YOˇHAˬ 7

1K'oeˇ naˇ, Gaˬliˬlehˇ miˇ k'ahˬ-ahˇ Yeˬsuˇ cah-euˬ meh. Yuˇdaˆ miˇ k'ahˬ-ahˇ aˬ yaw ̭ maˬ cah maw ̭-a. Aˬ jeˬ miˇ neh ehˇ naˇ, Yuˇdaˆ tsawˇ haˬ aˬ yui ̭ aˬ tsu deuˬ aˬ yaw ̭-ahˇ seh ̭ maw ̭-eu meh. 2Sehˬ g'awˆ-euˬ Bawˬ-iˬ g'eh-eu aˇ yamˬ peh laˇ-euˬ meh. 3K'oeˇ miˇ neh, aˬ yaw ̭-euˬ mehˇ nmˇ deuˬ aˬ yaw ̭-ahˇ ehˇ-eu, "Nawˬ-euˬ mehˬ nah caw teh-eu tsawˇ haˬ deuˬ nawˬ neh mˇ mehˬ-euˬ zahˬ leˇ paˬ-ehˇ g'eh-eu gaˇ deuˬ-ahˇ ya mawˇ ni, heu gaˇ dzuˇ dzuˇ-ehˇ maˬ jawˇ ni Yuˇdaˆ miˇ k'ahˬ-ahˇ iˇ-awˬ. 4Yawˬ ha neh mˇ-euˬ jeˬ aˬ cawˬ-ahˇ bi siˬ bi mawˇ maw ̭-eu tsawˇ haˬ-aˬ, yawˬ ha neh mˇ-euˬ jeˬ-ahˇ maˬ za ̭ taˬ-aˇ. Nawˇ heu lo ̭-ehˇ g'eh-eu gaˇ deuˬ mˇ lu ̭-eu-aˬ, nawˬ-euˬ gaˇ kawˆ miˇ tsaˬ k'oeˇ taˆ k'aˇ jawˇ-eu tsawˇ haˬ dawˬ tawˆ lu ̭ bi siˬ jiˇ-awˬ tawˇ." 5Aˬ yaw ̭-euˬ uˇ pyehˆ mehˇ nmˇ deuˬ k'aw ̭ aˬ yaw ̭-ahˇ maˬ jah-a. 6Yeˬsuˇ aˬ yaw ̭-euˬ mehˇ nmˇ deuˬ-ahˇ ehˇ nehˬ-eu, "Ngaˬ-euˬ g'aˇ duˬ aˇ yamˬ maˬ tsaˬ laˇ-aˬ siˬ. Nawˬ ha mehˇ nmˇ-euˬ g'aˇ duˬ law nmˇ-aˬ, aˇ yamˬ maˬ tsaˬ laˇ-euˬ maˬ baw-a. 7Miˇ tsaˬ zaˬ deuˬ nawˬ ha mehˇ nmˇ-ahˇ muiˇ-eu gaˇ kawˆ maˬ jaˆ-a. Ehˇ k'aw ̭, ngaˬ-ahˇ muiˇ meh. Aˬ jeˬ miˇ neh ehˇ naˇ, aˬ yaw ̭ ma ̭-euˬ deh ̭ jeˬ deh ̭ kawˆ maˬ muiˬ gaˇ ngaˇ maˬ tsehˆ leˇ ni ehˇ lu ̭-eu miˇ neh meh. 8Bawˬ-iˬ g'eh gaˇ nawˬ ha mehˇ nmˇ iˇ-awˬ. Ngaˇ maˬ iˇ. Aˬ jeˬ miˇ neh ehˇ naˇ, ngaˬ-euˬ g'aˇ duˬ aˇ yamˬ maˬ tsaˬ laˇ-aˬ siˬ." 9Yeˬsuˇ k'oeˇ lo ̭-ehˇ ehˇ-awˇ, Gaˬliˬlehˇ miˇ k'ahˬ-ahˇ jawˇ ya ̭-euˬ meh. 10Yeˬsuˇ-euˬ mehˇ nmˇ deuˬ Sehˬ g'awˆ-euˬ bawˬ-iˬ-ahˇ iˇ dzeuˇ ngeh, Yeˬsuˇ jiˇ iˇ-euˬ meh. Ehˇ k'aw ̭, aˬ yaw ̭ bya cehˆ ni maˬ iˇ-ehˇ, ciˬ cuˇ ni iˇ k'oeˬ-euˬ meh. 11Yuˇdaˆ tsawˇ haˬ aˬ yui ̭ aˬ tsu deuˬ, "Aˬ yaw ̭ aˬ gaˇ jawˇ ta" lehˇ naˇ haˬ naˇ haˬ-ehˇ, Bawˬ-iˬ la ̭ k'oeˇ Yeˬsuˇ-ahˇ poˆ lu ̭-eu meh. 12Tsawˇ haˬ aˇ ma ̭ la ̭ k'oeˇ, aˬ yaw ̭-euˬ gaˇ kawˆ g'awˬ mya jeˬ ja k'oeˬ lu ̭-eu meh. Tiˬ paˆ na deuˬ-aˬ, aˬ yaw ̭ muiˬ-eu gaˇ kawˆ ja-eu meh. Tiˬ paˆ na deuˬ-aˬ, k'oeˇ lo ̭-ehˇ maˬ ja ni, aˬ yaw ̭ aˬ cawˬ-ahˇ gaˇ ma sheuˬ bahˬ-eu tsawˇ haˬ meh lehˇ ja-eu meh. 13Ehˇ k'aw ̭, Yuˇdaˆ tsawˇ haˬ aˬ yui ̭ aˬ tsu deuˬ-ahˇ gaˬ leˇ gaˇ guˆ-eu miˇ neh, tiˬ g'aˬ-iˬ bya cehˆ ni maˬ ja doˆ peuˬ-a. 14Bawˬ-iˬ g'eh-eu aˇ nah aˇ yamˬ tiˬ paˆ jiˇ leˇ ngeh, Yeˬsuˇ Uˬ duˬ tahˬ nymˇ nymˇ ma-ahˇ le-awˇ mehˬ nehˬ tsoˆ nehˬ leˇ-euˬ meh. 15Yuˇdaˆ tsawˇ haˬ aˬ yui ̭ aˬ tsu deuˬ zahˬ leˇ-awˇ ehˇ-eu, "Tsawˇ haˬ heu g'aˬ tiˬ jeˬ-iˬ maˬ ya dzaw haw-euˬ gaˇ, aˇ naˆ naˆ-ehˇ siˬ nya-eu nga teu." 16Yeˬsuˇ ehˇ-eu, "Ngaˇ mehˬ-eu heu-aˬ, ngaˬ-euˬ dawˬ maˬ ngeuˇ. Ngaˬ-ahˇ k'ehˇ g'eh le ̭-euˬ Miˬyehˇ-euˬ dawˬ meh. 17Miˬyehˇ-euˬ nui k'ahˇ mˇ maw ̭-eu tsawˇ haˬ aˬ geu g'aˬ maˬ kaˬ, ngaˇ mehˬ-eu dawˬ heu Miˬyehˇ-euˬ dawˬ nga loˇ, ngaˬ-euˬ baoˬ-ahˇ g'oe-awˇ mehˬ-eu tsoˆ-eu dawˬ nga loˇ lehˇ, tseˇ paˆ geu ̭ nya teh ̭-a. 18Yawˬ ha-euˬ nui noeˬ ngehˬ-eu tmˇ-eu tsawˇ haˬ-aˬ, yawˬ ha yaw sheh ̭ k'ahˬ sehˇ za ni mˇ-eu teh ̭-a. Ehˇ k'aw ̭, yawˬ ha-ahˇ k'ehˇ g'eh le ̭-euˬ Miˬyehˇ-euˬ yaw sheh ̭ k'ahˬ sehˇ bi doˆ laˇ maw ̭-eu g'aˬ-aˬ, yaw sui yaw dawˇ jeˬ ahˇ-awˇ, yaw lehˬ tiˬ paw ̭-iˬ maˬ ahˇ-a. 19Moˇseˬ neh naw ma ̭-ahˇ Zahˇ dawˬ k'o ̭ dawˬ bi ̭ ya ̭-euˬ maˬ ngeuˇ-a loˇ. Ehˇ k'aw ̭, naw ma ̭ tiˬ g'aˬ-iˬ Zahˇ dawˬ k'o ̭ dawˬ-ahˇ maˬ caw teh-a. Aˬ jeˬ miˇ neh naw ma ̭ ngaˬ-ahˇ seh ̭-eu lehˇ leh jeh te." 20Tsawˇ haˬ aˇ ma ̭ ehˇ-eu, "Nawˇ neh ̭ uˇ-eu ngaˇ. Aˬ suˇ g'aˬ nawˬ-ahˇ seh ̭-eu g'eh nga lehˇ ehˇ te." 21Yeˬsuˇ ehˇ-eu, "Ngaˇ zahˬ leˇ paˬ-ehˇ g'eh-eu jeˬ mˇ mehˬ ngeh, naw ma ̭ zahˬ leˇ-eu meh. 22(Baˆ k'oˆ mehˬ dzaˬ yehˬ-eu zahˇ-ahˇ Moˇsehˬ neh mˇ dahˬ beh-euˬ maˬ ngeuˇ-ehˇ, aˬ yaw ̭-euˬ mehˬ hu deh ̭ dzeuˇ ya ̭-euˬ naw ma ̭-euˬ aˬ poeˬ aˬ bawˇ deuˬ neh mˇ dahˬ beh-euˬ k'aw ̭,) naw ma ̭-euˬ aˬ li deuˬ-ahˇ baˆ k'oˆ mehˬ dzaˬ yehˬ-eu g'aˇ duˬ Moˇseˬ neh dawˬ bi ̭ taˬ ya ̭-euˬ miˇ neh, Jawˇ nah ngeh nah naw ma ̭-euˬ aˬ li deuˬ-ahˇ naw ma ̭ baˆ k'oˆ mehˬ dzaˬ yehˬ-eu meh. 23Jawˇ nah ngeh nah aˬ li tiˬ li-ahˇ baˆ k'oˆ mehˬ dzaˬ yehˬ-euˬ k'oeˇ Zahˇ dawˬ k'o ̭ dawˬ-ahˇ maˬ bahˬ-a lehˇ ngeuˇ naˇ, Jawˇ nah ngeh nah tsawˇ haˬ tiˬ g'aˬ-euˬ g'awˇ mawˇ mawˇ lah-ehˇ muiˬ laˇ ni ngaˬ neh laˆ taˬ nehˬ-euˬ gaˇ, naw ma ̭ aˬ jeˬ miˇ neh nui ma pehˇ te. 24K'oeˇ taˆ paw teh ̭-ehˇ haw-awˇ daˇ-eu jeˬ-ahˇ byehˇ-awˇ, maˇ maˇ ni k'aˇ ngeuˇ-eu lo ̭-ehˇ daˇ-awˬ." 25Yeˬluˇsaˬlehˬ meuˬ-ahˇ jawˇ-eu tsawˇ haˬ tiˬ paˆ na deuˬ ehˇ-eu, "Aˬ yui ̭ aˬ tsu deuˬ seh ̭-eu lehˇ poˆ lu ̭-eu k'oeˇ heu g'aˬ-ahˇ poˆ-eu maˬ ngeuˇ-a loˇ. 26Haw sheˇ. Aˬ yaw ̭ tsawˇ haˬ heu myaˆ ni g'eh-eu mehˬ shi bya cehˆ ni dawˬ ngehˬ k'aw ̭, aˬ yaw ̭ ma ̭ aˬ yaw ̭-ahˇ tiˬ jeˬ-iˬ maˬ ehˇ nehˬ nga tawˇ. Aˬ yaw ̭ Meˬsiˇya pyeu ̭-eu ngaˇ lehˇ aˬ yui ̭ aˬ tsu deuˬ siˬ duˬ-eu miˇ neh nga loˇ. 27Aˬ diˇ ehˇ naˇ, Meˬsiˇya oe ngeh, aˬ geu gaˇ neh oe-euˬ tsawˇ haˬ tiˬ g'aˬ-iˬ maˬ ya siˬ-aˇ. Ehˇ k'aw ̭, tsawˇ haˬ heu g'aˬ aˬ gaˇ neh oe-euˬ aˬ dui ma ̭ siˬ nya ma." 28Yeˬsuˇ Uˬ duˬ tahˬ nymˇ nymˇ ma la ̭ k'oeˇ mehˬ nehˬ tsoˆ nehˬ lu ̭ ngeh, teˇ saˇ yaw k'aˆ-ehˇ heu lo ̭-ehˇ ehˇ-eu meh. "Ngaˇ aˬ suˇ g'aˬ pyeu ̭-awˇ aˬ gaˇ neh oe-euˬ naw ma ̭ siˬ duˬ ma loˇ. Ngaˇ ngaˬ-euˬ nui noeˬ oe-euˬ maˬ ngeuˇ. Ngaˬ-ahˇ k'ehˇ g'eh le ̭-euˬ g'aˬ-aˬ, yaw tsaˬ yaw dawˇ meh. Naw ma ̭ aˬ yaw ̭-ahˇ maˬ siˬ nya-a. 29Ehˇ k'aw ̭, ngaˇ aˬ yaw ̭-ahˇ siˬ nya ma. Aˬ jeˬ miˇ neh ehˇ naˇ, ngaˇ aˬ yaw ̭ jawˇ gaˇ neh oe-awˇ, aˬ yaw ̭ neh ngaˬ-ahˇ k'ehˇ g'eh le ̭-euˬ meh." 30K'oeˇ ngeh, aˬ yaw ̭ ma ̭ aˬ yaw ̭-ahˇ nyeh ̭-eu lehˇ g'eh-eu meh. Ehˇ k'aw ̭, aˬ yaw ̭-euˬ aˇ yamˬ maˬ keuˆ le dah-euˬ miˇ neh aˬ yaw ̭-ahˇ tiˬ g'aˬ-iˬ maˬ nyeh ̭ nya-a. 31Ehˇ k'aw ̭, tsawˇ haˬ aˇ ma ̭ la ̭ k'oeˇ g'awˬ mya ni aˬ yaw ̭-ahˇ jah laˇ-awˇ, heu lo ̭-ehˇ ehˇ-eu meh. "Meˬsiˇya oe ngeh, tsawˇ haˬ heu g'aˬ naˆ maˬ tseˇ zahˬ leˇ paˬ-ehˇ g'eh-eu jeˬ mˇ mehˬ la ̭ nya teh ̭-a lehˇ duˇ te loˇ." 32Tsawˇ haˬ aˇ ma ̭ k'oeˇ lo ̭-ehˇ ja k'oeˬ lu ̭ gaˇ Paˬliˬsehˇ deuˬ ya gaˬ-euˬ meh. K'oeˇ miˇ neh, piˇ ma aˬ yui ̭ deuˬ hawˇ-eu Paˬliˬsehˇ deuˬ bawˬ dzaˬ-awˇ, Yeˬsuˇ-ahˇ bi nyeh ̭-eu g'aˇ duˬ k'ehˇ g'eh-euˬ meh. 33Yeˬsuˇ ehˇ-eu, "Ngaˇ naw ma ̭ nehˬ-ehˇ tiˬ k'ehˬ jawˇ g'aˬ naˇ, ngaˬ-ahˇ k'ehˇ g'eh le ̭-euˬ g'aˬ jawˇ gaˇ g'o ̭ leˇ ma. 34Naw ma ̭ ngaˬ-ahˇ poˆ teh ̭-a. Ehˇ k'aw ̭, maˬ poˆ mawˇ nya-aˇ. Aˬ jeˬ miˇ neh ehˇ naˇ, ngaˇ jawˇ gaˇ naw ma ̭ maˬ laˇ keuˆ nya-a." 35Yuˇdaˆ tsawˇ haˬ aˬ yui ̭ aˬ tsu deuˬ yaw kaˬ heu lo ̭-ehˇ ja-eu meh. "Aˬ dui ma ̭ aˬ yaw ̭-ahˇ maˬ poˆ mawˇ nya paˬ-ehˇ aˬ yaw ̭ aˬ gaˇ iˇ-eu lehˇ nga. Heˬlaˬsaˇ tsawˇ haˬ-euˬ meuˬ deuˬ-ahˇ jawˇ-iˇ-euˬ aˬ dui-euˬ tsawˇ jeuˬ jawˇ gaˇ iˇ-awˇ, Heˬlaˬsaˇ tsawˇ haˬ deuˬ-ahˇ mehˬ-iˇ tsoˆ-iˇ-eu lehˇ nga loˇ. 36Aˬ dui ma ̭ aˬ yaw ̭-ahˇ poˆ k'aw ̭ maˬ poˆ mawˇ nya-ehˇ, aˬ yaw ̭ jawˇ gaˇ aˬ dui ma ̭ maˬ le keuˆ nya-aˇ lehˇ aˬ yaw ̭ ehˇ-eu k'oeˇ aˬ jeˬ ehˇ mawˬ-eu nga." 37Sehˬ g'awˆ-euˬ Bawˬ-iˬ g'eh-eu aˇ saˬ saˬ-eu aˇ nah pyeu ̭-eu huiˬ dui dui-eu aˇ nah k'oeˇ nah-ahˇ, Yeˬsuˇ tuˇ -awˇ, teˇ saˇ yaw k'aˆ k'aˆ-ehˇ -ehˇ-eu, "Iˇ cu ̭ k'aˇ meh ̭-eu tsawˇ haˬ ngaˇ jawˇ gaˇ laˇ-awˇ dawˇ laˇ-awˬ. 38Jaˇli ̭ la ̭ k'oeˇ ehˇ taˬ-euˬ lo ̭-ehˇ, 'Ngaˬ-ahˇ k'aˇ jah-eu tsawˇ haˬ-euˬ nui ma la ̭ k'oeˇ deh ̭-eu sa ̭ laˇ bi ̭-eu iˇ cu ̭ lawˇ gawˆ yoeˇ doˆ le teh ̭-a."' 39Yeˬsuˇ k'oeˇ lo ̭-ehˇ ehˇ-eu-aˬ, aˬ yaw ̭-ahˇ k'aˇ jah-eu tsawˇ haˬ deuˬ Yaw sahˇ Miˬyehˇ za gaˇ ehˇ maw ̭-eu meh. Aˇ yamˬ k'oeˇ yamˬ-ahˇ keuˆ ni Yaw sahˇ Miˬyehˇ maˬ bi ̭ le ̭-aˬ siˬ. Aˬ jeˬ miˇ neh ehˇ naˇ, Yeˬsuˇ-ahˇ yaw sheh ̭ k'ahˬ sehˇ la ̭ k'oeˇ maˬ ciˬ daˆ k'o ̭ le ̭-aˬ siˬ. 40Yeˬsuˇ k'oeˇ lo ̭-ehˇ ehˇ gaˇ ya gaˬ ngeh, tsawˇ haˬ aˇ ma ̭ la ̭ k'oeˇ tiˬ paˆ na deuˬ ehˇ-eu, "Tsawˇ haˬ teu g'aˬ aˬ diˇ aˬ maˇ Miˬyehˇ g'aˇ duˬ ngehˬ dah-eu tsawˇ haˬ ngaˇ." 41Yawˬ deuˬ yawˬ ehˇ-eu, "Aˬ yaw ̭ Meˬsiˇya ngaˇ." Ehˇ k'aw ̭, tiˬ deuˬ paˇ ehˇ-eu, "Meˬsiˇya Gaˬliˬlehˇ miˇ k'ahˬ-ahˇ neh maˬ oe-aˇ. 42Meˬsiˇya-aˬ, Daˬbiˇ-euˬ zaˬ deuˬ uˆ deuˬ la ̭ k'oeˇ doˆ le- ̭ awˇ, Daˬbiˇ-euˬ meuˬ pyeu ̭-eu Behˬlehˬhehˬ meuˬ-ahˇ deh ̭ le teh ̭-a lehˇ, Jaˇli ̭ la ̭ k'oeˇ ehˇ taˬ-euˬ maˬ ngeuˇ-a loˇ." 43Tsawˇ haˬ aˇ ma ̭ k'oeˇ ma ̭, Yeˬsuˇ gaˇ kawˆ tiˬ g'aˬ tiˬ jeˬ k'oeˇ lo ̭-ehˇ noeˬ-eu meh. 44Tiˬ paˆ na deuˬ aˬ yaw ̭-ahˇ nyeh ̭ maw ̭-eu meh. Ehˇ k'aw ̭, a yaw ̭-ahˇ tiˬ g'aˬ-iˬ maˬ nyeh ̭ nya-a. 45Yehˇ k'oeˇ deuˬ g'o ̭ keuˆ leˇ ngeh, piˇ ma aˬ yui ̭ deuˬ hawˇ-eu Paˬliˬsehˇ deuˬ ehˇ-eu, "Aˬ jeˬ miˇ neh naw ma ̭ aˬ yaw ̭-ahˇ maˬ nyeh ̭ la ̭ teˬ." 46Yehˇ k'oeˇ deuˬ ehˇ-eu, "Tsawˇ haˬ tiˬ g'aˬ-iˬ tsawˇ haˬ heu g'aˬ lo ̭-ehˇ dawˬ ngehˬ-eu maˬ gaˬ haw-aˬ." 47Paˬliˬsehˇ deuˬ ehˇ-eu, "Naw ma ̭ g'eh aˬ yaw ̭ neh paˇ bi laˆ jah teˬ loˇ. 48Aˬ yui ̭ aˬ tsu deuˬ hawˇ-eu Paˬliˬsehˇ deuˬ la ̭ k'oeˇ aˬ yaw ̭-ahˇ jah-eu tsawˇ haˬ tiˬ g'aˬ na mawˇ haw teˬ loˇ. 49Haw taˬ-awˬ. Tsawˇ haˬ aˇ ma ̭ k'oeˇ ma ̭ Moˇseˬ-euˬ Zahˇ dawˬ k'o ̭ dawˬ maˬ siˬ nya-eu miˇ neh Miˬyehˇ neh yaˬ k'ehˇ bi yaˬ teh ̭-a." 50Yaw beh Yeˬsuˇ jawˇ gaˇ iˇ-euˬ Niˇgawˇdeˬ lehˇ myahˇ-euˬ k'oeˇ g'aˬ k'aw ̭, Paˬliˬsehˇ k'oeˇ deuˬ la ̭ k'oeˇ ahˇ-eu meh. 51Aˬ yaw ̭ ehˇ-eu, "Aˬ dui-euˬ Zahˇ dawˬ k'o ̭ dawˬ-ahˇ tsaˬ ni ya ehˇ naˇ, tsawˇ haˬ tiˬ g'aˬ-ahˇ, aˬ yaw ̭ neh ngehˬ-euˬ dawˬ maˬ ya gaˬ duˬ-ehˇ, aˬ yaw ̭ neh mˇ-euˬ gaˇ deuˬ-ahˇ maˬ ya siˬ duˬ k'oeˇ keuˆ ni, aˬ yaw ̭-ahˇ yaˇ k'aˬ maˬ daˇ nya-aˇ." 52Aˬ yaw ̭ ma ̭ aˬ yaw ̭-ahˇ ehˇ-eu, "Nawˇ g'eh Gaˬliˬlehˇ miˇ k'ahˬ-ahˇ neh oe-euˬ tsawˇ haˬ te loˇ. Jaˇli ̭-ahˇ gui duˬ haw sheˇ. Miˬyehˇ g'aˇ duˬ ngehˬ dah-eu tsawˇ haˬ tiˬ g'aˬ-iˬ Gaˬliˬlehˇ miˇ k'ahˬ-ahˇ neh maˬ doˆ le haw-euˬ nawˇ ya siˬ duˬ teh ̭-a." 53K'oeˇ lo ̭-ehˇ ehˇ g'aˬ ngeh jawˇ, aˬ yaw ̭ ma ̭ yawˬ g'aˬ na lu ̭ g'o ̭-iˇ jiˇ-euˬ meh.

will be added

X\