ ehˇ doeˇ-eu meh. 6Yeˬsuˇ ehˇ-eu, "Zaˬ miˬ zaˬ heu g'aˬ-ahˇ tiˬ jeˬ-iˬ taˬ paˇ ehˇ. Aˬ jeˬ miˇ neh naw ma ̭ aˬ yaw ̭-ahˇ ehˇ doeˇ te. Aˬ yaw ̭-aˬ, ngaˬ-euˬ g'aˇ duˬ muiˬ dui dui-eu jeˬ mˇ-euˬ meh. 7Shaˬ zaˬ zahˬ zaˬ deuˬ naw ma ̭ nehˬ-ehˇ aˬ myah lu ̭ jawˇ-awˇ, naw ma ̭ k'aˇ caw ba nehˬ maw ̭ ngeh caw ba nehˬ nya teh ̭-a. Ehˇ k'aw ̭, ngaˇ-aˬ, naw ma ̭ nehˬ-ehˇ aˬ myah lu ̭ jawˇ-eu maˬ ngeuˇ. 8Zaˬ miˬ zaˬ heu g'aˬ aˬ yaw ̭ k'aˇ g'eh nya-eu lo ̭-ehˇ mˇ-euˬ meh. Ngaˬ-ahˇ ba ̭ pahˬ-eu aˇ yamˬ maˬ keuˆ laˇ mi naˆ-ehˇ, ngaˬ-euˬ g'awˇ mawˇ-ahˇ tsiˇ yaw saw jeˬ shehˆ daˆ-awˇ, ba ̭ pahˬ-eu g'aˇ duˬ laˆ saˆ nehˬ la ̭-euˬ meh. 9Miˇ tsaˬ tahˬ k'awˇ heu doe ni, Laˬ k'aˬ cehˇ-eu Guiˬ lahˬ dawˬ heu k'aˇ mehˬ keuˆ gaˇ, zaˬ miˬ zaˬ heu g'aˬ neh mˇ-euˬ gaˇ kawˆ heu ja-awˇ, aˬ yaw ̭-ahˇ noeˬ keuˆ teh ̭-a lehˇ, naw ma ̭-ahˇngaˇ maˇ jawˆ ni ehˇ-eu ma." 10K'oeˇ naˇ, zaˬ lahˇ tseˇ nyi ̭ g'aˬ la ̭ k'oeˇ ahˇ-eu Yuˇdaˆ Iˇsaˬgaˬliˬoˆ lehˇ kuˇ-eu g'aˬ, Yeˬsuˇ-ahˇ ahˬ dzaˬ-eu g'aˇ duˬ, piˇ ma aˬ yui ̭ deuˬ jawˇ gaˇ le-euˬ meh. 11Aˬ yaw ̭ ehˇ gaˇ piˇ ma aˬ yui ̭ deuˬ laˬ k'aˬ cehˇ dui dui-awˇ, aˬ yaw ̭-ahˇ pyuˇ bi ̭-eu g'aˇ duˬ saˇ jaˇ dzaˬ-euˬ meh. K'oeˇ naˇ, Yeˬsuˇ-ahˇ aˬ yaw ̭ ma ̭-euˬ aˬ la ̭ la ̭ k'oeˇ a nehˬ-eu g'aˇ duˬ aˬ myah yeh ̭ laˇ nga lehˇ, Yuˇdaˆ jawˬ lu ̭-eu meh. 12Dehˬ tseˬ maˬ ahˇ-eu Kaˬ muˇ dzaˬ-eu Bawˬ-iˬ g'eh dahˬ beh ngeh nah pyeu ̭-eu, Baˬsaˬkaˬ dzaˬ byawˇ g'aˇ duˬ yawˇ seh ̭-eu aˇ nah k'oeˇ nah-ahˇ, zaˬ lahˇ deuˬ Yeˬsuˇ-ahˇ naˇ haˬ-eu, "Nawˇ nga ma ̭-ahˇ Baˬsaˬkaˬ dzaˬ byawˇ aˬ gaˇ bi lehˬ hmˬ maw ̭-eu nya." 13K'oeˇ ngeh, zaˬ lahˇ nyiˬ g'aˬ-ahˇ Yeˬsuˇ heu lo ̭-ehˇ mehˬ nehˬ-awˇ k'ehˇ g'eh-euˬ meh. "Naw nya ̭ meuˬ-ahˇ iˇ-awˬ. Iˇ cu ̭ mui deuˇ oeˬ lahˬ ba ̭ lu ̭-eu tsawˇ haˬ tiˬ g'aˬ ya tahˬ pu ̭ teh ̭-a. Aˬ yaw ̭-euˬ mehˬ nah naw nya ̭ caw teh g'eh-awˬ. 14Aˬ yaw ̭ aˬ geu nymˇ-ahˇ uˇ-iˇ-eu maˬ kaˬ, nymˇ sahˇ g'aˬ-ahˇ 'Saˬ laˬ nyaˇ-eu aˬ yaw ̭ hawˇ-eu aˬ yaw ̭-euˬ zaˬ lahˇ deuˬ Baˬsaˬkaˬ dzaˬ byawˇ dzaˬ-eu g'aˇ duˬ aˇ lawˆ aˬ geu gaˇ jaˆ ta jeˇ' lehˇ naˇ haˬ-awˬ. 15K'oeˇ ngeh, nymˇ la ̭ taˆ tiˆ-ahˇ laˆ saˆ taˬ-euˬ aˇ lawˆ lawˆ ma tiˬ lawˆ, naw nya ̭-ahˇ aˬ yaw ̭ mehˬ nehˬ la ̭ teh ̭-a. Aˬ dui ma ̭ g'aˇ duˬ yawˬ jeˬ na lu ̭ k'oeˇ gaˇ lehˬ hmˬ taˬ-awˬ." 16Zaˬ lahˇ k'oeˇ nyi g'aˬ doˆ-iˇ-awˇ meuˬ-ahˇ iˇ ngeh, yawˬ jeˬ na lu ̭ Yeˬsuˇ neh ehˇ nehˬ-euˬ lo ̭-ehˇ jaˆ gaˇ ya mawˇ-awˇ, Baˬsaˬkaˬ dzaˬ byawˇ lehˬ hmˬ laˆ dawˆ-euˬ meh. 17Uˬ ci ̭ ci ̭ le ngeh, Yeˬsuˇ zaˬ lahˇ tseˇ nyi ̭ g'aˬ sheuˬ-awˇ oe-euˬ meh. 18Aˬ yaw ̭ ma ̭ hawˬ jeh-ahˇ jawˬ leˇ-awˇ dzaˬ lu ̭ ngeh, Yeˬsuˇ ehˇ-eu, "Naw ma ̭ la ̭ k'oeˇ tiˬ g'aˬ ngaˬ-ahˇ ahˬ dzaˬ teh ̭-a. Ngaˬ nehˬ-ehˇ tiˬ gaˇ dzaˬ lu ̭-eu g'aˬ ngaˬ-ahˇ ahˬ dzaˬ teh ̭-a lehˇ, ngaˇ maˇ maˇ ni ehˇ-eu ma." 19Zaˬ lahˇ deuˬ dawˬ k'oeˇ dawˬ-ahˇ nui ma maˬ saˇ-ehˇ, "Ngaˬ-ahˇ ehˇ te loˇ" lehˇ, tiˬ g'aˬ saˇ-iˬ tiˬ g'aˬ aˬ yaw ̭-ahˇ naˇ haˬ-eu meh. 20Yeˬsuˇ ehˇ-eu, "Naw ma ̭ tseˇ nyi ̭ g'aˬ la ̭ k'oeˇ tiˬ g'aˬ meh. Ngaˬ nehˬ-ehˇ g'awˬ nyoeˇ k'mˬ maˬ ta ̭-eu g'aˬ meh. 21Tsawˇhaˬ-euˬ Zaˬmaˇ-aˬ, Jaˇli ̭ la ̭ k'oeˇ ehˇ taˬ-euˬ lo ̭-ehˇ ya shiˇ teh ̭-a. Ehˇ k'aw ̭, Tsawˇhaˬ-euˬ Zaˬmaˇ-ahˇ ahˬ dzaˬ-eu k'oeˇ g'aˬ ya noeˬ shaˬ dui dui teh ̭-a. Aˬ yaw ̭ maˬ deh ̭ le-euˬ law nmˇ-aˬ, aˬ yaw ̭ g'aˇ duˬ muiˬ dzehˬ teh ̭-a." 22Aˬ yaw ̭ ma ̭ ci ̭ hawˬ dzaˬ lu ̭ ngeh, Yeˬsuˇ kaˬ muˇ yuˇ-awˇ, Miˬyehˇ-euˬ guiˬ lahˬ-ahˇ ja ceuˬ-euˬ meh. K'oeˇ naˇ, kaˬ muˇ k'oeˇ ngawˬ pyehˬ-awˇ, zaˬ lahˇ deuˬ-ahˇ biˇ nehˬ-awˇ ehˇ-eu, "Yuˇ dzaˬ-awˬ. Heu-aˬ, ngaˬ-euˬ g'awˇ mawˇ ma." 23K'oeˇ naˇ, aˬ yaw ̭ k'mˬ maˬ ciˬ-awˇ, Miˬyehˇ-euˬ guiˬ lahˬ-ahˇ ja ceuˬ-euˬ meh. K'mˬ maˬ k'oeˇ aˬ yaw ̭ ma ̭-ahˇ ciˬ nehˬ-awˇ, aˬ yaw ̭ ma ̭ dawˇ-euˬ meh. 24Yeˬsuˇ ehˇ-eu, "Heu-aˬ, tsawˇ haˬ g'awˬ mya ni g'aˇ duˬ yoeˇ le-euˬ, Miˬyehˇ-euˬ dawˬ ma saˇ jaˇ-ahˇ ta ̭-eu ngaˬ-euˬ shiˬ ma. 25Miˬyehˇ Miˇk'ahˬ la ̭ k'oeˇ aˬ ga ̭ dzaˇ uiˇ yaw shui ̭-ahˇ ngaˇ ya dawˇ-eu aˇ nah maˬ keuˆ laˇ k'oeˇ keuˆ ni, aˬ ga ̭ dzaˇ uiˇ heu ngaˇ maˬ paˇ dawˇ ma lehˇ, naw ma ̭-ahˇ ngaˇ ehˇ-eu ma." 26K'oeˇ naˇ, ja ceuˬ-eu caˇ dawˬ tiˬ bymˇ aˬ yaw ̭ ma ̭ caˇ-awˇ, Saˬloˬ gawˬ jawˬ-ahˇ le-euˬ meh. 27K'oeˇ naˇ, aˬ yaw ̭ ma ̭-ahˇ Yeˬsuˇ heu lo ̭-ehˇ ehˇ nehˬ-euˬ meh. "Naw ma ̭ dawˬ tawˆ lu ̭ ngaˬ-ahˇ byehˇ dzeh-awˇ cehˆ teh ̭-a. Aˬ jeˬ miˇ neh ehˇ naˇ, 'Yawˇ bo-eu yaw sahˇ-ahˇ Miˬyehˇ seh ̭-awˇ, yawˇ yawˇ ma ̭ cehˆ byaˆ jiˇ teh ̭-a' lehˇ, Jaˇli ̭ la ̭ k'oeˇ ehˇ taˬ-euˬ meh. 28Ehˇ k'aw ̭, Miˬyehˇ ngaˬ-ahˇ paˇ bi g'o ̭ deh ̭ laˇ g'aˬ ngeh, naw ma ̭-euˬ mehˬ hu Gaˬliˬlehˇ miˇ k'ahˬ-ahˇ ngaˇ iˇ tawˬ ma." 29Beˬtuˆluˆ ehˇ-eu, "Aˬ cawˬ nawˬ-ahˇ byehˇ dzeh-awˇ cehˆ jiˇ k'aw ̭, ngaˇ nawˬ-ahˇ maˬ byehˇ dzeh." 30Yeˬsuˇ Beˬtuˆluˆ-ahˇ ehˇ nehˬ-eu, "Nymˇ ci ̭ ya poeˇ nyiˬ tahˬ maˬ doeˇ laˇ mi naˆ-ehˇ, nawˇ ngaˬ-ahˇ maˬ siˬ lehˇ smˬ poˆ keuˆ ni pyehˇ teh ̭-a lehˇ, ngaˇ nawˬ-ahˇ maˇ jawˆ ni ehˇ-eu ma." 31Beˬtuˆluˆ ui cuiˆ teˇ k'aˆ jeˬ-ehˇ ehˇ-eu, "Ngaˇ nawˬ- nehˬ-ehˇ ya shiˇ paˬ-ehˇ tsaˬ laˇ k'aw ̭, nawˬ-ahˇ ngaˇ maˬ siˬ lehˇ maˬ ehˇ." K'oeˇ ngeh, zaˬ lahˇ dawˬ tawˆ lu ̭ k'aw ̭, k'oeˇ lo ̭-ehˇ ehˇ-eu meh. 32Geˬseˬmaˬniˇ lehˇ kuˇ-eu jawˇ duˬ-ahˇ aˬ yaw ̭ ma ̭ oe keuˆ-euˬ meh. Zaˬ lahˇ deuˬ-ahˇ Yeˬsuˇ ehˇ nehˬ-eu, "Heu gaˇ nuiˇ-awˇ ngaˇ guiˬ lahˬ shaˇ gaˇ dawˬ tawˬ-awˬ." 33Beˬtuˆluˆ, Yaˬkoˆ, Yoˇhaˬ, aˬ ha smˇ g'aˬ-ahˇ aˬ yaw ̭ sheuˬ g'eh-euˬ meh. Aˬ yaw ̭ noeˬ shaˬ dui dui-awˇ, nui ma la ̭ k'oeˇ shaˬ zahˬ mˇ dui dui lu ̭-eu meh. 34Aˬ ha smˇ g'aˬ-ahˇ aˬ yaw ̭ ehˇ nehˬ-eu, "Ngaˬ-euˬ nui ma la ̭ k'oeˇ shaˬ zahˬ mˇ-eu shiˇ taw tehˬ ni miˇ-a. Heu gaˇ jawˇ-awˇ lo ̭ tawˬ-awˬ." 35Aˬ yaw ̭ mehˬ hu paw heu myaˆ to ̭ iˇ jiˆ-awˇ, miˇ tsa awˆ byaˆ-awˇ, shaˬ zahˬ na ̭ dui dui-eu aˇ yamˬ k'oeˇ aˬ yaw ̭-ahˇ bi dzeuˇ-iˇ nya naˇ bi dzeuˇ-iˇ la ̭-eu g'aˇ duˬ guiˬ lahˬ shaˇ-euˬ meh. 36"Aˬda-oˇ. Ngaˬ Da-oˇ. Nawˇ maˬ mˇ nya-eu tiˬ jeˬ-iˬ maˬ jaˆ-a. Shaˬ zahˬ na ̭ dui dui-eu k'mˬ maˬ heu k'mˬ-ahˇ bi dzeuˇ-iˇ la ̭. Ehˇ k'aw ̭, ngaˬ-euˬ nui noeˬ taˬ bi pyeu ̭ la ̭. Nawˬ-euˬ nui noeˬ bi pyeu ̭-awˬ." 37K'oeˇ naˇ, zaˬ lahˇ k'oeˇ smˇ g'aˬ jawˇ gaˇ aˬ yaw ̭ g'o ̭ le ngeh, yu ̭ k'aˆ jiˇ taˬ-euˬ gaˇ ya mawˇ-euˬ meh. Beˬtuˆluˆ-ahˇ aˬ yaw ̭ ehˇ nehˬ-eu, "Siˇmoˬ-oˇ. Nawˇ yu ̭ k'aˆ teˬ loˇ. Naˬ liˬ tiˬ la ̭ teh ̭-ehˇ k'aw ̭ maˬ yu ̭ ni maˬ dawˬ keuˆ coeˇ nya loˇ." 38K'oeˇ naˇ, aˬ yaw ̭ ma ̭-ahˇ aˬ yaw ̭ ehˇ nehˬ-eu, "Muˇ juˇ juˇ-eu mehˬ nah naw ma ̭ maˬ ya caw teh-iˇ ni, guiˬ lahˬ shaˇ-awˇ yaw beuˇ beuˇ-ehˇ jawˇ-awˬ. Nui ma keuˆ k'aw ̭, g'awˇ mawˇ g'aˬ baˬ meh." 39Aˬ yaw ̭ tiˬ poˆ paˇ iˇ-awˇ, yaw beh poˆ k'aˇ shaˇ-euˬ lo ̭-ehˇ guiˬ lahˬ paˇ shaˇ-euˬ meh. 40Zaˬ lahˇ deuˬ jawˇ gaˇ aˬ yaw ̭ paˇ g'o ̭ le ngeh, yu ̭ yoeˇ dui dui-eu miˇ neh yu ̭ k'aˆ jiˇ taˬ-euˬ gaˇ ya mawˇ-euˬ meh. Aˬ yaw ̭ ma ̭ aˬ yaw ̭-ahˇ ehˇ k'o ̭ nehˬ tsaˬ maˬ siˬ-a. 41Aˬ yaw ̭ smˬ poˆ tiˬ poˆ paˇ g'o ̭ le ngeh, aˬ yaw ̭ ma ̭-ahˇ heu lo ̭-ehˇ ehˇ nehˬ-euˬ meh. "Naw ma ̭ nymˬ-mˇ keuˆ ni yu ̭ k'aˆ-awˇ g'aˬ naˬ naˬ lu ̭ te siˬ loˇ. G'aˬ-aˇ. Aˇ yamˬ keuˆ laˇ-euˬ ngaˇ. Haw-awˬ. Tsawˇhaˬ-euˬ Zaˬmaˇ-ahˇ iˬ baˇ zaˬ deuˬ-euˬ aˬ la ̭ la ̭ k'oeˇ a nehˬ shaw-iˬ meh. 42Tuˇ-awˬ. Iˇ kaˇ-euˇ. Haw sheˇ. Ngaˬ-ahˇ ahˬ dzaˬ-eu lehˇ g'eh-eu g'aˬ heu gaˇ oe keuˆ taˬ-euˬ ngaˇ." 43Yeˬsuˇ dawˬ ngehˬ g'aˬ-eu maˬ dah ni, zaˬ lahˇ tseˇ nyi ̭ g'aˬ la ̭ k'oeˇ ahˇ-eu Yuˇdaˆ lehˇ myahˇ-euˬ g'aˬ ja pyuˬ ni oe keuˆ-euˬ meh. Mi cehˇ hawˇ-eu daˇ kawˬ ba ̭ lu ̭-eu tsawˇ haˬ aˇ ma ̭ ma ̭ ma tiˬ ma ̭ aˬ yaw ̭ nehˬ-ehˇ oe-euˬ meh. Piˇ ma aˬ yui ̭ deuˬ, Zahˇ dawˬ k'o ̭ dawˬ mehˬ-eu saˬ laˬ deuˬ hawˇ-eu, tsawˇ mawˬ tsawˇ k'aˆ deuˬ neh aˬ yaw ̭ ma ̭-ahˇ k'ehˇ g'eh le ̭-euˬ meh. 44Yeˬsuˇ-ahˇ ahˬ dzaˬ-euˬ k'oeˇ g'aˬ tsawˇ haˬ k'oeˇ ma ̭-ahˇ heu lo ̭-ehˇ ehˇ nehˬ taˬ-euˬ meh. "Ngaˇ mehˬ cuˇ cuˇ nehˬ-eu g'aˬ-aˬ, naw ma ̭ poˆ lu ̭-eu k'oeˇ g'aˬ meh de. Aˬ yaw ̭-ahˇ nyeh ̭-awˇ, yaw muiˬ paˬ-ehˇ bi lo ̭-awˇ tsahˇ g'eh-awˬ." 45Yuˇdaˆ oe keuˆ-euˬ nehˬ-ehˇ, Yeˬsuˇ jawˇ gaˇ iˇ-awˇ, "Saˬ laˬ-oˇ" lehˇ ehˇ-awˇ mehˬ cuˇ cuˇ nehˬ-euˬ meh. 46K'oeˇ ngeh, aˬ yaw ̭ ma ̭ Yeˬsuˇ-ahˇ nyeh ̭-awˇ, zi ̭ dah ni daw ̭ tehˬ taˬ-euˬ meh. 47Ehˇ k'aw ̭, k'oeˇ gaˇ yaw ̭ lu ̭-eu tsawˇ haˬ tiˬ g'aˬ mi cehˇ g'awˇ doˆ-awˇ, Piˇ ma Yaw huiˬ g'aˬ-euˬ zaˬ k'aˆ-ahˇ coeˇ-awˇ, naˬ pa ̭ coeˇ tsehˆ dzeh-euˬ meh. 48K'oeˇ ngeh, aˬ yaw ̭ ma ̭-ahˇ Yeˬsuˇ heu lo ̭-ehˇ ehˇ nehˬ-euˬ meh. "Smˇ k'oeˬ tahˇ joe-ahˇ nyeh ̭-eu lo ̭-ehˇ, mi cehˇ hawˇ-eu daˇ kawˬ ba ̭-awˇ ngaˬ-ahˇ ya nyeh ̭ le ta loˇ. 49Aˬ yaw ̭ nah yaw ̭ Uˬ duˬ tahˬ nymˇ nymˇ ma-ahˇ mehˬ-eu tsoˆ-eu la ̭ k'oeˇ, naw ma ̭ nehˬ-ehˇ ngaˇ jawˇ lu ̭ k'aw ̭, naw ma ̭ ngaˬ-ahˇ maˬ nyeh ̭ le-a. Ehˇ k'aw ̭, Jaˇli ̭ la ̭ k'oeˇ ehˇ taˬ-euˬ jeˬ ya bi byah laˇ teh ̭-a." 50K'oeˇ ngeh, zaˬ lahˇ dawˬ tawˆ lu ̭ aˬ yaw ̭-ahˇ byehˇ dzeh ya ̭-awˇ cehˆ jiˇ-euˬ meh. 51Zaˬ guˬ tiˬ g'aˬ shawˇ jehˆ ni g'eh-eu saˬ paˇ neh za ̭ taˬ-euˬ aˇ bui tiˬ kahˇ tsahˇ lahˇ-awˇ, Yeˬsuˇ mehˬ nah caw teh lu ̭-eu meh. 52Aˬ yaw ̭ ma ̭ aˬ yaw ̭-ahˇ nyeh ̭-eu lehˇ g'eh-euˬ meh. Ehˇ k'aw ̭, aˬ yaw ̭ aˇ bui k'oeˇ kahˇ teuˆ lehˆ ya ̭-awˇ, neˇ myawˆ ni cehˆ dzeuˇ-euˬ meh. 53K'oeˇ naˇ, piˇ ma aˬ yui ̭ deuˬ, tsawˇ mawˬ tsawˇ k'aˆ deuˬ hawˇ-eu, Zahˇ dawˬ k'o ̭ dawˬ mehˬ-eu saˬ laˬ deuˬ dawˬ tawˆ lu ̭ uiˬ leˇ jiˇ-awˇ jawˇ-eu, Piˇ ma Yaw huiˬ g'aˬ-euˬ nymˇ-ahˇ, Yeˬsuˇ-ahˇ sheuˬ g'eh-euˬ meh. 54Beˬtuˆluˆ-aˬ, naˇ k'ah paw ui cuiˆ gaˇ mahˇ kaˬ gaˇ cah-awˇ, Piˇ ma Yaw huiˬ g'aˬ-euˬ nymˇ-ahˇ gawˬ lahˇ taˬ-euˬ la ̭ k'oeˇ paw keuˆ ni caw teh keuˆ g'eh-euˬ meh. K'oeˇ gaˇ lo ̭-eu yehˇ deuˬ nehˬ-ehˇ aˬ yaw ̭ ga dzuˇ-iˇ-awˇ, miˬ dzaˬ lmˇ lmˇ-ehˇ jawˇ-euˬ meh. 55Piˇ ma aˬ yui ̭ deuˬ hawˇ-eu Ba ̭ dzah aˇ muˇ muˇ lah-ehˇ ga uiˬ-awˇ, Yeˬsuˇ-ahˇ yaw lehˬ poˆ doˆ-awˇ seh ̭-eu lehˇ leh jeh k'aw ̭, yaw lehˬ tiˬ jeˬ-iˬ maˬ poˆ doˆ nya-a. 56Tsawˇ haˬ g'awˬ mya g'aˬ Yeˬsuˇ gaˇ kawˆ jaˬ myaw ̭ myaw ̭-eu la ̭ k'oeˇ saˇ kiˇ kamˬ k'aw ̭, tiˬ g'aˬ ehˇ-euˬ tiˬ jeˬ beu beu-ehˇ, yaw duˬ maˬ laˆ baw nya-a. 57K'oeˇ ngeh, tsawˇ haˬ tiˬ deuˬ tuˇ laˇ-awˇ, Yeˬsuˇ-euˬ gaˇ kawˆ jaˬ myaw ̭ myaw ̭-awˇ heu