LUˇKA ̭ 8

1K'oeˇ naˇ, g'awˬ myahˇ maˬ g'eh-ehˇ, tiˬ meuˬ saˇ-iˬ tiˬ meuˬ, tiˬ pu saˇ-iˬ tiˬ pu, Yeˬsuˇ iˇ-awˇ, Miˬyehˇ Miˇk'ahˬ gaˇ kawˆ Laˬ k'aˬ cehˇ-eu Guiˬ lahˬ dawˬ mehˬ mehˬ-ehˇ cah-euˬ meh. Zaˬ lahˇ tseˇ nyi ̭ g'aˬ k'aw ̭, aˬ yaw ̭ nehˬ-ehˇ iˇ-euˬ meh. 2Zaˬ miˬ zaˬ tiˬ deuˬ k'aw ̭, aˬ yaw ̭ nehˬ-ehˇ iˇ-euˬ meh. Zaˬ miˬ zaˬ k'oeˇ deuˬ-aˬ, Yeˬsuˇ neh neh ̭ bi teh doˆ-euˬ deuˬ hawˇ-eu, naˇ gawˇ g'awˬ mya jeˬ bi laˆ taˬ-euˬ deuˬ pyeu ̭-eu meh. Aˬ yaw ̭ ma ̭-aˬ, neh ̭ shi ̭ mawˇ uˇ-eu bi teh doˆ-euˬ g'aˬ pyeu ̭-eu Maˬgaˬdaˬlaˇ lehˇ kuˇ-euˬ Maˬliˇ tiˬ g'aˬ, 3Heˬloˆ-euˬ saˇ naˇ-ahˇ gaˇ mˇ-eu Kuˇzaˬ-euˬ nymˇ dahˬ Yoˇaˬnaˆ tiˬ g'aˬ, Suˬsaˇnaˬ tiˬ g'aˬ hawˇ-eu, nui deuˬ g'awˬ mya g'aˬ meh. Zaˬ miˬ zaˬ k'oeˇ deuˬ-aˬ, yawˬ ha k'aˇ jaˆ-eu jeˬ yuˇ doˆ-awˇ, Yeˬsuˇ hawˇ-eu aˬ yaw ̭-euˬ zaˬ lahˇ deuˬ-ahˇ caw ba nehˬ-euˬ meh. 4Meuˬ tiˬ meuˬ saˇ-iˬ tiˬ meuˬ-ahˇ jawˇ-eu tsawˇ haˬ deuˬ Yeˬsuˇ jawˇ gaˇ laˇ-awˇ, tsawˇ haˬ aˇ ma ̭ ma ̭ ma uiˬ laˇ ngeh, Yeˬsuˇ yaw jeˬ ma jeˬ heu hmˬ ja mehˬ nehˬ-euˬ meh. 5"Tiˬ poˆ-aˬ, tsawˇ haˬ tiˬ g'aˬ siˬ yoeˬ sehˬ-iˇ-euˬ meh. Aˬ yaw ̭ siˬ yoeˬ sehˬ ngeh, siˬ yoeˬ tiˬ paˆ na deuˬ gaˇ ma-ahˇ ga-iˇ-awˇ, aˬ cawˬ neh bi nawˬ-euˬ uˬ ta ̭, k'oeˇ taˆ zaw-eu aˇ jiˇ deuˬ neh bi g'oˆ dzaˬ jiˇ-euˬ meh. 6Siˬ yoeˬ tiˬ paˆ na deuˬ-aˬ, k'aˬ lo lo yaˇ-ahˇ ga-iˇ-awˇ, deh ̭ laˇ-euˬ meh. Ehˇ k'aw ̭, miˇ tsaˬ yaw gui miˇ neh, nyoeˬ-iˇ koˆ-iˇ-euˬ meh. 7Siˬ yoeˬ tiˬ paˆ na deuˬ-aˬ, aˬ gah gah yaˇ-ahˇ ga-iˇ-awˇ, aˬ gah baw duˆ neh bi uˆ tehˬ-euˬ meh. 8Siˬ yoeˬ tiˬ paˆ na deuˬ-aˬ, miˇ tsaˬ miˇ muiˬ muiˬ gaˇ ga-iˇ-awˇ, muiˬ le loˆ le-euˬ miˇ neh, tiˬ yaˇ bymˇ za le-euˬ meh." Yeˬsuˇ teˇ saˇ ui cuiˆ yaw k'aˆ-ehˇ guˇ-awˇ ehˇ-eu, "Naˬ bawˇ k'aˇ tso ̭-eu deuˬ naˇ haˬ-awˬ." 9Yaw jeˬ ma jeˬ k'oeˇ hmˬ-euˬ dawˬ tsui ̭, Yeˬsuˇ-ahˇ zaˬ lahˇ deuˬ naˇ haˬ-euˬ meh. 10Yeˬsuˇ aˬ yaw ̭ ma ̭-ahˇ ehˇ nehˬ-eu, "Miˬyehˇ Miˇk'ahˬ gaˇ kawˆ aˬ cawˬ maˬ g'oˆ shaw nya-eu za ̭ taˬ-euˬ jeˬ-ahˇ g'oˆ shaw nya-eu tsawˇ gahˇ deuˬ, naw ma ̭-ahˇ bi ̭ taˬ g'aˬ-euˬ meh. Ehˇ k'aw ̭, nui deuˬ-aˬ, ya mawˇ-euˬ k'aw ̭ maˬ siˬ nya-ehˇ, ya gaˬ-euˬ k'aw ̭ maˬ g'oˆ shaw nya-eu miˇ neh, yaw jeˬ ma jeˬ ja-awˇ ya mehˬ nehˬ-eu meh. 11"Yaw jeˬ ma jeˬ heu hmˬ-euˬ dawˬ tsui ̭-aˬ, heu lo ̭-ehˇ meh. Siˬ yoeˬ-aˬ, Miˬyehˇ-euˬ dawˬ meh. 12Gaˇ ma-ahˇ ga-iˇ-euˬ siˬ yoeˬ lehˇ ehˇ-eu-aˬ, Miˬyehˇ-euˬ dawˬ kawˬ-ahˇ ya gaˬ-euˬ k'aw ̭, Neh ̭sahˬpaˬ oe-awˇ, aˬ yaw ̭ ma ̭-euˬ nui ma la ̭ k'oeˇ ahˇ-eu dawˬ k'oeˇ yuˇ doˆ g'eh-euˬ miˇ neh, aˬ yaw ̭ ma ̭ maˬ jah-ehˇ, ka k'o ̭-eu jeˬ maˬ za-eu tsawˇ haˬ deuˬ-ahˇ ehˇ maw ̭-eu meh. 13K'aˬ lo lo yaˇ-ahˇ ga-iˇ-euˬ siˬ yoeˬ lehˇ ehˇ-eu-aˬ, Miˬyehˇ-euˬ dawˬ kawˬ ya gaˬ ngeh, laˬ k'aˬ tiˬ cehˇ ha geu ̭-euˬ k'aw ̭, duˬ ciˇ maˬ toeˬ zi ̭ nya-eu miˇ neh, tiˬ k'ehˇ laˇ k'ehˬ teh ̭-ehˇ jah-awˇ, muˇ juˇ juˇ-eu jeˬ keuˆ le ngeh, coˬ-iˇ-eu meh. 14Aˬ gah gah yaˇ-ahˇ ga-iˇ-euˬ siˬ yoeˬ lehˇ ehˇ-eu-aˬ, Miˬyehˇ dawˬ kawˬ-ahˇ ya gaˬ-euˬ k'aw ̭, shiˬ shaˬ jiˇ-ahˇ ta ̭-eu k'ahˬ lahˇ-eu nui ma, pyuˇ shuiˇ myawˬ gahˬ-ahˇ gaˬ-eu nui ma hawˇ-eu, byawˬ g'a mo g'a gaˇ gaˬ-eu nui k'ahˇ neh bi uˆ tehˬ-awˇ, aˇ siˬ maˬ siˬ le nya-eu tsawˇ haˬ deuˬ-ahˇ ehˇ maw ̭-eu meh. 15Miˇ tsaˬ miˇ muiˬ muiˬ gaˇ ga-iˇ-euˬ siˬ yoeˬ lehˇ ehˇ-eu-aˬ, Miˬyehˇ dawˬ kawˬ-ahˇ ya gaˬ ngeh, dawˇ coe ni g'eh-eu muiˬ-eu jaˬ-eu nui ma la ̭ k'oeˇ jeˬ hmˬ taˬ-awˇ, aˇ siˬ siˬ le ngeh keuˆ ni dawˬ k'oeˇ deuˬ-ahˇ zi ̭ dah ni nyeh ̭ tehˬ taˬ-eu tsawˇ haˬ deuˬ-ahˇ ehˇ maw ̭-eu meh. 16"Tsawˇ haˬ tiˬ g'aˬ-iˬ tsiˇ k'mˬ do ̭-awˇ k'aˆ puˬ neh maˬ mo ̭ tsahˬ-aˇ. Jaˆ ciˬ uˬ moˆ k'aw ̭ maˬ ciˬ taˬ-aˇ. Ehˇ k'aw ̭, k'aˇ uˇ laˇ-eu tsawˇ haˬ deuˬ mawˇ nya ni, ciˇ k'mˬ do ̭ taˬ duˬ-ahˇ ciˬ daˆ taˬ teh ̭-a. 17"K'aˇ za ̭ taˬ-euˬ yawˬ jeˬ na lu ̭, bya cehˆ ni g'eh gaˇ yuˇ doˆ la ̭-awˇ, k'aˇ dehˬ kaˬ taˬ-euˬ yawˬ jeˬ na lu ̭ mawˇ awˇ, yaw bya-ahˇ yuˇ doˆ la ̭ teh ̭-a. 18"Naw ma ̭ ya gaˬ-euˬ gaˇ kawˆ heu-ahˇ yaw muiˬ paˬ-ehˇ noeˬ gahˇ-awˬ. Aˬ jeˬ miˇ neh ehˇ naˇ, jaˆ-eu tsawˇ haˬ-ahˇ paˇ bi ̭ lahˬ nehˬ-awˇ, maˬ jaˆ-eu tsawˇ haˬ-ahˇ-aˬ, yawˬ ha neh jaˆ ma lehˇ k'aˇ noeˬ taˬ-euˬ dawˬ tawˆ lu ̭ yuˇ jiˇ nehˬ teh ̭-a." 19Yeˬsuˇ-euˬ aˬ ma hawˇ-eu mehˇ nmˇ deuˬ aˬ yaw ̭ jawˇ gaˇ oe keuˆ-euˬ meh. Ehˇ k'aw ̭, tsawˇ haˬ tiˬ teuˇ jawˇ-eu miˇ neh, aˬ yaw ̭ jawˇ gaˇ maˬ jiˆ peh leˇ nya-a. Aˬ cawˬ Yeˬsuˇ-ahˇ ehˇ nehˬ-eu, 20"Nawˬ ma hawˇ-eu nawˬ-euˬ mehˇ nmˇ deuˬ nawˬ-ahˇ dawˬ ngehˬ cawˬ maw ̭ nya lehˇ, la ̭ nyiˇ yaw ̭ lu ̭ meh." 21Yeˬsuˇ aˬ yaw ̭ ma ̭-ahˇ ehˇ nehˬ-eu, "Miˬyehˇ dawˬ kawˬ-ahˇ gaˬ-awˇ naˇ haˬ geu ̭-eu tsawˇ haˬ deuˬ-aˬ, ngaˬ ma hawˇ-eu ngaˬ-euˬ mehˇ nmˇ pyeu ̭-eu ma." 22Tiˬ nah-aˬ, Yeˬsuˇ aˬ yaw ̭-euˬ zaˬ lahˇ deuˬ nehˬ-ehˇ lawˬ-ahˇ dziˬ-awˇ, "Lah nui baˬ-ahˇ tsehˆ-iˇ kaˇ-euˇ" lehˇ ehˇ-awˇ iˇ-euˬ meh. 23Aˬ yaw ̭ ma ̭ lawˬ dziˬ-awˇ iˇ lu ̭ ngeh, Yeˬsuˇ yu ̭ k'aˆ-euˬ meh. Ja pyuˬ ni, lah k'oeˇ taˆ jaˬ lehˇ lehˇ ma baw g'eh le ̭-awˇ, lawˬ la ̭ k'oeˇ iˇ cu ̭ dahˬ byah laˇ lu ̭-eu miˇ neh, aˬ yaw ̭ ma ̭ ga nui ̭-iˇ paˬ-ehˇ pyeu ̭ laˇ taˬ-euˬ meh. 24Aˬ yaw ̭ ma ̭ Yeˬsuˇ-ahˇ laˆ noeˬ-iˇ-awˇ, "Saˬ laˬ-oˇ, saˬ laˬ-oˇ, nga ma ̭ ya shiˇ jiˇ-eu keuˆ le-euˬ miˇ-a" lehˇ ehˇ nehˬ-euˬ meh. K'oeˇ ngeh, aˬ yaw ̭ noeˬ laˇ-awˇ, jaˬ lehˇ hawˇ-eu iˇ luˆ dzeh gaˇ dehˬ ngeh, naˬ leˇ jiˇ-awˇ, ciˬ cuˇ ni pyeu ̭-iˇ-euˬ meh. 25"Naw ma ̭-euˬ jah-eu nui ma aˬ lehˬ" lehˇ, aˬ yaw ̭ ma ̭-ahˇ aˬ yaw ̭ dehˬ-euˬ meh. K'oeˇ ngeh, aˬ yaw ̭ maˬ guˆ-awˇ zahˬ leˇ-eu la ̭ k'oeˇ, tiˬ g'aˬ tiˇ g'aˬ ehˇ-eu, "Tsawˇ haˬ heu g'aˬ aˬ suˇ g'aˬ nga. Jaˬ lehˇ hawˇ-eu iˇ cu ̭-ahˇ aˬ yaw ̭ dawˬ bi ̭ ngeh, aˬ yaw ̭-euˬ dawˬ-ahˇ naˇ haˬ-eu nga." 26Yeˬsuˇ hawˇ-eu aˬ yaw ̭-euˬ zaˬ lahˇ deuˬ, Gaˬliˬlehˇ miˇ k'ahˬ-euˬ nui baˬ paw jaˆ-eu Geˬlaˬsaˬ miˇ k'ahˬ -ahˇ lawˬ dziˬ-awˇ iˇ-euˬ meh. 27Aˬ yaw ̭ lawˬ la ̭ k'oeˇ neh lawˇ dzeˇ-ahˇ doˆ leˇ-eu nehˬ-ehˇ, meuˬ k'oeˇ meuˬ-ahˇ jawˇ-eu neh ̭ uˇ-eu tsawˇ haˬ tiˬ g'aˬ-ahˇ tahˬ puˬ-euˬ meh. Tsawˇ haˬ k'oeˇ g'aˬ mehˬ tsoeˬ maˬ dm-ehˇ, iˇ kahˇ-ahˇ maˬ jawˇ ni, lmˬ bymˇ lo k'ahˬ-ahˇ teh ̭-ehˇ jawˇ lu ̭-eu myahˇ dui dui laˇ-euˬ meh. 28Tsawˇ haˬ k'oeˇ g'aˬ Yeˬsuˇ-ahˇ ya mawˇ ngeh, guˇ guˇ-ehˇ Yeˬsuˇ-euˬ mehˬ shi ga byaˆ-awˇ, "Huiˬ dui Mahˇ dui dui-eu Miˬyehˇ-euˬ Zaˬmaˇ pyeu ̭-eu Yeˬsuˇ-oˇ, nawˇ ngaˬ-ahˇ aˬ jeˬ ta ̭ te. Ngaˬ-ahˇ taˬ k'ehˬ taˬ k'aˆ nehˬ la ̭ lehˇ nawˬ-ahˇ shaˇ-eu ma" lehˇ, guˇ guˇ-ehˇ ehˇ-eu meh. 29Neh ̭ yaw jaw ̭ k'oeˇ mawˇ-ahˇ tsawˇ haˬ k'oeˇ g'aˬ la ̭ k'oeˇ neh doˆ-iˇ-eu g'aˇ duˬ Yeˬsuˇ dawˬ bi ̭-euˬ miˇ neh, aˬ yaw ̭ k'oeˇ lo ̭-ehˇ ehˇ-eu meh. Aˬ yaw ̭-ahˇ shmˇ caˆ neh kuiˇ cu ̭ la ̭ cu ̭ cu ̭-awˇ pa ̭ taw ̭ taˬ-euˬ k'aw ̭, neh ̭ k'oeˇ mawˇ aˬ yaw ̭ la ̭ k'oeˇ tiˬ k'ehˬ maˬ taˬ ni uˇ le ngeh, shmˇ caˆ k'oeˇ deuˬ teuˆ tsehˆ jiˇ-awˇ, neh ̭ k'oeˇ mawˇ neh bawˇ tsahˬ bawˇ dahˇ paw bi teh byoˆ g'eh-eu meh. 30"Nawˬ-euˬ tsawˇ myahˇ aˬ joˆ-ehˇ myahˇ teˬ" lehˇ Yeˬsuˇ naˇ haˬ ngeh, "Ngaˬ-euˬ tsawˇ myahˇ 'Yehˇ yehˇ ma ̭' lehˇ myahˇ-euˬ ma" lehˇ aˬ yaw ̭ ehˇ-eu meh. Neh ̭ g'awˬ mya ni aˬ yaw ̭ la ̭ k'oeˇ uˇ lu ̭-eu miˇ neh, aˬ yaw ̭ k'oeˇ lo ̭-ehˇ ehˇ-eu meh. 31Neh ̭ k'oeˇ deuˬ Yeˬsuˇ-ahˇ shaˇ-eu, "Na ̭ dui dui-eu shiˬ buiˇ lah ma -ahˇ taˬ bi uˇ-iˇ nehˬ la ̭." lehˇ, neh ̭ k'oeˇ deuˬ Yeˬsuˇ-ahˇ shaˇ-eu meh. 32Aˬ yaw ̭ ma ̭ jawˇ-eu dawˬ peh gawˬ jawˬ baˬ g'a-ahˇ, myaˬ dui dui-eu aˬ za ̭ tiˬ ma ̭ gaˆ lu ̭-eu meh. Aˬ za ̭ k'oeˇ ma ̭-euˬ la ̭ k'oeˇ bi uˇ-iˇ la ̭ lehˇ, neh ̭ k'oeˇ deuˬ Yeˬsuˇ-ahˇ shaˇ ngeh, aˬ yaw ̭ ma ̭-ahˇ aˬ za ̭ k'oeˇ deuˬ la ̭ k'oeˇ bi uˇ-iˇ-euˬ meh. 33Neh ̭ k'oeˇ deuˬ tsawˇ haˬ k'oeˇ g'aˬ-euˬ la ̭ k'oeˇ neh doˆ-iˇ-awˇ, aˬ za ̭ k'oeˇ deuˬ la ̭ k'oeˇ uˇ-iˇ-euˬ meh. K'oeˇ ngeh, aˬ za ̭ k'oeˇ ma ̭ ma ̭ lah-ehˇ, gawˬ jawˬ baˬ g'a g'a pya ̭-ahˇ sehˇ ka g'eh-awˇ, lah-ahˇ ga pu ̭ seh ̭ jiˇ-euˬ meh. 34Aˬ za ̭ bo lu ̭-eu tsawˇ haˬ deuˬ k'oeˇ gaˇ mawˇ ngeh, cehˆ coeˬ coeˬ k'o ̭ g'eh-awˇ, meuˬ doe pu doe ni gaˇ kawˆ k'oeˇ ja byah-iˇ-euˬ meh. 35Tsawˇ haˬ g'awˬ mya ni aˬ joˆ-ehˇ pyeu ̭ laˇ-euˬ gaˇ haw le-eu lehˇ oe-awˇ, Yeˬsuˇ-euˬ dawˬ peh oe keuˆ ngeh, neh ̭ bi