MAˬKUˆ 10

1K'oeˇ naˇ, jawˇ duˬ k'oeˇ tsahˇ-ahˇ neh Yeˬsuˇ doˆ-iˇ-awˇ, Yuˇdaˆ miˇ k'ahˬ-ahˇ iˇ-awˇ, Yawˇdaˬ lawˇ baˬ tsehˆ-euˬ meh. Tsawˇ haˬ aˇ ma ̭ ma ̭ ma aˬ yaw ̭ jawˇ gaˇ uiˬ le-awˇ, aˬ yaw ̭ aˬ myah myah mehˬ-euˬ lo ̭-ehˇ, aˬ yaw ̭ ma ̭-ahˇ mehˬ nehˬ tsoˆ nehˬ-euˬ meh. 2Paˬliˬsehˇ tiˬ paˆ na deuˬ aˬ yaw ̭ jawˇ gaˇ laˇ-awˇ, aˬ yaw ̭-ahˇ lahˇ ju k'mˇ maw ̭-eu miˇ neh heu lo ̭-ehˇ naˇ haˬ-euˬ meh. "Tsawˇ haˬ tiˬ g'aˬ yawˬ ha-euˬ miˬ zaˬ k'o ̭ naˇ, zahˇ dawˬ k'o ̭ dawˬ-ahˇ bahˬ ta loˇ." 3Yeˬsuˇ ehˇ-eu, "Moˇseˬ neh naw ma ̭-ahˇ bi ̭ taˬ-euˬ zahˇ dawˬ k'o ̭ dawˬ aˬ joˆ-ehˇ jaˆ ta." 4Aˬ yaw ̭ ma ̭ ehˇ-eu, "Miˬ zaˬ k'o ̭-eu sahˬ bo ̭ tiˬ dzeh bo ̭ nehˬ g'aˬ naˇ, yawˬ ha-euˬ miˬ zaˬ-ahˇ k'o ̭-awˇ bi g'o ̭-iˇ nya meh lehˇ, Moˇseˬ neh ehˇ taˬ-euˬ jaˆ meh." 5Yeˬsuˇ aˬ yaw ̭ ma ̭-ahˇ ehˇ nehˬ-eu, "Naw ma ̭ nui ma g'ahˇ dui dui-awˇ, maˬ mehˬ maˬ tsoˆ paˇ nya-eu miˇ neh, naw ma ̭ g'aˇ duˬ Moˇseˬ neh zahˇ dawˬ k'o ̭ dawˬ k'oeˇ dawˬ bo ̭ taˬ ya ̭-euˬ meh. 6Ehˇ k'aw ̭, Miˬyehˇ mˬ beh miˇ beh beh ngeh neh, 'Tsawˇ haˬ zaˬ-ahˇ, k'aˬ dzeˇ zaˬ hawˇ-eu zaˬ miˬ zaˬ beh-euˬ meh' lehˇ, Jaˇli ̭ la ̭ k'oeˇ ehˇ taˬ-euˬ meh. 7'K'oeˇ baˬ da neh, k'aˬ dzeˇ zaˬ-aˬ, yawˬ ha-euˬ aˬ da aˬ ma-ahˇ g'awˬ-iˇ-awˇ, yawˬ ha-euˬ miˬ zaˬ nehˬ-ehˇ deh ̭ ta ̭-eu la ̭ k'oeˇ, 8nyiˬ g'aˬ-euˬ tiˬ shiˬ tiˬ shaˬ teh ̭-ehˇ ya pyeu ̭ laˇ meh' lehˇ ehˇ taˬ-euˬ meh. K'oeˇ miˇ neh, aˬ nya ̭-aˬ, nyiˬ g'aˬ maˬ paˇ ngeuˇ meh. Tiˬ shiˬ tiˬ shaˬ teh ̭ meh. 9Miˬyehˇ neh yuˇ dzoeˇ taˬ-euˬ gaˇ, tsawˇ haˬ zaˬ maˬ ya laˆ g'awˬ-a." 