lo ̭-ehˇ ehˇ-eu meh. 58"'Tsawˇ haˬ zaˬ neh tsoˆ-euˬ Uˬ duˬ tahˬ nymˇ nymˇ ma heu nymˇ-ahˇ ngaˇ deh pyaˆ dzeh jiˇ-awˇ, smˬ nah la ̭ k'oeˇ tsawˇ haˬ zaˬ neh maˬ tsoˆ-euˬ Uˬ duˬ tahˬ nymˇ nymˇ ma ngaˇ paˇ tsoˆ k'o ̭ ma' lehˇ, tsawˇ haˬ teu g'aˬ ehˇ-eu nga ma ̭ gaˬ duˬ taˬ-euˬ ma." 59Tsawˇ haˬ k'oeˇ deuˬ k'aw ̭, aˬ yaw ̭ ma ̭ ehˇ-eu gaˇ kawˆ k'oeˇ tiˬ g'aˬ tiˇ g'aˬ duˇ leˇ ni maˬ ehˇ tsaˬ nya-a. 60K'oeˇ ngeh, aˬ yaw ̭ ma ̭ dawˬ tawˆ lu ̭ mehˬ shi Piˇ ma Yaw huiˬ g'aˬ tuˇ laˇ-awˇ, Yeˬsuˇ-ahˇ ehˇ-eu, "Tsawˇ haˬ heu deuˬ nawˬ-euˬ yaw lehˬ dzawˇ gaˇ nawˇ ehˇ k'o ̭ nehˬ-eu dawˬ maˬ jaˆ loˇ." 61Ehˇ k'aw ̭, Yeˬsuˇ dawˬ maˬ tmˇ-ehˇ ciˬ cuˇ ni jawˇ-euˬ meh. Piˇ ma Yaw huiˬ g'aˬ Yeˬsuˇ-ahˇ tiˬ poˆ paˇ naˇ haˬ-eu, "Guiˬ lahˬ huiˬ-eu Miˬyehˇ-euˬ Zaˬmaˇ pyeu ̭-eu Ka li lehˇ ehˇ-eu k'oeˇ g'aˬ nawˇ ma loˇ." 62Yeˬsuˇ ehˇ-eu, "Ngeuˇ ma. Tsawˇhaˬ-euˬ Zaˬmaˇ-aˬ, Baoˬ huiˬ-eu Miˬyehˇ-euˬ aˇ maˇ paw nuiˇ lu ̭ gaˇ maˬ ehˇ, mˬ dmˇ dziˬ-awˇ za ̭ ka le gaˇ maˬ ehˇ, naw ma ̭ yawˬ g'aˬ na lu ̭ ya mawˇ teh ̭-a." 63K'oeˇ ngeh poˆ jawˇ, Piˇ ma Yaw huiˬ g'aˬ yawˬ ha-euˬ pehˇ k'ahˬ pehˇ mahˇ g'eu paˆ-awˇ ehˇ-eu, "Aˬ dui saˇ kiˇ yawˬ-awˇ yawˬ maˬ paˇ loˬ meh. 64Aˬ yaw ̭ Miˬyehˇ-ahˇ yehˬ bawˬ sehˇ lu-ehˇ ehˇ-eu naw ma ̭ gaˬ jiˇ-euˬ meh. Naw ma ̭ aˬ joˆ-ehˇ noeˬ-eu nya." K'oeˇ ngeh, aˬ yaw ̭ bahˬ-eu miˇ neh, aˬ yaw ̭-ahˇ seh ̭-eu g'aˇ duˬ dawˬ tawˆ lu ̭ nui ma tsaˬ-euˬ meh. 65Tiˬ paˆ na deuˬ Yeˬsuˇ-ahˇ duˬ k'aˬ k'a daˆ-awˇ, myaˆ nuiˆ ka ̭ kaˬ nehˬ-awˇ diˬ diˬ-ehˇ, "Nawˬ-ahˇ diˬ-euˬ aˬ suˇ g'aˬ nga lehˇ ja maw maw haw sheˇ" lehˇ ehˇ nehˬ-euˬ meh. K'oeˇ naˇ, aˬ yaw ̭-ahˇ lo ̭-eu yehˇ deuˬ aˬ yaw ̭-ahˇ tsahˇ-awˇ, baˬ ba-ahˇ tehˆ nehˬ-euˬ meh. 66Piˇ ma Yaw huiˬ g'aˬ-euˬ zaˬ miˬ zaˬ zaˬ k'aˆ tiˬ g'aˬ oe ngeh keuˆ ni, nymˇ-ahˇ gawˬ lahˇ taˬ-euˬ la ̭ k'oeˇ Beˬtuˆluˆ jawˇ lu ̭-eu meh. 67Beˬtuˆluˆ miˬ dzaˬ lmˇ lu ̭ gaˇ aˬ yaw ̭ ya mawˇ ngeh, yaw muiˬ paˬ-ehˇ haw duˬ-awˇ ehˇ-eu, "Nawˇ jiˇ Naˬzaˬlehˇ tsawˇ haˬ Yeˬsuˇ nehˬ-ehˇ jawˇ-euˬ tsawˇ haˬ meh." 68Ehˇ k'aw ̭, aˬ yaw ̭ tsawˇ pyehˇ pyehˇ-awˇ ehˇ-eu, "Ngaˇ maˬ siˬ. Nawˇ ehˇ-eu teu ngaˇ tiˬ paw ̭-iˬ maˬ siˬ nya nya." K'oeˇ lo ̭-ehˇ ehˇ g'aˬ-awˇ, lahˇ k'ehˬ paw iˇ-euˬ meh. K'oeˇ ngeh, ya poeˇ tiˬ tahˬ doeˇ doˆ laˇ-euˬ meh. 69Zaˬ miˬ zaˬ k'oeˇ g'aˬ aˬ yaw ̭-ahˇ paˇ mawˇ-awˇ, k'oeˇ gaˇ yaw ̭ lu ̭-eu tsawˬ haˬ deuˬ-ahˇ ehˇ nehˬ-eu, "Teu g'aˬ jiˇ, aˬ yaw ̭ ma ̭-euˬ aˇ muˇ la ̭ k'oeˇ ahˇ-eu tsawˇ haˬ meh." 70Ehˇ k'aw ̭, aˬ yaw ̭ maˬ ngeuˇ lehˇ Beˬtuˆluˆ tsawˇ pyehˇ paˇ pyehˇ-euˬ meh. Tiˬ k'ehˬ paˇ kaˇ-iˇ ngeh, dawˬ peh yaw ̭ lu ̭-eu tsawˇ haˬ k'oeˇ deuˬ Beˬtuˆluˆ-ahˇ ehˇ nehˬ-eu, "Nawˇ g'eh Gaˬliˬlehˇ miˇ k'ahˬ-ahˇ jawˇ-eu miˇ neh, aˬ yaw ̭ ma ̭-euˬ aˇ muˇ-ahˇ ahˇ-eu yaw duˬ baw ngaˇ." 71Beˬtuˆluˆ ehˇ-eu, "Ngaˇ jaˬ myaw ̭ maˬ myaw ̭ lehˇ kamˬ peuˬ ma. Ngaˇ jaˬ myaw ̭ myaw ̭ lawˬ naˇ, Miˬyehˇ ngaˬ-ahˇ k'ehˬ lu ̭-uˇ. Naw ma ̭ ehˇ-eu tsawˇ haˬ k'oeˇ g'aˬ-ahˇ ngaˇ maˇ maˇ ni maˬ siˬ nya nya." 72K'oeˇ lo ̭-ehˇ ehˇ g'aˬ-eu maˬ dah ni, ya poeˇ nyiˬ tahˬ tiˬ tahˬ doeˇ doˆ laˇ-euˬ meh. K'oeˇ ngeh, "Ya poeˇ nyiˬ tahˬ maˬ doeˇ laˇ mi naˆ-ehˇ, nawˇ ngaˬ-ahˇ maˬ siˬ lehˇ smˬ poˆ keuˆ ni pyehˇ teh ̭-a" lehˇ, Yeˬsuˇ neh aˬ yaw ̭-ahˇ ehˇ nehˬ-euˬ dawˬ k'oeˇ dawˬ-ahˇ noeˬ doˆ leˇ-awˇ, nui ma-ahˇ maˬ nyeh ̭ tehˬ g'aˬ coeˇ-ehˇ ngoeˇ-euˬ meh.

will be added

X\