teh doˆ-euˬ tsawˇ haˬ k'oeˇ g'aˬ paˇ muiˬ k'o ̭ laˇ-awˇ, mehˬ tsoeˬ yaw muiˬ-ehˇ dm-awˇ Yeˬsuˇ-euˬ aˬ kuiˇ dawˬ peh nuiˇ lu ̭ gaˇ ya mawˇ-euˬ miˇ neh, aˬ yaw ̭ ma ̭ guˆ dui dui-iˇ-euˬ meh. 36K'aˇ pyeu ̭ laˇ-euˬ jeˬ-ahˇ ya mawˇ-euˬ tsawˇ haˬ deuˬ neh, neh ̭ uˇ-eu tsawˇ haˬ k'oeˇ g'aˬ-ahˇ aˬ joˆ-ehˇ laˆ taˬ nehˬ-euˬ gaˇ kawˆ k'oeˇ, aˬ yaw ̭ ma ̭-ahˇ dzawˇ mehˬ nehˬ-euˬ meh. 37Miˇ k'ahˬ k'oeˇ k'ahˬ-ahˇ k'aˇ jawˇ-eu tsawˇ haˬ dawˬ tawˆ lu ̭ guˆ dui dui-awˇ, Yeˬsuˇ-ahˇ aˬ yaw ̭ ma ̭-euˬ miˇ k'ahˬ la ̭ k'oeˇ neh doˆ-iˇ nehˬ la ̭ lehˇ shaˇ-eu meh. K'oeˇ ngeh, Yeˬsuˇ lawˬ dziˬ-awˇ doˆ-iˇ-euˬ meh. 38Neh ̭ teh doˆ nehˬ-euˬ tsawˇ haˬ k'oeˇ g'aˬ Yeˬsuˇ-ahˇ ehˇ-eu, "Ngaˬ-ahˇ nawˬ nehˬ-ehˇ bi oe la ̭." Ehˇ k'aw ̭, Yeˬsuˇ aˬ yaw ̭-ahˇ heu lo ̭-ehˇ ehˇ nehˬ-awˇ bi g'o ̭-iˇ-euˬ meh. 39"Iˇ kahˇ-ahˇ g'o ̭-iˇ-awˇ, Miˬyehˇ neh nawˬ-ahˇ aˬ joˆ-ehˇ jahˇ nehˬ la ̭-euˬ gaˇ kawˆ ja mehˬ-iˇ-awˬ." K'oeˇ ngeh, tsawˇ haˬ k'oeˇ g'aˬ g'o ̭-iˇ-awˇ, aˬ yaw ̭ g'aˇ duˬ Yeˬsuˇ neh aˇ naˆ ni mˇ nehˬ-euˬ gaˇ kawˆ, meuˬ doe-iˇ ni dzawˇ gaˬ-euˬ meh. 40Yeˬsuˇ lah nui baˬ-ahˇ g'o ̭ keuˆ-iˇ ngeh, tsawˇ haˬ aˇ ma ̭ aˬ yaw ̭-ahˇ laˬ k'aˬ tiˬ cehˇ ha-euˬ meh. Aˬ jeˬ miˇ neh ehˇ naˇ, aˬ yaw ̭ ma ̭ aˬ yaw ̭-ahˇ dawˬ lu ̭ gaˇ tsaˬ leˇ-euˬ meh. 41K'oeˇ ngeh, Yaˬiˇluˆ lehˇ myahˇ-euˬ tsawˇ haˬ tiˬ g'aˬ oe keuˆ-euˬ meh. Aˬ yaw ̭-aˬ, Yuˇdaˆ tsawˇ haˬ-euˬ uˬ duˬ tahˬ nymˇ-ahˇ uˆ lahˇ-eu aˬ yui ̭ aˬ tsu tiˬ g'aˬ pyeu ̭-eu meh. Yeˬsuˇ-euˬ aˬ kuiˇ dawˬ peh awˆ byaˆ-awˇ, aˬ yaw ̭-euˬ iˇ kahˇ-ahˇ oe nehˬ la ̭ lehˇ shaˇ-eu meh. 42Aˬ jeˬ miˇ neh ehˇ naˇ, tseˇ nyi ̭ k'o ̭ k'awˆ laˇ-euˬ aˬ yaw ̭-euˬ aˬ buˇ shiˇ leˇ lu ̭-eu meh. Aˬ yaw ̭-aˬ, aˬ buˇ k'oeˇ buˇ jawˇ-eu teh ̭ meh. Yeˬsuˇ k'oeˇ gaˇ iˇ lu ̭ ngeh, tsawˇ haˬ aˇ ma ̭ aˬ yaw ̭ jawˇ gaˇ tah uˇ laˇ lu ̭-eu meh. 43Tseˇ nyi ̭ k'o ̭ keuˆ ni shiˬ doˆ-eu naˇ gawˇ-ahˇ maˬ tsehˆ leˇ ni ya daˬ lu ̭-eu zaˬ miˬ zaˬ tiˬ g'aˬ jawˇ-eu meh. Aˬ yaw ̭ k'aˇ jaˆ-eu jeˬ dawˬ tawˆ lu ̭ ahˬ dzeh jiˇ-awˇ, jaˆ g'aˬ yaˇ-eu saˬ laˬ g'oˬ deuˬ neh bi yaˇ-euˬ k'aw ̭, tiˬ g'aˬ-iˬ maˬ yaˇ taˬ nehˬ nya-a. 44Aˬ yaw ̭ Yeˬsuˇ-euˬ mehˬ nah miˇ ni caw teh leˇ-awˇ, Yeˬsuˇ-euˬ pehˇ k'ahˬ pehˇ dahˬ-ahˇ toeˬ ciˆ ngeh, aˬ yaw ̭ shiˬ doˆ-eu tiˬ poˆ teh ̭-ehˇ tsiˇ leˇ-euˬ meh. 45K'oeˇ ngeh, "Ngaˬ-ahˇ toeˬ ciˆ-euˬ aˬ suˇ g'aˬ-a" lehˇ Yeˬsuˇ ehˇ-eu meh. Tsawˇ haˬ tiˬ g'aˬ-iˬ Yeˬsuˇ-ahˇ toeˬ ciˆ-euˬ ma lehˇ maˬ ehˇ-a. Beˬtuˆluˆ ehˇ-eu, "Sahˬpaˬ-oˇ, nawˬ-euˬ tiˬ jawˬ tsawˇ haˬ tiˬ teuˇ jawˇ-awˇ, nawˇ jawˇ gaˇ tah uˇ laˇ lu ̭ nga tawˇ." 46Ehˇ k'aw ̭, Yeˬsuˇ ehˇ-eu, "Tsawˇ haˬ tiˬ g'aˬ ngaˬ-ahˇ toeˬ ciˆ-euˬ meh. Aˬ jeˬ miˇ neh ehˇ naˇ, ngaˬ-euˬ la ̭ k'oeˇ ahˇ-eu baoˬ doˆ-iˇ-euˬ ngaˬ-ahˇ siˬ laˇ nya." 47Gaˇ kawˆ k'oeˇ maˬ paˇ za ̭ taˬ nya ngaˇ lehˇ zaˬ miˬ zaˬ k'oeˇ g'aˬ-ahˇ siˬ duˬ leˇ ngeh, yaw dzuˬ dzuˬ-eu la ̭ k'oeˇ laˇ-awˇ, Yeˬsuˇ-euˬ aˬ kuiˇ dawˬ peh awˆ byaˆ-euˬ meh. K'oeˇ naˇ, aˬ jeˬ miˇ neh Yeˬsuˇ-ahˇ aˬ yaw ̭ toeˬ ciˆ-euˬ gaˇ kawˆ hawˇ-eu, aˬ yaw ̭-euˬ naˇ gawˇ tiˬ poˆ teh ̭-ehˇ taˬ leˇ-euˬ gaˇ kawˆ, tsawˇ haˬ k'oeˇ myaˆ ni g'eh-eu mehˬ shi ehˇ doˆ-euˬ meh. 48"Aˬ buˇ-oˇ, nawˬ-euˬ jah-eu nui ma nawˬ-ahˇ bi taˬ leˇ-euˬ meh. Nui ma saˇ lehˆ ni g'o ̭-iˇ-awˬ" lehˇ, zaˬ miˬ zaˬ k'oeˇ g'aˬ-ahˇ Yeˬsuˇ ehˇ nehˬ-euˬ meh. 49Yeˬsuˇ k'oeˇ lo ̭-ehˇ ehˇ lu ̭ ngeh, Yuˇdaˆ tsawˇ haˬ-euˬ uˬ duˬ tahˬ nymˇ-ahˇ uˆ lahˇ-eu aˬ yui ̭ aˬ tsu-euˬ nymˇ-ahˇ neh tsawˇ haˬ tiˬ g'aˬ laˇ-awˇ, Yaˬiˇluˆ-ahˇ ehˇ-eu, "Nawˬ buˇ shiˇ tsehˆ g'aˬ-euˬ meh. Saˬ laˬ-ahˇ maˬ paˇ laˆ bahˬ k'aw ̭ g'aˬ meh." 50Ehˇ k'aw ̭, dawˬ k'oeˇ dawˬ-ahˇ Yeˬsuˇ ya gaˬ ngeh, Yaˬiˇluˆ-ahˇ ehˇnehˬ-eu, "K'ahˬ taˬ lahˇ. Jah-eu nui ma ahˇ naˇ g'aˬ-aˇ. Aˬ yaw ̭ jawˇ saˇ doˆ laˇ teh ̭-a." 51Nymˇ k'oeˇ nymˇ-ahˇ aˬ yaw ̭ iˇ keuˆ ngeh, nui deuˬ maˬ bi uˇ leˇ ni, Beˬtuˆluˆ, Yoˇhaˬ, Yaˬkoˆ aˬ ha smˇ g'aˬ hawˇ-eu, aˬ buˇ k'oeˇ buˇ-euˬ aˬ da aˬ ma-ahˇ teh ̭-ehˇ sheuˬ-awˇ uˇ leˇ-euˬ meh. 52K'oeˇ gaˇ jawˇ-eu tsawˇ haˬ deuˬ aˬ buˇ k'oeˇ buˇ g'aˇ duˬ tsawˇ ngoeˇ ngoeˇ-awˇ, noeˬ shaˬ lu ̭-eu meh. Yeˬsuˇ aˬ yaw ̭ ma ̭-ahˇ ehˇ nehˬ-eu, "Taˬ ngoeˇ. Aˬ yaw ̭ shiˇ-euˬ maˬ ngeuˇ-a. Yu ̭ k'aˆ taˬ-euˬ teh ̭ meh." 53K'oeˇ ngeh, aˬ yaw ̭ ma ̭ dawˬ tawˆ lu ̭, aˬ yaw ̭-ahˇ uiˇ-eu meh. Aˬ jeˬ miˇ neh ehˇ naˇ, aˬ yaw ̭ shiˇ tsehˆ taˬ-euˬ aˬ yaw ̭ ma ̭ siˬ duˬ-eu meh. 54Ehˇ k'aw ̭, aˬ buˇ k'oeˇ buˇ-euˬ aˬ la ̭-ahˇ aˬ yaw ̭ nyeh ̭ tehˬ-awˇ, + "Aˬ buˇ-oˇ, tuˇ-awˬ" lehˇ, teˇ saˇ yaw k'aˆ k'aˆ-ehˇ ehˇ nehˬ-euˬ meh. 55Aˬ buˇ k'oeˇ buˇ paˇ deh ̭ k'o ̭ laˇ-awˇ, ja pyuˬ ni tuˇ laˇ-euˬ meh. Aˬ yaw ̭-ahˇ tiˬ jeˬ paˬ bi dzaˬ-eu g'aˇ duˬ, aˬ yaw ̭ ma ̭-ahˇ Yeˬsuˇ dawˬ bi ̭-euˬ meh. 56Aˬ yaw ̭-euˬ aˬ da aˬ ma zahˬ dui dui leˇ-euˬ meh. Ehˇ k'aw ̭, pyeu ̭ laˇ-euˬ gaˇ kawˆ k'oeˇ tiˬ g'aˬ-ahˇ-iˬ maˬ bi ja mehˬ-eu g'aˇ duˬ, aˬ yaw ̭ ma ̭-ahˇ Yeˬsuˇ dawˬ bi ̭-euˬ meh.

will be added

X\