YOˇHAˬ 6

1K'oeˇ naˇ, Gaˬliˬlehˇ lah-euˬ nui baˬ-ahˇ Yeˬsuˇ tsehˆ-iˇ-euˬ meh. (Gaˬliˬlehˇ lah-ahˇ Deˬbeˬliˇ lah lehˇ k'aw ̭ kuˇ-eu meh.) 2Tsawˇ haˬ aˇ ma ̭ ma ̭ ma aˬ yaw ̭-euˬ mehˬ nah caw teh g'eh-euˬ meh. Aˬ jeˬ miˇ neh ehˇ naˇ, aˬ yaw ̭ neh mˇ-euˬ zahˬ leˇ paˬ-ehˇ g'eh-eu naˇ-eu tsawˇ haˬ deuˬ-ahˇ laˆ taˬ nehˬ-euˬ jeˬ-ahˇ aˬ yaw ̭ ma ̭ ya mawˇ haw-euˬ meh. 3Yeˬsuˇ gawˬ duˇ tiˬ duˇ-ahˇ daˆ leˇ-awˇ, aˬ yaw ̭-euˬ zaˬ lahˇ deuˬ nehˬ-ehˇ nuiˇ-euˬ meh. 4Yuˇdaˆ tsawˇ haˬ deuˬ-euˬ bawˬ-iˬ pyeu ̭-eu Baˬsaˬkaˬ Bawˬ-iˬ g'eh-eu aˇ yamˬ keuˆ laˇ taˬ-euˬ meh. 5Yeˬsuˇ haw g'eh ngeh, tsawˇ haˬ aˇ ma ̭ ma ̭ ma uiˬ laˇ lu ̭ gaˇ ya mawˇ-awˇ, "Tsawˇ haˬ heu deuˬ-ahˇ bi dzaˬ bi dawˇ-eu g'aˇ duˬ, dzaˬ dzaˬ dawˇ dawˇ aˬ gaˇ zeuˇ lo ̭ laˬ-iˇ nmˇ" lehˇ, Piˇliˇpuˆ-ahˇ naˇ haˬ-euˬ meh. 6Piˇliˇpuˆ-euˬ nui ma-ahˇ lawˬ haw maw ̭-eu miˇ neh, k'oeˇ lo ̭-ehˇ naˇ haˬ-euˬ meh. Maˇ maˇ ni ehˇ naˇ, Yeˬ suˇ-aˬ, aˬ joˆ-ehˇ ya jahˇ-eu gaˇ kawˆ siˬ duˬ taˬ-awˇ jawˇ-eu meh. 7Piˇliˇpuˆ ehˇ-eu, "Tsawˇ haˬ heu deuˬ-ahˇ tiˬ g'aˬ ui cuiˆ ui cuiˆ bi dzaˬ-eu kaˬ muˇ zeuˇ k'aw ̭, pyuˇ maˇ byaˆ nyiˬ yaˇ byaˆ neh maˬ zeuˇ lo ̭ nya-aˇ." 8Yeˬsuˇ-euˬ zaˬ lahˇ yawˬ g'aˬ yawˬ pyeu ̭-eu Siˇmoˬ Beˬtuˆluˆ-euˬ aˬ nyiˇ Aˬdehˬlehˬ heu lo ̭-ehˇ ehˇ-eu meh. 9"Lawˬ loeˇ neh jahˇ taˬ-euˬ kaˬ muˇ ngaˬ yaˆ hawˇ-eu ngaˬ shaˬ nyiˬ mawˇ pi lu ̭-eu aˬ li tiˬ li jawˇ meh. Ehˇ k'aw ̭, tsawˇ haˬ heu deuˬ-ahˇ aˬ joˆ-ehˇ jahˇ-awˇ biˇ o ̭ nehˬ nya nmˇ." 10Yeˬsuˇ aˬ yaw ̭ ma ̭-ahˇ ehˇ nehˬ-eu, "Tsawˇ haˬ dawˬ tawˆ lu ̭ bi nuiˇ jiˇ-awˬ." Jawˇ duˬ k'oeˇ tsahˇ-aˬ, daˬ zawˬ deh pyeu ̭-awˇ, tsawˇ haˬ dawˬ tawˆ lu ̭ k'oeˇ gaˇ nuiˇ jiˇ-euˬ meh. K'aˬ dzeˇ zaˬ deuˬ teh ̭-ehˇ ngaˬ heˇ g'aˬ dawˬ peh byah-eu meh. 11Yeˬsuˇ kaˬ muˇ k'oeˇ yuˇ-awˇ, Miˬyehˇ-euˬ guiˬ lahˬ-ahˇ ja ceuˬ-awˇ, k'oeˇ gaˇ nuiˇ lu ̭-eu tsawˇ haˬ k'oeˇ deuˬ-ahˇ bi biˇ nehˬ-euˬ meh. Ngaˬ shaˬ k'oeˇ k'aw ̭, k'oeˇ lo ̭-ehˇ bi biˇ nehˬ-euˬ meh. Tsawˇ haˬ dawˬ tawˆ lu ̭ tiˬ dehˆ dzaˬ-euˬ meh. 12Aˬ yaw ̭ ma ̭ dzaˬ dehˆ g'aˬ jiˇ ngeh, "K'aˇ dzehˬ laˇ-euˬ dawˬ tawˆ lu ̭ tiˬ paw ̭-iˬ maˬ bi cawˆ-iˇ ni g'oˆ uiˬ jiˇ-awˬ" lehˇ, zaˬ lahˇ deuˬ-ahˇ aˬ yaw ̭ ehˇ nehˬ-euˬ meh. 13K'oeˇ naˇ, lawˬ loeˇ kaˬ muˇ k'oeˇ ngaˬ yaˆ-ahˇ tsawˇ haˬ k'oeˇ deuˬ dzaˬ dehˆ g'aˬ-awˇ, dzeˇ laˇ-euˬ deuˬ paˇ g'oˆ uiˬ ngeh, k'aˆ puˬ tseˇ nyi ̭ puˬ byah laˇ-euˬ meh. 14Yeˬsuˇ neh mˇ-euˬ zahˬ leˇ paˬ-ehˇ g'eh-eu k'oeˇ-ahˇ tsawˇ haˬ k'oeˇ deuˬ ya mawˇ ngeh, "Tsawˇ haˬ heu g'aˬ-aˬ, maˇ maˇ ni miˇ tsaˬ k'oeˇ taˆ oe meh lehˇ ehˇ taˬ-euˬ Miˬyehˇ g'aˇ duˬ ngehˬ dah-eu k'oeˇ g'aˬ ngaˇ" lehˇ ehˇ-eu meh. 15Aˬ yaw ̭ ma ̭ aˬ yaw ̭-ahˇ nyeh ̭-awˇ, sahˬ paˬ maˬ geu ̭-ehˇ maˬ juˬ ni jahˇ teh ̭-a lehˇ Yeˬsuˇ siˬ duˬ taˬ-euˬ miˇ neh, gawˬ duˇ paw paˇ le daˆ le ̭-euˬ meh. 16Uˬ ci ̭ ci ̭ le ngeh, Yeˬ suˇ-euˬ zaˬ lahˇ deuˬ lah-ahˇ g'o ̭ ka le-euˬ meh. 17Aˬ yaw ̭ ma ̭ lawˬ-ahˇ dziˬ leˇ-awˇ, lah nui baˬ paw jaˆ-eu Gaˬbeˬneˬoˬ meuˬ-ahˇ g'o ̭ tsehˆ-iˇ-euˬ meh. Uˬ ci ̭ zahˇ le-euˬ k'aw ̭, aˬ yaw ̭ ma ̭ jawˇ gaˇ Yeˬsuˇ maˬ g'o ̭ doˆ le-a. 18K'oeˇ naˇ, jaˬ lehˇ lehˇ ma baw laˇ-awˇ, iˇ luˆ dzeh dui dui-eu meh. 19Aˬ yaw ̭ ma ̭ lawˬ heu g'eh le ̭-euˬ smˬ laˇ oeˬ laˇ ehˇ g'aˬ ni byah laˇ ngeh, Yeˬsuˇ iˇ cu ̭ k'oeˇ taˆ gaˇ ma cah cah-ehˇ aˬ yaw ̭ ma ̭ jawˇ gaˇ oe lu ̭-eu ya mawˇ-awˇ, guˆ dui dui-iˇ-euˬ meh. 20"Taˬ guˆ. Ngaˇ ma." lehˇ aˬ yaw ̭ ma ̭-ahˇ Yeˬsuˇ ehˇ nehˬ-euˬ meh. 21K'oeˇ naˇ, aˬ yaw ̭ ma ̭ laˬ k'aˬ tiˬ cehˇ aˬ yaw ̭-ahˇ lawˬ la ̭ k'oeˇ bi uˇ laˇ-euˬ meh. Tiˬ k'ehˇ laˇ k'ehˬ la ̭ k'oeˇ, aˬ yaw ̭ ma ̭ iˇ lu ̭-eu lawˇ deh k'oeˇ tsahˇ-ahˇ iˇ keuˆ-euˬ meh. 22Lah lah dzeˇ lawˬ tiˬ laˇ teh ̭-ehˇ jaˆ-awˇ, lawˬ k'oeˇ laˇ-ahˇ zaˬ lahˇ deuˬ nehˬ-ehˇ Yeˬsuˇ maˬ dziˬ-ehˇ, zaˬ lahˇ deuˬ teh ̭-ehˇ dziˬ-awˇ doˆ-iˇ-euˬ gaˇ kawˆ, lah nui baˬ-ahˇ jawˇ ya ̭-euˬ tsawˇ haˬ aˇ ma ̭ k'oeˇ ma ̭ yawˬ nah yawˬ siˬ duˬ-euˬ meh. 23Ehˇ k'aw ̭, Sahˬpaˬ Yeˬsuˇ neh Miˬyehˇ-euˬ guiˬ lahˬ-ahˇ ja ceuˬ-awˇ aˬ yaw ̭ ma ̭ kaˬ muˇ dzaˬ-euˬ jawˇ duˬ k'oeˇ tsahˇ-euˬ dawˬ peh, Deˬbeˬliˇ meuˬ-ahˇ neh lawˬ tiˬ deuˬ oe-euˬ meh. 24Yeˬsuˇ maˬ ehˇ, aˬ yaw ̭-euˬ zaˬ lahˇ deuˬ maˬ ehˇ, k'oeˇ gaˇ maˬ paˇ jawˇ-euˬ gaˇ tsawˇ haˬ aˇ ma ̭ k'oeˇ ma ̭ ya mawˇ ngeh, Yeˬsuˇ-ahˇ poˆ-iˇ-eu g'aˇ duˬ, lawˬ k'oeˇ deuˬ-ahˇ dziˬ-awˇ Gaˬbeˬneˬoˬ meuˬ-ahˇ iˇ-euˬ meh. 25Lah k'oeˇ baˬ-ahˇ tsawˇ haˬ k'oeˇ deuˬ Yeˬsuˇ-ahˇ poˆ mawˇ ngeh, "Saˬ laˬ-oˇ, nawˇ heu gaˇ aˬ myah oe keuˆ teˬ" lehˇ naˇ haˬ-euˬ meh. 26Yeˬ suˇ aˬ yaw ̭ ma ̭-ahˇ ehˇ nehˬ-eu, "Ngaˇ naw ma ̭-ahˇ maˇ jawˆ ni ehˇ nehˬ nyaˇ. Naw ma ̭ kaˬ muˇ tiˬ dehˆ ya dzaˬ-euˬ miˇ neh ngaˬ-ahˇ poˆ-eu meh. Ngaˬ neh mˇ-euˬ zahˬ leˇ paˬ-ehˇ g'eh-eu jeˬ-euˬ dawˬ tsui ̭ g'oˆ shaw-euˬ miˇ neh poˆ-eu maˬ ngeuˇ-a. 27Bu ̭-iˇ cehˇ-iˇ nya-eu dzaˬ dzaˬ dawˇ dawˇ g'aˇ duˬ maˬ leh jeh ni, mˬ maˬ maˬ byaˆ zaˇ ziˇ bi deh ̭-eu dzaˬ dzaˬ dawˇ dawˇ g'aˇ duˬ leh jeh-awˬ. Tsawˇ haˬ-euˬ Zaˬmaˇ pyeu ̭-eu ngaˇ naw ma ̭-ahˇ dzaˬ dzaˬ dawˇ dawˇ k'oeˇ jeˬ bi ̭ ma. Aˬ jeˬ miˇ neh ehˇ naˇ, Aˬda Miˬyehˇ ngaˬ-ahˇ nui ma tsaˬ-awˇ juˬ diˬ taˬ-euˬ meh." 28Aˬ yaw ̭ ma ̭ aˬ yaw ̭-ahˇ naˇ haˬ-eu, "Miˬyehˇ-euˬ gaˇ mˇ-eu lehˇ nga ma ̭ aˬ geuˬ jeˬ ya mˇ ta." 29Yeˬsuˇ ehˇ-eu, "Miˬyehˇ-euˬ gaˇ-aˬ, aˬ yaw ̭ neh k'ehˇ g'eh le ̭-euˬ g'aˬ-ahˇ naw ma ̭ jah-eu k'oeˇ meh." 30Aˬ yaw ̭ ma ̭ ehˇ-eu, "Nga ma ̭ nawˬ-ahˇ jah laˇ ni nawˇ zahˬ leˇ paˬ-ehˇ g'eh-eu aˬ geu jeˬ mˇ mehˬ nmˇ. Nawˇ aˬ geu jeˬ mˇ mehˬ-eu g'eh te. 31'Aˬ yaw ̭ neh aˬ yaw ̭ ma ̭-ahˇ mˬ taˆ-euˬ kaˬ muˇ bi dzaˬ-euˬ meh' lehˇ Jaˇli ̭ la ̭ k'oeˇ ehˇ taˬ-euˬ lo ̭-ehˇ, nga ma ̭-euˬ aˬ poeˬ aˬ bawˇ deuˬ bawˇ tsahˬ bawˇ dahˇ k'aˇ shui ̭ deh yaˇ-ahˇ cah ngeh, maˬ naˆ kaˬ muˇ ya dzaˬ-euˬ meh." 32Yeˬsuˇ ehˇ-eu, "Ngaˇ naw ma ̭-ahˇ maˇ jawˆ ni ehˇ nehˬ nyaˇ. Moˇseˬ neh naw ma ̭-ahˇ bi dzaˬ-euˬ k'oeˇ-aˬ, mˬ taˆ-euˬ kaˬ muˇ maˬ ngeuˇ-a. Naw ma ̭-ahˇ maˇ maˇ ni g'eh-eu mˬ taˆ kaˬ muˇ bi ̭-eu g'aˬ-aˬ, ngaˬ Da meh. 33Aˬ jeˬ miˇ neh ehˇ naˇ, Miˬyehˇ neh bi ̭ le ̭-euˬ kaˬ muˇ lehˇ ehˇ-eu k'oeˇ-aˬ, mˬ k'oeˇ taˆ neh za ̭ ka le-awˇ, miˇ tsaˬ zaˬ-ahˇ deh ̭-eu sa ̭ laˇ bi ̭ le-euˬ g'aˬ-ahˇ ehˇ-eu meh." 34Aˬ yaw ̭ ma ̭ ehˇ-eu, "Saˬ laˬ-oˇ, kaˬ muˇ k'oeˇ jeˬ nga ma ̭-ahˇ aˬ myah lu ̭ bi dzaˬ la ̭-awˬ." 35Yeˬsuˇ aˬ yaw ̭ ma ̭-ahˇ ehˇ nehˬ-eu, "Ngaˇ-aˬ, sa ̭ laˇ bi deh ̭-eu kaˬ muˇ ma. Ngaˇ jawˇ gaˇ k'aˇ laˇ-eu tsawˇ haˬ-aˬ, tiˬ jawˇ-iˬ hawˬ maˬ paˇ meh ̭-aˇ. Ngaˬ-ahˇ k'aˇ jah-eu tsawˇ haˬ-aˬ, tiˬ jawˇ-iˬ iˇ cu ̭ maˬ paˇ meh ̭-aˇ. 36Naw ma ̭ ngaˬ-ahˇ mawˇ-euˬ k'aw ̭ maˬ jah-aˇ lehˇ, naw ma ̭-ahˇngaˇ ehˇ nehˬ-euˬ ma. 37Ngaˬ Da neh ngaˬ-ahˇ k'aˇ bi ̭ la ̭-euˬ tsawˇ haˬ yawˬ g'aˬ yawˬ na lu ̭ ngaˇ jawˇ gaˇ laˇ teh ̭-a. Ngaˇ jawˇ gaˇ laˇ-eu tsawˇ haˬ aˬ geu g'aˬ-ahˇ maˬ kaˬ, ngaˇ maˬ ha geu ̭ nehˬ ni maˬ byehˇ. 38Aˬ jeˬ miˇ neh ehˇ naˇ, ngaˇ mˬ k'oeˇ taˆ neh oe-euˬ-aˬ, ngaˬ-euˬ nui k'ahˇ mˇ le-euˬ maˬ ngeuˇ. Ngaˬ-ahˇ k'ehˇ g'eh le ̭-euˬ g'aˬ-euˬ nui k'ahˇ mˇ le-euˬ ma. 39Ngaˬ-ahˇ k'ehˇ g'eh le ̭-euˬ g'aˬ-euˬ nui k'ahˇ-aˬ, ngaˬ-ahˇ k'aˇ bi ̭ la ̭-euˬ dawˬ tawˆ lu ̭, tiˬ g'aˬ-iˬ maˬ ya byoˆ-iˇ-eu uˬ ta ̭, aˇ saˬ saˬ ngeh nah yawˬ g'aˬ yawˬ na lu ̭ bi g'o ̭ deh ̭ laˇ-eu g'aˇ duˬ pyeu ̭-eu meh. 40Ngaˬ Da-euˬ nui k'ahˇ-aˬ, Zaˬmaˇ-ahˇ mawˇ-awˇ k'aˇ jah-eu tsawˇ haˬ dawˬ tawˆ lu ̭, mˬ maˬ maˬ byaˆ zaˇ ziˇ deh ̭-eu jeˬ bi za-eu g'aˇ duˬ meh. Aˇ saˬ saˬ ngeh nah, aˬ yaw ̭ ma ̭-ahˇ ngaˇ bi g'o ̭ deh ̭ laˇ ma." 41"Ngaˇ-aˬ, mˬ k'oeˇ taˆ neh oe-euˬ kaˬ muˇ ma" lehˇ aˬ yaw ̭ ehˇ-eu miˇ neh, tsawˇ haˬ k'oeˇ deuˬ aˬ yaw ̭-ahˇ toˇ-eu meh. 42Aˬ yaw ̭ ma ̭ ehˇ-eu, "Tsawˇ haˬ teu g'aˬ Yoˇsehˆ-euˬ aˬ li Yeˬsuˇ maˬ ngeuˇ-a loˇ. Aˬ yaw ̭-euˬ aˬ da aˬ ma-ahˇ aˬ dui ma ̭ siˬ nya ma. Aˬ yawˇ yaw ̭ mˬ k'oeˇ taˆ neh oe-euˬ ma lehˇ aˬ joˆ-ehˇ ehˇ nya-eu nga." 43Yeˬsuˇ ehˇ-eu, "Naw ma ̭ ngaˬ-ahˇ maˬ toˇ ni naˬ leˇ sheˇ. 44Aˬda neh sheuˬ ha laˇ-euˬ maˬ ngeuˇ naˇ, tsawˇ haˬ tiˬ g'aˬ-iˬ ngaˇ jawˇ gaˇ maˬ laˇ nya-a. Aˬda neh sheuˬ ha laˇ-euˬ tsawˇ haˬ-ahˇ, aˇ saˬ saˬ ngeh nah ngaˇ bi g'o ̭ deh ̭ laˇ ma. 45"'Tsawˇ haˬ yawˬ g'aˬ na lu ̭-ahˇ Miˬyehˇ mehˬ nehˬ tsoˆ nehˬ teh ̭-a' lehˇ, Miˬyehˇ g'aˇ duˬ ngehˬ dah-eu tsawˇ haˬ deuˬ neh bo ̭ taˬ-euˬ jaˆ-eu meh. Aˬda-euˬ dawˬ ya gaˬ-awˇ dzaw geu ̭-eu tsawˇ haˬ aˬ geu g'aˬ maˬ kaˬ, ngaˇ jawˇ gaˇ laˇ teh ̭-a. 46Heu lo ̭-ehˇ ehˇ-eu-aˬ, tsawˇ haˬ tiˬ g'aˬ na Aˬda-ahˇ mawˇ haw-euˬ meh lehˇ ehˇ maw ̭-eu maˬ ngeuˇ. Miˬyehˇ jawˇ gaˇ neh oe-euˬ g'aˬ teh ̭-ehˇ Aˬda-ahˇ mawˇ haw-euˬ meh. 47Ngaˇ naw ma ̭-ahˇ maˇ jawˆ ni ehˇ nehˬ nyaˇ. Jah-eu tsawˇ haˬ mˬ maˬ maˬ byaˆ zaˇ ziˇ deh ̭-eu jeˬ za-eu meh. 48Ngaˇ-aˬ, sa ̭ laˇ bi deh ̭-eu kaˬ muˇ ma. 49Naw ma ̭-euˬ aˬ poeˬ aˬ bawˇ deuˬ bawˇ tsahˬ bawˇ dahˇ k'aˇ shui ̭ deh yaˇ-ahˇ cah ngeh, maˬ naˆ kaˬ muˇ ya dzaˬ-euˬ ngeuˇ meh. Ehˇ k'aw ̭, aˬ yaw ̭ ma ̭ tiˬ jawˇ-iˬ maˬ shiˇ ni deh ̭-euˬ maˬ ngeuˇ-a. 50Mˬ k'oeˇ taˆ neh oe-euˬ kaˬ muˇ heu-aˬ, k'aˇ dzaˬ-eu tsawˇ haˬ-ahˇ tiˬ jawˇ-iˬ maˬ shiˇ ni bi deh ̭-eu meh. 51Ngaˇ-aˬ, mˬ k'oeˇ taˆ neh oe-euˬ deh ̭ lu ̭-eu kaˬ muˇ ma. Kaˬ muˇ heu-ahˇ k'aˇ dzaˬ-eu tsawˇ haˬ-aˬ, mˬ maˬ maˬ byaˆ zaˇ ziˇ deh ̭ teh ̭-a. Ngaˇ bi ̭-eu kaˬ muˇ-aˬ, ngaˬ-euˬ g'awˇ mawˇ ma. Miˇ tsaˬ zaˬ deuˬ sa ̭ laˇ deh ̭-eu jeˬ za ni bi ̭-eu ma." 52Yeˬsuˇ k'oeˇ lo ̭-ehˇ ehˇ gaˇ tsawˇ haˬ k'oeˇ deuˬ nui ma pehˇ laˇ-awˇ, aˬ yaw ̭ ma ̭ yaw kaˬ ja dui dui-awˇ ehˇ-eu, "Tsawˇ haˬ teu g'aˬ aˬ yaw ̭-euˬ g'awˇ mawˇ aˬ dui-ahˇ bi ̭-awˇ aˬ joˆ-ehˇ bi dzaˬ nya-eu lehˇ ehˇ ta." 53Yeˬsuˇ aˬ yaw ̭ ma ̭-ahˇ ehˇ nehˬ-eu, "Ngaˇ naw ma ̭-ahˇ maˇ jawˆ ni ehˇ nehˬ nyaˇ. Naw ma ̭ Tsawˇhaˬ-euˬ Zaˬmaˇ-euˬ shaˬ jiˇ maˬ dzaˬ-ehˇ, aˬ yaw ̭-euˬ shiˬ maˬ dawˇ naˇ, deh ̭-eu sa ̭ laˇ maˬ za nya-a. 54Ngaˬ-euˬ shaˬ jiˇ dzaˬ-awˇ ngaˬ-euˬ shiˬ k'aˇ dawˇ-eu tsawˇ haˬ-aˬ, mˬ maˬ maˬ byaˆ zaˇ ziˇ deh ̭-eu jeˬ za-eu meh. Aˇ saˬ saˬ ngeh nah, aˬ yaw ̭-ahˇ ngaˇ bi g'o ̭ deh ̭ laˇ ma. 55Aˬ jeˬ miˇ neh ehˇ naˇ, ngaˬ-euˬ shaˬ jiˇ-aˬ, maˇ maˇ ni g'eh-eu dzaˬ-eu jeˬ pyeu ̭-awˇ, ngaˬ-euˬ shiˬ-aˬ, maˇ maˇ ni g'eh-eu dawˇ-eu jeˬ pyeu ̭-eu ma. 56Ngaˬ-euˬ shaˬ jiˇ dzaˬ-awˇ ngaˬ-euˬ shiˬ dawˇ-eu tsawˇ haˬ-aˬ, ngaˬ-euˬ la ̭ k'oeˇ jawˇ-eu tsawˇ haˬ pyeu ̭-awˇ, ngaˇ k'aw ̭, aˬ yaw ̭-euˬ la ̭ k'oe jawˇ-eu ma. 57Deh ̭ lu ̭-eu Aˬda neh ngaˬ-ahˇ k'ehˇ g'eh le ̭-euˬ meh. Ngaˇ k'aw ̭, aˬ yaw ̭ baˬ da neh deh ̭ lu ̭-eu ma. K'oeˇ gaˇ duˇ ni, ngaˬ-ahˇ k'aˇ dzaˬ-eu tsawˇ haˬ-aˬ, ngaˇ baˬ da neh deh ̭ teh ̭-a. 58Heu-aˬ, mˬ k'oeˇ taˆ neh oe-euˬ kaˬ muˇ meh. Kaˬ muˇ heu-aˬ, naw ma ̭-euˬ aˬ poeˬ aˬ bawˇ deuˬ neh dzaˬ-euˬ kaˬ muˇ k'oeˇ-ahˇ maˬ duˇ-a. Aˬ yaw ̭ ma ̭-aˬ, kaˬ muˇ k'oeˇ dzaˬ-euˬ k'aw ̭ shiˇ-euˬ meh. Ehˇ k'aw ̭, kaˬ muˇ heu-ahˇ dzaˬ-eu tsawˇ haˬ-aˬ, mˬ maˬ maˬ byaˆ zaˇ ziˇ ya deh ̭ meh." 59Gaˬbeˬneˬoˬ meuˬ-ahˇ jaˆ-eu Yuˇdaˆ tsawˇ haˬ-euˬ uˬ duˬ tahˬ nymˇ la ̭ k'oeˇ Yeˬsuˇ mehˬ nehˬ tsoˆ nehˬ ngeh, k'oeˇ lo ̭-ehˇ ehˇ-euˬ meh. 60Yeˬsuˇ k'oeˇ lo ̭-ehˇ ehˇ gaˇ ya gaˬ ngeh, aˬ yaw ̭-euˬ zaˬ lahˇ g'awˬ mya g'aˬ ehˇ-eu, "Aˬ yaw ̭ mehˬ-euˬ gaˇ kawˆ teu hmˬ teu naˆ naˆ-ehˇ k'aˆ-eu beu tawˇ. Aˬ suˇ g'aˬ ha geu ̭ coeˇ paˬ nga." 61Aˬ yaw ̭ ma ̭ k'oeˇ lo ̭-ehˇ toˇ lu ̭-eu gaˇ kawˆ aˬ cawˬ Yeˬsuˇ-ahˇ maˬ ehˇ nehˬ-euˬ k'aw ̭, Yeˬsuˇ siˬ nya-awˇ, aˬ yaw ̭ ma ̭-ahˇ heu lo ̭-ehˇ ehˇ nehˬ-euˬ meh. "Ngaˇ heu lo ̭-ehˇ ehˇ-eu miˇ neh, jah-eu jeˬ-ahˇ naw ma ̭ byehˇ dzeh maw ̭-eu nya loˇ. 62Toˆ-ehˇ maˇ-iˬ, Tsawˇhaˬ-euˬ Zaˬmaˇ aˬ yaw ̭-euˬ jawˇ duˬ-ahˇ paˇ daˆ g'o ̭ leˇ naˇ, naw ma ̭ aˬ joˆ-ehˇ jahˇ nmˇ. 63Naw ma ̭-ahˇ deh ̭-eu sa ̭ laˇ bi ̭-euˬ-aˬ, Miˬyehˇ-euˬ Yaw sahˇ meh. Tsawˇ haˬ zaˬ-euˬ baoˬ neh tiˬ jeˬ-iˬ maˬ g'eh nya-a. Ngaˬ neh naw ma ̭-ahˇ ehˇ-euˬ gaˇ kawˆ heu-aˬ, deh ̭-eu sa ̭ laˇ bi ̭-eu Miˬyehˇ-euˬ Yaw sahˇ-ahˇ naw ma ̭ bi za nya-eu g'aˇ duˬ pyeu ̭-eu ma. 64Ehˇ k'aw ̭, naw ma ̭ la ̭ k'oeˇ tiˬ paˆ na deuˬ maˬ jah nga siˬ." (Aˬ geu deuˬ maˬ jah-eu tsawˇ haˬ pyeu ̭-awˇ, aˬ geu g'aˬ aˬ yaw ̭-ahˇ ahˬ dzaˬ teh ̭-a lehˇ, na ̭ ngeh neh Yeˬsuˇ siˬ nya taˬ-euˬ meh.) 65Aˬ yaw ̭ paˇ ehˇ-eu, "K'oeˇ miˇ neh, Aˬda neh bi laˇ-euˬ maˬ ngeuˇ naˇ, tsawˇ haˬ tiˬ g'aˬ-iˬ ngaˇ jawˇ gaˇ maˬ laˇ nya-a lehˇ, naw ma ̭-ahˇ ngaˇ ehˇ nehˬ-euˬ ma." 66K'oeˇ lo ̭-ehˇ ehˇ-euˬ baˬ da neh, Yeˬsuˇ-euˬ mehˬ nah caw teh-eu tsawˇ haˬ g'awˬ mya g'aˬ g'o ̭-iˇ-awˇ, aˬ yaw ̭-euˬ mehˬ nah maˬ paˇ caw teh ni byehˇ-euˬ meh. 67K'oeˇ ngeh, "Naw ma ̭ g'eh byehˇ-awˇ g'o ̭-iˇ maw ̭-eu nya loˇ" lehˇ, zaˬ lahˇ tseˇ nyi ̭ g'aˬ-ahˇ Yeˬsuˇ ehˇ nehˬ-euˬ meh. 68Siˇmoˬ Beˬtuˆluˆ ehˇ-eu, "Sahˬpaˬ-oˇ, mˬ maˬ maˬ byaˆ zaˇ ziˇ deh ̭-eu jeˬ bi ̭-eu dawˬ nawˇ jawˇ gaˇ jaˆ ngeh keuˆ keuˆ-ehˇ-aˬ, nga ma ̭ aˬ suˇ g'aˬ jawˇ gaˇ paˇ iˇ nmˇ. 69Nawˇ-aˬ, Miˬyehˇ jawˇ gaˇ neh oe-euˬ Muiˬ-eu Shawˇ-eu G'aˬ meh lehˇ nga ma ̭ siˬ duˬ jah duˬ g'aˬ-euˬ ma." 70Yeˬsuˇ ehˇ-eu, "Naw ma ̭ tseˇ nyi ̭ g'aˬ-ahˇ ngaˬ neh tseˇ doˆ-euˬ maˬ ngeuˇ-a loˇ. Ehˇ k'aw ̭, naw ma ̭ la ̭ k'oeˇ tiˬ g'aˬ-aˬ, Neh ̭sahˬpaˬ meh." 71Yeˬsuˇ k'oeˇ lo ̭-ehˇ ehˇ-eu-aˬ, Siˇmoˬ Iˇsaˬgaˬliˬoˆ-euˬ aˬ li Yuˇdaˆ Iˇsaˬgaˬliˬoˆ-ahˇ ehˇ maw ̭-eu meh. Aˬ jeˬ miˇ neh ehˇ naˇ, Yuˇdaˆ-aˬ, zaˬ lahˇ tseˇ nyi ̭ g'aˬ la ̭ k'oeˇ ahˇ-eu k'aw ̭, Yeˬsuˇ-ahˇ ahˬ dzaˬ-eu lehˇ g'eh-eu meh.

will be added

X\