LUˇKA ̭ 11

1Tiˬ poˆ-aˬ, Yeˬsuˇ jawˇ duˬ tiˬ tsahˇ-ahˇ guiˬ lahˬ shaˇ lu ̭-eu meh. Aˬ yaw ̭ guiˬ lahˬ shaˇ g'aˬ ngeh, aˬ yaw ̭-euˬ zaˬ lahˇ tiˬ g'aˬ aˬ yaw ̭-ahˇ ehˇ-eu, "Sahˬpaˬ-oˇ, Yoˇhaˬ neh aˬ yaw ̭-euˬ zaˬ lahˇ deuˬ-ahˇ mehˬ nehˬ-euˬ lo ̭-ehˇ, guiˬ lahˬ aˬ joˆ-ehˇ ya shaˇ-eu gaˇ kawˆ nga ma ̭-ahˇ mehˬ nehˬ la ̭-awˬ." 2Aˬ yaw ̭ ma ̭-ahˇ Yeˬsuˇ ehˇ nehˬ-eu, "Naw ma ̭ guiˬ lahˬ shaˇ ngeh, heu lo ̭-ehˇ shaˇ-awˬ. 'Aˬda-oˇ, Nawˬ-euˬ tsawˇ myahˇ-ahˇ yaw zeu baw lu ̭-uˇ. Nawˬ-euˬ Miˇ k'ahˬ keuˆ le lu ̭-uˇ. 3Aˬ yaw ̭ nah yaw ̭ loˬ-eu dzaˬ-eu dawˇ-eu jeˬ, aˬ yaw ̭ nah yaw ̭ nga ma ̭-ahˇ bi ̭ nehˬ la ̭. 4Nga ma ̭-ahˇ k'aˇ mˇ bahˬ la ̭-euˬ deuˬ-ahˇ, nga ma ̭ iˬ baˇ pyehˬ nehˬ-euˬ miˇ neh, nawˇ nga ma ̭-ahˇ iˬ baˇ pyehˬ nehˬ la ̭. Iˬ baˇ muˇ juˇ juˇ-eu mehˬ nah, nga ma ̭-ahˇ taˬ bi iˇ la ̭."' 5K'oeˇ naˇ, zaˬ lahˇ deuˬ-ahˇ Yeˬsuˇ heu lo ̭-ehˇ ehˇ nehˬ-euˬ meh. "Naw ma ̭ tiˬ g'aˬ na uˬ ci ̭ sehˇ g'ahˇ yawˬ ha-euˬ cawˬ-euˬ nymˇ-ahˇ iˇ-awˇ, heu lo ̭-ehˇ ehˇ nehˬ-iˇ-euˬ ehˇ-awˬ. 'Cawˬ-oˇ, ngaˬ-ahˇ kaˬ muˇ smˇ siˬ tiˬ poˆ bi ̭ paˇ nehˬ le ̭ sheˇ. 6Gaˇ mahˇ kaˬ gaˇ jawˇ-eu ngaˬ-euˬ cawˬ tiˬ g'aˬ ngaˇ jawˇ gaˇ laˇ keuˆ-awˇ, aˬ yaw ̭-ahˇ bi dzaˬ-eu tiˬ jeˬ-iˬ ma jaˆ nga.' 7K'oeˇ ngeh, aˬ yaw ̭-euˬ cawˬ k'oeˇ g'aˬ iˇ kahˇ la ̭ k'oeˇ paw jawˇ-awˇ, heu lo ̭-ehˇ ehˇ-eu ehˇ-awˬ. 'Aˬ jeˬ paˇ laˆ bahˬ laˇ teˬ. Laˇ g'oˆ ka ̭ tehˬ jiˇ-awˇ, ngaˬ-euˬ zaˬ deuˬ k'aw ̭ ngaˬ nehˬ-ehˇ yu ̭ k'aˆ taˬ-euˬ miˇ neh, ngaˇ tuˇ le-awˇ nawˬ-ahˇ tiˬ jeˬ-iˬ maˬ paˇ bi ̭ le nya miˇ-a.' 8Ngaˇ naw ma ̭-ahˇ ehˇ nehˬ nyaˇ. Cawˬ aˇ naˆ ni g'oeˇ k'aw ̭ dui-eu ngaˇ. Tuˇ laˇ-awˇ maˬ paˇ bi ̭ le-eu ngaˇ lehˇ k'aw ̭ ehˇ-awˬ. Ehˇ k'aw ̭, shaˇ-eu nui paw shaˇ tehˇ tehˬ naˇ, k'aˇ loˬ-eu jeˬ maˬ bi ̭ le-ehˇ maˬ paˇ g'eh nya-aˇ. 9"Ngaˇ naw ma ̭-ahˇ ehˇ nehˬ nyaˇ. Shaˇ-awˬ. Shaˇ naˇ za teh ̭-a. Poˆ-awˬ. Poˆ naˇ mawˇ teh ̭-a. Laˇ g'oˆ-ahˇ k'oˆ-awˬ. K'oˆ naˇ pah nehˬ la ̭ teh ̭-a. 10Aˬ jeˬ miˇ neh ehˇ naˇ, shaˇ-eu tsawˇ haˬ yawˬ g'aˬ na lu ̭-ahˇ Miˬyehˇ bi ̭ nehˬ teh ̭-a. Poˆ-eu tsawˇ haˬ yawˬ g'aˬ na lu ̭ k'aw ̭, poˆ mawˇ teh ̭-a. Laˇ g'oˆ-ahˇ k'oˆ-eu tsawˇ haˬ-ahˇ laˇ g'oˆ pah nehˬ teh ̭-a. 11Naw ma ̭ la ̭ k'oeˇ, yawˬ ha-euˬ aˬ li ngaˬ shaˬ shaˇ dzaˬ gaˇ aˇ lawˇ nyeh ̭ nehˬ-eu aˬ da jawˇ meh loˇ. 12Maˬ ngeuˇ naˇ, yawˬ ha-euˬ aˬ li ya uˆ shaˇ dzaˬ gaˇ boeˬ kaˬ laˬ ma nyeh ̭ nehˬ-eu aˬ da jawˇ meh loˇ. 13Naw ma ̭ iˬ baˇ mˇ-eu tsawˇ haˬ deuˬ k'aw ̭, yawˬ ha-euˬ zaˬ-ahˇ yaw muiˬ jeˬ bi ̭-eu g'aˇ duˬ k'oeˇ naˆ ni siˬ nya naˇ, mˬ k'oeˇ taˆ jawˇ-eu naw ma ̭-euˬ Aˬda-aˬ, aˬ yaw ̭-ahˇ k'aˇ shaˇ-eu tsawˇ haˬ deuˬ-ahˇ Muiˬ-eu shawˇ-eu Yaw sahˇ Miˬyehˇ bi ̭-eu g'aˇ duˬ aˇ naˆ ni paˇ siˬ nya dzehˬ nmˇ." 14Tsawˇ haˬ-ahˇ dawˬ maˬ ngehˬ nya ni aˬ dzawˬ bi dzawˬ-iˇ-eu neh ̭ tiˬ mawˇ-ahˇ Yeˬsuˇ teh doˆ lu ̭-eu meh. Neh ̭ k'oeˇ mawˇ teh doˆ g'aˬ ngeh, aˬ dzawˬ dzawˬ-iˇ-euˬ tsawˇ haˬ k'oeˇ g'aˬ dawˬ ngehˬ nya laˇ-euˬ meh. Tsawˇ haˬ aˇ ma ̭ k'oeˇ gaˇ zahˬ dui dui leˇ-euˬ meh. 15Ehˇ k'aw ̭, tsawˇ haˬ tiˬ paˆ na deuˬ ehˇ-eu, "Neh ̭sahˬpaˬ Beˬlaˇzeˬbuˇlaˆ-euˬ baoˬ-ahˇ g'oe-awˇ, aˬ yaw ̭ neh ̭ teh doˆ-euˬ ngaˇ." 16Tiˬ paˆ na deuˬ-aˬ, aˬ yaw ̭-ahˇ lawˬ haw-eu la ̭ k'oeˇ, "Mˬ taˆ-euˬ zahˬ leˇ paˬ-ehˇ g'eh-eu jeˬ jahˇ mehˬ nehˬ la ̭ sheˇ" lehˇ ehˇ-eu meh. 17Ehˇ k'aw ̭, aˬ yaw ̭ ma ̭-euˬ nui noeˬ-ahˇ aˬ yaw ̭ siˬ nya-awˇ, heu lo ̭-ehˇ ehˇ nehˬ-euˬ meh. "Miˇ k'ahˬ aˬ geu k'ahˬ maˬ kaˬ, yawˬ ha yaw kaˬ aˇ muˇ muˇ paˆ-awˇ guiˇ deuˆ naˇ, g'awˬ myahˇ ni maˬ zi ̭-aˇ. Aˇ muˇ biˇ paˆ-eu nymˇ jiˇ k'aw ̭, pyaˆ-iˇ shaˆ-iˇ teh ̭-a. 18Saˬdaˬ k'aw ̭, aˬ yawˇ yaw ̭ aˇ muˇ biˇ paˆ-awˇ guiˇ deuˆ naˇ, a yaw ̭-euˬ miˇ k'ahˬ aˬ joˆ-ehˇ zi ̭ nya nmˇ. Beˬlaˇzeˬbuˇlaˆ-euˬ baoˬ-ahˇ g'oe-awˇ ngaˇ neh ̭ teh doˆ-eu nga lehˇ naw ma ̭ ehˇ-eu meh. 19Beˬlaˇzeˬbuˇlaˆ-euˬ baoˬ-ahˇ g'oe-awˇ ngaˇ neh ̭ teh doˆ-eu ngeuˇ naˇ, naw ma ̭-euˬ zaˬ lahˇ deuˬ aˬ suˇ g'aˬ-euˬ baoˬ-ahˇ g'oe-awˇ neh ̭ teh doˆ ta. Naw ma ̭ neh ehˇ-euˬ maˬ tsaˬ-eu gaˇ kawˆ, naw ma ̭-euˬ zaˬ lahˇ deuˬ neh mˇ-euˬ gaˇ deuˬ saˇ kiˇ kamˬ lu ̭ meh. 20Miˬyehˇ-euˬ la ̭ noeˇ-ahˇ g'oe-awˇ ngaˇ neh ̭ teh doˆ-eu ma. Heu-aˬ, Miˬyehˇ Miˇk'ahˬ naw ma ̭ k'oeˇ taˆ keuˆ le-euˬ gaˇ kawˆ saˇ kiˇ pyeu ̭-eu meh. 21"G'aˬ k'aˆ aˬ da tiˬ g'aˬ guiˇ deuˆ-eu keu ka tiˬ ku ̭ lehˬ hmˬ-awˇ aˬ yaw ̭-euˬ nymˇ-ahˇ lo ̭ piˇ lu ̭ ngeh, aˬ yaw ̭-euˬ myawˬ gahˬ maˬ byoˆ-iˇ-a. 22Ehˇ k'aw ̭, aˬ yaw ̭ naˆ maˬ tseˇ k'aˆ dzehˬ-eu tiˬ g'aˬ deuˆ ceh ceh le-awˇ, aˬ yaw ̭-ahˇ deuˆ g'aˬ ngeh, a ̭ yaw ̭ nui ma huiˬ-euˬ aˬ yaw ̭-euˬ guiˇ deuˆ-eu keu ka dawˬ tawˆ lu ̭ yuˇ geu ̭ g'eh jiˇ-awˇ, k'aˇ deuˆ za-euˬ jeˬ, biˇ geu ̭ teh ̭-a. 23"Ngaˇ jawˇ paw maˬ pyawˬ-euˬ tsawˇ haˬ-aˬ, ngaˬ-ahˇ muiˇ-eu tsawˇ haˬ meh. Ngaˬ nehˬ-ehˇ tiˬ kawˆ lo ̭-ehˇ maˬ g'oˆ uiˬ maˬ g'oˆ bymˇ-eu tsawˇ haˬ-aˬ, byaˆ dzeh-eu tsawˇ haˬ meh. 24"Tsawˇ haˬ tiˬ g'aˬ la ̭ k'oeˇ jawˇ-eu neh ̭ yaw jaw ̭ tiˬ mawˇ doˆ-iˇ-awˇ, gui coˇ ni g'eh-eu miˇ k'ahˬ-ahˇ g'aˬ naˬ naˬ duˬ poˆ-iˇ-euˬ meh. G'aˬ naˬ naˬ duˬ maˬ poˆ mawˇ nya-ehˇ, 'Ngaˬ-euˬ nymˇ-ahˇ paˇ g'o ̭ jawˇ leˇ ma' lehˇ, aˬ yawˇ yaw ̭ ehˇ-eu meh. 25K'oeˇ naˇ, aˬ yaw ̭ paˇ g'o ̭ leˇ haw ngeh, nymˇ k'oeˇ nymˇ juˇ tsui ni yaˆ juiˇ taˬ-awˇ jaˆ gaˇ ya mawˇ-euˬ meh. 26Aˬ yaw ̭ paˇ doˆ-iˇ-awˇ, aˬ yaw ̭ naˆ maˬ tseˇ haiˬ-eu neh ̭ shi ̭ mawˇ paˇ kuˇ ahˇ la ̭-awˇ bi jawˇ-euˬ meh. K'oeˇ lo ̭-ehˇ pyeu ̭ laˇ g'aˬ ngeh jawˇ, tsawˇ haˬ k'oeˇ g'aˬ yaw beh naˆ maˬ tseˇ doeˇ dzehˬ laˇ teh ̭-a." 27Yeˬsuˇ k'oeˇ lo ̭-ehˇ ehˇ g'aˬ ngeh, tsawˇ haˬ aˇ ma ̭ la ̭ k'oeˇ zaˬ miˬ zaˬ tiˬ g'aˬ teˇ saˇ ui cuiˆ yaw k'aˆ-ehˇ guˇ-awˇ ehˇ-eu, "Nawˬ-ahˇ bi deh ̭ doˆ le-awˇ aˬ coeˇ bi dawˇ huiˬ-euˬ zaˬ miˬ zaˬ k'oeˇ g'aˬ aˇ naˆ ni guiˬ lahˬ huiˬ-eu nga." 28Ehˇ k'aw ̭, Yeˬsuˇ ehˇ-eu, "Maˇ maˇ ni guiˬ lahˬ huiˬ-eu deuˬ-aˬ, Miˬyehˇ-euˬ dawˬ gaˬ-awˇ naˇ haˬ geu ̭-eu deuˬ meh." 29Yeˬsuˇ dawˬ peh uiˬ laˇ lu ̭-eu tsawˇ haˬ aˇ ma ̭ myaˬ laˇ tehˇ tehˬ lu ̭ ngeh, Yeˬsuˇ heu lo ̭-ehˇ ehˇ-eu meh. "Heu ziˇ-ahˇ deh ̭ lu ̭-eu tsawˇ haˬ heu deuˬ aˇ naˆ ni haiˬ-eu nga. K'aˆ jeˬ-ehˇ g'eh-eu jeˬ mˇ mehˬ la ̭ lehˇ aˬ yaw ̭ ma ̭ ehˇ-eu meh. Yawˇnaˆ gaˇ kawˆ k'aˆ jeˬ-ehˇ g'eh-eu k'oeˇ maˬ ngeuˇ naˇ, nui jeˬ maˬ mehˬ nehˬ. 30Yawˇ naˆ-aˬ, Niˇnaˬbeˬ meuˬ-ahˇ jawˇ-eu tsawˇ haˬ deuˬ g'aˇ duˬ k'aˆ jeˬ-ehˇ g'eh-eu jeˬ pyeu ̭-eu lo ̭-ehˇ, Tsawˇhaˬ-euˬ Zaˬmaˇ-aˬ, heu ziˇ-ahˇ deh ̭ lu ̭-eu tsawˇ haˬ deuˬ g'aˇ duˬ, k'aˆ jeˬ-ehˇ g'eh-eu jeˬ pyeu ̭ teh ̭-a. 31Yaˇ k'aˬ daˇ-eu Aˇ nah keuˆ laˇ ngeh, Sheˬba sahˬ paˬ ma tsawˬ tuˇ laˇ-awˇ, heu ziˇ-euˬ tsawˇ haˬ deuˬ-euˬ iˬ baˇ poˆ -awˇ yaˇ k'aˬ ja teh ̭-a. Aˬ jeˬ miˇ neh ehˇ naˇ, sahˬ paˬ Sawˇlaˬmoˬ-euˬ zaˬ siˬ tsawˇ gahˇ byah-eu dawˬ-ahˇ naˇ haˬ laˇ-eu g'aˇ duˬ, mˬ dzeˇ miˇ dzeˇ-ahˇ neh aˬ yaw ̭ laˇ-euˬ meh. Ngaˇ naw ma ̭-ahˇ ehˇ nehˬ nyaˇ. Sawˇlaˬmoˬ naˆ maˬ tseˇ huiˬ-eu g'aˬ heu gaˇ jawˇ lu ̭ ma. 32Yaˇ k'aˬ daˇ-eu aˇ nah keuˆ laˇ ngeh, Niˇnaˬbeˬ meuˬ-ahˇ jawˇ-eu tsawˇ haˬ deuˬ tuˇ laˇ-awˇ, naw ma ̭-ahˇ iˬ baˇ poˆ teh ̭-a. Aˬ jeˬ miˇ neh ehˇ naˇ, Yawˇnaˆ dawˬ mehˬ mehˬ gaˇ aˬ yaw ̭ ma ̭ ya gaˬ ngeh, aˬ yaw ̭ ma ̭ iˬ baˇ noeˬ poˆ-euˬ meh. Ngaˇ naw ma ̭-ahˇ ehˇ nehˬ nyaˇ. Yawˇnaˆ naˆ maˬ tseˇ huiˬ dzehˬ-eu g'aˬ heu gaˇ jawˇ lu ̭ ma. 33"Tsiˇ k'mˬ do ̭-awˇ baˇ za ̭-ahˇ ciˬ taˬ-eu maˬ ehˇ, k'aˆ puˬ neh mo ̭ tsahˬ-eu maˬ ehˇ, tsawˇ haˬ tiˬ g'aˬ-iˬ maˬ jahˇ-a. Ehˇ k'aw ̭, k'aˇ uˇ laˇ-eu tsawˇ haˬ deuˬ myaˆ nuiˆ mawˇ nya ni, tsiˇ k'mˬ do ̭ taˬ duˬ-ahˇ ciˬ daˆ taˬ-eu meh. 34Nawˬ-euˬ myaˆ nuiˆ-aˬ, nawˬ-euˬ g'awˇ mawˇ-euˬ tsiˇ k'mˬ pyeu ̭-eu meh. Nawˬ-euˬ myaˆ nuiˆ muiˬ naˇ, nawˬ-euˬ g'awˇ mawˇ mawˇ lah-ehˇ yaw sheh ̭ za teh ̭-a. Ehˇ k'aw ̭, nawˬ-euˬ myaˆ nuiˆ maˬ muiˬ naˇ, nawˬ-euˬ g'awˇ mawˇ mawˇ lah-ehˇ zahˇ tsui ni g'eh teh ̭-a. 35K'oeˇ miˇ neh, nawˬ-euˬ la ̭ k'oeˇ ahˇ-eu yaw sheh ̭ zahˇ tsui ni maˬ bi pyeu ̭-iˇ-eu g'aˇ duˬ yahˇ-awˬ. 36Nawˬ-euˬ g'awˇ mawˇ mawˇ lah-ehˇ yaw sheh ̭ za-awˇ, yaw zahˇ tiˬ tsahˇ-iˬ maˬ baw naˇ, tsiˇ k'mˬ-euˬ yaw sheh ̭ nawˬ-euˬ k'oeˇ taˆ bya gaˇ duˇ ni, nawˬ-euˬ g'awˇ mawˇ mawˇ lah-ehˇ yaw sheh ̭ bya teh ̭-a." 37Yeˬsuˇ dawˬ ngehˬ ngehˬ g'aˬ ngeh, Paˬliˬsehˇ tiˬ g'aˬ Yeˬsuˇ-ahˇ aˬ yaw ̭ nehˬ-ehˇ hawˬ bi dzaˬ-eu lehˇ kuˇ-eu miˇ neh, Yeˬsuˇ uˇ leˇ-awˇ hawˬ jawˬ jawˬ-euˬ meh. 38Yeˬsuˇ hawˬ maˬ dzaˬ mi naˆ-ehˇ aˬ la ̭ maˬ dzui ̭ gaˇ Paˬliˬsehˇ k'oeˇ g'aˬ mawˇ ngeh, zahˬ leˇ-euˬ meh. 39K'oeˇ ngeh, Sahˬpaˬ Yeˬsuˇ aˬ yaw ̭-ahˇ heu lo ̭-ehˇ ehˇ nehˬ-euˬ meh. "Naw ma ̭ Paˬliˬsehˇ deuˬ-aˬ, naˬ bo hawˇ-eu k'mˬ maˬ-ahˇ la ̭ nyiˇ paw joˆ shawˇ-eu meh. Ehˇ k'aw ̭, naw ma ̭-euˬ la ̭ k'oeˇ paw-aˬ, mehˇ juiˇ juiˇ-eu nui ma hawˇ-eu, yaw haiˬ jeˬ mˇ maw ̭-eu nui noeˬ tiˬ byah ni ahˇ-eu meh. 40Aˬ dzawˬ aˇ gah deuˬ-oˇ, la ̭ nyiˇ hawˇ-eu la ̭ k'oeˇ nyiˬ paw lu ̭ aˬ yaw ̭ tiˬ g'aˬ neh beh-euˬ maˬ ngeuˇ-a loˇ. 41Ehˇ k'aw ̭, naw ma ̭-euˬ k'mˬ maˬ la ̭ k'oeˇ ahˇ-eu jeˬ shaˬ-eu zahˬ-eu tsawˇ haˬ deuˬ-ahˇ gam ̭ nehˬ-awˬ. K'oeˇ lo ̭-ehˇ jahˇ naˇ, naw ma ̭ muiˬ laˇ shawˇ laˇ teh ̭-a. 42"Paˬliˬsehˇ deuˬ-oˇ, naw ma ̭ ya noeˬ shaˬ dui dui teh ̭-a. Aˬ jeˬ miˇ neh ehˇ naˇ, naw ma ̭-aˬ, dzaˇ muiˇ dzaˇ sawˇ hawˇ-eu ka g'awˬ ka dzaˇ deuˬ Miˬyehˇ-ahˇ tseˇ bymˇ tiˬ bymˇ damˬ-eu meh. Ehˇ k'aw ̭, yaw tsaˬ yaw dawˇ jeˬ hawˇ-eu Miˬyehˇ-ahˇ gaˬ-eu jeˬ-ahˇ naw ma ̭ byehˇ taˬ-euˬ meh. Naw ma ̭ heu deuˬ-ahˇ mˇ byah-eu uˬ ta ̭, nui deuˬ-ahˇ k'aw ̭ maˬ byehˇ ni mˇ-eu tsaˬ meh. 43"Paˬliˬsehˇ deuˬ-oˇ, naw ma ̭ ya noeˬ shaˬ dui dui teh ̭-a. Aˬ jeˬ miˇ neh ehˇ naˇ, uˬ duˬ tahˬ nymˇ la ̭ k'oeˇ aˬ cawˬ taˬ huiˬ-eu nuiˇ mahˬ-ahˇ naw ma ̭ nuiˇ maw ̭-awˇ, lehˆ lehˆ kawˆ doe ni cah ngeh, aˬ cawˬ yaw zeu baw-eu la ̭ k'oeˇ dawˬ ngehˬ cawˬ laˇ gaˇ geu ̭ maw ̭-eu meh. 44Naw ma ̭ ya noeˬ shaˬ dui dui teh ̭-a. Aˬ jeˬ miˇ neh ehˇ naˇ, naw ma ̭-aˬ, aˬ cawˬ maˬ siˬ nya-ehˇ nawˬ tehˬ nawˬ tehˬ-ehˇ cah lu ̭-eu lmˬ bymˇ-ahˇ duˇ-eu meh." 45Zahˇ dawˬ k'o ̭ dawˬ mehˬ-eu saˬ laˬ tiˬ g'aˬ Yeˬsuˇ-ahˇ ehˇ-eu, "Saˬ laˬ-oˇ, nawˇ teu lo ̭-ehˇ ehˇ-eu teu, nga ma ̭-ahˇ k'aw ̭ zaw laˇ nya." 46Yeˬsuˇ ehˇ-eu, "Zahˇ dawˬ k'o ̭ dawˬ mehˬ-eu saˬ laˬ deuˬ-oˇ, naw ma ̭ k'aw ̭ ya noeˬ shaˬ dui dui teh ̭-a. Aˬ jeˬ miˇ neh ehˇ naˇ, naw ma ̭ aˬ cawˬ-ahˇ maˬ pi coeˇ-eu k'aˆ behˆ ciˬ pi-awˇ, naw ma ̭-aˬ, la ̭ noeˇ neh teh ̭-ehˇ k'aw ̭ caw dehˬ caw toˆ nehˬ-eu ma ̭ baw-a. 47Naw ma ̭ ya noeˬ shaˬ dui dui teh ̭-a. Aˬ jeˬ miˇ neh ehˇ naˇ, naw ma ̭-euˬ aˬ poeˬ aˬ bawˇ deuˬ neh seh ̭-euˬ Miˬyehˇ g'aˇ duˬ ngehˬ dah-eu deuˬ-euˬ lmˬ bymˇ-ahˇ naw ma ̭ gawˬ-eu meh. 48Naw ma ̭-euˬ aˬ poeˬ aˬ bawˇ deuˬ neh k'oeˇ lo ̭-ehˇ mˇ-euˬ gaˇ nui ma tsaˬ-eu ma lehˇ, naw ma ̭ yawˬ haˇ yawˬ ha saˇ kiˇ kamˬ gaˇ duˇ-eu meh. Aˬ jeˬ miˇ neh ehˇ naˇ, Miˬyehˇ g'aˇ duˬ ngehˬ dah-eu tsawˇ haˬ deuˬ-ahˇ aˬ yaw ̭ ma ̭ seh ̭-euˬ gaˇ, naw ma ̭ lmˬ bymˇ gawˬ caw nehˬ-eu meh. 49K'oeˇ baˬ da neh, Miˬyehˇ-euˬ zaˬ siˬ tsawˇ gahˇ sahˬ bo ̭ la ̭ k'oeˇ, 'Miˬyehˇ g'aˇ duˬ ngehˬ dah-eu deuˬ hawˇ-eu G'aˬ k'ehˇ deuˬ-ahˇ aˬ yaw ̭ ma ̭ seh ̭-awˇ, tiˬ paˆ na deuˬ-ahˇ k'ehˬ nehˬ k'aˆ nehˬ teh ̭-a' lehˇ ehˇ taˬ-euˬ meh. 50K'oeˇ miˇ neh, mˬ dawˬ pehˬ miˇ duˬ puˇ seu le ngeh neh bi seh ̭ ka le ̭-euˬ Miˬyehˇ g'aˇ duˬ ngehˬ dah-eu deuˬ-euˬ aˇ poeˬ, heu ziˇ-euˬ tsawˇ haˬ deuˬ-ahˇ k'ehˬ nehˬ k'aˆ nehˬ teh ̭-a. 51Muiˬ-eu shawˇ-eu Jawˇ duˬ hawˇ-eu lawˇ duˬ-euˬ yaw kaˬ-ahˇ Zaˬkaˬliˇ bi seh ̭-euˬ gaˇ kawˆ-ahˇ keuˆ ni, aˬ yaw ̭ ma ̭-ahˇ ciˬ pi nehˬ teh ̭-a. K'oeˇ deuˬ dawˬ tawˆ lu ̭ aˇ poeˬ, heu ziˇ-euˬ tsawˇ haˬ deuˬ-ahˇ k'ehˬ nehˬ k'aˆ nehˬ teh ̭-a lehˇ, naw ma ̭-ahˇ ngaˇ ehˇ-eu ma. 52"Zahˇ dawˬ k'o ̭ dawˬ mehˬ-eu saˬ laˬ deuˬ-oˇ, naw ma ̭ ya noeˬ shaˬ dui dui teh ̭-a. Aˬ jeˬ miˇ neh ehˇ naˇ, zaˬ siˬ tsawˇ gahˇ laˇ g'oˆ-euˬ mawˬ taw ̭ kahˬ naw ma ̭ tuˆ tehˬ taˬ-awˇ, naw ma ̭ maˬ uˇ leˇ-eu uˬ ta ̭, aˬ cawˬ uˇ leˇ gaˇ naw ma ̭ laˆ tsoeˬ-eu meh." 53Jawˇ duˬ k'oeˇ tsahˇ-ahˇ neh Yeˬsuˇ doˆ-iˇ ngeh, Zahˇ dawˬ k'o ̭ dawˬ mehˬ-eu saˬ laˬ deuˬ hawˇ-eu Paˬliˬsehˇ deuˬ aˬ yaw ̭-ahˇ yaw k'aˆ-ehˇ ja haw ja haw-ehˇ, g'awˬ mya jeˬ naˇ haˬ-eu la ̭ k'oeˇ, 54aˬ yaw ̭ dawˬ ngehˬ bahˬ ni, dawˬ lahˇ ju k'mˇ-eu lehˇ leh jeh-eu meh.

will be added

X\