LUˇKA ̭ 18

1Zaˬ lahˇ deuˬ aˬ myah lu ̭ guiˬ lahˬ shaˇ-awˇ, tiˬ jawˇ-iˬ nui ma maˬ ya cawˆ-eu g'aˇ duˬ, Yeˬsuˇ yaw jeˬ ma jeˬ ja-awˇ, mehˬ nehˬ tsoˆ nehˬ-euˬ meh. 2"Meuˬ tiˬ meuˬ la ̭ k'oeˇ, Miˬyehˇ-ahˇ maˬ guˆ-ehˇ, tsawˇ haˬ-ahˇ k'aw ̭ yaw zeu maˬ baw-eu yaˇ k'aˬ daˇ-eu tsawˇ haˬ tiˬ g'aˬ jawˇ-eu meh. 3Meuˬ k'oeˇ meuˬ la ̭ k'oeˇ, miˬ coeˬ miˬ ma tiˬ g'aˬ jawˇ-eu meh. Miˬ coeˬ miˬ ma k'oeˇ g'aˬ yaˇ k'aˬ daˇ-eu g'aˬ jawˇ gaˇ tiˬ k'ehˬ maˬ taˬ ni laˇ laˇ-ehˇ, 'Ngaˬ-ahˇ g'awˬ shaˬ gaˬ-awˇ, ngaˬ nehˬ-ehˇ yaˇ k'aˬ ja lu ̭-eu g'aˬ-ahˇ yaˇ k'aˬ daˇ nehˬ la ̭ sheˇ' lehˇ shaˇ-eu meh. 4Yaˇ k'aˬ daˇ-eu tsawˇ haˬ k'oeˇ g'aˬ yaˇ k'aˬ maˬ daˇ nehˬ ni tiˬ k'ehˬ jawˇ-euˬ meh. Ehˇ k'aw ̭, aˇ saˬ saˬ laˇ ngeh, aˬ yawˇ yaw ̭ heu lo ̭-ehˇ ehˇ-eu meh. 'Ngaˇ Miˬyehˇ-ahˇ maˬ guˆ-ehˇ, tsawˇ haˬ-ahˇ yaw zeu maˬ baw k'aw ̭, 5aˬ yaw ̭ ngaˇ jawˇ gaˇ laˇ laˇ-ehˇ bahˬ g'a-eu miˇneh, aˬ yaw ̭-euˬ gaˇ kawˆ daˇ tsehˆ nehˬ shaw-iˬ ma. Maˬ ngeuˇ naˇ, aˬ yaw ̭ laˇ laˇ-ehˇ bahˬ g'a-eu miˇ neh teh ̭-ehˇ k'aw ̭, maˬ paˇ deh ̭-iˇ-eu miˇ-a."' 6Sahˬpaˬ Yeˬsuˇ ehˇ-eu, "Maˬ sui maˬ dawˇ-eu yaˇ k'aˬ daˇ-eu tsawˇ haˬ k'oeˇ g'aˬ ehˇ-eu gaˬ maˬ loˇ. 7Toˆ-ehˇ ngeuˇ naˇ, uˬ ci ̭ nah g'ahˇ maˬ ehˇ caw ba nehˬ la ̭ lehˇ shaˇ lu ̭-eu, Miˬyehˇ neh tseˇ doˆ-euˬ tsawˇ haˬ deuˬ-euˬ g'aˇ duˬ, Miˬyehˇ yaˇ k'aˬ maˬ daˇ nehˬ-aˇ loˇ. Aˬ yaw ̭ nyi naˬ nyi naˬ-ehˇ jawˇ teh ̭-a loˇ. 8Aˬ yaw ̭ ma ̭-euˬ g'aˇ duˬ aˬ yaw ̭ yaw kawˇ-ehˇ yaˇ k'aˬ daˇ teh ̭-a lehˇ, naw ma ̭-ahˇ ngaˇ ehˇ-eu ma. Ehˇ k'aw ̭, Tsawˇhaˬ-euˬ Zaˬmaˇ za ̭ le ngeh, miˇ tsaˬ k'oeˇ taˆ jah-eu jeˬ jaˆ lu ̭ gaˇ ya mawˇ teh ̭-a loˇ." 9Yawˬ haˇ yawˬ ha yaw tsaˬ yaw dawˇ ma lehˇ sawˇ-awˇ, aˬ cawˬ-ahˇ taˬ nyiˇ-eu tsawˇ haˬ deuˬ-ahˇ, Yeˬsuˇ yaw jeˬ ma jeˬ heu hmˬ ja mehˬ nehˬ-euˬ meh. 10"Tiˬ poˆ-aˬ, tsawˇ haˬ nyiˬ g'aˬ Uˬ duˬ tahˬ nymˇ nymˇ ma-ahˇ daˆ leˇ-awˇ, guiˬ lahˬ shaˇ leˇ-euˬ meh. Tiˬ g'aˬ-aˬ, Paˬliˬsehˇ meh. Tiˬ g'aˬ-aˬ, kawˬ ta ̭-eu tsawˇ haˬ meh. 11"Paˬliˬsehˇ k'oeˇ g'aˬ tiˬ paw yaw ̭-awˇ, 'Miˬyehˇ-oˇ, ngaˇ-aˬ, aˬ cawˬ-ahˇ maˬ duˇ-eu miˇ neh nawˬ-euˬ guiˬ lahˬ-ahˇ ja ceuˬ-eu ma. Aˬ cawˬ lo ̭-ehˇ k'oeˬ dzaˬ k'aˆ dzaˬ-eu, maˬ sui maˬ dawˇ-eu, aˬ cawˬ miˬ zaˬ-ahˇ bahˬ-eu heu deuˬ ngaˇ maˬ mˇ. K'oeˇ uˬ ta ̭, k'oeˇ gaˇ yaw ̭ lu ̭-eu kawˬ ta ̭-eu tsawˇ haˬ heu g'aˬ-ahˇ ngaˇ maˬ duˇ-eu miˇ neh, nawˬ-euˬ guiˬ lahˬ-ahˇ ja ceuˬ-eu ma. 12Ngaˇ-aˬ, tiˬ jaw la ̭ k'oeˇ nyiˬ nah maˬ dzaˬ-eu zahˇ tawˬ lu ̭-awˇ, ngaˇ k'aˇ za-euˬ yawˬ jeˬ na lu ̭ la ̭ k'oeˇ, tseˇ bymˇ tiˬ bymˇ nawˬ-ahˇ damˬ lu ̭ ma' lehˇ shaˇ-euˬ meh. 13Ehˇ k'aw ̭, kawˬ ta ̭-eu tsawˇ haˬ k'oeˇ g'aˬ-aˬ, ui cuiˆ yaw taw yaw ̭-awˇ, myaˆ pyawˬ mˬ paw maˬ ciˬ diˇ peuˬ ni, noeˬ shaˬ dui dui-eu miˇ neh k'ahˬ-ahˇ teˇ teˇ-ehˇ, 'Miˬyehˇ-oˇ, ngaˇ iˬ baˇ zaˬ ma. G'awˬ shaˬ gaˬ nehˬ la ̭-awˬ' lehˇ shaˇ-euˬ meh. 14Ngaˇ naw ma ̭-ahˇ ehˇ nehˬ nyaˇ. Kawˬ ta ̭-eu tsawˇ haˬ k'oeˇ g'aˬ g'o ̭ ka-iˇ ngeh, Paˬliˬsehˇ k'oeˇ g'aˬ naˆ maˬ tseˇ Miˬyehˇ mehˬ shi guiˬ lahˬ za dzehˬ-awˇ, tsaˬ dzehˬ dawˇ dzehˬ-eu tsawˇ haˬ pyeu ̭ laˇ-euˬ meh. Aˬ jeˬ miˇ neh ehˇ naˇ, yawˬ haˇ yawˬ ha taˬ huiˬ-eu tsawˇ haˬ-aˬ, taˬ nyiˇ gaˇ ya daˬ-awˇ, yawˬ haˇ yawˬ ha taˬ nyiˇ-eu tsawˇ haˬ-aˬ, aˬ cawˬ taˬ huiˬ nehˬ-eu jeˬ-ahˇ za teh ̭-a." 15K'oeˇ ngeh, Yeˬsuˇ neh bi toeˬ ciˆ-eu g'aˇ duˬ, zaˬ deuˬ-ahˇ aˬ yaw ̭ ma ̭ sheuˬ la ̭-euˬ meh. Zaˬ lahˇ deuˬ aˬ yaw ̭ ma ̭-ahˇ dehˬ-euˬ meh. 16Ehˇ k'aw ̭, Yeˬsuˇ zaˬ k'oeˇ deuˬ-ahˇ kuˇ-awˇ ehˇ-eu, "Zaˬ deuˬ-ahˇ maˬ laˆ tsoeˬ ni ngaˇ jawˇ gaˇ bi laˇ-awˬ. Aˬ jeˬ miˇ neh ehˇ naˇ, Miˬyehˇ Miˇk'ahˬ-aˬ, aˬ yaw ̭ ma ̭ lo ̭-ehˇ g'eh-eu deuˬ-ahˇ o ̭-eu meh. 17Zaˬ yaw nyiˇ tiˬ g'aˬ lo ̭-ehˇ nui ma taˬ-awˇ Miˬyehˇ Miˇk'ahˬ-ahˇ maˬ ha geu ̭-eu tsawˇ haˬ aˬ geu g'aˬ maˬ kaˬ, k'oeˇ gaˇ maˬ ya uˇ leˇ-aˇ lehˇ, naw ma ̭-ahˇ ngaˇ maˇ jawˆ ni ehˇ-eu ma." 18Myaˆ pyawˬ naˇ mehˇ jaˆ-eu aˬ yui ̭ aˬ tsu tiˬ g'aˬ Yeˬsuˇ-ahˇ naˇ haˬ-eu, "Muiˬ-eu saˬ laˬ-oˇ, mˬ maˬ maˬ byaˆ zaˇ ziˇ deh ̭-eu jeˬ-ahˇ za nya ni, ngaˇ aˬ geu jeˬ ya mˇ ta." 19Yeˬsuˇ aˬ yaw ̭-ahˇ ehˇ nehˬ-eu, "Aˬ jeˬ miˇ neh nawˇ ngaˬ-ahˇ muiˬ-eu g'aˬ lehˇ kuˇ te. Miˬyehˇ maˬ ngeuˇ naˇ, yaw muiˬ tiˬ g'aˬ-iˬ maˬ jawˇ-a. 20Zahˇ dawˬ k'o ̭ dawˬ heu deuˬ-ahˇ nawˇ siˬ nya meh. 'Aˬ cawˬ-euˬ miˬ zaˬ yo zaˬ-ahˇ taˬ bahˬ taˬ muˆ. Tsawˇ haˬ taˬ seh ̭. Smˇ k'oeˬ taˬ k'oeˬ. Aˬ cawˬ gaˇ kawˆ maˬ ngeuˇ gaˇ keuˆ ni saˇ kiˇ taˬ kamˬ. Yawˬ ha-euˬ aˬ da aˬ ma-ahˇ yaw zeu baw-awˬ' lehˇ ehˇ taˬ-euˬ meh." 21Tsawˇ haˬ k'oeˇ g'aˬ ehˇ-eu, "Zahˇ dawˬ k'o ̭ dawˬ heu deuˬ dawˬ tawˆ lu ̭-ahˇ, nyiˇ ngeh neh ngaˇ caw teh lu ̭-eu ma." 22Dawˬ k'oeˇ dawˬ-ahˇ ya gaˬ ngeh, Yeˬsuˇ aˬ yaw ̭-ahˇ ehˇ nehˬ-eu, "Nawˇ tiˬ jeˬ loˬ nga siˬ. Nawˇ k'aˇ jaˆ-eu jeˬ ahˬ jiˇ-awˇ, shaˬ zaˬ zahˬ zaˬ deuˬ-ahˇ biˇ nehˬ-awˬ. Mˬ k'oeˇ taˆ nawˬ-euˬ pyuˇ shuiˇ myawˬ gahˬ jaˆ laˇ teh ̭-a. K'oeˇ naˇ, g'o ̭ poˆ laˇ-awˇ, ngaˬ-euˬ mehˬ nah caw teh laˇ-awˬ." 23Ehˇ k'aw ̭, dawˬ k'oeˇ dawˬ-ahˇ tsawˇ haˬ k'oeˇ g'aˬ ya gaˬ ngeh, noeˬ shaˬ-euˬ meh. Aˬ jeˬ miˇ neh ehˇ naˇ, aˬ yaw ̭ smˇ muiˬ muiˬ dui dui-eu meh. 24Yeˬsuˇ aˬ yaw ̭-ahˇ haw-awˇ ehˇ-eu, "Pyuˇ shuiˇ jaˆ myaˬ-eu tsawˇ haˬ-aˬ, Miˬyehˇ Miˇk'ahˬ-ahˇ uˇ leˇ-eu aˇ naˆ ni shaˬ-eu nga. 25Smˇ muiˬ smˇ baw tiˬ g'aˬ Miˬyehˇ Miˇk'ahˬ-ahˇ uˇ leˇ-eu-aˬ, law taw tiˬ mawˇ aˬ g'aw ̭ g'aw ̭ naˬ-ahˇ uˇ leˇ-eu naˆ maˬ tseˇ k'aˆ dzehˬ-eu meh." 26Dawˬ k'oeˇ dawˬ-ahˇ ya gaˬ-euˬ tsawˇ haˬ deuˬ ehˇ-eu, "Toˆ-ehˇ ngeuˇ naˇ, ka k'o ̭-eu jeˬ-ahˇ za nya-eu tsawˇ haˬ aˬ suˇ g'aˬ jawˇ nmˇ." 27Yeˬsuˇ ehˇ-eu, "Tsawˇ haˬ zaˬ maˬ jahˇ nya-eu jeˬ-ahˇ Miˬyehˇ jahˇ nya meh." 28K'oeˇ ngeh, Beˬtuˆluˆ ehˇ-eu, "Haw sheˇ. Nga ma ̭ k'aˇ jaˆ-eu yawˬ jeˬ na lu ̭ byehˇ dzeh ya ̭ jiˇ-awˇ, nawˬ-euˬ mehˬ nah caw teh laˇ-euˬ maˬ ngeuˇ nga loˇ." 29Yeˬsuˇ aˬ yaw ̭ ma ̭-ahˇ ehˇ k'o ̭ nehˬ-eu, "Ngaˇ naw ma ̭-ahˇ maˇ jawˆ ni ehˇ-eu ma. Miˬyehˇ Miˇk'ahˬ g'aˇ duˬ yawˬ ha-euˬ nymˇ, miˬ zaˬ, mehˇ nmˇ, aˬ buˇ aˬ li, heu deuˬ-ahˇ byehˇ dzeh ya ̭-euˬ tsawˇ haˬ aˬ geu g'aˬ maˬ kaˬ, 30nymˬ-mˇ deh ̭ lu ̭-eu heu ziˇ la ̭ k'oeˇ, g'awˬ mya bymˇ paˇ za k'o ̭-eu uˬ ta ̭, aˬ kaˇ kaˇ ziˇ la ̭ k'oeˇ, mˬ maˬ maˬ byaˆ zaˇ ziˇ deh ̭-eu jeˬ za teh ̭-a." 31Zaˬ lahˇ tseˇ nyi ̭ g'aˬ-ahˇ Yeˬsuˇ kuˇ doˆ-awˇ, heu lo ̭-ehˇ ehˇ nehˬ-euˬ meh. "Aˬ dui ma ̭ Yeˬluˇsaˬlehˬ meuˬ-ahˇ le lu ̭-eu ma. Tsawˇhaˬ-euˬ Zaˬmaˇ gaˇ kawˆ Miˬyehˇ g'aˇ duˬ ngehˬ dah-eu deuˬ neh k'aˇ bo ̭ taˬ-euˬ yawˬ jeˬ na lu ̭, k'oeˇ gaˇ byah laˇ jiˇ teh ̭-a. 32Aˬ yaw ̭-ahˇ aˬ cawˬ tsawˇ jeuˬ-euˬ aˬ la ̭ la ̭ k'oeˇ a nehˬ-awˇ, bi naˬ g'a-awˇ, yehˬ bawˬ sehˇlu-ehˇ bi g'eh-awˇ, duˬ k'aˬ bi k'a daˆ teh ̭-a. 33Aˬ yaw ̭ ma ̭ aˬ yaw ̭-ahˇ yahˬ caˆ neh jui ̭-awˇ seh ̭ teh ̭-a. Ehˇ k'aw ̭, smˬ nah byah laˇ naˇ, Miˬyehˇ aˬ yaw ̭-ahˇ paˇ bi g'o ̭ deh ̭ laˇ teh ̭-a." 34Gaˇ kawˆ k'oeˇ deuˬ-ahˇ zaˬ lahˇ deuˬ tiˬ paw ̭-iˬ maˬ g'oˆ shaw nya-a. Dawˬ k'oeˇ deuˬ-euˬ dawˬ tsui ̭ aˬ yaw ̭ ma ̭ g'aˇ duˬ dehˬ kaˬ taˬ-euˬ gaˇ duˇ-awˇ, Yeˬsuˇ ehˇ maw ̭-eu jeˬ-ahˇ aˬ yaw ̭ ma ̭ maˬ siˬ nya-a. 35Aˬ yaw ̭ Yeˬliˇkoˇ meuˬ dawˬ peh le keuˆ ngeh, myaˆ beh ̭ tiˬ g'aˬ gaˇ ma gaˇ dzeˇ nuiˇ-awˇ, hawˬ shaˇ shaˇ lu ̭-eu meh. 36Tsawˇ haˬ aˇ ma ̭ ma ̭ ma le-eu teˇ saˇ-ahˇ aˬ yaw ̭ ya gaˬ ngeh, "Aˬ jeˬ g'eh ta" lehˇ naˇ haˬ-eu meh. 37"Naˬzaˬlehˇ tsawˇ haˬ Yeˬsuˇ le lu ̭-eu nga" lehˇ, aˬ cawˬ aˬ yaw ̭-ahˇ ehˇ nehˬ-euˬ meh. 38"Daˬbiˇ-euˬ Zaˬmaˇ Yeˬsuˇ-oˇ, ngaˬ-ahˇ g'awˬ shaˬ gaˬ nehˬ la ̭-awˬ" lehˇ, aˬ yaw ̭ guˇ-euˬ meh. 39Mehˬ hu paw cah lu ̭-eu deuˬ aˬ yaw ̭-ahˇ, "Ciˬ cuˇ ni jawˇ-awˬ" lehˇ dehˬ k'aw ̭, aˬ yaw ̭ maˬ naˇ haˬ ni, "Daˬbiˇ-euˬ Zaˬmaˇ-oˇ, ngaˬ-ahˇ g'awˬ shaˬ gaˬ nehˬ la ̭-awˬ" lehˇ, yaw beh poˆ naˆ maˬ tseˇ paˇ guˇ k'aˆ laˇ-euˬ meh. 40K'oeˇ ngeh, Yeˬsuˇ naˬ leˇ-awˇ, tsawˇ haˬ k'oeˇ g'aˬ-ahˇ aˬ yaw ̭ jawˇ gaˇ bi sheuˬ la ̭-eu g'aˇ duˬ dawˬ bi ̭-euˬ meh. Tsawˇ haˬ k'oeˇ g'aˬ dawˬ peh laˇ keuˆ ngeh, Yeˬsuˇ aˬ yaw ̭-ahˇ ehˇ nehˬ-eu, 41"Nawˬ-euˬ g'aˇ duˬ ngaˇ aˬ jeˬ bi jahˇ nehˬ maw ̭-eu nya." Aˬ yaw ̭ ehˇ-eu, "Saˬ laˬoˇ, ngaˬ-euˬ myaˆ nuiˆ mawˇ laˇ ni bi jahˇ nehˬ maw ̭ miˇ-a." 42Yeˬsuˇ aˬ yaw ̭-ahˇ ehˇ nehˬ-eu, "Myaˇ nuiˆ mawˇ laˇ-awˬ. Nawˬ-euˬ jah-eu nui ma nawˬ-ahˇ bi taˬ leˇ-euˬ meh." 43Tsawˇ haˬ k'oeˇ g'aˬ tiˬ poˆ teh ̭-ehˇ myaˆ nuiˆ mawˇ laˇ-awˇ, Miˬyehˇ-euˬ guiˬ lahˬ-ahˇ ja ceuˬ ja ceuˬ-ehˇ, Yeˬsuˇ-euˬ mehˬ nah caw teh g'eh-euˬ meh. Tsawˇ haˬ dawˬ tawˆ lu ̭ k'oeˇ gaˇ ya mawˇ ngeh, Miˬyehˇ-ahˇ ja ceuˬ-euˬ meh.

will be added

X\