10Aˬ yaw ̭ ma ̭ iˇ kahˇ-ahˇ g'o ̭ keuˆ-iˇ ngeh, zaˬ lahˇ deuˬ Yeˬsuˇ-ahˇ gaˇ kawˆ k'oeˇ naˇ haˬ-euˬ meh. 11Yeˬsuˇ ehˇ-eu, "Tsawˇ haˬ tiˬ g'aˬ yawˬ ha-euˬ miˬ zaˬ-ahˇ k'o ̭-awˇ yawˬ g'aˬ yawˬ sheuˬ paˇ naˇ, yawˬ ha-euˬ miˬ zaˬ-ahˇ bahˬ-eu jeˬ mˇ-euˬ meh. 12K'oeˇ lo ̭-ehˇ duˇ ni, zaˬ miˬ zaˬ tiˬ g'aˬ yawˬ haˬ-euˬ k'aˬ dzeˇ zaˬ-ahˇ k'o ̭-awˇ, yawˬ g'aˬ yawˬ-ahˇ dahˬ dzaˬ paˇ-iˇ naˇ, yawˬ ha-euˬ k'aˬ dzeˇ zaˬ-ahˇ bahˬ-eu jeˬ mˇ-euˬ meh." 13Tsawˇ haˬ tiˬ paˆ na deuˬ, Yeˬsuˇ neh aˬ la ̭ bi ba ̭ daˆ-eu g'aˇ duˬ zaˬ yaw nyiˇ deuˬ sheuˬ-awˇ Yeˬsuˇ jawˇ gaˇ laˇ-euˬ meh. Ehˇ k'aw ̭, zaˬ sheuˬ ha laˇ-euˬ tsawˇ haˬ k'oeˇ deuˬ-ahˇ zaˬ lahˇ deuˬ neh dehˬ-euˬ meh. 14K'oeˇ lo ̭-ehˇ dehˬ gaˇ Yeˬsuˇ ya mawˇ ngeh, nui ma pehˇ laˇ-awˇ, zaˬ lahˇ deuˬ-ahˇ heu lo ̭-ehˇ ehˇ nehˬ-euˬ meh. "Zaˬ deuˬ-ahˇ maˬ laˆ tsoeˬ ni ngaˇ jawˇ gaˇ bi laˇ-awˬ. Aˬ jeˬ miˇ neh ehˇ naˇ, Miˬyehˇ Miˇk'ahˬ-aˬ, aˬ yaw ̭ ma ̭ lo ̭-ehˇ g'eh-eu deuˬ-ahˇ o ̭-eu meh. 15Zaˬ yaw nyiˇ tiˬ g'aˬ lo ̭-ehˇ Miˬyehˇ Miˇk'ahˬ-ahˇ maˬ ha geu ̭-eu tsawˇ haˬ aˬ geu g'aˬ maˬ kaˬ, k'oeˇ gaˇ maˬ ya uˇ leˇ-aˇ lehˇ, naw ma ̭-ahˇ ngaˇ maˇ jawˆ ni ehˇ-eu ma." 16K'oeˇ naˇ, zaˬ yaw nyiˇ k'oeˇ deuˬ-ahˇ aˬ yaw ̭ ciˬ-awˇ, aˬ yaw ̭ ma ̭ k'oeˇ taˆ aˬ la ̭ ba ̭ daˆ-awˇ guiˬ lahˬ shaˇ nehˬ-euˬ meh. 17Yeˬsuˇ gaˇ ma doˆ-iˇ-eu lehˇ luˆ-iˇ ngeh, tsawˇ haˬ tiˬ g'aˬ cehˆ g'eh la ̭-awˇ, aˬ yaw ̭-euˬ mehˬ shi pawˬ tsui ̭ pawˬ dmˬ dmˬ-awˇ ehˇ-eu, "Muiˬ-eu saˬ laˬ-oˇ, mˬ maˬ maˬ byaˆ zaˇ ziˇ deh ̭-eu jeˬ-ahˇ za nya ni, ngaˇ aˬ geu jeˬ ya mˇ ta." 18Yeˬsuˇ ehˇ-eu, "Aˬ jeˬ miˇ neh nawˇ ngaˬ-ahˇ muiˬ-eu g'aˬ lehˇ kuˇ te. Miˬyehˇ maˬ ngeuˇ naˇ, yaw muiˬ tiˬ g'aˬ-iˬ maˬ jawˇ-a. 19Zahˇ dawˬ k'o ̭ dawˬ heu deuˬ-ahˇ nawˇ siˬ nya meh. 