YOˇHAˬ 9

1Yeˬsuˇ iˇ lu ̭ ngeh, deh ̭ le ngeh neh myaˆ beh ̭ beh ̭-eu tsawˇ haˬ tiˬ g'aˬ-ahˇ ya mawˇ-euˬ meh. 2Aˬ yaw ̭-euˬ zaˬ lahˇ deuˬ aˬ yaw ̭-ahˇ ehˇ-eu, "Saˬ laˬ-oˇ, aˬ yaw ̭ deh ̭ le ngeh neh myaˆ beh ̭ beh ̭-eu teu aˬ suˇ g'aˬ-euˬ iˬ baˇ baˬ da neh g'eh ta. Aˬ yaw ̭-euˬ iˬ baˇ baˬ da neh nga loˇ. Aˬ da aˬ ma-euˬ iˬ baˇ baˬ da neh nga loˇ." 3Yeˬ suˇ ehˇ-eu, "Aˬ yaw ̭ myaˆ beh ̭ beh ̭-eu k'oeˇ-aˬ, aˬ yaw ̭-euˬ iˬ baˇ baˬ da neh maˬ ngeuˇ-a. Aˬ da aˬ ma euˬ iˬ baˇ baˬ da neh k'aw ̭ maˬ ngeuˇ-a. Miˬyehˇ teh ̭-ehˇ mˇ nya-eu zahˬ leˇ paˬ-ehˇ g'eh-eu jeˬ-ahˇ aˬ cawˬ ya mawˇ ni aˬ yaw ̭ myaˆ beh ̭ beh ̭-eu jeˬ pyeu ̭-eu meh. 4Uˬ ci ̭ maˬ ci ̭ le k'oeˇ keuˆ ni, ngaˬ-ahˇ k'ehˇ g'eh le ̭-euˬ g'aˬ-euˬ gaˇ-ahˇ aˬ dui ya mˇ meh. Tsawˇ haˬ tiˬ g'aˬ-iˬ gaˇ maˬ mˇ nya-eu uˬ ci ̭ aˇ yamˬ keuˆ le lu ̭ meh. 5Ngaˇ miˇ tsaˬ k'oeˇ taˆ k'aˇ jawˇ k'oeˇ keuˆ ni, miˇ tsaˬ-euˬ yaw sheh ̭ pyeu ̭-eu ma." 6Yeˬsuˇ k'oeˇ lo ̭-ehˇ ehˇ g'aˬ-awˇ, miˇ tsaˬ-ahˇ duˬ k'aˬ k'a shehˬ-awˇ shaˬ jehˆ laˆ pyeu ̭-euˬ meh. K'oeˇ naˇ, tsawˇ haˬ k'oeˇ g'aˬ-euˬ myaˆ nuiˆ-ahˇ leh ̭ nehˬ-awˇ, 7"Siˇlamˬ lah-ahˇ myaˆ du ̭ pu ̭ shawˇ-iˇ-awˬ" lehˇ ehˇ nehˬ-euˬ meh. (Siˇlamˬ lehˇ ehˇ-eu dawˬ tsui ̭-aˬ, 'K'ehˇ g'eh-euˬ' lehˇ ehˇ maw ̭-eu meh.) K'oeˇ ngeh, tsawˇ haˬ k'oeˇ g'aˬ myaˆ du ̭ pu ̭ shawˇ-iˇ-awˇ, myaˆ nuiˆ mawˇ laˇ-awˇ g'o ̭ laˇ-euˬ meh. 8Aˬ yaw ̭-ahˇ nymˇ kaˬ ta ̭-eu deuˬ hawˇ-eu, yaw beh aˬ yaw ̭ hawˬ shaˇ shaˇ dzaˬ ngeh mawˇ-euˬ tsawˇ haˬ deuˬ, "Tsawˇ haˬ heu g'aˬ nuiˇ nuiˇ-ehˇ hawˬ shaˇ shaˇ dzaˬ-euˬ k'oeˇ g'aˬ maˬ ngeuˇ nga loˇ" lehˇ ehˇ-eu meh. 9Tiˬ paˆ na deuˬ-aˬ, "Ngeuˇ ngaˇ" lehˇ ehˇ-eu meh. Ehˇ k'aw ̭, tiˬ paˆ na deuˬ-aˬ, "Maˬ ngeuˇ nga. Aˬ yaw ̭-ahˇ duˇ leˇ-eu yawˬ g'aˬ yawˬ nga" lehˇ ehˇ-eu meh. K'oeˇ ngeh, tsawˇ haˬ k'oeˇ g'aˬ aˬ yaw ̭ ma ̭-ahˇ, "Hawˬ shaˇ shaˇ dzaˬ-euˬ k'oeˇ g'aˬ ngaˇ ma" lehˇ ehˇ duˬ nehˬ-euˬ meh. 10Aˬ yaw ̭ ma ̭ aˬ yaw ̭-ahˇ ehˇ-eu, "Nawˇ aˬ joˆ-ehˇ jahˇ-awˇ myaˆ nuiˆ paˇ mawˇ laˇ teˬ." 11Aˬ yaw ̭ ehˇ-eu, "Yeˬsuˇ lehˇ myahˇ-euˬ g'aˬ neh shaˬ jehˆ ui cuiˆ jahˇ-awˇ, ngaˬ-euˬ myaˆ nuiˆ-ahˇ leh ̭ nehˬ la ̭-awˇ, 'Siˇlamˬ lah-ahˇ myaˆ du ̭ pu ̭ shawˇ-iˇ-awˬ' lehˇ ehˇ nehˬ la ̭-euˬ meh. Ngaˇ iˇ-awˇ myaˆ du ̭ pu ̭-euˬ nehˬ-ehˇ, tiˬ poˆ teh ̭-ehˇ myaˆ nuiˆ mawˇ laˇ-euˬ miˇ-a." 12Aˬ yaw ̭ ma ̭ aˬ yaw ̭-ahˇ "Aˬ yaw ̭ aˬ gaˇ jawˇ ta" lehˇ naˇ haˬ ngeh, "Ngaˇ maˬ siˬ" lehˇ aˬ yaw ̭ ehˇ k'o ̭ nehˬ-euˬ meh. 13K'oeˇ naˇ, yaw beh myaˆ beh ̭ beh ̭-euˬ tsawˇ haˬ k'oeˇ g'aˬ-ahˇ, Paˬliˬsehˇ deuˬ jawˇ gaˇ aˬ yaw ̭ ma ̭ sheuˬ g'eh-euˬ meh. 14Yeˬsuˇ neh shaˬ jehˆ jahˇ-awˇ aˬ yaw ̭-euˬ myaˆ nuiˆ mawˇ laˇ nya ni laˆ taˬ nehˬ-euˬ aˇ nah k'oeˇ nah-aˬ, Jawˇ nah pyeu ̭-eu meh. 15Aˬ joˆ-ehˇ jahˇ-awˇ myaˆ nuiˆ mawˇ laˇ-euˬ gaˇ kawˆ, tsawˇ haˬ k'oeˇ g'aˬ-ahˇ Paˬliˬsehˇ deuˬ paˇ naˇ haˬ-euˬ meh. Aˬ yaw ̭ ehˇ-eu, "Aˬ yaw ̭ ngaˬ-euˬ myaˆ nuiˆ-ahˇ shaˬ jehˆ leh ̭ nehˬ la ̭-awˇ, ngaˇ myaˆ du ̭ pu ̭ shawˇ-iˇ ngeh, myaˆ nuiˆ mawˇ laˇ-euˬ ma." 16Paˬliˬsehˇ tsawˇ haˬ tiˬ paˆ na deuˬ ehˇ-eu, "Myaˆ nuiˆ mawˇ laˇ ni jahˇ nehˬ-euˬ k'oeˇ g'aˬ Miˬyehˇ jawˇ gaˇ neh oe-euˬ tsawˇ haˬ maˬ ngeuˇ lu ̭-a. Aˬ jeˬ miˇ neh ehˇ naˇ, Jawˇ nah-ahˇ ya lah ya daw-eu zahˇ sahˇ k'o ̭-ahˇ maˬ caw teh ni, maˬ mˇ k'mˬ-eu jeˬ aˬ yaw ̭ mˇ-euˬ nga." Ehˇ k'aw ̭, tiˬ paˆ na deuˬ ehˇ-eu, "Iˬ baˇ zaˬ tiˬ g'aˬ heu naˆ naˆ-ehˇ zahˬ lehˇ paˬ-ehˇ g'eh-eu jeˬ aˬ joˆ-ehˇ mˇ nya ta." Aˬ yaw ̭ ma ̭ k'oeˇ lo ̭-ehˇ tiˬ g'aˬ tiˬ jeˬ noeˬ-eu meh. 17K'oeˇ naˇ, Paˬliˬsehˇ k'oeˇ deuˬ tsawˇ haˬ k'oeˇ g'aˬ-ahˇ heu lo ̭-ehˇ paˇ naˇ haˬ-euˬ meh. "Nawˬ-euˬ myaˆ nuiˆ mawˇ laˇ ni aˬ yaw ̭ neh jahˇ nehˬ la ̭-euˬ meh lehˇ nawˇ ehˇ-eu-aˬ, aˬ yaw ̭-ahˇ nawˇ aˬ joˆ-ehˇ noeˬ-eu nya." Tsawˇ haˬ k'oeˇ g'aˬ ehˇ-eu, "Aˬ yaw ̭-aˬ, Miˬyehˇ g'aˇ duˬ ngehˬ dah-eu tsawˇ haˬ meh." 18Yuˇdaˆ tsawˇ haˬ aˬ yui ̭ aˬ tsu deuˬ-aˬ, tsawˇhaˬ k'oeˇ g'aˬ-euˬ aˬ da aˬ ma-ahˇ kuˇ-awˇ maˬ naˇ haˬ duˬ k'oeˇ keuˆ ni, yaw beh aˬ yaw ̭ myaˆ beh ̭ beh ̭-awˇ nymˬ-mˇ mawˇ laˇ-euˬ meh lehˇ ehˇ gaˇ maˬ jah-a. 19Aˬ yaw ̭ ma ̭ aˬ yaw ̭ nya ̭-ahˇ naˇ haˬ-eu, "Aˬ yaw ̭ naw nya ̭-euˬ zaˬ ngeuˇ ma loˇ. Aˬ yaw ̭ deh ̭ le ngeh neh myaˆ beh ̭ beh ̭-eu meh lehˇ naw nya ̭ ehˇ-eu meh. Toˆ-ehˇ ngeuˇ naˇ, nymˬ-mˇ aˬ yaw ̭ aˬ joˆ-ehˇ myaˆ nuiˆ paˇ mawˇ laˇ nya taˬ." 20Aˬ yaw ̭-euˬ aˬ da aˬ ma ehˇ-eu, "Nga nya ̭-euˬ zaˬ ma. Deh ̭ le ngeh neh myaˆ beh ̭ meh lehˇ nga nya ̭ siˬ duˬ-eu ma. 21Ehˇ k'aw ̭, nymˬ-mˇ aˬ yaw ̭ aˬ joˆ-ehˇ jahˇ-awˇ myaˆ nuiˆ paˇ mawˇ laˇ-euˬ gaˇ kawˆ hawˇ-eu, aˬ suˇ g'aˬ neh myaˆ nuiˆ laˆ dahˇ nehˬ-euˬ gaˇ kawˆ nga nya ̭ maˬ siˬ nya nya. Aˬ yaw ̭-ahˇ naˇ haˬ-awˬ. Aˬ yaw ̭ huiˬ laˇ-euˬ meh. Aˬ yawˇ yaw ̭ ja mehˬ nehˬ la ̭ nya teh ̭-a." 22Aˬ da aˬ ma k'oeˇ nyiˬ g'aˬ Yuˇdaˆ tsawˇ haˬ aˬ yui ̭ aˬ tsu deuˬ-ahˇ guˆ-eu miˇ neh k'oeˇ lo ̭-ehˇ ehˇ-eu meh. Aˬ jeˬ miˇ neh ehˇ naˇ, Yeˬsuˇ-ahˇ Meˬsiˇya meh lehˇ k'aˇ jah-eu tsawˇ haˬ deuˬ-ahˇ, Yuˇdaˆ tsawˇ haˬ-euˬ uˬ duˬ tahˬ nymˇ-ahˇ maˬ bi ta ̭ ni teh dzeh-eu g'aˇ duˬ, Yuˇdaˆ tsawˇ haˬ aˬ yui ̭ aˬ tsu deuˬ neh bawˬ tsehˆ taˬ-euˬ meh. 23K'oeˇ miˇ neh, "Aˬ yaw ̭ huiˬ laˇ-euˬ meh. Aˬ yaw ̭-ahˇ naˇ haˬ-awˬ" lehˇ, aˬ yaw ̭ nya ̭ ehˇ-eu meh. 24Deh ̭ le ngeh neh myaˆ beh ̭ beh ̭-euˬ tsawˇ haˬ k'oeˇ g'aˬ-ahˇ aˬ yaw ̭ ma ̭ tiˬ poˆ paˇ kuˇ-awˇ ehˇ nehˬ-eu, "Nawˇ dawˇ coe ni ehˇ ma lehˇ Miˬyehˇ mehˬ shi kamˬ-awˬ. Nawˬ-ahˇ myaˆ nuiˆ mawˇ laˇ ni jahˇ nehˬ-euˬ k'oeˇ g'aˬ iˬ baˇ zaˬ meh lehˇ nga ma ̭ siˬ nya ma." 25Tsawˇ haˬ k'oeˇ g'aˬ ehˇ-eu, "Aˬ yaw ̭ iˬ baˇ zaˬ ngeuˇ-eu maˬ ngeuˇ-eu k'oeˇ law nmˇ-aˬ ngaˇ maˬ siˬ. Ngaˇ siˬ nya-eu-aˬ, yaw beh ngaˇ myaˆ beh ̭ beh ̭-euˬ k'aw ̭, nymˬ-mˇ myaˆ nuiˆ mawˇ laˇ-euˬ heu tiˬ hmˬ teh ̭ ma." 26Aˬ yaw ̭ ma ̭ ehˇ-eu, "Aˬ yaw ̭ nawˬ-ahˇ aˬ jeˬ jahˇ nehˬ la ̭ taˬ. Nawˇ myaˆ beh ̭ beh ̭-eu mawˇ nya laˇ ni aˬ joˆ-ehˇ laˆ taˬ nehˬ la ̭ taˬ." 27Tsawˇ haˬ k'oeˇ g'aˬ ehˇ-eu, "Ngaˇ naw ma ̭-ahˇ ehˇ nehˬ g'a-euˬ ma tawˇ. Aˬ jeˬ miˇ neh paˇ gaˬ poˆ maw ̭-eu nya. Naw ma ̭ jiˇ aˬ yaw ̭-euˬ zaˬ lahˇ geu ̭ maw ̭-eu nya loˇ." 28K'oeˇ ngeh, aˬ yaw ̭ ma ̭ aˬ yaw ̭-ahˇ yaˬ k'ehˇ yaˬ-awˇ ehˇ-eu, "Nawˇ-aˬ, tsawˇ haˬ k'oeˇ g'aˬ-euˬ zaˬ lahˇ ngaˇ. Nga ma ̭-aˬ, Moˇseˬ-euˬ zaˬ lahˇ ma. 29Moˇseˬ-ahˇ Miˬyehˇ dawˬ ngehˬ cawˬ-euˬ nga ma ̭ siˬ nya ma. Ehˇ k'aw ̭, tsawˇ haˬ k'oeˇ g'aˬ aˬ gaˇ neh doˆ le-euˬ jiˇ nga ma ̭ maˬ siˬ." 30Myaˆ nuiˆ mawˇ laˇ-euˬ tsawˇ haˬ k'oeˇ g'aˬ ehˇ-eu, "Naw ma ̭ ngehˬ-eu dawˬ teu dawˬ-ahˇ ngaˇ zahˬ dui dui leˇ nya. Aˬ yaw ̭ ngaˬ-ahˇ myaˆ nuiˆ bi mawˇ laˇ ngeh keuˆ ni, aˬ yaw ̭ aˬ gaˇ neh oe-euˬ naw ma ̭ maˬ siˬ nya nya lehˇ la. 31Iˬ baˇ zaˬ-euˬ shaˇ dawˬ-ahˇ Miˬyehˇ maˬ naˇ haˬ-a lehˇ aˬ dui siˬ nya ma. Ehˇ k'aw ̭, aˬ yaw ̭-ahˇ yaw zeu baw-awˇ, aˬ yaw ̭-euˬ nui k'ahˇ mˇ-eu deuˬ-euˬ shaˇ dawˬ-ahˇ naˇ haˬ nehˬ meh. 32Mˬ beh miˇ beh ngeh neh iˬ nah keuˆ ni, myaˆ beh ̭ beh ̭-eu tsawˇ haˬ-ahˇ myaˆ nuiˆ mawˇ laˇ ni jahˇ nehˬ nya-eu tsawˇ haˬ tiˬ g'aˬ-iˬ maˬ gaˬ haw-aˬ siˬ. 33Tsawˇ haˬ k'oeˇ g'aˬ Miˬyehˇ jawˇ gaˇ neh oe-euˬ maˬ ngeuˇ law nmˇ-aˬ, tiˬ jeˬ-iˬ maˬ jahˇ nya-aˇ." 34Aˬ yaw ̭ ma ̭ aˬ yaw ̭-ahˇ ehˇ-eu, "Nawˇ lo ̭-ehˇ g'eh-eu iˬ baˇ la ̭ k'oeˇ deh ̭ le-awˇ huiˬ laˇ-euˬ tsawˇ haˬ tiˬ g'aˬ nga ma ̭-ahˇ paˇ mehˬ paˇ tsoˆ-eu g'eh te loˇ." K'oeˇ naˇ, aˬ yaw ̭-ahˇ Yuˇdaˆ tsawˇ haˬ-euˬ uˬ duˬ tahˬ nymˇ-ahˇ maˬ bi ta ̭ ni teh dzeh nehˬ-euˬ meh. 35Tsawˇ haˬ k'oeˇ g'aˬ-ahˇ teh dzeh nehˬ-euˬ gaˇ kawˆ Yeˬsuˇ ya gaˬ ngeh, aˬ yaw ̭-ahˇ poˆ mawˇ-awˇ, "Tsawˇ haˬ-euˬ Zaˬmaˇ-ahˇ nawˇ jah ma loˇ" lehˇ naˇ haˬ-euˬ meh. 36Tsawˇ haˬ k'oeˇ g'aˬ ehˇ-eu, "Saˬ laˬ-oˇ, aˬ yaw ̭-ahˇ ngaˇ jah nya ni aˬ yaw ̭ aˬ suˇ g'aˬ-a lehˇ tiˬ poˆ ehˇ nehˬ la ̭-awˬ." 37Yeˬsuˇ aˬ yaw ̭-ahˇ ehˇ nehˬ-eu, "Nawˇ aˬ yaw ̭-ahˇ tahˬ puˬ g'aˬ-euˬ meh. Nymˬ-mˇ nawˬ-ahˇ ngehˬ cawˬ lu ̭-eu g'aˬ aˬ yaw ̭ meh." 38K'oeˇ ngeh jawˇ, tsawˇ haˬ k'oeˇ g'aˬ "Sahˬ paˬ-oˇ, ngaˇ jah ma" lehˇ ehˇ-awˇ, Yeˬsuˇ-euˬ mehˬ shi pawˬ tsui ̭ pawˬ dmˬ dmˬ-euˬ meh. 39Yeˬsuˇ ehˇ-eu, "Myaˆ beh ̭ deuˬ-ahˇ myaˆ nuiˆ bi mawˇ laˇ-awˇ, myaˆ nuiˆ mawˇ lu ̭-eu deuˬ myaˆ beh ̭ bi beh ̭-iˇ ni yaˇ k'aˬ daˇ-eu g'aˇ duˬ, miˇ tsaˬ heu k'oeˇ taˆ ngaˇ oe-euˬ ma." 40K'oeˇ gaˇ jawˇ-eu Paˬliˬsehˇ tiˬ paˆ na deuˬ aˬ yaw ̭ k'oeˇ lo ̭-ehˇ ehˇ gaˇ ya gaˬ ngeh, "Nga ma ̭-ahˇ myaˆ beh ̭ nga lehˇ nawˇ ehˇ maw ̭-eu maˬ ngeuˇ-eu paˬ" lehˇ ehˇ-eu meh. 41Yeˬsuˇ ehˇ-eu, "Naw ma ̭ myaˆ beh ̭ law nmˇ-aˬ, iˬ baˇ maˬ ahˇ-aˇ. Ehˇ k'aw ̭, naw ma ̭ myaˆ nuiˇ mawˇ nya ma lehˇ yawˬ haˇ yawˬ ha ehˇ-eu miˇ neh, iˬ baˇ ahˇ-eu meh."

will be added

X\