YOˇHAˬ 13

1Baˬsaˬkaˬ Bawˬ-iˬ keuˆ le-eu mehˬ hu ngeh nah, aˬ yaw ̭ miˇ tsaˬ heu-ahˇ g'awˬ-iˇ-awˇ, Aˬda jawˇ gaˇ ya g'o ̭ leˇ-eu aˇ yamˬ tsaˬ laˇ-euˬ gaˇ kawˆ Yeˬsuˇ siˬ nya-eu meh. Miˇtsaˬ k'oeˇ taˆ jawˇ-eu aˬ yaw ̭-ahˇ jah-eu tsawˇ haˬ deuˬ-ahˇ aˬ yaw ̭ gaˬ-awˇ, aˇ saˬ saˬ ngeh keuˆ ni gaˬ-euˬ meh. 2Yeˬsuˇ hawˇ-eu aˬ yaw ̭-euˬ zaˬ lahˇ deuˬ ci ̭ hawˬ dzaˬ lu ̭-eu meh. Siˇmoˬ Iˇsaˬgaˬliˬoˆ-euˬ aˬ li Yuˇdaˆ-euˬ nui ma la ̭ k'oeˇ, Yeˬsuˇ-ahˇ ahˬ dzaˬ maw ̭-eu nui ma Neh ̭sahˬpaˬ neh dawˆ ahˇ g'aˬ nehˬ-euˬ meh. 3Aˬda neh Yeˬsuˇ-ahˇ baoˬ tiˬ byah ni bi ̭ taˬ-euˬ gaˇ kawˆ Yeˬsuˇ siˬ nya-eu meh. Aˬ yaw ̭ Aˬda jawˇ gaˇ neh oe-awˇ, Aˬda jawˇ gaˇ ya g'o ̭ leˇ-eu gaˇ kawˆ k'aw ̭, siˬ nya-eu meh. 4K'oeˇ miˇ neh, aˬ yaw ̭ hawˬ jeh-ahˇ tuˇ-awˇ, k'oeˇ taˆ dm lu ̭-eu pehˇ k'ahˬ pehˇ mahˇ lehˆ-awˇ, jo ̭-ahˇ paˇ jeh pa ̭-euˬ meh. 5K'oeˇ naˇ, k'mˬ maˬ shehˇ byehˇ-ahˇ iˇ cu ̭ shehˆ ahˇ-awˇ, zaˬ lahˇ deuˬ-euˬ aˬ kuiˇ dzui ̭ nehˬ-awˇ, jo ̭-ahˇ pa ̭ taˬ-euˬ paˇ jeh neh shiˆ gui nehˬ-euˬ meh. 6Siˇmoˬ Beˬtuˆluˆ jawˇ gaˇ iˇ keuˆ ngeh, heu lo ̭-ehˇ ehˇ-eu meh. "Sahˬpaˬ-oˇ, nawˇ ngaˬ-euˬ aˬ kuiˇ dzui ̭-eu lehˇ g'eh te loˇ." 7Yeˬsuˇ ehˇ-eu, "Ngaˇ mˇ lu ̭-eu heu nawˇ nymˬ-mˇ maˬ g'oˆ shaw-a siˬ. Ehˇ k'aw ̭, ni shawˇ pehˬ siˬ nya laˇ teh ̭-a." 8Beˬtuˆluˆ ehˇ-eu, "Nawˬ neh ngaˬ-euˬ aˬ kuiˇ tiˬ jawˇ-iˬ maˬ bi dzui ̭." Yeˬsuˇ ehˇ-eu, "Nawˬ-euˬ aˬ kuiˇ ngaˇ maˬ ya dzui ̭ nehˬ naˇ, nawˇ ngaˬ-ahˇ maˬ paˇ ta ̭ nya meh." 9Siˇmoˬ Beˬtuˆluˆ ehˇ-eu, "Sahˬpaˬ-oˇ, toˆ-ehˇ jeˬ maˬ-iˬ, ngaˬ-euˬ aˬ kuiˇ teh ̭-ehˇ maˬ ngeuˇ ni, aˬ la ̭ hawˇ-eu uˬ duˬ jiˇ dzui ̭ nehˬ la ̭-awˬ." 10Yeˬsuˇ ehˇ-eu, "Iˇ cu ̭ dzui ̭ g'aˬ-euˬ tsawˇ haˬ-aˬ, yaw shawˇ miˇ neh, aˬ kuiˇ maˬ ngeuˇ naˇ dzui ̭-eu maˬ paˇ loˬ meh. Naw ma ̭ la ̭ k'oeˇ tiˬ g'aˬ maˬ ngeuˇ naˇ dawˬ tawˆ lu ̭ yaw shawˇ meh." 11Aˬ geu g'aˬ aˬ yaw ̭-ahˇ ahˬ dzaˬ-eu lehˇ g'eh-eu gaˇ kawˆ Yeˬsuˇ siˬ duˬ taˬ-euˬ miˇ neh, "Naw ma ̭ la ̭ k'oeˇ tiˬ g'aˬ maˬ ngeuˇ naˇ dawˬ tawˆ lu ̭ yaw shawˇ meh" lehˇ ehˇ-eu jeˬ pyeu ̭-eu meh. 12Yeˬsuˇ aˬ yaw ̭ ma ̭-ahˇ aˬ kuiˇ dzui ̭ nehˬ jiˇ g'aˬ ngeh, pehˇ k'ahˬ pehˇ mahˇ paˇ dm-awˇ, aˬ yaw ̭-euˬ nuiˇ duˬ-ahˇ hawˬ jawˬ paˇ jawˬ leˇ-awˇ, heu lo ̭-ehˇ ehˇ-eu meh. "Naw ma ̭-ahˇ ngaˬ neh mˇ nehˬ-euˬ heu naw ma ̭ g'oˆ shaw ma loˇ." 13Naw ma ̭ ngaˬ-ahˇ 'Saˬ laˬ-oˇ', 'Sahˬpaˬ-oˇ' lehˇ kuˇ-eu meh. Naw ma ̭ k'oeˇ lo ̭-ehˇ kuˇ-eu tsaˬ meh. Aˬ jeˬ miˇ neh ehˇ naˇ, ngaˇ-aˬ, naw ma ̭ kuˇ-eu lo ̭-ehˇ naw ma ̭-euˬ saˬ laˬ hawˇ-eu Sahˬpaˬ pyeu ̭-eu ma. 14Naw ma ̭-euˬ Sahˬpaˬ hawˇ-eu naw ma ̭-euˬ saˬ laˬ pyeu ̭-eu ngaˇ-aˬ, naw ma ̭-euˬ aˬ kuiˇ dzui ̭ nehˬ g'aˬ-euˬ ma. K'oeˇ miˇ neh, naw ma ̭ k'aw ̭ tiˬ g'aˬ tiˇ g'aˬ aˬ kuiˇ dzui ̭ nehˬ-eu tsaˬ meh. 15Naw ma ̭ ngaˬ-ahˇ dzaw geu ̭-awˇ mˇ nya ni, ngaˇ naw ma ̭-ahˇ mˇ mehˬ nehˬ g'aˬ-euˬ ma. 16Ngaˇ naw ma ̭-ahˇ maˇ jawˆ ni ehˇ nehˬ nyaˇ. Zaˬ k'aˆ-aˬ baw leˬ naˆ maˬ tseˇ maˬ huiˬ dzehˬ-aˇ. Myawˬ k'ehˇ g'oˆ le-euˬ g'aˬ-aˬ, aˬ yaw ̭-ahˇ k'ehˇ g'eh le ̭-euˬ g'aˬ naˆ maˬ tseˇ maˬ huiˬ dzehˬ-aˇ. 17Nymˬ-mˇ, gaˇ kawˆ heu deuˬ naw ma ̭ ya siˬ g'aˬ jiˇ-euˬ meh. Siˬ nya-eu lo ̭-ehˇ mˇ naˇ, naw ma ̭ aˇ naˆ ni guiˬ lahˬ huiˬ-eu nga. 18"Naw ma ̭ dawˬ tawˆ lu ̭ gaˇ kawˆ ngaˇ ehˇ lu ̭-eu maˬ ngeuˇ. Ngaˬ neh tseˇ doˆ-euˬ tsawˇ haˬ deuˬ ngaˇ siˬ nya ma. Ehˇ k'aw ̭, Jaˇli ̭ la ̭ k'oeˇ ehˇ taˬ-euˬ, 'Ngaˬ nehˬ-ehˇ g'awˬ nyoeˇ k'mˬ maˬ ta ̭-eu g'aˬ ngaˬ-ahˇ puiˬ-eu meh' lehˇ ehˇ-eu dawˬ k'oeˇ dawˬ maˬ byah laˇ-ehˇ maˬ g'eh nya-a. 19Aˬ diˇ aˬ maˇ pyeu ̭ laˇ ngeh jawˇ, ngaˬ neh ehˇ-euˬ lo ̭-ehˇ ngaˇ-aˬ ngaˇ law hawˇ nga lehˇ naw ma ̭ siˬ nya ni, maˬ pyeu ̭ laˇ mi naˆ-ehˇ naw ma ̭-ahˇ ehˇ k'mˬ taˬ-eu ma." 20Ngaˇ naw ma ̭-ahˇ maˇ jawˆ ni ehˇ nehˬ nyaˇ. Ngaˬ neh k'ehˇ g'eh-euˬ tsawˇ haˬ-ahˇ k'aˇ ha geu ̭-eu tsawˇ haˬ-aˬ, ngaˬ-ahˇ ha geu ̭ gaˇ duˇ-awˇ, ngaˬ-ahˇ k'aˇ ha geu ̭-eu tsawˇ haˬ-aˬ, ngaˬ-ahˇ k'ehˇ g'eh le ̭-euˬ g'aˬ-ahˇ ha geu ̭ gaˇ duˇ-eu meh." 21Yeˬsuˇ k'oeˇ lo ̭-ehˇ ehˇ g'aˬ ngeh jawˇ, aˬ yaw ̭-euˬ nui ma shaˬ zahˬ mˇ dui dui-eu la ̭ k'oeˇ, heu lo ̭-ehˇ bya cehˆ ni ehˇ doˆ nehˬ-euˬ meh. "Ngaˇ naw ma ̭-ahˇ maˇ jawˆ ni ehˇ-eu ma. Naw ma ̭ la ̭ k'oeˇ tiˬ g'aˬ ngaˬ-ahˇ ahˬ dzaˬ teh ̭-a." 22Zaˬ lahˇ deuˬ tiˬ g'aˬ tiˇ g'aˬ haw haw-ehˇ, aˬ yaw ̭ aˬ suˇ g'aˬ-ahˇ ehˇ maw ̭-eu maˬ siˬ lehˇ zahˬ leˇ-euˬ meh. 23Yeˬsuˇ gaˬ-euˬ zaˬ lahˇ tiˬ g'aˬ Yeˬsuˇ-euˬ dawˬ peh nuiˇ lu ̭-eu meh. 24Siˇmoˬ Beˬtuˆluˆ neh zaˬ lahˇ k'oeˇ g'aˬ-ahˇ la ̭ dzawˇ dzawˇ nehˬ-awˇ, "Aˬ suˇ g'aˬ-ahˇ ehˇ maw ̭ te lehˇ aˬ yaw ̭-ahˇ tiˬ poˆ naˇ haˬ-iˬ sheˇ" lehˇ ehˇ nehˬ-euˬ meh. 25Zaˬ lahˇ k'oeˇ g'aˬ Yeˬsuˇ dawˬ peh jiˆ tuˆ leˇ-awˇ, "Sahˬpaˬ-oˇ, aˬ suˇ g'aˬ-ahˇ ehˇ maw ̭ te" lehˇ naˇ haˬ-euˬ meh. 26Yeˬsuˇ ehˇ-eu, "Ngaˇ kaˬ muˇ yuˇ-awˇ g'awˬ nyoeˇ-ahˇ tahˬ leh ̭-awˇ bi ̭ nehˬ ma. Ngaˬ neh bi ̭ nehˬ-euˬ k'oeˇ g'aˬ-aˬ, ngaˇ ehˇ-eu k'oeˇ g'aˬ meh." K'oeˇ naˇ, aˬ yaw ̭ kaˬ muˇ yuˇ-awˇ g'awˬ nyoeˇ-ahˇ tahˬ leh ̭-awˇ, Siˇmoˬ Iˇsaˬgaˬliˬoˆ-euˬ aˬ li Yuˇdaˆ-ahˇ bi ̭-euˬ meh. 27Kaˬ muˇ k'oeˇ-ahˇ Yuˇdaˆ yuˇ-eu nehˬ-ehˇ, Saˬdaˬ aˬ yaw ̭-euˬ la ̭ k'oeˇ uˇ leˇ-euˬ meh. "Nawˇ mˇ-eu lehˇ g'eh-eu jeˬ-ahˇ yaw kawˇ-ehˇ mˇ-awˬ" lehˇ, aˬ yaw ̭-ahˇ Yeˬsuˇ ehˇ nehˬ-euˬ meh. 28Aˬ jeˬ miˇ neh Yeˬsuˇ aˬ yaw ̭-ahˇ k'oeˇ lo ̭-eh ehˇ nehˬ-eu gaˇ kawˆ, hawˬ jawˬ jawˬ lu ̭-eu tsawˇ haˬ nui deuˬ maˬ siˬ nya-a. 29Yuˇdaˆ-aˬ, pyuˇ pawˬ behˆ tawˬ-eu pyuˇ jeˬ hmˬ-eu g'aˬ pyeu ̭-eu miˇ neh, Yeˬsuˇ aˬ yaw ̭-ahˇ k'ehˇ-awˇ, Bawˬ-iˬ g'eh gaˇ zmˬ-eu jeˬ maˬ ngeuˇ naˇ, shaˬ zaˬ zahˬ zaˬ-ahˇ bi ̭-eu tiˬ jeˬ paˬ bi zeuˇ-iˇ-eu lehˇ ehˇ-eu paˬ lehˇ, zaˬ lahˇ tiˬ paˆ na deuˬ noeˬ-euˬ meh. 30Yuˇdaˆ-aˬ, kaˬ muˇ k'oeˇ jeh ̭ yuˇ-awˇ doˆ-iˇ-euˬ meh. K'oeˇ ngeh, sehˇ g'ahˇ ceh laˇ taˬ-euˬ meh. 31Yuˇdaˆ doˆ-iˇ dzeuˇ ngeh, Yeˬsuˇ heu lo ̭-ehˇ ehˇ-eu meh. "Nymˬ-mˇ poˆ jawˇ-aˬ, Tsawˇhaˬ-euˬ Zaˬmaˇ-euˬ yaw sheh ̭ k'ahˬ sehˇ-ahˇ ya mawˇ teh ̭-a. Zaˬmaˇ-euˬ la ̭ k'oeˇ, Miˬyehˇ-euˬ yaw sheh ̭ k'ahˬ sehˇ-ahˇ ya mawˇ teh ̭-a. 32Tsawˇhaˬ-euˬ Zaˬmaˇ la ̭ k'oeˇ Miˬyehˇ-euˬ yaw sheh ̭ k'ahˬ sehˇ ya mawˇ-eu jeˬ ngeuˇ naˇ, Miˬyehˇ-euˬ la ̭ k'oeˇ Tsawˇhaˬ-euˬ Zaˬmaˇ-euˬ yaw sheh ̭ k'ahˬ sehˇ pah mehˬ le teh ̭-a. Miˬyehˇ yaw kawˇ-ehˇ pah mehˬ le teh ̭-a. 33Ngaˇ gaˬ-eu ngaˬ-euˬ zaˬ deuˬ-oˇ, ngaˇ naw ma ̭ nehˬ-ehˇ g'awˬ myahˇ ni maˬ paˇ ya jawˇ meh. Naw ma ̭ ngaˬ-ahˇ poˆ teh ̭-a. Yuˇdaˆ tsawˇ haˬ aˬ yui ̭ aˬ tsu deuˬ-ahˇ ngaˬ neh ehˇ nehˬ-euˬ dawˬ ngaˇ naw ma ̭-ahˇ paˇ ehˇ nehˬ nyaˇ. 'Ngaˇ le-eu lehˇ g'eh-eu jawˇ duˬ-ahˇ naw ma ̭ maˬ le nya-a.' 34Nymˬ-mˇ ngaˇ naw ma ̭-ahˇ zahˇ dawˬ k'o ̭ dawˬ yaw shui ̭ bi ̭ ya ̭-eu ma. Tiˬ g'aˬ tiˇ g'aˬ gaˬ-awˬ. Ngaˇ naw ma ̭-ahˇ gaˬ gaˇ duˇ ni, naw ma ̭ tiˬ g'aˬ tiˇ g'aˬ ya gaˬ meh. 35Naw ma ̭ tiˬ g'aˬ tiˇ g'aˬ gaˬ-eu jeˬ ahˇ naˇ, naw ma ̭ ngaˬ-euˬ zaˬ lahˇ ngaˇ lehˇ tsawˇ haˬ dawˬ tawˆ lu ̭ siˬ nya teh ̭-a." 36Siˇmoˬ Beˬtuˆluˆ ehˇ-eu, "Sahˬpaˬ-oˇ nawˇ aˬ gaˇ le-eu lehˇ g'eh te." Yeˬsuˇ ehˇ-eu, "Ngaˇ le-eu lehˇ g'eh gaˇ nawˇ nymˬ-mˇ mi naˆ-ehˇ maˬ caw teh laˇ nya-a siˬ. Ehˇ k'aw ̭, aˬ kaˇ caw teh laˇ nya teh ̭-a." 37Beˬtuˆluˆ ehˇ-eu, "Sahˬpaˬ-oˇ, aˬ jeˬ miˇ neh ngaˇ nawˬ-euˬ mehˬ nah nymˬ-mˇ mi naˆ-ehˇ maˬ caw teh laˇ nya ta. Ngaˇ nawˬ-euˬ g'aˇ duˬ shiˇ dah peuˬ ma." 38Yeˬsuˇ ehˇ-eu, "Nawˇ ngaˬ-euˬ g'aˇ duˬ aˬ diˇ aˬ maˇ shiˇ dah peuˬ ma loˇ. Ngaˇ nawˬ-ahˇ maˇ jawˆ ni ehˇ-eu ma. Ya poeˇ maˬ doeˇ laˇ mi naˆ-ehˇ, ngaˬ-ahˇ maˬ siˬ lehˇ smˬ poˆ keuˆ ni nawˇ pyehˇ teh ̭-a."

will be added

X\