'Tsawˇ haˬ taˬ seh ̭. Aˬ cawˬ-euˬ miˬ zaˬ yo zaˬ-ahˇ taˬ bahˬ taˬ muˆ. Smˇ k'oeˬ taˬ k'oeˬ. Aˬ cawˬ gaˇ kawˆ maˬ ngeuˇ gaˇ keuˆ ni saˇ kiˇ taˬ kamˬ. Jaˬ myaw ̭ taˬ myaw ̭. Yawˬ ha-euˬ aˬ da aˬ ma-ahˇ yaw zeu baw-awˬ' lehˇ ehˇ taˬ-euˬ meh." 20Tsawˇ haˬ k'oeˇ g'aˬ ehˇ-eu, "Saˬ laˬ-oˇ, zahˇ dawˬ k'o ̭ dawˬ heu deuˬ dawˬ tawˆ lu ̭-ahˇ, nyiˇ ngeh neh ngaˇ naˇ haˬ geu ̭-euˬ ma." 21Yeˬsuˇ aˬ yaw ̭-ahˇ g'awˬ shaˬ haw gaˬ-awˇ ehˇ-eu, "Nawˇ tiˬ jeˬ loˬ nga siˬ. Nawˇ k'aˇ jaˆ-eu jeˬ dawˬ tawˆ lu ̭ ahˬ-iˇ-awˇ, ahˬ za-euˬ pyuˇ k'oeˇ, shaˬ zaˬ zahˬ zaˬ deuˬ-ahˇ bi ̭-awˬ. Mˬ k'oeˇ taˆ nawˬ-euˬ pyuˇ shuiˇ myawˬ gahˬ jaˆ laˇ teh ̭-a. K'oeˇ naˇ, g'o ̭ k'o ̭ laˇ-awˇ, ngaˬ-euˬ meh nah caw teh laˇ-awˬ." 22Dawˬ k'oeˇ dawˬ-ahˇ tsawˇ haˬ k'oeˇ g'aˬ ya gaˬ ngeh, myaˆ pyawˬ nyoeˬ-iˇ-awˇ, nui ma maˬ saˇ ni g'o ̭-iˇ-euˬ meh. Aˬ jeˬ miˇ neh ehˇ naˇ, aˬ yaw ̭ smˇ muiˬ muiˬ dui dui-eu meh. 23Yeˬsuˇ aˬ yaw ̭-euˬ zaˬ lahˇ deuˬ jawˇ paw ciˬ pyawˇ-awˇ ehˇ-eu, "Smˇ muiˬ smˇ baw deuˬ Miˬyehˇ Miˇk'ahˬ-ahˇ uˇ leˇ-eu aˇ naˆ ni shaˬ-eu nga." 24Dawˬ k'oeˇ dawˬ-ahˇ ya gaˬ ngeh, zaˬ lahˇ deuˬ tsoˆ leˇ jiˇ-euˬ meh. Ehˇ k'aw ̭, Yeˬsuˇ paˇ ehˇ-eu, "Ngaˬ-euˬ zaˬ deuˬ-oˇ, Miˬyehˇ Miˇk'ahˬ-ahˇ uˇ leˇ-eu aˇ naˆ ni shaˬ-eu nga. 25Smˇ muiˬ smˇ baw tiˬ g'aˬ Miˬyehˇ Miˇk'ahˬ-ahˇ uˇ leˇ-eu-aˬ, law taw tiˬ mawˇ aˬ g'aw ̭ g'aw ̭ naˬ-ahˇ uˇ leˇ-eu naˆ maˬ tseˇ k'aˆ dzehˬ-eu meh." 26Dawˬ k'oeˇ dawˬ-ahˇ aˬ yaw ̭ ma ̭ zahˬ dui dui leˇ-awˇ tiˬ g'aˬ tiˇ g'aˬ ehˇ-eu, "Toˆ-ehˇ ngeuˇ naˇ, ka k'o ̭-eu jeˬ-ahˇ za nya-eu tsawˇ haˬ aˬ suˇ g'aˬ jawˇ nmˇ." 27Yeˬsuˇ aˬ yaw ̭ ma ̭-ahˇ haw tsoˆ-awˇ ehˇ nehˬ-eu, "Heu-aˬ, tsawˇ haˬ zaˬ jahˇ nya-eu jeˬ maˬ ngeuˇ-a. Ehˇ k'aw ̭, Miˬyehˇ jahˇ nya meh. Miˬyehˇ maˬ jahˇ nya-eu tiˬ jeˬ-iˬ maˬ baw-a." 28K'oeˇ ngeh, Beˬtuˆluˆ dawˬ ngehˬ laˇ-awˇ ehˇ-eu, "Haw sheˇ. Nga ma ̭ k'aˇ jaˆ-eu yawˬ jeˬ na lu ̭ byehˇ dzeh ya ̭ jiˇ-awˇ, nawˬ-euˬ mehˬ nah caw teh laˇ-euˬ maˬ ngeuˇ nga loˇ." 29Yeˬsuˇ aˬ yaw ̭ ma ̭-ahˇ ehˇ nehˬ-eu, "Ngaˇ naw ma ̭-ahˇ maˇ jawˆ ni heu lo ̭-ehˇ ehˇ-eu ma. Ngaˬ-euˬ g'aˇ duˬ hawˇ-eu Laˬ k'aˬ cehˇ-eu Guiˬ lahˬ dawˬ g'aˇ duˬ, yaw ̭ ha-euˬ nymˇ, mehˇ nmˇ, dmˇ ma, aˬ da, aˬ ma, aˬ buˇ aˬ li, myawˬ dahˬ yaˇ dahˬ, heu deuˬ-ahˇ byehˇ dzeh ya ̭-euˬ tsawˇ haˬ aˬ geu g'aˬ maˬ kaˬ, 30nymˬ-mˇ deh ̭ lu ̭-eu heu ziˇ la ̭ k'oeˇ, nymˇ, mehˇ nmˇ, dmˇ ma, aˬ ma, aˬ buˇ aˬ li, myawˬ dahˬ yaˇ dahˬ heu deuˬ, tiˬ yaˇ bymˇ paˇ za k'o ̭ teh ̭-a. K'oeˇ nehˬ-ehˇ tiˬ kawˆ lo ̭-ehˇ, k'ehˬ-eu k'aˆ-eu jeˬ-ahˇ k'aw ̭ ya daˬ teh ̭-a. Aˬ kaˇ kaˇ ziˇ la ̭ k'oeˇ, mˬ maˬ maˬ byaˆ zaˇ ziˇ deh ̭-eu jeˬ-ahˇ za teh ̭-a. 31Ehˇ k'aw ̭, nymˬ-mˇ aˬ cawˬ-euˬ mehˬ hu jawˇ lu ̭-eu tsawˇ haˬ g'awˬ mya ni aˬ cawˬ-euˬ mehˬ nah ya jawˇ-awˇ, nymˬ-mˇ aˬ cawˬ-euˬ mehˬ nah jawˇ lu ̭-eu tsawˇ haˬ g'awˬ mya ni aˬ cawˬ-euˬ mehˬ hu ya jawˇ teh ̭-a." 32Yeˬsuˇ hawˇ-eu a yaw ̭-euˬ zaˬ lahˇ deuˬ Yeˬluˇsaˬlehˬ meuˬ-ahˇ le-eu lehˇ, gaˇ pehˇ le lu ̭-eu meh. Yeˬsuˇ mehˬ hu paw cah-awˇ, jeˬ nah paw cah lu ̭-eu zaˬ lahˇ deuˬ-aˬ, k'ahˬ lahˇ lahˇ-ehˇ caw teh lu ̭-eu meh. Naˇ k'ah paw cah lu ̭-eu tsawˇ haˬ deuˬ-aˬ, guˆ-eu meh. Zaˬ lahˇ deuˬ-ahˇ Yeˬsuˇ tiˬ poˆ paˇ sheuˬ ceuˆ g'eh-awˇ, aˬ yaw ̭-euˬ k'oeˇ taˆ keuˆ le-eu lehˇ g'eh-eu jeˬ dzawˇ nehˬ-euˬ meh. 33"Naˇ haˬ sheˇ. Aˬ dui ma ̭ Yeˬluˇsaˬlehˬ meuˬ-ahˇ le lu ̭-eu ma. K'oeˇ gaˇ, Tsawˇhaˬ-euˬ Zaˬmaˇ-ahˇ, piˇ ma aˬ yui ̭ deuˬ hawˇ-eu Zahˇ dawˬ k'o ̭ dawˬ mehˬ-eu saˬ laˬ deuˬ-euˬ aˬ la ̭ la ̭ k'oeˇ aˬ cawˬ a nehˬ-awˇ, aˬ yaw ̭ ya shiˇ ni aˬ yaw ̭ ma ̭ yaˇ k'aˬ daˇ teh ̭-a. K'oeˇ naˇ, Miˬyehˇ-ahˇ maˬ siˬ nya-eu aˬ cawˬ tsawˇ jeuˬ-euˬ la ̭-ahˇ a nehˬ teh ̭-a. 34Aˬ cawˬ tsawˇ jeuˬ neh aˬ yaw ̭-ahˇ yehˬ bawˬ sehˇ lu-ehˇ bi ehˇ niˇ g'a-awˇ, duˬ k'aˬ bi k'a daˆ-awˇ, yahˬ caˆ neh bi jui ̭-awˇ, bi seh ̭ teh ̭-a. Ehˇ k'aw ̭, smˬ nah byah laˇ naˇ, Miˬyehˇ aˬ yaw ̭-ahˇ paˇ bi g'o ̭ deh ̭ laˇ teh ̭-a." 35K'oeˇ naˇ, Zeˬbeˬdehˇ-euˬ aˬ li Yaˬkoˆ hawˇ-eu Yoˇhaˬ aˬ nya ̭ nmˇ Yeˬsuˇ jawˇ gaˇ laˇ-awˇ ehˇ-eu, "Saˬ laˬ-oˇ, nga nya ̭ nmˇ g'aˇ duˬ nawˬ neh heu lo ̭-ehˇ bi jahˇ nehˬ maw ̭ nya." 36Yeˬsuˇ aˬ nya ̭ nmˇ-ahˇ ehˇ nehˬ-eu, "Naw nya ̭ nmˇ g'aˇ duˬ aˬ jeˬ bi jahˇ nehˬ maw ̭-eu nya." 37Aˬ nya ̭ nmˇ ehˇ-eu, "Yaw sheh ̭ k'ahˬ sehˇ huiˬ-eu Miˇ k'ahˬ la ̭ k'oeˇ, nawˬ-euˬ dzoeˬ dzaˬ nuiˇ mahˬ k'oeˇ taˆ nawˇ nuiˇ ngeh, nga nya ̭ nmˇ-ahˇ nawˬ-euˬ aˇ maˇ paw tiˬ g'aˬ hawˇ-eu, aˇ caˇ paw tiˬ g'aˬ bi nuiˇ la ̭." 38Aˬ nya ̭ nmˇ-ahˇ Yeˬsuˇ ehˇ-eu, "Naw nya ̭ nmˇ shaˇ lu ̭-eu jeˬ-ahˇ naw nya ̭ nmˇ maˬ siˬ nya-a. Ngaˇ ya dawˇ-eu shaˬ zahˬ na ̭-eu k'mˬ maˬ-ahˇ naw nya ̭ nmˇdawˇ coeˇ ma loˇ. Ngaˇ baˇ tiˇ saˬ kamˬ-euˬ jeˬ-ahˇ naw nya ̭ nmˇ kamˬ coeˇ ma loˇ." 39Aˬ nya ̭ nmˇ ehˇ-eu, "Kamˬ coeˇ ma." Yeˬsuˇ ehˇ-eu, "Ngaˇ ya dawˇ-eu k'mˬ maˬ-ahˇ naw nya ̭ nmˇ aˬ diˇ aˬ maˇ dawˇ-awˇ, ngaˬ neh baˇ tiˇ saˬ kamˬ-euˬ jeˬ naw nya ̭ nmˇ aˬ diˇ aˬ maˇ kamˬ teh ̭-a. 40Ehˇ k'aw ̭, ngaˬ-euˬ aˇ maˇ paw hawˇ-eu aˇ caˇ paw bi nuiˇ-eu tsawˇ haˬ-ahˇ ngaˇ tseˇ geu ̭-eu a kawˬ-aˬ maˬ jaˆ. Nuiˇ duˬ k'oeˇ deuˬ-aˬ, Miˬyehˇ neh bi nuiˇ-eu lehˇ lehˬ hmˬ taˬ-euˬ tsawˇ haˬ deuˬ g'aˇ duˬ meh." 41K'oeˇ lo ̭-ehˇ ehˇ gaˇ zaˬ lahˇ nui deuˬ tseˇ g'aˬ ya gaˬ ngeh, Yaˬkoˆ hawˇ-eu Yoˇhaˬ aˬ nya ̭ nmˇ-ahˇ nui ma pehˇ-euˬ meh. 42K'oeˇ miˇ neh, aˬ yaw ̭ ma ̭ dawˬ tawˆ lu ̭-ahˇ Yeˬsuˇ kuˇ uiˬ-awˇ, heu lo ̭-ehˇ ehˇ nehˬ-euˬ meh. "Aˬ cawˬ tsawˇ jeuˬ-euˬ sahˬ paˬ sahˬ ma deuˬ-aˬ, miˇ k'ahˬ zaˬ deuˬ k'oeˇ taˆ zuiˆ-eu baoˬ jaˆ-awˇ, aˬ yui ̭ aˬ tsu geu ̭-awˇ uˆ lahˇ-eu deuˬ k'aw ̭, yawˬ ha k'aˇ noeˬ-euˬ lo ̭-ehˇ uˆ lah nya-eu baoˬ tiˬ byah jaˆ meh. 43Ehˇ k'aw ̭, naw ma ̭ k'oeˇ lo ̭-ehˇ maˬ ya geu ̭-a. Naw ma ̭ la ̭ k'oeˇ, aˬ cawˬ naˆ maˬ tseˇ huiˬ maw ̭ mahˇ maw ̭-eu g'aˬ-aˬ, aˬ cawˬ-euˬ myawˬ k'ehˇ ya g'oˆ teh ̭-a. 44Naw ma ̭ la ̭ k'oeˇ, aˬ cawˬ mehˬ hu jawˇ maw ̭-eu g'aˬ-aˬ, aˬ cawˬ-euˬ zaˬ k'aˆ ya geu ̭ teh ̭-a. 45Aˬ jeˬ miˇ neh ehˇ naˇ, Tsawˇhaˬ-euˬ Zaˬmaˇ k'aw ̭, aˬ cawˬ neh bi mˇ cu-eu lehˇ oe-euˬ maˬ ngeuˇ-a. Aˬ cawˬ g'aˇ duˬ mˇ le-euˬ uˬ ta ̭, tsawˇ haˬ g'awˬ mya ni-ahˇ ka k'o ̭-eu g'aˇ duˬ shiˇ dah-eu lehˇ oe-euˬ meh." 46Aˬ yaw ̭ ma ̭ Yeˬliˇkoˇ meuˬ-ahˇ iˇ keuˆ-euˬ meh. K'oeˇ naˇ, Yeˬsuˇ hawˇ-eu aˬ yaw ̭-euˬ zaˬ lahˇ deuˬ tsawˇ haˬ aˇ ma ̭ ma ̭ ma nehˬ-ehˇ, Yeˬliˇkoˇ meuˬ-ahˇ neh paˆ doˆ-iˇ lu ̭ ngeh, Tiˇmehˇ-euˬ aˬ li pyeu ̭-eu Baˬtiˇmehˇ lehˇ myahˇ-euˬ myaˆ beh ̭ beh ̭-eu hawˬ shaˇ shaˇ-eu tsawˇ ha tiˬ g'aˬ, gaˇ ma gaˇ dzeˇ nuiˇ lu ̭-eu meh. 47K'oeˇ gaˇ iˇ lu ̭-eu k'oeˇ g'aˬ Naˬzaˬlehˇ tsawˇ haˬ Yeˬsuˇ pyeu ̭-eu gaˇ kawˆ aˬ yaw ̭ ya gaˬ ngeh, aˬ yaw ̭ guˇ-awˇ ehˇ-eu, "Daˬbiˇ-euˬ Zaˬmaˇ Yeˬsuˇ-oˇ, ngaˬ-ahˇ g'awˬ shaˬ gaˬ nehˬ la ̭-awˬ." 48Aˬ cawˬ g'awˬ mya ni aˬ yaw ̭-ahˇ dehˬ-awˇ, ciˬ cuˇ ni jawˇ-awˬ lehˇ ehˇ nehˬ-euˬ meh. Ehˇ k'aw ̭, aˬ yaw ̭ maˬ naˇ haˬ ni, yaw beh naˆ maˬ tseˇ paˇ guˇ k'aˆ laˇ-awˇ ehˇ-eu, "Daˬbiˇ-euˬ Zaˬmaˇ-oˇ, ngaˬ-ahˇ g'awˬ shaˬ gaˬ nehˬ la ̭-awˬ." 49K'oeˇ ngeh, Yeˬsuˇ naˬ leˇ-awˇ, "Aˬ yaw ̭-ahˇ kuˇ la ̭-awˬ" lehˇ ehˇ nehˬ-euˬ meh. Aˬ yaw ̭ ma ̭ mya ̭ beh ̭ k'oeˇ g'aˬ-ahˇ kuˇ-awˇ ehˇ nehˬ-eu, "Laˬ k'aˬ cehˇ taˆ ni tuˇ-awˬ. Aˬ yaw ̭ nawˬ-ahˇ kuˇ lu ̭ ngaˇ." 50Tsawˇ haˬ k'oeˇ g'aˬ pehˇ k'ahˬ biˬ dzeh-awˇ, tsawˬ tuˇ-awˇ Yeˬsuˇ jawˇ gaˇ laˇ-euˬ meh. 51Yeˬsuˇ aˬ yaw ̭-ahˇ ehˇ nehˬ-eu, "Nawˬ-euˬ g'aˇ duˬ ngaˇ aˬ jeˬ bi jahˇ nehˬ maw ̭-eu nya." Myaˆ beh ̭ k'oeˇ g'aˬ ehˇ-eu, "Saˬ laˬ-oˇ, ngaˬ-euˬ myaˆ nuiˆ mawˇ laˇ ni bi jahˇ nehˬ maw ̭ miˇ-a." 52Yeˬsuˇ ehˇ-eu, "G'o ̭-iˇ-awˬ. Nawˬ-euˬ jah-eu nui ma neh nawˬ-ahˇ bi taˬ leˇ-euˬ meh." Tsawˇ haˬ k'oeˇ g'aˬ tiˬ poˆ teh ̭-ehˇ myaˆ nuiˆ mawˇ laˇ-awˇ, Yeˬsuˇ-euˬ mehˬ nah caw teh g'eh-euˬ meh.

will be added

X\